Dialysis

[ 28 November, 2009 | 3 comments ]

Dialysis tih hi mizo tawngin a awm lo va, chuvangin kal(kidney) thuahfaina a ni ber mai a. He thil hi a tangkaiin nunna pawh a chhan hnem ta hle. Kal a tha lo kan tih hian thisena bawlhhlawh leh paih tur ho kha paih thei lovin a luang tlang ringawt a. Tui te, bawlhhlawh te, a paih chhuak tur a ni a. Mahse, taksa a bikin liver (thin) tha lo te, amah kal hrim hrim tha lote leh natna dang dang vangin a khawl hi a tawp hmak thin a ni. Chutiang a lo nih chuan, zun a insiam ta lova, zun aiah taksa pumah a kal kual a, an vung ta bur thin a ni.

Taksaa bawlhhlawh awmte paihchhuah loh a lo nih chuan reilote ah unconcious (engmah hrelo) in an awm ta mai a ni. Hemi, kal (kidney) thawk theilo hi Dialysis khawl hian a thawh sak ta a. Thisen zawng zawng hi khawlah a kal kual a, a inthlifim-a, kal pawh zawi zawiin a lo tha ve leh a, an dam ve leh mai thin. Mahse kal (kidney) kha engtinmah thawk thei tawh lova chhia a lo nih chuan, kal thlak a nih loh leh nunin a tlin loh hun a awm thin a, kal tha lo tam tak Dialysis vanga dam leh hi an tam em em tih hriat tur.

Tunah chuan kan Hospital a changkang ta hlawm a, heng khawl tha te hi kan nei ta a, nunna tam tak chhan a ni ta reng a ni. Dialysis tih laia a bawlhhlawh paih chhuah han hmuh chuan rapthlak khawpin a bal a ni.

Heng zawng zawng piah lamah hian Dialysis ngailo turin, zuk leh hmuam, zu in te sim a, tui leh thingpuisen hang a tam thei ang ber in tum tur. Tichuan, i lo hrisel ang a, Dialysis khawl hi i mamawh lo mai ang.
- Dr Thangchungnunga, MS (Ortho)

Rs.25 lakhs sanction tawh

| 10 comments ]

Nov. 26. 2009 (Zirtawp) zan dar 7:00-ah Dawrpui Multipurpose Centre Demand Committee chu Dawrpui School, YMA Committee room-ah neih a ni a.

Hetah hian hmalakna hrang hrang report ngaihthlak a niin, Pu Malthantluanga, Vice President, Dawrpui V.C. in Sorkar lam atanga lehkha rawn lut te leh hmalaknate report a pe a. Local Administrative Department-in Park siamna atan cheng nuai sawmhnih panga (Rs.25 lakhs) an rawn sanction tawh thu a sawi a, Demand Commitee chuan lawmawm a ti hle a ni.

Hmalak zui zel dan tur sawi ho a ni a. Chaktaka hmalak zui zel a tul thute sawi a ni a. Sorkar leh khawtlang indawrna chungchangah Village Council hnenah engkim thlen vek thin a nih tawh avangin Committee chuan DMCDC aiawhin Dawrpui Village Council leh Dawrpui Multipurpose Centre Demand Commitee Office Bearers ten a tul angin chak takin hma lo la se tih a ni. He hmalakna hi Village Council kaihruainain kalpui nise tih a ni bawk.

Dawrpui Joint Committee Thuchhuak

| 5 comments ]

Nov. 23, 2009 Thawhtanni zan khan Dawrpui khawtlang hruaitu hrang hrang VC, YMA, MHIP, MUP- te Joint Committee Dawrpui School-ah neih a an thurel thenkhat vantlang mipui hriat awmte kan han tarlang e :-
1] Vengchhung Chei : Krismas vuakveta veng chhung chei tha tih a ni a. Kum danga kan lo chei tawh Bazar Bungkawn chei leh ngei nise tih a ni a. Heng a hnuaia mite hi mawhphur tura ruat an ni :-
Conveners : 1. Pu Rosangliana (Masanga) & Pu Rothuamliana
Secretaries : 1. Pu KL Zamvela & Pu Vanlalbika
Treasurer : Pi Zosangzuali (Baby-i)
Heng te hian a tul angin phungbawm an siam thei anga, a chei hun tur leh a chei dan tur pawh an kuta dah a ni.

2] Ramri Chhinchhiahna : Dawrpui veng ramri chhinchhiahna a remchanna hmun apiangah tar leh nise tih a ni.

