Family Planning

[ 31 May, 2009 | 6 comments ]

- Dr Thangchungnunga, MS (Ortho)

Family planning hi tunhma 1980’s daih atang tawha India sorkar scheme (project) ami a ni a, state tin a ti hlawhtling tura tih kan ni. Target-te an rawn siam a, pawisa tam tak an rawn siam a ni. Mizote hian kan man fuh vak lo emaw ni, thingtlanga ka awm lai chuan, mi chhungkua, lehkha zir sang leh sorkara hna beisei lo tur chi hlo thlo tur tho tho tur emaw kut hnathawk emaw a eizawng tan chuan fa a tam theih ang ber nei u la, mahni inchawm zo tur khawp hnathawk tur neih tur, ka ti thin. Family Planning nilo in 'Plan your family' tih hi a awmzia a ni, fa i chawm zawh tawk nei rawh tihna a ni.


Tunhma hlo thlo ringawta eizawnlai kha chuan chhungkaw rual apiang an awh awm thin. Tunah erawh chuan thingtlang chengker berah pawh lehkha zirtir theuh kan tum tawh si a. Nula tlangval kum 25 chhung nu leh pa in an han chawm hlawm tawp mai chu, hlo thlo ringawt emaw nitin inhlawh ringawt tan chuan harsa/theihloh tluk ani a. Hei tak hi kan Family Plan tur chu a ni. Enge kan tih ang zel a, kan chawm theih dan zawh tawk hisapa fa neih hi i tum ang u, tih hi “Family Planning” tum chu a ni.

Fa neih teuh ringawt a, lehkha pawh zirtir thei si lo tan chuan phurrit ani mai a. Tam hrim hrim changkanna ni se Bihar leh Uttar Pradesh an changkang ber ang. Mahse a changkang lo ber an ni si a.

Chuvangin mahni theuh inchhut a, kan enkawl puitlin theih tur theuh tur chauh neih hi a tul ani. Quantity (tam duah) aiin quality (tha theh thawh) hi ram tan chuan kan mamawh a ni. He thil sensitive tak mai hi chu mahni chhungkaw mila in plan thiam a tul ta hle mai. Chhungtinin rilru i lo seng theuh ang u.

Branch YMA Ex. Committee Vawi 5-na

| 1 comments ]

28 May (Ningani) zan khan Dawrpui School YMA Committeee room-ah Branch YMA Executive Committee vawi 5 na neih a ni a, hetah hian thu pawimawh tak tak rel a niin, veng mipuiten kian hriattur tlangpuite kan han tarlang ange.

1) Secretary Report : Branch YMA Office leh VC ten Aizawl P/S OC thar an kawm thu leh Bialtu MLA in thilpek min pek avanga lawmthu sawina leh thu pawimawh dang report ngaihthlak a ni.

2) Thlanmual thar ngaihtuahtu Committee : Thlanmual thar tur chungchangah hmalakna hrang hrang ngaihthlak a niin, Mualpui rama Pu Lalchhandama Varte ram Mualpui ami Bigha 65 a zau chu Rs 27 Lakh (Nuai sawmhnih pasarih) a lei tura in biak rem anih tawh thu leh, vengchhunga sum khawn dan tur thu ngaihthlak a ni bawk.

3) Sports Sub Committee : YMA day inbuatsaihna atana Branch YMA sports neih mek dan leh, 15 June YMA Day chhunah sports kharna neih a nih tur thu leh, Prize Money atan Section Champion in Rs.3000/- leh Trophy leh 2-na in Rs 2000/- leh Certificate leh 3 nain Rs 1000/- leh Certificate leh mimal leh team tina lawmman la pha chin 1 na atanga 3-na thlengin Medal pek annih tur thu ngaihthlak a ni bawk.

4) Cultural Sub Committee : Dawrpui Cultural Club 10 May a din anih tak thu leh Office Bearer leh Committee member 22 an in ruat tawh thu ngaihthlak a niin, Art & Culture ah in Affiliate a nih theihna atan lam zirtirtu thlahnih chhung atan lak Branch chuan a phalsak bawk.

