VIRUS DAMDAWI A AWM LO

[ 28 June, 2009 | 16 comments ]

- Dr Thangchungnunga, MS (Ortho)
Natna chi hrang hrang, bacteria, fungus te bakah virus hi thlur bing ta ila. Mawl takin sawi ila, hrileng tlanglawn tam ber hi virus vang a ni deuh vek a. Heng AIDS/ HIV te, hepatitis, influenza, khawsik, awmna, hritlang, polio, Japanese, encephalitis, bird flu leh tuna hri leng, Swine flu (vawk hri) te, ui hri te reng reng hi virus vang vek an ni a, a damdawi a awm lo vek.

Chuvang chuan heng laka invenna awm chhun chu, ruih theih thil leh zuk leh hmuam a fihlima, fit tengtawng nih a ngai a ni. Tunah phei chuan Swine flu (vawk hri) a leng mek a, lo hlauh vak pawh awmzia a awm lo. Mihring leh mihring inthawkkhuma inkaichhawn a ni a. Nikhatah hian natna hrik engemaw zat kan hip lut reng a ; TB hrikte pawh kan taksa hian a lo hmet hlum zel a, kan dam mai mai a ni ber. Bible in thianghlim tura min tih hi zawm ila, kan damtlang ang. Heng hri leng mai mai hlau lo tur hian rinna leh hriselna i nei tawk em? VIRUS DAMDAWI A AWM LO. Nakinah phei chuan pulh puk pukna virus hrik avang hian a lo la kal tam telh telh dawn.

I hriat tur chu, hritlang hi virus vang a ni a, damdawi eiin enkawl la, ni sarihah a dam ang a, engmah pe lovin awm tir la karkhatah a dam ang. Hei hian a entir chu - HIV, Bird flu, Swine flu-te hi lo hlau viau suh, “I sirah sang an tlu anga, i ding lamah sing an tlu bawk ang, nimahsela nang chu a hnaih lovang che.......” I ring ngam ang em le?

Valtea kan chan ta

[ 26 June, 2009 | 7 comments ]

Pu C. Lalrinmawia (Valtea) hi Upa Mankunga leh Pi Laithuami te fa upa ber dawttu a ni a, kum 1967, June ni 1 khan Aizawl Civil Hospital-ah a piang a, an unau upat dan indawt chu hetiang hi a ni :-
1] Dr. C. LALRINTLUANGI w/o Upa H. Zoliana
2] C. LALRINMAWIA
h/o C. Lalnuntluangi
3] C. LALRINKIMA (Mapuia)
h/o Lalawmpuii
4] C. LALRINSANGA (Matea)
h/o
Ruby Zothankimi


CHHUNGKUA : Kum 2003, July 24 khan C. Lalnuntluangi d/o Pu Hranghrima (L), Republic Veng nen Dawrpui Presbyterian Kohhran Biak Inah Rev. H. Zalawman a inneihtir a, tunah hian fa pahnih an nei a, chungte chu :-
1] Ruth Lalrinengi (kum 5) 2] Lexis Lalrinzawna (kum 1 ½)

A MIZIA : Pu C. Lalrinmawia hi mi zaidam, fiamthu thiam leh rualpawl thiam tak a ni a. Amah hi naupang ngaina tak a ni a, a unau fate pawh a fiamin a chhawnchhaih peih em em thin a, anni pawhin an hmangaihin an ngaina em em theuh a ni. Kutthemthiam leh inchhung khur chet vel pawh peih tak mi a ni a, eirawngbawl te thlengin a thiamin a peih em em bawk a ni. Mi khawngaihthei tak a ni a, an in chhunga lo leng lut, tute pawh tha taka lo dawngsawng thin mi a ni a, a unaute leh a chhungte pawh mi zawng zawng chunga that chhuah thin turin a fuih fo thin. Mi thilphal tak a ni a, a neihchhun ngawih ngawih pawh a mamawh zawkte tana ui lova pe phal zel mi a ni bawk.