3] Vengchhung Venhimna : Dawrpui Vengchhung kawng hrang hranga alo thianghlimna atan leh vengchhungah Ruihhlo lo hluar zel dona atan New Market Area-a Duty turin Excise Force-te VC ten dil se tih a ni. (Kan VC-te hian an bawhzui nghal a, a rang lama tihhlawhtlin tum mek a nih thu kan dawng - Admin)

Pu-Tea kan chan ta

[ 24 November, 2009 | 6 comments ]

Tv. Joseph Lalhmachhuana (Tea) hi Pu P.C. Thandanga leh Pi Laldingliani (L) te fa, unau paruk zinga palina niin May 10, 1967 khan Civil Hospital, Aizawl-ah alo piang a. R.B. School-ah zirna tan ve in, Assam Rifle School-ah kal chhunzawmin a hriselna a that vak loh avangin Class - V bak chu a chhunzawm thei ta lo a ni.

Amah hi naupang zaidam leh nunnem tak, nu leh pa leh unaute hmangaih tak, thuawih thei tak a ni a. A nu khan hmun hran hrana hna a thawhna Sairang leh Serchhipah te a zui ve zel a. Sairang a an awm lai hian a mitah Balu an ti lut palh a, chuta tang chuan a mit hian a that loh hlen phah ta a ni.

A hriselna a that vak loh avang hian Delhi leh hmun dang dangah pawh check-up neihpui a ni tawh. Khawtlang leh Kohhran tan a phak ang tawk tawka in hmang ve tlat mi a ni a. Kohhran Zaipawl leh hnatlan nikhuaah a dam phawt chuan tel ve ngei ngei thin, thulh duh ngailo a ni.

Tunhma deuh atang khan a hriselna hi a tlahniam deuh a, a thawhah avangte in Damdawi inahte pawh lutin enkawl alo ni tawh thin a. Meizial hi a nghei thei tlat lova, tunhnai mai khan a thaw a hah zual a, Nov. 23, 2009 (Thawhtanni) pawh khan Doctor entir a ni a, chutah pawh chuan kalkawng kal ringawt pawh a chauh pui mai zel a. Nizan (ie.23 Nov) pawh khan rei vaklo chu lengchhuakin tui takin a mu a. Tukin zing (ie. 24Nov, 2009) dar 8: 00 vela kaithawh an han tum chuan a tho thei ta lo a ni.

Dawrpui Khawtlang dinhmun

[ 22 November, 2009 | 9 comments ]

Dawrpui Khawtlang dinhmun hi kan sawifo thin a, thenkhat thengathawngah a lut lo mai thei? Mahse, sawifo a ngai si a nih hi. Hengte hi lo zirbing ve teh u, engtin nge kan tih ang?

1] Nov 14, 2009 (Inrinni) khan VC leh YMA Ex. Committee member leh Section OB ten nilengin Dawrpui vengchhunga Dawrkai an dawr bak a Varandah vela dawhkan leh thil zawrh dahchhuakte ti tawh lova, mipui tana hmunawl tam zawk kian ve tura ngenin nilengin an fangkual a. A tirah chuan an han ti ve mai a, reilote hnuah a ngaite bawkin an tizui leh mai a. Hah man a awm lo hle. Hemi chungchang hi kan VC ten an bawhzui zel dawn niin kan lo hria.

2] Sualna a pung nasa a, kan vengah rukruk leh ruihhlo zuar leh hmang thinte an huangtau hle a. Veng mipui nun a ralti ta lek lek mai! Kan YMA leh VC ten theihtawp an chhuah mek a, mipui ten kan theihna chin chinah i thlawp tlat zel ang u. Tunlai hian YMA lamin zan lam Duty a ruahman a, kartin Thawhlehni zan leh Zirtawp ni zan Duty hun a ruat a, hminghmerh in mahni Duty hun pawh an ruat a. Mahni Duty hun nana chu ngaipawimawh tlang ang u.

Tin, Nov 21, 2009 Inrinni khan VC huaihawtin khawtlang nun siamthat chungchangah kan vengchhung YMA, MUP, MHIP Leader KTP & SAY, FXB, SHALOM, VOLCOMH etc. Joint Commitee an nei a ni.

Rulhut - II

| 11 comments ]

Rulhut hi tun hma Rambuai hma leh 1970’s thleng kha chuan kan ngah em em mai a, e chhuak loa ram pawh an awm lova, a thente phei chu ka lamahte alo chhuak hial a nih kha!