YMA DAY : 15 June (Thawhtanni)-a YMA day lo thleng turah hian hlim leh tangkai taka hman tum a ni a, zing dar 6:00-ah vengchhung thenfai hnatlang neih nise, Section tinten mahni Section huam theuh atanga bul rawn tanin atawpah Bazar Bungkawnah intawkkhawmin hnatlangte tan thei tui, tui tak hlui sak nise.

YMA day pualin Mizoram chhung leh pawnah tangkai taka an lo hman atan puan pek nise, chungte chu :
Mizoram Chhung : a) Sairang Branch b) Sairang Dinthar c) Sihhmui Branch
Mizoram Pawn : a) Silchar b) Guwahati c) Kolkata d) Delhi e) Mumbai f) Vellore

YMA Day chhun lam Programme chu Sports Sub Committe leh Cultural Sub Committee kutah dah niin School kawtah he hun hi hmang tura duan lawk a ni. Chhun lamah chuan sawhchiar tui hnai tak pir tur a ni ang. Zan lam Programme chu Branch Office Bearer ten phungbawm lo sawmin lo duang se tih a ni.

Questionaire : Veng chhung In tin dengchhuak in Thlan laih leh khawhar In riah chungchangah zawhna sem a ni ang.

Section O.B thar : Tatesena Section Treasurer thar atan Nl Vanlalpeki ruat a ni.
Vanapa Section Assistant Secretary atan Tv. Lalmuanpuia Ralte ruat a ni.

Disaster Management : VC-te hnehah Disaster Management Committee hlan let leh nise tih a ni.

Pu Vanlalruata kan chan ta

| 0 comments ]

A chanchin : Pu Vanlalruata hi kum 1952-ah khan Bethlehem-ah Pu Chhawnvawra (L) leh Pi Lalngengi Sailo te fa hmasa ni turin a lo pianga, kum 1968-ah Pu Vanlalnghaka (L) te unau zinga pathumna Pi Lalripari nen an innei a, nupa hlim dun tak niin fa pakhat Vanlalhruaia an nei a, tu pali a nei a. A nupui leh a fanau kalsan tak te hian vawiin ni thleng hian tuna an awmna (N.Market)-ah hian an la awm a ni.

Eizawnna : Lehkha zir sang lo a nih avangin M.R.P-ah atang ve a, rei lo teah a bang leh mai a, Sumdawngin Bazar-ah ei an zawng ve a, tun thlengin Sumdawnga ei zawn hi an hnathawh pui ber a ni.

Kohhran lam : Kohhran lamah hian a in hmanglo hle nain, a fanaute erawh chu Presbyterian Kohhran-ah lawiin, Hetih lai hian Pathian thu lama tui mi, hlimna avanga vak vak thin, Pathian thu sawi lova awm hlei thei lo a ni a, chhandamnaah a chiangin a thla pawh a muang em em a ni. Hetiang mi a nih avang hian a neih ang ang pawh ui ngai lo mi a ni.

A nat dan tlangpui : Kum 2007 June thla atang khan a khak a thi a, Doctor-te rawnin an in check-up reng thin a, a hnu lawkah T.B hrik hmuh a ni a, T.B damdawi-a rei tak enkawl a nih hnuah Cancer a chuap-ah hmuh a ni leh a, a Cancer hi alo nasat deuh tawh avangin In-lamah a theih ang anga in enkawl a. Tichuan a chauh zual tak avangin Dt. 25th May, 2009 ( Thawhtanni ) khan Grace Hospital-a admit a ni a, Doctor-te leh nurse-ten theih tawp an chhuah a, thisen pawh Unit-2 an pe a, a ziaawm viau laiin Dt. 29th May, 2009 zing dar 9:00 velah khan a lo zual leh a, Zing dar 10:00-ah a lo ngaih em em thin a Lalpa hnenah a chawl ta a ni.

Tualchhung News (31 May, 2009)

| 0 comments ]

Tuakthar : 29 May (Zirtawpni) khan C.Lalnunsiami (Teteii) d/o CL Thanga (L) New market chuan VL Hruaitluanga Chandmary West chu a nei ta.

