KTP Aizawl Central Presbytery Meet

[ 28 April, 2009 | 13 comments ]

KTP Aizawl Central Presbytery Meet chu a vawikhatna atan Dawrpui Pastor Bial KTP-in Dawrpui Kohhran Biak Inah 25 & 26th khan a thleng a. Presbytery huam chhunga KTP member-ten an hlut hle niin a hriat a. Biak in chhunga lenglo inkhawm an awm reng a, Biak in chhunga lenglo tan hmun 2-ah projector buatsaih a ni a. LPS Vision ten Live telecast an pe chhuak reng bawk a ni.
Inkhawm tinah hian Kohhran zaipawl 4 awm ziahin thlarau lam thupui ngaihthlak thin ani a. Tin, Birth Control chungchang thusawi tawi ngaihthlak ani bawk.
Pathianni chawhma inkhawm banah leh zan inkhawm banahte ‘Fellowship Programme’ neih a ni a. Pathianni chawhnu inkhawm chu ‘Fakna Inkhawm’ programme-a hman a ni bawk a, hetah pawh hian zaipawl 4 bakah special item tha tak tak ngaihthlak thin a ni.

Meet Bulletin chhiar duh tan Hetah click rawh

Palaiten zawngchhangthlak hlein an hria a, KTP Gen. Conf. neih loh kuma Presbytery Level (huap)-a KTP Intawhkhawm (Conf.) neih hi thil tha tak leh sawt tak a nih a rinawm a, hruaitu chherna tha tak a ni bawk ang.

Aizawl Central Presbytery huam chhungah hian Bial 4 awmin Branch 16 a awm a, member 7684 an awm bawk a ni :
1] Dawrpui Bial - (i) Dawrpui (ii) Saron (iii) Zarkawt
2] Armed Veng Bial - (i) Armed Veng (ii) Armed Veng S(iii) Chite (iv)Armed Veng N
3] Electric Veng Bial - (i) Electric (ii) Ramthar (iii) Aizawl Venglai (iv) Ramthar N
(v) Electric Vengthlang
4] Chhinga Veng Bial - (i) Chhinga Veng (ii) Chhinga Vengthlang
(iii) Chhinga Veng East (iv) Tuithiang


2008 chhung khan Aizawl Central Presbytery-ah hian KTP Inkhawm percentage chu 21.43% ani a, Biak in hawnga inneih 99 an awm laiin hmun danga Inneih erawh chu 116 an ni. Member thi 6 an awm bawk a. Branch hrang hrang Missionary chawm belhkhawm chu 115 ani a, Bial-in 10 a chawm bawk a ni. He Presbytery atang hian KTP member Missionary-a chhuak 51 an awm a, Bial sum thawhchhuah belhkhawm chu Rs. 5,69,713/- a ni.


Thlalak tam zawk enduh tan HETAH CLICK rawh

DAWRPUI VENG LO INTAN DAN

[ 19 April, 2009 | 14 comments ]

Dawrpui veng hi a hming ang mai hian, Dawrkai hmunpui leh chawhmeh zawrhna hmunpui (New Market) awmna a ni. Aizawl khawpuia veng laili tak a ni. Aizawl khawpui tia kan han hriat tak lo intanna hmun chu tuna Dawrpui Veng hi a ni. Mizorama Tan In (Jail) hmasaber awmna hmun a ni a, Lamsuaka leh Chala an khaihlumna hmun a ni bawk .

Aizawl Fort dinna Veng : British hovin Mizoram awp an tum a, Kulh an siam hmasakber, Aizawl Fort dinna Veng a ni. Dawrpui Veng hi Aizawl khawpui lo intandan a ni nghal a, tun hmain he Aizawl tlangah hian an lo awm tawh thin a, kum 1835 vellai khan Lal Savung’an a lo thut tawh a, kum 1957 vel lai khan Thanrum’an khua a lo siam tawh bawk a, mahse, Tanhril lamah a chhuksan leh nghal a. Heng hunlai pawh hian Aizawl tih hming hi an lo vuah tawh awma ani. Mahse, an pemchhuahsan leh thin avangin Aizawl khua tiha sawi tur a awm lo.

Aizawl Fort : Dawrpui Veng hi Aizawl Fort lo din tak atang leh Bawrhsap lo awm taka lo intan a ni. Sawrkar mi leh an chekkawite leh Sipaite awmna a nih avangin Civil mi an tlem a, Sawrkar Veng ruihin an lo ngai thin a ni. Zawi zawin Civil mi an lo pung ve zel a, Bawrhsapin Bazar hmun atana a han siam takah khan an lo pung chho ta em em a ni.

AR :Kum 1890 khan tuna Assam Rifle hmunah hian Sipaite chuan Buk an sa a, an awm tan ta a, February ni 15 chuan Aizawl Fort sakna tur chu tihngheh a niin, ni 25 an sa tan ta a, Aizawl Fort hmun tak chu Baza Tlang kan tih, AR Ground chung, Gate pui Hmar lam tlang pawng hi a ni. Heta tang hian Dawrpui Veng, Sumdawnna hmunpui leh kan Aizawl khawpui hi a lo intan chho ta a ni.