A NAT DAN : June 12, 2009 khan thaw-hah avangin Greenwood Hospital-ah dah luh a ni a. Doctor ten investigation an tih hnuah Chuap TB leh mitliam a nei tih hmuhchhuah a ni a. A natna hi tawngtaina nen chhel takin a tuar fan fan a, tha chhuak leh mai tura kan beisei laiin rin loh takin June 25, 2009 chawhnu lam atang khan a chau zual a, zan dar 8:12 khan, “Ka chawl hahdam tawh dawn”, tiin chatuan ram min lo pansan ta a ni.

YMA DAY ROPUI TAKA HMAN A NI

[ 23 June, 2009 | 3 comments ]

15 June (Thawhtanni) khan YMA day vawi 74- na chu Zoram hmun hrang hrangah ropui tak leh tangkai taka hman zawh a ni ta. Kan Branch pawhin he hun hi hun rei tawh tak atang khan lo ur lawk tanin Branch YMA Sports (Sport Item 27) YMA day puala neih pawh thla hmasa lam atang daih tawh khan lo tan a ni tawh a ni. -ah Section hrang hrangte inelna neih a ni a. YMA Day zingkarah Hnatlang neih a ni a, member 200 chuang lai kan thawk chhuak thei a, a lawmawm hle.

YMA Day Function June 15, 2009 zana neih tura Programme duan fel vek tawh chu chhiat kan tawh tak hlauh avangin thulh a ni a. He hun hi June 19, 2009 (Zirtawpni) zan khan ropui taka hman zawh a ni ta a. He mi zan hian Branch Secretary hnen atangin Report ngaihthlak a ni a, kan veng chhunga zaithiam tak takte zai ngaihthlak a nih bakah Branch President, Pu Chhawnkima Pachuau hnen atangin fuihna leh thu tha tak tak ngaihthlak a ni . Tin, YMA Day Sport-a lawmman hrang hrang sem a ni bawk a, a pumpuiah Chawngbawla Section chuan Points 142 hmuin pakhatna an ni a, Taitesena Section chuan points 135 hmuin 2-na an ni a, Point 115 hmutu Vanapa Section chu pathumna an ni.

Tualchhung News (21 June,2009)

[ 20 June, 2009 | 3 comments ]

Naute thar : Pu Lalsawipuia s/o Pu Tlanchhunga Dawrpui west te chuan 16th June khan fanu duhawm tak an nei thar

In sawn : Pu Thanghmasaa te chhung Jail venga awm chu remchan zawkna avangin Upper Bazar, Dr. C. Zarzoliana Bld-ah an insawn.

Damlo : Pu Lalrinmawia (Valtea) s/o Upa Mankunga, Zion Street chu Aizawl Hospital-ah enkawl mek a ni a, that lam a pan zel niin kan lo hria.
* Pu Sailothanga Sailo, Jail Veng chu hun rei tak atang tawh khan Kawngna avangin in lamah a inenkawl tawh a, that lam a pan zel niin kan lo hria. Hetih rual hian a fapa Pu Vanlalhruaia (Vla) pawh CARE Hospital-ah eng emaw chen enkawl a nih hnuah in lamah inenkawl chhunzawm turin a chhuak leh ta.
* Pi Thuamkungi w/o Ch. Aikima (L) tunlai hian a chak lo zual deuh hlek a, June 19, 2009 (Zirtawpni) khan Thisen Unit 2 pek a ni.

DISASTER MANAGEMENT

| 1 comments ]

June 18, 2009 (Ningani) khan Dawrpui Village Level Disaster Management Committee leh Disaster Management Team hrang hrang member ten Awareness training programme Dawrpui School Hall-ah an nei. He training ah hian mi 80 vel kal khawmin he hunah hian DC Office lam atangin Pu Lalsangliana EAC leh Pi Zoengmawii Project Support Officer ten training an rawn pe a ni.

Village Disaster Management Committee Chairman, Pu Zosangzuala (VCP) chuan he training hi a kaihruaia, Pu P.C.Lianhmingthanga’n hunserh a hmang a, Secretary Pu Chhawnkima Pachuau in report leh team hrang hrang members lokalte inhmelhriattirna a nei a. Trauma & Councelling team Leader Rev.H. Zalawma, hmanni lawka chatuan ram panta sunnna hun hman a ni bawk.