Pem lehkha : Pem lehkha la tur reng reng chuan mahni awmna Section hruaitute hnen atangin hriatpuina lehkha lak hmasak phawt tur a ni. Branch YMA Secretary hnenah Section hriatpuina lehkha bakah Voters ID Card leh a form man (Rs. 5) kengin Pem lehkha an lachhuak thei ang.

Thlanmual thar : 26 May (Thawhlehni) khan VC, YMA, MHIP, MUP Office Bearer-te leh Fund Rising Commt. te chuan Dawrpui Sikulah Thlanmual thar lei chungchangah Joint Meeting an nei a, thlanmual thar man chungchangah thutlukna fumfe tak an siam.

Sport : Ni 23 May Inrinni khan Zarkawt High School Field-ah Branch YMA Sport neih a ni a, hetah hian Football Men leh Under - 15, 100 metres (women) Tug Of War, Relay Race (women) neih a ni. Hetah hian member an kal tha hle a, sport hi hun remchang hmasaberah neih chhoh tum leh a ni.

Legal Wing leh Sanitation & Beautification Comm.

| 2 comments ]

May ni 21-a V.C Sitting chuan legal Wing Dawrpui leh Dawrpui sanitation and Beautification Committee din a, a hnuai amite hi hruaitute an ni :-

LEGAL WING DAWRPUI
  • Chairman : Pu Zosangzuala (Upa) VCP
  • Secretary : Dr. Chawnglungmuana (VCM)
  • Members : Pu H. Malsawma (VCM), Rev. H. Zalawma
  • Pu Chhawnkima Pachuau, Pu Aldrin Lallawmzuala (Advocate), Pi Dinary T.Azyu (Advocate), Dr. Lalsangluaia Sailo, Pu Zoramsanga Ralte, Pu R. Chhawnkima, Dr. Lalrindiki Fanai, (Reader MZU)

DAWRPUI SANITATION AND BEAUTIFICATION COMMITTEE
  • Chairman : Pu Rothuamliana, (Treasurer DVC)
  • Vice Chairman : Pu Kapchhunga Pachuau
  • Secretary : Pu K.L. Zamvela, (Secretary DVC)
  • Asst. Secy : Pu V.R. Hmachhuana, (Asst Secy, DYMA)
  • Members : Pu K.Hmingthanga, Pu Ramthanga (IFS), Pu Lalrammuana, Pu V.Lalawia, Pi Lalthakimi, Pi Vanlalhriati, Pu Vanthangpuia, Pu Vanhmingliana (Tauva), Pu Zoremmawia, Pu R. Zothansanga (Zotea)
  • Ex-Officio: V.C. Member-te

Durtlang Leitan

[ 25 May, 2009 | 4 comments ]







KUHVA

[ 23 May, 2009 | 4 comments ]

-Dr Thangchungnunga, MS (Ortho)
Kuhva hi kan ei nasa a, kei ngei pawh hian ni khatah Rs.30/- man ka ei thin. Kumin atang hian ka ei ta lova. A thatna hi a tlem hle - Ka rimchhe lutuk tur a veng deuh tih mai loh chu thawh vak a nei lo. A that lohna chu kan han thial a, kan thial rual rual hian thluak-in pumpui hnenah chiahral tur a lo tla dawn tih a zu hrilh a, anin an acid (Hcl) an lo tichhuak tam a. Mahse engmah tla thla tur mumal a awm si lova, pumpuia acid kha a awmsa aia tam a awm ta teuh mai a. Pumpui bang kha a chiah lawng ve leh ta a, pumpui na, pumpui Ulcer kan tih chu an nei der mai a. Tin, Kuhva leh a hnahah hian damdawi ang (Chemical) thisen dawt tite theitu a awm a, ei tam tak tak chuan mit mengte hi a ti fiah loin, lu te pawh a nat phah deuh thei thin.