Dawrpui tih hming lo put chhoh dan : Dawrpui tih hming a lo put chhoh takna hi chu 1910 Bazar neih kum hnu lam atang khan a ni. Dawrkai awmna hmun thil zawrhna leh hralhna hmun anih avangin Vai hovin Bara Bazar an ti thin a, Mizo tawngin Dawrpui kan lo ti chho ta zel a ni.

Hun hmasa a dawrpui Veng hrang hmingte : Tuna Dawrpui Veng hian, Lal ban hma leh VC neih hma chuan heng Dawrpui Vengthar, Zarkawt, Chanmari, Chhinga Veng, Saron Veng, Tuikual Veng, Dinthar Veng etc.. te hi a huam vek thin a. Mizoramah Lal ban a lo nih atang khan, Village Council neiin Veng hrang hrang ah an lo inhlawm hrang ta a ni.

Dawrpui Veng chhunga veng hming hrang hrang lo intan dan :
1. Bungkawn : Indopui vellai khan Pu R. Buchhawnan Bung a phun a, vawiin thleng hian ala awm a, Dawrpui Bungkawn (Bazar Bungkawn) kan lo ti hlen ta a ni. Tunah hian Sawrkar in Bungkawn atanga Chhim lama kawngpui phei zel hi Nehru Road tiin a vuah ta a ni.
2. Zaiawn (Zion) street : Pu Thangruaia fanu Manpuii, Nula Zaithiam leh ngaihnobei tak a awm a, helai vengah hian an zai ho reng reng thin a. An zai lo hre thin Pu Liana chuan, “He lai Veng hi zaiawn veng anih hi” a ti thin a. Hun a lo kal zel a, Zaiawn Veng (Zion Street) an lo ti ta a ni.
3. Jail Veng : Jail hmasaber awmna a ni a, Ran Tan In (Jail) awmna hmasaber Veng a ni bawk a, chu vangin Jail Veng tih a lo ni ta reng a ni.
4. Pi Pu Tlang : Tuna Hospital quarter tlang, Dr. Biakkimate awmna bawr hi a ni a tunah chuan Hospital Quarter Veng ani ta ber a ni.
5. Canteen Kual : 1st Assam Rifle Canteen awmna Veng anih avangin Canteen Kual tih a lo ni ta a ni.
6. New Market : Bazar pui awmna Veng hi Bazar hmun atana 1965-ah tih thar anih avangin, henglai bawr vel hi New Market Veng anga sawi a ni ta ani.
7. Dawrpui West : 1989 khan, YMA in Dawrpui Veng tlak lam Bungkawn leh Hospital liam hi Dawrpui West tiin a vuah ta a ni.
8. Church Square : Kum 2000 khan Dawrpui Presbyterian Kohhran chuan hming phuahin Dawrpui Pastor quarter atanga Dawrpui School thleng hi Church Square tiin an vuah.

Central YMA Sport

| 4 comments ]

Central YMA-in a buatsaih Branch hrang hrangte inelna chu tluang taka kalpui zel a ni a, April 14, 2009 (Thawhtanni) khan kan Branch leh Chaltlang Branch-te chuan Durtlang Field-ah Cricket Second Round an khel a, Toast-ah kan Branch chakin vuak hmasak an thlang a, kan Branch chuan over 20-ah run 137 an vaw chhuak thei a, Lalhmangaiha (Amatea) chu a tawp thleng damin run 101 lai a vawk chhuak a ni, a team mate-te hian an bat reipui hlei thei lova, a ni lo hi chu run siam hnem an awm lo. Chaltlang lamin bat ve lehin, rin aiin run an siam chak a, kan Branch lam hian mi 5 vawm hlum hmanin Wicket 5 in kan chak zo ta lo a ni. Kum dang angin Practice-na hun kan nei lo chu kan tuar ta deuh niin a lang. Kan Players te hi an chhe hauh lova, Tournament a awm dawn tih kan hriat hian kar khat chauh Practice-na hun a awm tawh a, heti chung hian kan naute hian an khel chhe lo hle. Hmalam hunah beiseina sang tak kan nei a, inthlahdah lova tang sauh sauh turin kan duhsak.

Athletics lamah pawh heng- 100 Metre Race (Women), Long Jump (Men), Jevelin throw (Men) ah te kan tel bawk a, vanduaithlak takin 100 Metre Race (Men) ah tel kan tum viau laiin engemaw harsatna avangin kan tel thei ta lova, pawi kan ti hle. 100 Metre hmeichhia-ah Lalhmangaihtluangi chuan Semi Final a thleng a, final erawh a thleng zo ta lo. Tin, Monty Malsawmzuali chuan Final thlengin nimin khan Final chu an tlan leh a, a pumpuiah 5-na a ni. Kan branch aiawh a Long Jump a zuang PC Rozamliana chu 6-na a ni bawk.