Tunah chuan a bikin khawpuiah chuan Rulhut kan tih bik (Ascaciasis) hi chu a awm ta meuh lo. Rulhut hi chi hrang hrang a awm a: Asearis te, Pinworm te, Hookworm te, Tapeworm te an awm a. Mizorama Rulhutpui kan tih chu tapeworm kan tih hi a ni a. Sei tak tak, chang rek thlik thlek an ni a, ran hian an pai tam bik.

Kan nun a lo changkangin, kan ei leh in te alo thianghlim ta bawk a, rulhut e chhuak an vang ta hle. A bikin naupangte hian an la nei tam deuh a, hei pawh hi tun hma ang em em chu a ni tawh lo. Hetiang rulhut kan ek chhuah loh vang ngawt hian kan pai lo tihna a ni lo a. Pinworm, hookworm-te hi mita hmuh mai harsa a te (small) an ni a, hengho hi kan pai deuh vek zawk a. Pum nuamlo, ti teuh teuh kan neihte, thin thip te a siam thei a. Tin, Vawk bawl kan tih ho hi hemi tapeworm tui (eggs) hi an ni a. A thi har em em a, chhum so chiam pawhin a thi thei lo, vaivut zingah pawh kum tam tak a awm thei a ni. Kan ei veleh pumpuia acid hian a kawr tuamtu alo chiah ral a, a note chu alo chhuak a, a lo thang lian ta thin a ni. A then chu thisen dawtah te kalin thluakah te, taksa khawi lai laiah emaw an tawp a, an awm ta reng a, thluaka a luh phei chuan buaina a siam thin a ni.

Tin, hookworm hi ke zungtang karah hian an lut a, tunhma chuian Bawng ek leh chirh diaka tuikhuah naupangin an chin/uar lai khan a tam a. Tunah chuan nausen tet atangin pheikhawk kan bun ta a, kan vei ta meuh lo ani ber. Pinworm kan tih hi mawngmirh kan tih hi a ni a. Hei erawh hi chu ala tam hle; ei leh in thianghlim loh vang a ni. Rulhut hi a tirh berah chuan Kelin a nei a, kel ek kha vawkin a ei a, an inkaichhawng zel a, kan ei tur thlaiah te, an lo kai ta thin a ni. Mahse hei pawh hi kel leh vawk khuahkhirh lohna khuaah chauh a hlauhawm tawh tih hriat a tha. Mihringin alo kai khan a e chhuak a, Ui in a lo ei a, a kai ve leh a, ui nen kan chengho leh si a. Hetiang stage hi chu Vawk khung lo, ek in nei lo khuaah a tam a, mahse Mizoram chu tun kum 20 chhung hian ek in nei lo khua an awm tawh lo a tih theih hial awm e.

Chuvangin, Aseacis (rulhut) kan tih bik tak hi chu a rampum ang pawhin kan ngah ta lo a ni. Chuvang chuan mahni a lo inenkawl ve dan tam tak a awm a, kut silfai ngun te, Rulhut hlo (eg: Albendazole )-te hi mum khat ei a tawk mai a. A ei dan chu regular taka thlaruk danah ei tur a ni. Chaw bel khat zen ho chuan zan mut dawnah a ruala ei thap a, zingah ek ngei ngei tur a ni. Mawngmirh hi a dam har a, Mebendazole hi a tha a. Ni khatah vawi 2 ei a, ni 3 ei tur a ni. Kum 1 ah vawi hnih tal tih tur a ni. Tunhma a rulhut hlo hlauhawm - fanghma, thingfanghma ei loh tur tih ang chi kha chu an siam tawh lo. Heng damdawi hi chuan engmah a hal lo tih hriat tur. Kum 2 chung lam chuan mum 1 ei a tawk a, kum 2 tling lo chuan a phel emaw a tui bur chanve ei tir tur. Naute an bawkvak thei tih atang hian engkim an ei a, ar ek te, lung te, ui ek rote an ei a. Chuvangin a kai hma ber ber an ni tih hriat tur a ni.
- Dr Thangchungnunga, MS (Ortho)

Pu Ni-a kan chan ta

| 2 comments ]

Pu Lalniliana Sailo hi thlahtu lamah chuan Pawibawiha Sailo Lal thlah kal zel niin, Buhban Lal, Lalchi-a Sailo (L) leh Thangliani Sailo (L) te fatlum ber a ni. Kolosib nula Rosy Lalrammawii d/o Lalrochhunga ASI (L) nen inneiin fanu pathum an nei.