Tin, Chinai kan ei tel hi a raw (Pawlh dal loh) a ni a, hei hian kan chaw eia Iron (Thisen sen tirtu) hi taksa hip theih lohin (Ferrous Oxide- thir tuiek chhia) a siam zel a. Kuhva ei nasa reng reng chuan Iron Deficiency (Iron tlachham) in an awm fo. I thisen Hb a hniam reng a nih a, kuhva i ei reng a nih chuan kuhva kha ei lo la a damdawi chu a ni mai.

Tin, Chinai a calcium awm hi mi tam takin taksa tana tha turah an ngai a, mahse a ni lo. Pumpui acid khan Calcium chhia-ah a lo chantir daih mai a, kan ek a ti khal mai mai a ni. Tin, Kuhva hi acid pawhin a chiah ral zo lo tih ka hriatna chu, kum 1985 khan Biate-ah thingzai ka ruai a, thla hnih an awm chhunga an kuhva eina kha an ekna bikah khan a lo vum thur mai a. Fanghmir bu kova lei mur sep sep ang mai hian (Ek zawng zawng kum khat hnuah chuan a lo tifai a) a awm vum thur mai a, kg 2 dawn vel zuk ni thei a. Kuhva rah sawm an ni tih chu hai rual a ni lo.

Tin, a panhnahah hian chemical chikhat thisen dawt tizim thei a awm ve leh a, a thlum chi phei hi chuan Allergy a siam duh em em bik a ni. Ei loh mai hi a him ber a ni e. A sehtu ang mai a kan ang sen huam mai hi chu a mawi lem lo a ni.

YMA DAY Sports

[ 16 May, 2009 | 11 comments ]

Kumin 2009 YMA Day Sports chu May 15, 2009 (Zirtawpni) zan khan neih tan a ni a. Kum dang ang lo takin kumin hian Sport Item pawh a tam thei ang ber buatsaih a ni a; Pu Chhawnkima Pachuau, Branch YMA President chuan Sports hawnna hun a hmang a, member-te an phur hle. May 16, 2009 (Inrinni) nileng khan Recreation Centre, Zarkawt Babutlangah chhunzawm a ni a, hetiang hian hunawl remchangah neih chhoh zel a ni dawn a ni. He Sport hi YMA Day June 15-ah kharna leh Item thenkhat Final neih a ni ang. Result awm thei ang angte chu kan han tarlang e:-
1] Tombola 1st- Chawngbawla Section
2] Chinese Checker (W) 1st - Vanapa Section
3] Draugh Board (M) 1st - Taitesena Section
4] Dawl Chuh 1st - Chawngbawla Section
5] Carromboard Mix 1st - Chawngbawla Section
6] Arm Wrestling 1st - Chawngbawla Section
7] Basketball 1st - Chawngbawla Section

Thlanmual thar tur lungrual taka lei remtih a ni

| 5 comments ]

Ruahman lawk angin May 14, 2009 (Ningani) zan khan Dawrpui Village Council huaihawtin Dawrpui Khawtlang “Vantlang Inkhawm” neih a ni a. Dawrpui School Hall khatin mipui an kalkhawm a ni. He Vantlang Inkhawmah hian nakin lawka chhungkaw tinin kan la mamawh tur Thlanmual Ram lei chungchang sawiho a ni a, lungrual taka “Thlanmual Thar Tur” hi lei remtih a ni.

He Vantlang Inkhawm hi VCP, Pu Zosangzuala’n a kaihruai a, Pathian hnena inhlanna hunserh Maj. Vanlalhuma CO, Bazar Corps-in a hmang a, YMA Zaipawl ten thiam takinin Opening Song an nei bawk. Tunhnaia Dawrpui Vengchhung mi HSLC leh HSSLC passed tharte hnenah Chawimawina Certificate, Dawrpui VC ten an hlan a, a ropui hle. Heng Certificate-te hi Pu John Rotluangliana, Mizoram Legislative Assembly - Dy. Speaker-in a hlan a; Passed tharte fuihna thu tha tak tak Dr. Lalrindiki, Reader Mizoram University-in a sawi bawk. Tin, tunhnaia Gospel band insiam thar Mizo Vocal Band ten thiam takin kalkhawmte zaiin an awi bawk a, kan veng nula, Lalruathlui (Hlutei) a zai bawk.