Kan mi sawmte atangin Pi Zoenmawii’n hun hmang hmasain, Chhiat rupna lo thlen palh thulah inbuatsaihna tha pawimawh zia te, training neih tam tawk a awm loh thute a lem nen a entir a, ram thenkhat hetiang lo tawng tawhte dinhmunte pawh sawiin a lem nen entir a ni bawk a ni.

Pu Lalsangliana pawhin thu sawiin “Sorkar lam atang nilo, ka mimal ngaih dan liau liau in khawtlangin Multipurpose Centre in sual mek hi a tul leh pawimawh ti pawl ka ni a, kan ram in hei hi a mamawh em em a ni. Chhiat rupna lo thleng palh thut se, Damdawi in hian min zolo nasa em em a, open space hi kan mamawh a ni,” a ti a. “ Khawpui laili a awm in ni a, Dawrpui veng a buai chuan Zoram pum a buai a ni nghal mai a, chuvangin he Awareness Programme buatsaihna chang in hria hi in fakawm a, hei mai hi erawh chu duhtawk suh u,” a ti. Kan mithiam sawm ten phur takin powerpoint presentation leh video te min entir a. He training kal ten an hlawkpui hle.

Pu Lalramthanga, Vice Chairman-in lawmthu sawina hun hmangin Pastor R. Vanlalnghaka’n tawngtaiin he training hi a tin a ni.

Rev. H. Zalawma kan chan ta

[ 16 June, 2009 | 6 comments ]

A chanchin tlangpui : Rev. H. Zalawma hi Kum 1943 khan Lungphun khuaah alo piang a. Pianpui unaute 6 neiin kum 1967 March 3, khan Pi C. Lalthanzami nen inneiin, fa pali- mipa 1 leh hmeichhia 3 an nei a. MA, B.D, M.Th niin Aizawl Theological College Lecturer hun rei tak niin tuna Presbyterian Kohhran Pastor tam tak hi a zirtir chhuah an ni hlawm a ni.

Dawrpuia a lo awm dan : Dawrpui Bial Pastor ni turin kum 2001 khan Dawrpui vengah a awm tan a, kum 2003 thleng Pastor thahnemngai leh taima tak niin alo pension ta a ni. A pension hnu hian Dawrpui khawtlang leh Kohhran an ngainat leh an thlakhlelh em avangin an mahni in Mission Vengthlang-ah pawh awm duh lovin, Dawrpuiah an in bengbel zui a ni.

Kohhran leh khawtlangah : Kohhran leh khawtlang tan thahnemngai mi a ni a, hnatlang neih nikhuaa ipte-pui leh chempui nena thawkchhuakin Mizo Pa takin khawtlang hi a muan a, a ta neih tlat a ni. Kohhran Krismas hnatlang nikhuaa chempui alo tat hauh hauh lai te, YMA etc. hnatlang nikhuaa a thawkchhuak hmasa pawl ni a, hlim taka mipui alo chiauau thinte chuan Dawrpui hi a ta neih zia a ti lang thin.

Tuna a hna thawh : Kum 2007 atangin Zawlbuk Real Estate-ah Director (Admn.) hna a chelh a, a thih ni thleng hian he hna hi thahnemngai takin a thawk a, thawktute puala zing tin Devotion neih pui thinin, nasa takin Pathian thu lamah thawktute a kaihruai thin avangin Zawlbuk Real Estate chuan a thlamuanpui em em a ni.

Dawrpui Kohhrana rawngbawlna hna chanvo a chelh mekte :-
1] Kohhran Committee Member
2] Upa Bial I-na bialtu
3] Sacrament Deptt. Leader
4] Property Committee Chairman
5] Centenary School Managing Board Member
6] Children For Christ Committee-a Kohhran aiawh

Khawtlanga chanvo a chelh mekte :- Kum 2007 - 2008 khan Mizoram Upa Pawl (MUP) Dawrpui Unit Fin. Secretary niin, 2009 - 2010 chhung atan Treasurer ni mek a ni. Dawrpui Multipurpose Centre Demand Committee-ah Sr. Adviser a ni mek a, Thlanmual Thar ngaihtuahtu Committee-ah member niin thlanmual kan neih ngei theih nana thahnemngai em em a thawktu a niin a leina man pek a nih pawh khan a lawm berte zing ami a ni.