Hmeichhe Volleyball-ah kan la dam a, First Round chu April 14, 2009 (Thawhtanni) zing khan khelh tura ruahman a ni a, amaherawhchu kan nulate khelh tur Tuikual North nulate an lo lan tak loh avangin Walk Over-in chaka puan kan ni. April 22, 2009 (Nilaini) zing dar 10:00 hian Electric veng Branch nen Second Round, Zarkawt Basketball Court-ah an khel dawn a, veng mipuite a tam thei ang ber tawiawm turin kan inngen e.

Central YMA Tournament neih zawh tun thla tawp lam hian Branch Sport pawh neih tum a ni a, hemi chungchang hi Sport Sub-Committee ten an la rel fel dawn a ni. Kumin hian Sport Item pawh a chikim thei ang bera neih tum a ni a, Section tinte lo inpuahchah tura hriattir kan ni e.

Tualchhung News (19 April, 2009)

| 8 comments ]

Naute thar : Pu Lalramchhana (RC-A) leh Pi Vannunneihi te chuan fanu thar duhawm tak neiin a hmingah Lalremruati tih an sa ani.
* Pu Lalchhuanawma, Medical Qtr.-te chuan an fa pathumna atan Fanu duhawm tak an nei.

Damlo : Lalrinkima Pachuau S/o Ziakkima Pachuau Taitesena Section chu April 11, 2009 (Inrinni) khan thawkna dawt vung avangin Civil Hospital-ah Admit a ni a, tunkar Thawhlehni khan dam takin a lo chhuak a, In lamah enkawl mek a ni.
* Pi Parmawii M/o Vanlalhriati (Te-i) chu April 13, 2009 (Thawhtanni) khan Care Hospital-ah Admit a ni a, a ni pawh dam takin a lo chhuak leh ta bawk.

Bungraw thar : Chhiat ni that ni a kan mamawh em em leh kan indaih loh thin Tea tray leh Ketli thar engemawzat Branch YMA chuan a lei thar.

Joint Meeting : April 17, 2009 (Zirtawpni) khan Branch YMA Office Bearer, VC Member-te leh Aizawl SP-te chuan New Market-ah Joint Meeting an nei a, Veng tana thil pawimawh tak tak an sawiho.

Presbytery Meet : KTP Aizawl Central Presbytery Meet Vawi 1-na chu Dawrpui Bial KTP-in Dawrpui Kohhran Biak inah 25 & 26 April, 2009 hian a thleng dawn a. He Presbytery-ah hian Dawrpui, Armed Veng, Electric leh Chhinga Veng Bialte a awm a, chumi chhungah chuan Branch 16 a awm ani.

Misual Police hmaa inpuangte hi engtin nge court-ah thiam an chan theih?

| 3 comments ]

Chhanna : Police hmaa misual an in puanna hi evidence(fiahna) a ngaih a ni lo (Vide sec 25 of Indian evidence act). Judicial Magistrate 1st class hmaa an inpuanna chauh hi evidence tling a ni a, chu chu confessional statement an ti. Mizoramah chuan separation of judiciary kan neih loh avangin Guwahati High Court chuan State of Mizoram vrs Lalrinawma 2000 (1) GLT 616 hmangin Executive Magistrate 1st class-in inpuanna achhinchhiah (confessional statement record) chu a pawmpui a ni.

Mizorama kan tihsual ziah thin chu 2nd class Magistrate-te confessional statement kan rocord tir thin hi a ni. 2nd Class Magistrate in confessional statement-a record dawn chuan sawrkar in special power a pe tur a ni (vide Nika Ram vrs state of H.P.(1972) 2SCC80). Special power sawrkar in a pe lo a nih chuan Supreme Court-in confessional statement record a kha evidence-ah a ngai lo. Tichuan Cr.P.C.sec.164 hmangin Magistrate chuan misuala puh, a inpuanna chu a record anga, chu chu evidence-ah hman theih a ni.

Criminal Court-ah chuan Police hmaa mi an inpuan in emaw case i/o khan evidence nei tha tawk a a inhriat chuan chargesheet court ah a thehlut a, court chuan thubuai ngaihtuah (trial) tlak a ni em tih a lo rel hmasa ber thin. Chutianga thubuai ngaihtuah (trial) tlak a ni e tih nan chuan misual-a puh police hmaa a inpuanna kha an hmang thin. Tichuan a thubuai kha ngaihtuah tlak a ni e tih nan an hmang a, thubuai ngaihtuahnaah chuan Police hmaa a lo inpuan tawhna hi a hmantlak loh a nih chu.
(India Constitution ah hian ‘Freedom of speech’ kan nei a ‘Freedom after speech’ erawh kan nei lo)

Thin (Liver)

[ 18 April, 2009 | 4 comments ]

Thin (Liver) hi kan taksaah chuan a pawimawh berte zinga mi a ni, thluak leh thin hi an that loh a hlauhawm em em a ni. Kan thil ei ka-a lut kan lem reng reng hi thin hian a lo thet darh a, a hmanna tur awm thei ang chi chu an thawn chhuak zar zar thin. Zu i lo in a nih chuan taksa tana pawilo thei ang ber turin an chan darh a, a chemical chain kha an siam danglam vek a, a tawpah chuan mihring tana hlauhawm lo thei ang berin Ethyl Alcohol-ah a siam a, thisenah a kual vel ta thin a ni.