Dawrpui Thlanmual thar tur chungchang sawi hawnna Pu Chhawnkima Pachuau, Chairman Thlanmual Thar Ngaihtuahtu Committee-in a nei a, Secretary Pu Rochungnunga’n Report kimchang tak pe in, Thlanmual Thar atana ram an lo zawn nasat tawh zia te, hun leh tha tam tak Committee hian an sen tawh thu leh chung zinga tha ber tura an ngaih ITI Mualpui-a Pu Lalchhandama, Damveng ram a nih thu a sawi a. Mipuite thlir theih turin a ram thla pawh Projector-a tihlan a ni a. Ngun taka sawiho a nih hnuah helai ram hi Vantlang mipui kalkhawmte chuan lei an remti ta a ni.

Cheng nuai tam taka lei a ngaih dawn avangin Fund Rising Committee siam thuai nise, VC-te huaihawtin NGO ten lo bawhzui se an ti. Pu Rothuamliana, Treasurer Dawrpui VC chuan lawmthu sawina neiin inkhawm hi tih tawp a ni.

He Vantlang Inkhawm pawimawh tak VC ten an kohah hian a thu a pawimawh em avangin vengchhung in tin atangin aiawh pakhat tal tel turin mipuite a ngen a, chhungkaw tam takin an ngaih pawimawh em em laiin ngaipawimawh lo chhungkua kan la awm fur mai hi a pawi hle. Vengchhung mi, khua leh tui dik tak te tan chuan hetiang hi ngaihpawimawh zui zel hi kan tih tur pawimawh tak a ni.

Tualchhung News (17 May, 2009)

| 3 comments ]

Damlo : Tv. Lalremliana (Nuka) New Market (V. Sect) chu Pumna leh thil dang dang avangin Durtlang Presbyterian Hospital-ah enkawl mek a ni.
* Pu Lianzama Pachuau, Leader Vanapa Section chu May 15, 2009 (Zirtawpni) khan Civil Hospital-ah a Sinus zai a ni.
* Pi. Ngursailovi, Pu James Thanmawia nupui New Life Hospital-a zai chu damtakin a lo chhuak leh ta.

TUAKTHAR TE : Nl. Hmangaihkimi D/o Ramdinliana Ralte, Dawrpui West chuan ni 15 May (Zirtawp) khan Chandmari Baptist Kohhran Biakin-ah pasal a nei.
* Nl. Lalnipuii d/o Pi. Manliani, Dawrpui West pawhin zirtawpni khan Republic vengah pasal a nei.

NAUTE THAR : Pu David Remruata, Chawngbawla Section Secretary chuan a vawi hnihna atan fapa duhawm tak Kg. 4-a rit 'Rinfela Coylam' chu Civil Hospital-ah ni 9 May (Inrinni) khan an nei.

LAWMTHU SAWI : Pu Lalsawta, Bialtu MLA chuan Zirtawpni khan YMA-ah Dekchi 2, Silpauline 3 min pe a. Heng bakah hian MUP hnenah No leh MHIP hnenah thleng leh Ketle a pe bawk a. Hetianga kan khawtlang mamawhte min hriatsaka, khawtlang tana tangkaitur min pe hi kan lawm tak meuh a ni.

Sa ei

[ 12 May, 2009 | 14 comments ]

-Dr Thangchungnunga, MS (Ortho)
Mizote hi rin dan leh ngaihdan nei ve tlat, mithiam zawkte sawi pawh ngaihsak lova advice lo pe ve chiam chiamte, kawng bula In sak phei chu ninawm khawpin, thil hria leh sak dan hria sawi tur nei an tam hle.