Kum 1956-ah an chhungkuain Churachandpur, Manipur-ah pemin, 1966 khan a lo piang a, pianpui unaute 6 a nei. Zirna Vairengte High School atanga Matric zir zovin, Kolkata-ah PU (Arts) a zo va. Chumi hnuah kum 1988, April ni 13 khan Mizoram Police Constable a zawm a. Departmental exam-ah tlingin kum 1991, September ni 5 khan ASI-ah kaisantir a ni a, a hnathawhnaah hian Pathian khawngaihna leh tanpuina, hotute duhsakna a dawng nasa a. Ni 19, September 2000 khan Departmental exam bei leh in tuna a chelh lai SI hna-ah hian kaisantir a ni leh ta a ni.

He hna a chelh chhung hian Mizoram hmun hrang hrangah dah a ni a. March 2009 khan Darlawn Police Station-ah OC dah a niin a boral thleng hian a thawk zui ta ni.

Pi Ni-a hi an hlawh la turin ni October 30, 2009 khan Aizawlah a rawn kal a. Nov. 4, 2009 khan a lu a na vak mai a, a luak bawk a. Darlawn damdawi inah dah luh a ni a. Aizawl-ah lakthlak a niin, Vaivenga Memorial Hospital-ah dahluh a ni a. Hmun pui zawk pan pui tula hriatna avangin thlawhna in ni 10.11.2009 zing dar 9 khan Guwahati panpui a ni a. ICU-ah dah nghal a ni a. Hemi zan la la hian ICU atang chuan ICCU ah sawn leh a ni a. A lu chhunga thi put chu tih reh mai theih a nih loh avangin a lo chau hret hret a, Nov 16, 2009 (Tawhtanni) zing dar 2 rik dawn chuan a natna tuar lovin chatuan ram a lo pan ta a ni. A ruang hi Guwahati atanga Motor-a phur chhoin Nov 17, 2009 zing dar 7:40-ah an chenna Police Qtr. thlenpui a ni.

NLUP hmahruai : Vawk vulh tanpuina Dawrpui ah

[ 20 November, 2009 | 16 comments ]


Mizoram Sorkar Scheme lian leh pawimawh tak, Zoram mipuite chawikanna tur NLUP chu a hmahruai (Vawk vulh tanpuina) tiin Sorkar chuan Aizawl khawpui chhungah a sem chhuak ta a, kan veng atang pawhin mi pariat (8) in Rs. 8120/- theuh (a vaiin Rs. 64,960/-) an dawng a, kan bial (Aizawl east II) huamchhung ah mi sawmruk (60) hnenah Rs. 4,95,320 /- sem a ni.
Hetih lai hian Agriculture Minister Pu H. Liansailova bial (Aizawl North II) ah chuan cheng nuai sawmhnih pathum chuang sem a ni a, kan bial nen chuan a inthlau khawp mai.

Chhura sul hnu

[ 17 November, 2009 | 18 comments ]



Pu Chhura Lung (Sialchal-a phun) ......................Chhura Chi Rawt Lung (Farkawn)

Chhura Ke Hniak

Ha chungchanga hriattur

| 1 comments ]

Flouride :
Flouride hi tui (natural water) -ah te hian a awm a. Kan hriat miah lohvin kan ha tan hian a lo tangkai ve em em mai a ni. A tawk tea kan taksa a a lo awm hian kan ha hian a lo thatpui em em a ni. Flouride tel Toothpaste/Powder leh Mouthwash (Entirnan : S-Flo) te pawh a tha. Hengte hian ha nget venna kawngah nasa takin a tanpui a ni. A nih tur aia tam (excess) flouride hi kan tui inah a lo awm erawh chuan, kan tuar ve leh hlauh thei thei thung a ni. Naupangin Toothpaste lem a chin tlat chuan ‘Non-Flouridated’ tih inziahna hman mai tur a ni.

Enamel :
Enamel hi a insiam fel tawh chuan amahin a in repair ve thei tawh lova. Ha nawhdan diklo avangte in a hek thei a, ha a nget kher loh pawhin a lo pan a (a bikin hapui), kan ei leh in azirin a lo chik ve thei bawk a ni (Entirnan: Sahdah, Khaini, Tuibur, etc.).