A nat dan : June 11, 2009 (Ningani) khan a dar na/kham avangin Civil Hospital-ah a inentir a, ziaawm lam a pan tho nain a nupui fanau ten Damdawi in lama chawl hahdam turin an rawn a. June 12, 2009 (Zirtawpni) khan Durtlang Hospital, Ortho Ward-ah an lo admit a, amah pawh a tha hle. Zanriah eikhama a zunram thiar zo chu luhai leh sahal avangin a buai a, Oxygen-te pe in, dar 6:30 velah ICU-ah dah a ni a, reiloteah a ziaawm leh deuh a, harh pawh a harh leh deuh na-in dar 10:30 velah rin leh beisei loh takin a rawng a bawl thin Pathian hnenah alo chawl ta a ni.

June ni 14, 2009 (Pathianni) chawhnu dar 1:00 khan an inlamah Bialtu Pastor R. Vanlalnghaka'n a vui a, Biak in lamah chawhnu dar 3:00 khan Rev. Vanlalchhunga (Ex.Moderator) in a vui bawk a, thlanmual lamah Rev. Challianngura vuitu a ni.
Thlalak tam zawk hetah en tur a awm bawk e.

Lam kan thai e

[ 13 June, 2009 | 2 comments ]

Environment & Forest Department atanga sawmna kan hmuh angin kan Branch Y.M.A chuan State Guest House-ah Mizo Hnam Lam - Cheraw leh Sarlamkai mawi takin kan han entir a. Central lam atanga Forest Department Official lo zin kan Mizo hnam lam kan entir theihna tur atana kawng min siam saktu Mizoram Environment & Forest Department hotute chungah Branch YMA chuan lawmthu a sawi tak meuh a ni.

He programme hlawhtlin theih nana thawk chhuak YMA Member-te chungah leh motor rawn thawh chhuaktute hnenah hian Branch YMA chuan lawmthu a sawi tak meuh bawk e. -
1] Pu Thansanga (Hauva & Sons) 2] Pu Andrew Z. John
3] Pu Vanthangpuia 4] Pu H.Dingluaia (Br. Treasurer)
5] Pu M.S.Dawngliana (Nanoa)

YMA DAY hman dan tur

| 2 comments ]

YMA Day hman dan tur tlangpui : YMA Day denchhenin Thawhtanni zingkar hian Branch hnatlang pawimawh tak koh a ni a, zing dar 6:00 ah tan tur a ni. Section tinte mahni Section Area theuhah hnatlang neiin Bazar Bungkawnah intawhkhawm tur a ni a, hetah hian Refreshment tuihnai tak a awm ang. Zing chaw eikham atangin Dawrpui School kawtah Branch Sports neih chhunzawm nghal tur a ni bawk ang a, zan lamah dar 8 atangin Hall-ah programme hlimawm tak hman a ni bawk ang.

Central YMA chuan YMA Day Vawi 74-na denchhen hian damlo leh mi angang tanpui thintu pawl pakua (9) hnenah “YMA Day Thilpek ” atan Rs. 52,000/- (Singnga leh sanghnih) a sem chhuak. CYMA hian nikum lam khan hetiang atan tho hian Rs. 54,000/- a lo semchhuak tawh a ni. Hengte hnenah hian thilpek sumfai a hlan -
  • Gan Sabra(Zonuam), Zauthanga Memorial Camping Centre(Chawnpui), TB Hospital(Zemabawk), Guwahati Mizo Welfare, Kolkata Mizo Welfare Association, Silchar Branch YMA, Delhi Mizo Welfare Association, Vellore Mizo Association leh Mumbai Mizo Welfare.
CYMA chuan thuchhuah siamin Zoram hmun hrang hrang Mizo awmte chibai a buk a ni.