Ninawm khawpin kan tawng peih a, kan hriat chian mahni hna leh kan hriat zawng sawi tha peih si lo, mahni thil hriat loh zia pawh hre pha lo. Entir nan : khup a na a, tui chhia a lo tling a, paih a ngai a, kan paih a. Thenawmpa in ‘Hetiang a tha lo, thling a ro duh’ te an lo ti a. Thling awmna pawh hre ngawt lo khan damlo tana kal leh pawh chakawm lo khawpin an lo sawi thaih a. A chhiat tawpah an lo kal leh tho a, a dam har tawh thin.
Chuvangin common sense kan hriat hi thenawm khawveng te tan hman tangkai tum ila, zira hriat chi chu a zirte kuta dah mai te pawh hi thiam ila. Khawtlang rorel thlengin kan sawiselin kan sawipui chiam thin. Thil reng reng hi a tha zawnga hman kan tum a ngai a ni.

Sa ei tih hi, kan ei nasa deuh niin a lang. Ruhseh kan ngah ta lutuk te hi, mit leh kala lungte awm titamtu a ni bawk. Sa ei tura duan hi chu kan nilo deuh niin a lang kan ha leh bawng ha hi a inang e mai. Chuvangin, ruh na, lung na, kala lungte awm , thin dawt thalo laka awl te a invenna chu, sa a tlem thei ang bera ei emaw ei loh a tha, ruhseh nei tan chuan. Hei pawh hi mi thenkhat chuan ‘Arsa a haw lo’ an lo ti leh a, Ruhseh nei chuan Sa, a ke nei chi reng reng chu a haw vek tih hriat tur a ni.

John Calvin-a piancham 500-na lawm

| 4 comments ]

Khawvel puma Reformed Protestant Kohhran ten Kohhran hmanga khawtlang siamthat rawngbawlnaa sulsutu John Calvin-a piancham vawi 500-na hriatrengna leh a lawmna Presbyterian Church of India (PCI) buatsaih chu ni 6-7 May 2009 chhung khan Aizawl Theological College-ah Mizoram Synod chuan thlengin, hetah hian thu zirhona (consultation- “Rediscovering the Legacy of John Calvin: A Contextual Reading”) neih a ni.

Vantlang Inkhawm

| 3 comments ]

Khawtlang hruaitu hrang hrang VC, YMA MUP leh MHIP Joint Meeting chuan tun kar May 14, 2009 (Ningani) zan hian Vantlang Inkhawm pawimawh tak a kova, hetah hian veng chhung mipuite a tam thei ang ber kal tura hriattir kan ni.
He vantlang Inkhawm koh chhan hi, khawvel thang zelah veng mipuite pawh kan lo pung chho ve zel a, mipui kan tam na na na chuan mamawh pawh a lo pung chho zel a nih hi. Tuna kan hman lai mek kan thlanmual hi veng thenawm - Saron Veng, Chhinga Veng, Armed Veng leh Tuithiang ten min tawm mek a. Tunah hian hmun awl inphumna tur tih tham a awm tawh lova, hemi a nih avang hian kan khawtlang hruaitute chuan thlanmual thar tur ngaihtuah ran a ngai a ni tih hriain, kan veng bil ta tur thlanmual thar hmun hranah neih thain a hria a, hemi chungchang ngaihtuah tur hian khawtlang hruaitute chuan mahni maia ngaihtuah chu tha ti lovin, veng mipui kalkhawm ten i ngaihtuah ho ang u, tiin Vantlang Inkhawm a ko ta a ni.
A pawimawh em avang hian hemi zan na na na hi chuan chhung tin ten Porgramme dang siam lovin, chhung tin atangin a tlem berah mi pakhat tal kal ngei turin min ngen tak meuh meuh a ni. Programme chu hetiang hi a ni e.
Chairman : Pu Zosangzuala (VCP)
Hunserh : Maj. Vanlalhuma, Bazar Corp CO
Sawi hawnna : Pu Chhawnkima Pachuau, President YMA
Report : Pu Rochungnunga
Sawihona : A duh apiang tan.