Mit (Eye) chhung tuia a luh hian a chhuak ve leh zung zung thei lova, chuvangin zu in reng reng chu an mit a vai hmasa ber thin. Thisenah hi chuan darkar 8 vel bak an awm lova, zunah hian darkar 24 lai an chambang thei a, mitmu tuiah phei chuan darkar 48 lai Alcohol hi a awm thei a ni.

Chutiang tho chuan kan ei leh in zawng zawng hi a thetdarh a, Vitamin, Minerals, Protein, Fats, Carbohydrate leh thil dang dang taksa mamawh chi reng reng thliar hrangtu a ni. Duat em em a ngai a, thin hian ngeih loh deuh deuh a nei a, Zu te, damdawi chi hrang hrang, a mawl zawngin nachhawkna hote hi rei tak ei chuan a chhiatpui ve a. Chuvangin kan thluak tih lohah chuan nunna hnar ber a ni. Zu, zuk leh hmuam, sahdah leh khaini te hian a Cell an tichhe hma bik a, heng ho hi tih loh a tha.

MP ELECTION ZAWH FEL A NI

[ 17 April, 2009 | 2 comments ]

Vawiin April ni 16 khan Mizoram tiam in State 15 leh Union territory 2-ah Lok sabha seat 124 atan vote thlak a ni a, Mizoramah pawh inthlan Vote thlak hi buaina leh harsatna awm lovin tluang taka neih a ni. Inthlan vote thlakna atan hian EVM hman a ni a, Mizoram E roll a chuang Bru-te erawh chuan Pastal Ballot an hmang thung a ni.

MP thlangtura Mipui thawk chhuak hi veng hrang hrangah an tlem hle a, Vote tla percentage pawh a tlem tlang pui ani. Dawrpui I-ah hian vote 1037 a awm a, vote tla zat chu 554 ani a, II-ah vote 1110 a awm bawk a, vote tla zat chu 487 a ni. Dawrpuia vote tla percentage chu 48.46% chauh a ni bawk.

Mizoramah hian MP thlan hi kum 1972 atang khan neih tan a ni a -
1972 khan Pu sangliana Mizo Union chu thlantlin a ni a,
1977 & 1980 - Dr R.Rothuama (PC)
1984 - Pu Lalduhawma (INC) chuhtu awm lova thlantlin
1989, 1991 & 1996 - Dr. C.Silvera (INC)
1998 - Dr H.Lallungmuana
1999 - Pu Vanlalzawma (MNF)

Dawrpui Veng Ramri Huam Chin

[ 11 April, 2009 | 13 comments ]

Kan veng VC ramri huam chin, Mizoram Gazetted Vol. XXIII Aizawl, Friday, 29.4.1994 in a chhuah angin heng a hnuaia mite hi Gazetted a in ziah lan dan a ni.

HRIATTIRNA

No.LAD/VC-11/90-AZl/139, the 29th April,1994. Lushai Hills District (Village Council) Act, 1953 Section 3 (6) angin, Aizawl District huam chhunga Village Council thenkhatte chu Annexure a tarlan ang hian Mizoram Governor chuan thu leh awm hma atan siamthatna thupek a chhuah a ni.
Hei hian a hma lama heng khaw ramri tura lo puan tawhte chu a luahlan (Supercede) a ni.
DAWRPUI VILLAGE COUNCIL BOUNDARY
New Market sa zawrhna sir Power House Compound sira Pu Vanthuama in huamin Khawthlang hawiin Sakawrpului zawh chhovin Biaksangi w/o Thanchunga (L) leh Pu V.Lalliana In huam telin a zawh chho va. Dawrpui Presbyterian Biak In sir hmar lam zawh chhovin Zarkawt panna kawngpui (Main Road) a man chho va, Pu Lalawia (L) Building sir step huam chhovin PWD panna kawngpui tan chhovin R.M Hall (S.A), Dr Doliana In, Pu C.Lalthianghlima In, Pu Liantuala In huamin chhim zawngin a zawh phei zel a, ramri pangngai thin kawrte a man a. Khawthlang hawia kawr chu zawhin PWD kawng a tan tlanga, Sairang kawngpui a pawh a. Pu R. Tlangliana In, Dinthar veng bulah kawngpui chu a pawh a ni.

Tichuan, chhim lam hawiin PWD kawngpui zelah a kal a, Zodin Cinema Hall bul kawrte a zawh chho va, Solomon’s Cave pan thlakna kawngpui tanin Traffic Point sir chhim lamah a lo chhuak a, chuta tangin chhim lam hawiin Main road a zawh a, Dak Inpui hmar lam sirah Venghlui ramri suin, Ist A.R Family lane panna kawng a zawh thla a, Ist A.R Family lane kawmchhak ko zelah hmar zawngin a phei zel a, Quarter guard thlang kawr kanin Ist A.R school kawmchhakah pheiin, Ist A.R choka leh A.R Doctor quarter huamin a kal zela, Modern English School leh Pi Rokhami In inkarah tlang pheiin Pu Vandailova kawmchhaka kawngpuiah chhovin Electric veng panna chu New Market hawiin a zawh thla a.