INCHEINA

| 9 comments ]

- Vanhmingliana (Taua) Vankhama Building
Kan thawmhnaw te hi mantlawm leh nalh vak lo pawh nise, thianghlim, fai leh mar tha tak a nih phawt chuan a tha a ni mai. Thawhchhuah nei mang si lovina manto ber ber kan hakte hian, nalh tih aiin mite nuihzat kan hlawh duh mah zawk. Mitinin mahni duh dan dana inchei theihna right kan nei, mahse kan inhmeh vek lem lo.

Pawnlam langthei aia chhungril lam chei that hi kan Pathian duh dan pawh a ni. Chuvangin kan Pathian thu chuan, “In incheina chu pawn lam incheina, sam phiar te, rangkachak thi awrh te, silhfena inthuam te chu- nilovin, thinlunga mihring thuruk chu, rilru thuhnuairawlh leh nunnem, silhfen chhe thei lova inthuam ni zawk rawh se, chu chu Pathian mithmuhin a hlu em em a ni. “(1Petera 3:3,4) a ti a.

Heta samphiar a tihte hi kan mizo nu samphiarte nen tehkhin chi a ni lo, samphiar kak te kha a mawi a, a zahawm bawk. A sawi tum tak zawk chu, Aigupta hmeichhia, lal ina chengte tih dan leh an lalnu ngei Cleopatra sam phiar dan (a film in en chuan), sîn te te a phiarchhuah vek ang te kha a ni Bible hian a sawi ni. Hetiang hi a lan sexy vanga ti an ni. Lunghlu, rangkachak leh silver-a kan taksa chei vak mai hi milem biaknaah kan Pathian thu chuan a ngai bawk. A chhan chu Amah Siamtu Pathian aia a thil siam mai mai in a, mihring chu a rilru a pawh pen tam zawk thin avangin.

Eng anga tle, mawi leh nalh pawhin langthei lamah chuan inchei sa teh thin mah ila, thinlung thuruk, chhungrila takna tak tak a awm chuan si loh chuan sawt tehchiamna a nei chuang lovang.

Chuzawng aia pawi ber mai chu- Pathian thu incheinaa hman hi a ni. Tle ve vur mahse rangkachak tak tak ni lo chu a hlu miah lo ang hian, Thlarau Thianghlim pawlna tello Kristian nun chu reiloteah a zia dik tak a chhuah leh thuai thin. Engkim Hretu leh Hmutu tan chuan hlutna leh mawina tak tak reng a nei lo. Kan thawmhnaw tur dik tak kan inbel hian kan inhmeh ber!

THLANMUAL THAR KAN NEI TA!

| 4 comments ]

Tar lan tawh angin he thlanmual thar (ITI Mualpui-a Pu Lalchhandama Dam Veng ram) leina tur pawisa hi khawtlangin a neih mai loh avangin vengchhunga mi awmthei, Pathian malsawmna dawngte hnenah tlawmngai tura ngenin an sum leh pai tam tak chu khawtlang tan liau liau ui lova pe in, June 12, 2009 (Zirtawpni) chawhnu lam khan Dawrpui Thlanmual tur ram 65 Bigha chu Rs. Nuai 27 in lei fel alo ni ta.

Mipuite mawhphurhna : Vengchhung mi thenkhat ten an sum leh pai khawtlang tana ui lova an hmanhawh tirna azarah Thlanmual Thar kan lo nei ta a. Hemi pawisa khawtlang hminga kan bat teuh hi mipui leh chhungkaw tin ten kan rulh alo ngai ta a ni. Khawtlang pawl hrang hrang hruaitu Joint Committee chuan ruahhmanna a siam a. Chhungkaw tinten kan thawh theih ang tawk nia an hriat kum khat chhunga tlak tur min rawn tuk dawn a. A duh tan tum khata pek vek theih a ni ang a, tum hnih tum thum pek emaw thla tina pek emaw pawhin a tih theih ang. Hei hi MHIP Dawrpui Branch ten thawhlawm ip siamin an bawhzui dawn a ni.