Branch YMA OB-ten Bialtu Minister an kawm

| 3 comments ]

28 April (Thawhlehni) tlai khan Branch YMA Office Bearer-te chuan Bialtu Minister Pu Lalsawta chu a Office Chamber-ah kawmna hun tha tak mai an nei a, hetah hian khawtlang thil pawimawh hrang hrang sawipui a niin heng bakah hian veng mipui ten kan hriattur tlangpui kan han tarlang ange.
1] YMA SILVER JUBILEE : Dawrpui Branch YMA hi 1988 October thlaah kan ding tan ve a, kum 2013 hian a kum 25-na (Silver Jubillee) kan lo thleng dawn ta der mai a, heta tan hian Upper Bazar-a YMA Building chu Jubilee Building atana hawn hman turin sak that nise tih sawi ho a ni a, hetah hian Bialtu pawh a in hawng hle a ‘Estimate te rawn siam ula’ tiin thu an dah a ni

2] YMA DAWR : Kan Branch in tangkai taka kan hman mek kan YMA dawr New Market leh Zion Street ami chu sak that nise tiin sawi ho a ni leh a, hetah pawh hian ‘kumin chhung atan chuan pakhat tal sakhman kan tum dawn nia’ a ti bawk a ni.

3] WAITING SHED SAK : Dawrpui thlanmual hi kum 1910 atanga hman tan a nih thute veng tam takin kan intawm thute sawipui a nih bakah thlanmual waiting shed sak belh kan mamawh zia thu sawipui a ni bawka hetah hian a ni chuan tunah mai chuan fund hman tur a awm mai lova ‘fund awm veleh bawhzui atan’ a ti a ni.

Kuri weds Thazova

[ 10 May, 2009 | 13 comments ]

Lalramhluni Hmar (d/0 H.Thanzara(L) Dawrpui Zion street) leh H. Lalthazova (TZA) College Veng-te chu May 1, 2009 (Zirtawpni) chhun dar 12 khan College Veng Presbyterian Kohhran Biak Inah Kohhran Dan Thianghlimin an innei.

Sanga weds Niteii

| 6 comments ]

Lalnunsanga (s/o Zadingluia) leh Lalnilawmi (d/o CS Vanhnuna) Dawrpui West ve ve te chu 7 May, 2009 (Ningani) chawhma dar 11:00 khan Dawrpui Presbyterian Kohhran Biak inah Kohhran Dan Thianghlimin an innei.

Mobile Handset hlauhawmna

[ 03 May, 2009 | 9 comments ]

-Dr Thangchungnunga, MS (Ortho)
Mobile phone hi kan nei ta deuh vek mai a, a hlauhawmna lam hi tlem tlem a awm ve a, hriat ve mai mai tur.

Tute tan nge hmanloh a him zawk? :
A hmasaberin, pacemaker (lung thalo) nei ho hian an hman loh a him zawk a, duhdan chuan inches 8 aia hnaiah an dah tur a ni lo. A heart beat a ti buai vek thei a ni. Boruak a wave current chakzia i hriat duh chuan dawhkanah vibrate in dah la a sawn dar dar thei a ni. Chuvangin hetiang taka electronic wave chak si hi boruakah a in sulpel suau suau tih hriat tur a ni.

Mipa leh hmeichhia tan dah lohna tur :
Fa duh tawk la neilo tan chuan fimkhur a tha. Chi (ovary/testis) mipa emaw hmeichhia emaw i nih chuan i mobile dahna ni lovin dah lohna tur hria ang che.
Mipaah chuan Til (scrotum) bulah kekawr ipteah ah loh tur a nih chu.
Hmeichhia i nih chuan dul hnuai sir lehlam lehlam hnaivaia dah loh tur. Hmeichhe chi chu, kumkuruh kil ve veah a awm a, chuvangin Lai hnuai sir lam ve veah dah loh tur a ni, a lang nghal mai lo na a, nupui/pasal i neih hunah i lo ching, fa i nei theih lo palh hlauh ang nge.

Lalbiaksangi kan chan ta

| 0 comments ]

Lalbiaksangi hi Pu Mangliana leh Pi Laikungi te fa pathum zinga upa ber niin kum 1964 khan Aizawl Civil Hospital-ah a lo piang a. A nau pakhat Lalthanpuia chuan nikum 2008 khan chatuan ram a lo pan san tawh bawk a ni. Tunah hian a nau Lalrinmawia te chhungkua (An fate pahnih) leh a nu Pi Laikungi hovin Medical Quarter-ah hian an cheng ho a ni.