Pu R.Lalhuzauva In leh Chhinga Veng Middle School leh New Market inrina zawh pheiin (New Market leh Lalthanzauva Building huam vekin ) ramri in tanna chiah kha a man leh a ni

Class XII Pass Tharte

| 0 comments ]

TAITESENA SECTION
1. Vanlalruati d/o Laltinchhawna, III Div
2. Lalremruati Ralte d/o Kapthianga Ralte, III Div
3. Benjamin Zalawma s/o Kapthianga I Div
4. K.Hmingthansangi d/o Dr K.Lalbiakzuala II Div
5. Freddy Lalruatdika s/o Romuana III Div
6. Laldintluanga s/o V. Lalrema I Div
7. Larry Lalrinsanga s/o F. Lalrinliana III Div

CHAWNGBAWLA SECTION
1. Sarah Rinkimi d/o James B.Ralte, I Div
2. Lalrinchhana s/o Major R Lalbiakliana III Div

VANAPA SECTION
1. Hmingthantluanga s/o Lalfakzuala III Div
2. Hmingthansanga s/o Lalfakzuala II Div
3. Nicky Lalrinawma d/o Lalrintluanga, I Div
4. Lalbiakliani d/o Sakhawliana, II Div.

(Tuna kan hriat theih chinte an ni a, hmaih palh erawh chu kan la tarlang zel dawn nia)

Tualchhung News (11 April, 2009)

| 0 comments ]

Damlo : Pu Rosangliana (Masanga) chu damlohna avangin in lamah a in enkawl mek.
* Pu C. Lalbuanga chu Care Hospital-ah enkawl mek a ni.
* Pi Vannunneihi w/o Lalramchhana (RCA) chu Civil Hospital-ah enkawl mek a ni
* Pi Thanzingi Dawrpui South damlohna avangin in lamah enkawl mek a ni
* Pu R. Kapthianga, Branch YMA Executive Committee Member Jail Veng T Section chu damlohna avangin In lamah enkawl mek a ni bawk.

CCC Meeting : 8 April (Nilaini) khan Central YMA Office-ah CCC Meeting neih a ni a, hetah hian kan Branch aiawhin Branch Finance Secretary Pu Lalrammuana a tel.

YMA Conference : Ni 20 - 22 October 2009 hian Darlawn-ah YMA General Conference ropui taka neih a ni dawn.

Census : Veng chhung In tinah Section hruaituten Village Census an rawn nei dawn a, Veng mipuite kan in hriattir a ni e.

Pem lehkha : Pem lehkha la tur reng reng chuan mahni awmna Section hruaitute hnen atangin hriatpuina lehkha lak hmasak phawt tur a ni. Branch Secretary hnenah Section hriatpuina lehkha bakah Voters ID Card leh a form man (Rs. 5) kengin Pem lehkha an lachhuak thei ang.

Central YMA Sport

| 2 comments ]

Central YMA buatsaih Mizoram pum huap YMA Branch hrang hrangte intihsiakna chu neih mek zel a ni a, kan branch pawh hetah hian Item engemawzatah tel vein, inbuatsaih mek a ni.
April 8, 2009 khan kan Branch leh Tuithiang Branch te chuan Cricket Durtlang Field-ah an khel a, Tuithiang lam hi Toast-ah chakin Bat hmasak an thlang a, Over 20-ah Run 115 an vaw chhuak thei a, kan Branch lam atangin Sangngaihthanga chuan Over 4 vawmin run 12 chiah a pe a, mi 4 a vawm hlum bawk, ropui tak a ni. Kan veng vuak hun a thleng ve ta, Tuithiang run siam hi um chho ve lehin over 16 lekah mi pahnih chiah chanin an khum chho thei ta mai a, tichuan wicket 7 in kan chak ta a ni. Kan Branch atang hian PC Lalrinchhana chuan run 43 lai a vaw chhuak bawk. April 14 Thawhlehni hian Ramhlun Sports Complex-ah Chaltlang Branch nen 2nd Round kan khel leh dawn, veng mipuite atam thei ang ber en turin kan insawm e.
April 14, Thawhlehni hian Zarkawt Recreation Centre-ah Hmeichhe Volleyball Tournament hawnna neih a ni ang a, kan veng nula te khelh hun tur erawh chu kan hre hman ta lo. He mi ni vek hian athletic item hrang hrang Ramhlun Sports Complex-ah neih a ni bawk ang.

Antibiotics

| 5 comments ]

- Dr. Thangchungnunga, MBBS (Ortho)
Kan tawng anga kan hman tawh, Antibiotics tih hi hriat chian a tul hle mai. Latin tawng a ni a, ‘Anti’ tih chu 'Against (Do/Sual)' tihna a ni a, ‘Biotics’ tih chu 'thil nung chi hrang hrang' tihna a ni ber. A vaia lakkhawmin, tuna kan hman danah chuan natna hrik tihlumtu Damdawi tihna a ni ber ang chu.