Pu Rosangliana (P&Sons) te chhungin Rs. 1,00,000/-(Cheng nuaikhat) he thlanmual leina atan hian a thlawn liau liau-in an rawn thawh bawk a, veng tana an inphalna a ropuiin an fakawm a, an chhungkaw chungah khawtlangin lawmthu a sawi mawlh mawlh a ni.

Tualchhung News (14 June,2009)

| 0 comments ]

Tuakthar : David Rinsanga S/o James B. Ralte, Dawrpui West leh Lalhmingsangi, Kulikawnte chu June 11, 2009 (Ningani) khan an innei.
Ration Card : Nimin khan Dawrpui School-ah kan VC-te kaihhruainain Vengchhung Ration Card siam tharna neih a ni a, hei hi chhunzawm zel tura ruahman a ni a, vengchhung tlangau a in hriattir zel a ni ang.
Affiliation : Aizawl East Zone Football Association chuan Kum 2009-2010 Season atan June 30,2009 thleng Club Affiliation leh Player Registration hun a hawng leh ta. Club thar tur tan Fee Rs.500, Renewal tan Rs.200, Security Deposit Rs.1,000 leh Player Registration Fee pakhat tan Rs.30 zel a ni ang. Player tan Passport size Photo leh Club tan player 18 aia tlem lo nih angai a, a tam lam chu bithliah a awm lo.

Tanpuina An Pe

[ 10 June, 2009 | 3 comments ]

June 4, 2009 (Ningani) zana Raphael's Gospel Ministry-in Gospel Concert an buatsaiha an sum hmuh ang angte chu Dawrpui Vengchhunga khawsak harsa zual, tanpui ngai nia an hriat, chhungkaw 20 (sawmhnih) hnenah Tanpuina an hlan fel ta. Hei hi Dawrpui Kohhranin thupui a neih “Nang malsawmna ni ang che” Gen. 12:2 bawhzuina hmasa a ni.

(Raphael's Ministry hi Dawrpui vengchhung mi, thahnemngaite rawngbawlna a ni a, Jail-ah te, Home-ah te leh Zoram hmun hrang hrangah rawngbawlna an kalpui mek a ni. An thiltih ropui tak hi mi tam tak tan malsawmna a nih ngei kan beisei.)

MIT (Gall Bladder)

[ 08 June, 2009 | 8 comments ]

- Dr Thangchungnunga, MS (Ortho)
Mit hi kan zai a, lung awm paih te a ngai a, gall-bladder nei lo hi an tam tawh mai a. A hnathawh ber chu storage (chhek khawl) a ni ber a, a tula hman thut tur dah khawmna a ni. Bile (a chhunga tui) hi a tlangpuiin sawi mai ila, thau lampang leh mawm lampang control-tu a ni a. Chuvangin, englai pawhin puar lang lang tham hi a chhekkhawl a, nitin mamawh erawh chu a kal thla ve reng a.
Entirnan, Vawksa thaute hi ei teuh ta la, bile (mit) a mamawh tam em em a, a ip-a awm zawng zawng kha a rawn bun chhuak a, buai lem lo in kan awm theih phah a ni.

Engemaw avanga Mit paih (zai) alo nih hian nilenga tlemte te-a a luangchhuak bak chhekkhawl sa a nei lova, chuvang chuan Mit paih tawh chuan sa leh thau mawm te, thil rim na lutuk te, an ei ve hian a chiah raltu tur mit a store sa a, bun huk tur a neih loh avangin pumte a nuam lo el ul a, ekte a tidik lo thei a, a chang phei chuan thau niawm tak takte an e chhuak thin.

Chuvang chuan Mit nei ve tawh lo ho hi chu fimkhur deuh a ngai a. Ei tur pawh thlan fimkhur a ngai ve a ni. A awmzia chu Mit nei tawh lo tan mi ei ang zawng zawng ei ve teuh teuh theih a ni lo tih hriat a tha.