Kum 2007 khan B. Lalbiakliana nen innei-in fa erawh an nei lova, an pa nen hian an inngainain an kalna apianga inzui chawt reng mai an ni. Camping-ah te lutin piantharna pawh an chang ve tawh a, mite angin tawngkam thiam lemlo mahse, a Bible chang ngainat zawng leh duh zawngte pawh a sawi a sawi ve thin. Jeremia tah hla ‘Pathian hmangaihna chu a ngai reng a, a kang ngai lo a ni’ tih hi a chang duh ber leh a sawi zin em em thin chu a ni.

April 23, 2009 (Nilaini) khan a pasal inhlawhna an In bul lawkah a va kal a, an pa chuan ‘Tikhan thutthlengah lo va mu hahchawl rawh’ a ti a, an pa rawn anga awm ta lo chuan In lamah a lo va phei a, a hnu rei vak lovah an pa hnathawhna lamah bawk chuan a va kal leh a. An pa chuan, ‘Lo va mu hahdam rawh, kan haw rual dawn nia’ a lo ti leh a. An pa sawi anga a kal ta chu, an In peng thlang kawngthlangah a bawkkhupin a tlu a, a ka leh hnarah te leiin a lo hnawh a, an pain a va hmuh veleh pawm kangin an sawi nawk nawk a, mahse a harh chhuak zo ta lo a ni. A tluk sual hun hi chawhnu lam dar 2:20 vel nia hriat a ni.

Tuitla venna

| 7 comments ]

-Dr Thangchungnunga, MS (Ortho)
Tunlai chu khua athal leh ta a. K.T.P., YMA, etc. nula tlangval mi puan su a, in hlawh a tlawng/serlui a kal an awm leh teuh tawh a. Vanduaithlak takin hmanni lawk pawh khan boralna a thleng leh tawh a. Chuvangin tun hma pawha an lo tih thin dan, leh nunna tam tak kan lo chhan tawh thin dan awlsam si, tha si hi sawi ka duh a. Hetianga a huho a picnic/huana an kal reng reng chuan an thlen veleh a hotu berin mau tlawn sei thei ang ber pahnih vel sat sela, insuk/picnic-na bulah lak mai theih a dah tur. Tla an lo awm palh pawhin, mau tlawn kha va pek a, hnuh chhuah mai tur a ni.

Tui tla reng reng hi vawi 2 emaw, vawi 3 emaw tal an rawn lang chhuak thin a. Lang miah lova tla nghal vang vang chu sawi tur an awm ve zeuh zeuh. An hlauh thawn hian an bula thil awm reng reng man an tum a, chuvangin tui thiam tan pawh va chhan mai ngam a ni thin lo, an vawn hi an thlah tawh lo a, an tlak pui fo tawh tih pawh kan hria a, chuvangin mau hmawr kha chu a lo man ngei ngei dawn a. Hetia tih ziah anih chuan nunna engemaw zat kan chhan thei ang. Class VIII, St. Pauls High School pawh kan picnic a. Kan thian pakhat hleuh thiam meuh silo in a laiah a va hleuh a, chutih lai chuan Electric ban hi a pil zan a, a tal buai ta a, kan zirtirtu zing ami Dominic Lalhmangaiha (ADC Kulikawn) kha lawng leng atangin chhan tumin a va man a, an pil dun ta vang vang a, rei fe hnuah Dominic-a chu a rawn chhuak hlawl a, lawngah kan lo pawt lut a, “Engtin nge, eng nge i zuk tih?” kan ti a,”Tal chhuah ka zuk tum” tih chu a chhanna a ni.

Chuvangin tui tla in ham buai lai taka hman tur mau tlawn sei pahnih tal in chhawp zel ila, nunna tam tak chu kan chhan ngei ka ring tlat a ni, keimah ngei pawhin ka chhan tawh miau avangin ho te, tha si hi picnic spot ni lo tlawng/serlui vela in ti hlim duh chuan hei hi hre reng sela ka duh khawp mai.