A mawl zawngin sawi ta ila, tupawhin na a lo neihin emaw, a khua a sik a nih chuan natna hrik vang tihna a ni. Mizoramah chuan Malaria leh natna hrik hi an ni mai a. Malaria chuan Quinin te, Chloroquin te, chi thar dang dang a ngai a. A bak khawsik ho hi Chuap, Hrawk, Ril, Zunkawng, Thin leh a dang dang vang pawh lo ni se, natna hrik vanga na a ni a, khawsik a tel chuan natna hrik a tel tihna a ni a, Antibiotics ei tel ngei a ngai tihna a ni.

Khuh leh hritlang satliahah chuan Antibiotics ei a ngai lem lo. A lar zual chu Penicillin, Ampicillin, Tetracycline, Chloramphenical, Enteroquinol, MB No.3, Septicare, Amoxicillin leh a dang tam tak a awm. Mi thenkhat hian Doctor chawh lem loh ei mai an ching a, chuvangin a hmanna hriat ve a tha tlangpui a, Side Effect a neih avangin ni 3 atanga ni 5 chhung bak ei loh a tha. Khua a sik a, Paracetamol, Brufen ei ringawt hi thil tha a ni ber lo. Khawsik siamtu kha tih hlum tur a ni zawk.

Sanitation Department nen meeting nei

| 0 comments ]

March ni 7 (Thawhlehni) chawhnu dar 1:00 khan Senior Sanitation Office Tuikhuahtlangah VC, YMA, MHIP te leh Pu B.Vanhlira Senior Sanitation Officer UD&PA te nen Joint Meeting neih a ni a, hetah hian kan vengchhunga ‘Mobile Garbage Trailer’ chungchangah dah zel nge tha/ tha lo, Motor a khawn thin a tha zawk nge tha lo zawk tih chungchang leh faina chungchang hrim hrimah engtinnge hma kan lak ho anga a sawt zawka tan ho dan tur a awm em tih chungchang leh tul dang te sawiin meeting an nei a. Hetah hian rawtna hrang hrangte sawi a niin kan veng bikah chuan hun remchang hmasa berah Department hotu lamte rawn kalin Mobile Garbage Trailer dah belhna turte rawn en bakah thil tul hrang hrangte sawi ho turin thu an dah

Dawrpui Branch Muslim Welfare Society

| 6 comments ]

Ni 11th April (Zirtawpni) chawhnu dar 4:00 khan Pu Lalnunpuia In New Market ah VC, YMA O.B te leh Dawrpui Muslim Welfare Society-te chuan in hmelhriatna tha zawk leh thawhhona tha zawk neih theihna turin inkawmhona neih pahin chawhlui an kilho.

Dawrpui Bial Inkhawmpui Vawi 84-na

| 11 comments ]

Dawrpui Bial Inkhawmpui Vawi 84-na chu Dawrpui Kohhranah April ni 3 - 5 khan nghah a ni a. Thupuiah 'Simna' (Luka 3:8) hman a ni.

Khawmpui Puipate :
Chairman : Upa Dr. R. Lalzauva
Secretaries : Upa C. Chhawnzauva & Upa R. Zodingliana
Treasurer : Upa Dr. C. Zarzoliana

Rorelah agenda 12 awm zinga khawmpuiin a passed te:-

GENERAL
1] “Inkhawmpui laiin Pandal-ah Lalpa Zanriah Sacrament buatsaih tawh loh nise”
2] “ Bial huap rawngbawltu Senimar neih ni rawh se”
3]
“Salem Boarding School-ah High School (H.S.L.C.) hawn ni rawh se”

4]
“Para Church-a rawngbawltute inhnamhnawih dan tur kaihhruaina kan neih hi khauh zawka lekkawh ni rawh se”
5]
“Pastor thlah/Induction hi Bial chhung Kohhran ten Biak In dang khara hmun khata hman ni se”

6]
“Inkawp lo chi inkawp (homosexual & lesbian) te chungchangah Synod-in tun aia chak zawkin hma la rawh se”
7]
“Synod Multipurpose Training Centre (SMTC) vocational training a, Puan thui leh Computer seat tihpun ti rawh se”

8]
“Probationary Pastor lak danah diltu awmna Presbytery Bial leh Kohhran ngaihdan lak ve thin ni rawh se”
9]
Kohhran Commitee Member (Tual Upa) 4 (Pali) Saron Veng Kohhranin an dil chu an dil ang in remtih a ni.