Chaw ei hrim hrim hi kan in-control thiam a tul hle. Ei tam hi chakna a ni lova, kuttum tia lenglawng hi ei reng la, i pumpui pawh alo te ve hret hret ang a, puar ve em em tho in kuttum tia chauh hi a ei kumkhua theih a ni. Chaw hi ka ei tam ngai lova, ka puar ve tho a, ram vah te, hnathawh hah te, tluk loh ka nei bik lo. Chuvangin, pumpui lianpui nei lovin pumpui tih tet i tum ve tan ang u.

YMA Day 2009 Programme

| 1 comments ]

Kum tina khel lova lo thleng thin YMA Day, hun ropui leh hun hlu tak, YMA member tawh phawt tana hun nuam chu alo thleng leh dawn ta..! June 15, 2009 hi “YMA Day” a ni a, Zoram puma YMA member-te chuan kumkhat chhunga kan hun ngahhlelh ber pawl a ni awm e. Programme chu mahni duh angin Branch hrang hrang ten kan hmang hlawm thin a. Kumin pawh hian ropui leh nuam taka hman tumin an inpuahchah mek hlawm a ni.

YMA Dawrpui Branch pawhin he hun hi ropui taka hman tumin a inbuatsaih mek a, hetiang hian ruahhmanna siam a ni :-
Hnatlang : June 15, 2009 (Thawhtanni) zing dar 6:00 atangin Vengchhung tihfai hnatlang neih a ni ang a, Section tinin mahni area theuah hnatlang hi an nei ang a, Bazar Bungkawnah intawhkhawm a ni ang.
Sports : Chhun lamah Dawrpui School tualah Sport Item chi hrang hrang neih a ni ang a, Final ropui neih a ni nghal dawn a ni.
I lam ang aw : YMA Day chhun hian Cultural Club lam ten lam an thai nasa dawn a, Hnamlam an entir ang a, a theih phei chuan Chai ropui pawh neih a ni ang.
Social Meeting : Zan dar 8:00 (KTP Inkhawm ban)-ah YMA Member Social Meeting - Dawrpui School Hall-ah neih a ni ang. Programme kimchang hetiang a ni :

THENKHATNA
Chairman : Pu Rosangliana, Vice President
Hunserh : Pu Zosangzuala (Upa) VCP
Report : Pu Vanlalbika, Secretary
YMA Day thuchah: Pu Chhawnkima, President

THENHNIHNA
Opening song : YMA Zaipawl
Solo : Nl Laldinpuii (Vanapa Section)
Duet : C.Lalrinpuii leh Ruthi
Lawmman semna: Branch YMA Sports intihsiakna
Female Voice : Nl Zorinpuii leh a thiante
Lawmman semna : Branch YMA Sports intihsiakna
Solo : Dr Zothansanga
Special item : Tv Lalruata leh a thiante
Section inchhiarna :Pu H.Dingluaia, Br.Treasurer
Lawmman semna : Section Over all Champion
Vote of Thanks : Pu VR Hmachhuana, Br. Asst

Thlanmual Thar leina sum puk

| 3 comments ]

Dawrpui vengin kan mamawh em em, hun engemawchen kalta atanga kan lo buaipui tawh ‘Thlanmual thar’ chu kan nei dawn tak tak ta e. Thlanmual thar ngaihtuahtu Committee Member-te leh Fund Rising Committee-te inpekna leh thahnemngaihna a fakawm hle. An ni hian theihtawp tak meuh chhuahin veng tan an tha leh zungte thawhin, an hun hlu takte sengin veng tana an inpeknaah an fakawm tak meuh meuh a ni.

He kan thlanmual thar tur hi a leina tur sum hi khawtlangin neihsa pakhatmah a nei lova. Fund Raising Committee-te hmalaknain a leina tur sum hi veng chhunga neinung deuh Pathian malsawmna dawng mi 28-te hnenah Rs. 1,00,000/- (Nuai khat) theuh 10% punga puk sak a rel a, hei hi kum khat chhunga rulh tur a ni. Heng mi sawmhnih pariatte hnen atang hian sum pawh puk fel a ni ta.