INTHLAN / INRUATNA
1. Kum 2010 Dawrpui Bial Inkhawmpui nomination committee members :
i) Upa Rokamlova, Dawrpui
ii) Rev. Rualkhuma, Saron Veng
iii) Upa Lalengmawia, Saron Veng
iv) Upa Zionpara, Zarkawt
v) Upa Lalthanzama, Zarkawt

2. Kum 2009 - ‘10 Bial Standing Committee members :
i) Upa Rokamlova, Dawrpui
ii) Upa R. Englaia, Dawrpui
iii) Upa Zosangzuala, Dawrpui
iv) Upa Malsawma, Saron Veng
v) Upa Lalengmawia, Saron Veng
vi) Upa P.H. Rualzakhuma, Saron Veng
vii) Rev. Challianngura, Zarkawt
viii) Upa Dr. Lalrimawia, Zarkawt
ix) Upa Zamliana, Zarkawt

3. Kum 2009 - ‘10 Bial Standing Bial Sunday School Comm. members :
i) Upa Lalbiaktluanga, Dawrpui
ii) Rev. H. Zalawma, Dawrpui
iii) Upa S. Pahlira, Saron Veng
iv) Upa Lalchawimawia, Saron Veng
v) Rev. C. Ronghinga, Zarkawt
vi) Upa Vanlalhruaia, Zarkawt

4. Kum 2009 - ‘20 Aizawl Central Presbytery Standing Comm. members :
i) Upa Lalbiaktluanga, Dawrpui
ii) Upa Malsawma, Saron Veng
iii) Upa Rohnuna, Saron Veng
iv) Upa Prof. Lalkima, Zarkawt
v) Upa Lalzamliana, Zarkawt

MIZO NUN ZEMAWI CHHAWM NUN ZEL !

[ 04 April, 2009 | 0 comments ]

- Vivita Pa
Mizo nun zemawi chhawm nun zel kawngah tunlai hian Mizo ten tanlak tharna tur kan ngah hle a. Zoram pum huap chuan kan sawi ngam lovang a. A bikin kan khawtlang bik - Dawrpui mipuiten he thu hi ngun zawkin lo zir tlang ila, chhung inkhawmah i zirho teh ang u. A pawimawh a, a hlu a, a tangkai a ni. He kan Mizo Nun chhawm nun kawnga tun ang renga kal kal emaw tun aia kan chhia a nih vaih chuan a zak leh hrehawm ti turte chu Keimahni tho kan ni si a.

Mitthi : Hmanlai Mizo nunah chuan khawtlangah Mitthi an awm chuan a hre hmasa a piang nu leh pa, thalai Mitthi in lamah an tlankhawm nghal a, tih tur tul ang ang - thutthleng put khawm, in singsak etc. an buaipui nghal a, ram kal an awm chuan a ko turin Zualko an tlan nghal a, a thih hun a zirin khaw thenawmah Zualko an tlan nghal thin bawk. Tin, Feh khama Mitthi an awmin tumah ramchhuak an awm ngailo mai nilo in, dawr hial pawh an khar vek thin. Zualko hi khaw thenawm hnaivaiah an in tir thin a, tlangval tlawmngai tlaivar te khawvar rual velin an chhuak thin.

Kan tunlai khawvelah hian a chunga kan sawi nilo ang chiah hian kan kal ta mai em ni aw? tih turin kan awm ta. Khua alo lian a, mitin kan buai ta em em theuh a, kan khawtlangah Mitthi an awmin Mike-a tlangau a inhriattir thin a ni a. Eng hunah pawh mitthi an awmin tlangau a inhriattir thin a ni a. Amaherawhchu, mitthi puana a hmuna kan kal nghal mai lo hian ngaihtuah a ti thui ta hle. zan laklawh muttui laia tlangau chu hriat loh palh awm thei a ni a. A hria pawh kal tum chuang lo, a hrelo pawh kal chuang lo, tih tur alo tam viau bawk si a, Mizo Nun Zemawi a ngaihawm vang vang thin hle a ni.

Tin, hmanlai angin Zualko tlan a ngai tawh lo tluk a ni a, telephone leh TV lamah awlsam te in kan ti ta mai a, a nihhlawhthlak em em rualin min tithatchhe ta em ni? a tih theih. Thutthleng putkhawm takngial pawh kan peih ta lo a, a dah fel leh thlengin thalaite kan thatchhe ta lutuk hi a pawi a ni. Motor a awm a, kan phurkhawm zung zung a, a awmlsam ngei mai. Mahse kan sawi tak ang khan Mitthi an awm a, thut mai theihin inchhung peihfel a ni tawh a. Thutna tur a awm tlat lo, tlangval rual 4/5 in an put a, thut theih mai tur motor kan nghak a, alo remchang mai lova, mipui an hawihai ta thin a ni. Vengdanga an chhungte an alo awm ve ngei a, Dawrpui min hmuh dan tur chu sawingam pawh a ni lo.

Thalaite In Pawimawh : Ka rilrua awm zawng zawng hi sawichhuah thiam ka chak a, chhungkaw tin ngaimawh tur leh an tihhlawhtlin nghal thei nan ziak thiam ka chak, ka tlin silo... Ka thalai puite u, a chunga hmanlai nun ka hriat tlemte ka ziak leh kan tunlai nun ka ziak khi in peih loh pawn lo chhiar chhuak hram hram teh u. Mizo kan la ni zel dawn, khawtlangah chhiattawk (mitthi) an la awm zel dawn, kan inbuaipui lothei bawk silo. Tumah mahni in chhiat kan tawk thei lo. Mi chhungkaw chhiat tawh a i awm dan ang khan in chhiattawh ve hunah mite awm ve ta se, mittui hul khawpin i hlim thei ang em? I thei hauh lovang. Chuvangin, tho la ding ta che, Mizo i nihna nun zemawi, hmanlai atanga Mizo nih ti nuamtu kha rawn chhunzawm rawh le. Nula Tlangval mitthi ina kal ngailo i nih chuan ngaihzawng nei suh, nupui pasal nei suh, a zahthlak (ka sawi na lutuk em?)

Chuvangin, kan vengah mitthi an awmin eng hunah pawh nise, tupawh ni rawh se, mitthi kha YMA VIP a nih kha. I hriat rual rualin mitthi in pan nghal la, tih tur awm ang angte buaipui nghal char char mai rawh. Chu chu a YMA a, a Mizo Nun Zemawi a, Mizo diktak nihna a ni.

Nu leh Pate Ka sawm e : Kan nu leh pa zahawm tak tak te u, in fate hi kan tling tawk lo, mahse zirtirna tha min pe ula, kan lo peih lo deuh a nih pawhin in fate kan nihna avangin min tir hreh lo ula, zan laklawh a ni emaw eng hunah pawh mitthi kan neih chuan min tirchhuak rawh u, min turlui rawh u, YMA member kan ni a, kan tih tur a lawm, Mizo kan ni a, kan tih tur a lawm. Nangmahni hian min zirtir tawk lo thin ve bawk a ni. Mizo Nun Zemawi chhawm nung zel tute zingah tel ve kan duh e. Dawrpui hi kan veng a ni. Tuman min thawhsah dawn silo.

Tualchhung News (5 April, 2009)

| 0 comments ]

Damlo : Pi Ngaihawmi, Pu Zadingluaia nupui, Dawrpui West (Ch. Sect) chu CARE Hospital-ah zai (operation) a ni a, that lam a pan zel niin kan lo hria.
* Pi Thandawngi, Dr. Zothansanga nu, Bazar Bungkawn (Ch. Sect) chu Civil Hospital-ah hlawhtling taka zai a ni. Kan tarlan tawh ang khan phai lamah hun engemaw chen enkawl a nih hnuah lo haw lehin Doctor Sick Room Civil Hospital-ah enkawl leh a ni ta a ni.
Lo Haw : Pu Lalramchhana (Rca) chu M.Th zir zoin alo haw ta. Result tha tak a neih ngei kan beisei.
* Pu Rosangliana (Masanga) Branch YMA Vice. President chu a fate hruaia zin pawh tluang takin a lo haw ta.
Lawmawm : Tunlai hian Dawrpui Vengchhungah Police-te an Duty tha a, zan lam boruak tha lo tur pawh a ziaawm hle a, an chungah khawtlang a lawm hle a ni. Amaherawhchu, thimhlim velah Zodin velah hian mi hnawksak erawh an la ngampa deuh hlek. Kan Police ten tan min laksak zel se kan duh hle.
Bengchheng Su : School Naupang First Term Exam alo hnai leh ta a, naupang tam takin zing zanah uluk takin Lehkha an zir tluk tluk a. Boruak tha an neih theih nan chhungkaw tin ten Bengchheng siam lo hram hram ang u.
Kan chhungkuaah lehkha zir an awm lo a nih pawhin thenawmah an awm tih hriat a tha, i bengchheng lo hram hram ang u.
Pass thar : Dawrpui MUP Unit chuan Millenium sira an building (Vantlang chawlhbuk) chu a hmun pass Land Lease an siamin an la chhuak fel ta.

CHIEF MINISTER KAWMNA

| 0 comments ]

Dt.3.4.2009(Zirtawpni) tlai dar 4:00 khan kan khawtlang hruaitu VC leh YMA O.B te chuan Chief Minister Pu Lalthanhawla chu a Office Chamber-ah kawmna hun an nei a.
Hetah hian kan khawtlang in kan mamawh hrang hrang leh harsatna kan neihte thlen a niin, chung zingah chuan tuna kan vengin kan mamawh kan buaipui mek thlanmual thar, hun rei tawh taka atanga lei dan tur kan lo buaipui tawh dante, leh YMA anga Thlanmual thar ngaihtuahtu Committee kan in din dante, he thlanmual lei nana veng mipuiin kan sum lamah tan kan lak dan tur te hrilhhriat a niin, chubakah sorkar atanga thlanmual leina tura puihna kan mamawh tur thute thlen a niin hrilhhriat a ni bawka, chubakah Bazar New Market-a Bazar Beat Police Bazar Building chungbera awm hi mipui vantlangten hei aia kan chhawr tangkai zawk theihnan Bazar Building hnuai Ground Floor-ah sawn turin ngen a niin, a ni chuan he thil pawh hi ngaipawimawhin biak tur tulte kan hruaitute awm laiin be nghalin Bazar Building chunga Bazar Beat Post awm chu a hnuai Ground floor-ah sawn turin tih nghal niin, tuna Apex Bank awmna hnuai room ruakah Bazar Beat Police chu an awm dawn ta a ni. Heng bakah hian thil hrang hrang vengchhung mamawh sawipui a ni bawk.