Heng sum pukte hi Dawrpui khawtlang mipuiten kan rul leh dawn a, kum khat chhunga rulh leh tur a ni. Fund Rising Committee ten Ip siamin In tinah tunkar chhung hian an rawn sem dawn a, Chhung tinte kan theih ang tawk tawk, tlem lua leh tam lua awm lova lo thun thin turin kan in ngen a ni. Ip hi thla tina collect thin tura ruahman a ni.

Dawrpui Khawtlang mamawh tak Thlanmual thar leina tur sum min puk tirtu, veng tana an neih sumte ui hauh lova thahnemngai taka min puk tirtute chu heng mite hi an ni :-
Pu BC Gohain (Ritz), Pu C. Thangkima, Pu Thansanga (Hauva & Sons),
Pu Darchhinga, Pu Vanthuama, Pu Bualhranga, Pu J. Thanzuala, Pu J. Thankunga,
Pu Rosangliana (P & Sons),Pi Zaithanchhungi, Pu PC. Lianhrima,
Pu Sangliankhuma, Pu Rosangliana (Masanga),Pu R. Zomawia (Zotea),
Pi Lalparmawii (Parpuii), Pu Andrew Z. John, Pu H. Dingluaia (Cell care),
Pi Thangliani, Pu Rothuamliana, Pu Vanthangpuia, Pu Lalhmingliana (Zofa),
Pu K. Liantuala, Pu Chhawnkima Pachuau, Pu V. Lalliana, Pu Malthantluanga,
Dr. Lalsangluaia Sailo, Dr. R. Tlangkunga leh Pu Lalthankima Hauhnar te an ni.

Tualchung News (7June,2009)

[ 07 June, 2009 | 0 comments ]

Tuakthar : 4 June (Ningani) khan Taitesena Section Treasurer Vanlalhriati (Te-i) leh Lalhmingsanga Kolasib te chu Kolasib-ah an innei, Nl. Vanlalhriati hi Taitesena Section Office Bearer kum 10 bawr vel ni tawh a ni a, mi tlawmngai, khawtlang tana a hun leh tha a nulat chhung zawnga hmang thintu a ni. Kan lawmpui rualin YMA chuan hetiang mi tlawmngai min pem san ta mai hi kan ui hle mai.

YMA Day thilpek : Branch Committee in a lo rel tawh angin kumin YMA Day denchhen hian kan veng pawn hmun hrang hrang YMA hnenah Puan 10 (Sawm) theuh pek tum a ni a, a tam zawk chu pek chhuah tawh a ni.
  • Kan pekna hmun turte chu : Sihhmui Branch, Sairang Branch, Sairang Dinthar Branch, Silchar Branch, Guwahati, Kolkata, Delhi, Mumbai leh Vellore te an ni.
Kan pek tawhna te chu, Vellore, Guwahati leh Kolkata te an ni a, a dang la pek lohna hmunah hian veng chhung mite YMA Day hmaa zin tur kan awm chuan Branch hruaitute hnenah in hriattir ni thei se a lawmawm hle ang.

Hriattirna : NEREF hnuaia Loan dil turte leh thil danga YMA leh VC te hriatpuina mamawhte chuan mahni awmna Section hruaitute hriatpuina leh Family Ration Card an keng ngei tur a ni.

Lam dawn : Environment & Forest Dept. sawmnain State Guest House, Chaltlangah June 8, 2009 (Thawhtanni) zan dar 7:00 hian Dawrpui YMA Cultural Club chuan Cheraw leh Sarlamkai ropui takin an Show dawn. He hunah hian Central lam atangin Deptt. hotu liante an lo kal dawn a ni. He hun pawimawh taka kan veng min rawn sawm hi kan vannei hle a ni.

Gospel Concert

[ 05 June, 2009 | 5 comments ]

Raphael's Ministry, Dawrpui-te buatsaih Gospel Concert chu hlawhtling takin June ni 4, 2009 (Ningani zan) khan Dawrpui School tualah neih a ni a. Magdalene, Dr. Luke, Drop Doubt bakah zaithiam chi hrang hrang an zai.

MNF Home Coming-I

[ 04 June, 2009 | 7 comments ]




Dawrpui Bara Bazar phei Lalhema dawr kawt vel bawr