Dentin :
Dentin hi chu kan damchhung hian a insiam reng a. Amah tuamtu ber Enamel awmlo chuan a za (Sensitive) em em a ni.

Pulp : Pulp hi Dentin chaw pe tu ber leh repair hnthawktu a ni a. Amahah hian timur (Cells) leh Blood Vessels, Nerves etc. te an awm a ni.

Cementum : A langlo lama Dentin tuamtu a ni.
- Dr Mary

Zorini weds AwP-a

[ 13 November, 2009 | 8 comments ]

Zorinpuii d/o Upa R.Zodingliana leh Pastor R. Lalawmpuia (Hunthar) te chu 12 November, 2009 (Ningani) 1:00PM khan Kohhran Dan Thianghlimin Hunthar Veng Presbyterian Kohhran Biak Inah Biak In hawngin an innei.



Zorinpuii hi Dawrpui Branch KTP Comm. member leh Bial Zaipawl member nilai a ni a. Pastor R. Lalawmpuia hi Khawbung Pastor Bial Bialtu a ni.

Dawrpui KTP 54th Rising Day

[ 12 November, 2009 | 9 comments ]

Dawrpui Branch KTP chuan an Branch din champha phak vawi 54-na 9 November, 2009 khan an hmang a. Rising Day denchhen hian Group hrang hrangte - Quiz, Extempore Speech, Drawing, Photography, Hla inphuahsiak, Article, Photography leh video tawi (10mins) insiamsiakah te an intihsiak a. November ni 7 (Inrinni) khan Kohhran Fellowship Hall-ah Presbyterian Hospital, Durtlanga hman tur atan thisen unit 53 (Mipa 47+Hmeichhia 6) an pe bawk a ni.

November ni 8 (Pathianni) Sunday School bana Photo Exhibition buatsaih chu Kohhran mipuiin an hlut hle a. Photography intihsiakna chu member ten secret ballot-in vote an thlak bawk a ni.


Rising Day hi Nov. ni 9 zanah Extension Hall-ah programme chi hrang hrangin hman ani a, Day Cake siam niin an Upaten an zei zawhah an Branch OB-te an barh a, annin an barh let ve bawk a ni.

Inkhawm banah thingpui ruai buatsaih a ni a, Biak in hnung tualah Group hrang hrangte video tawi insiamsiak projector-in an enho a, result puan bawk a ni.

Dawrpui Branch hian an Rising Day hi vawi 1 an lawmna a ni a, an din kum/ni leh thla chiah an hre thei tawh lova. Mizoram buai lai khan an document pawimawh tak tak a kanral bakah a bo nual a. Hruiatu hmasate sawidan a inchen loh bawk avangin kum 2009 Branch Comm. chuan November Thawhtanni hmasa ber dawttu apiang hi Kohhran Committee-te remtihpuinain Branch din ni-ah pawmin kum tina lawm tawh tura buatsaih a ni a. Kum 2005 khan kum 50-na (Golden Jubilee) ropui takin anlo lawm tawh bawk a ni.

Happy Birthday A_es

[ 09 November, 2009 | 9 comments ]

Vawiin November ni 9 hi kan admin Lalrinsanga (Asanga) a.k.a A_es pianchampa (vawi sawmthum leh engzat na nge ka hre chiah bik lo) ani a. Kan lawmpui em em e. Kan admin dam reng rawh se.

Rising Day Blood Donation

[ 07 November, 2009 | 10 comments ]

Dawrpui Branch KTP chuan an Branch din champha Vawi 54-na denchhenin vawiin (ie.7 Nov) hian Presbyterian Hospital, Durtlanga hman turin 'Blood Donation Camp' an Kohhran Fellowship Hall-ah hman a ni a. Thisen pete hi mipa 47 leh Hmeichhia 6 te an ni a, an zavaiin 53 an ni.

Thisen pek tuma hming ziak hi za chuang an ni a, pe theilo an awm nual bawk a ni.


Rising Day hi November ni 9 (Thawhtan) zan hian ropui taka lawm tum a ni a. Hemi denchhen hian Group Intihsiakna - Quiz, Hla phuah, Extempore Speech, Article/Essay, Painting & Drawing, Photography leh Film siamahte intihsiakna an nei mek bawk a ni.

Social Health (Vantlang hriselna)

| 0 comments ]

Social health kan tih hian vantlang, khawtlang mipui hriselna a ni a. A enna ber pawh chi hrang hrang a awm a. Tunlai kan Zoram social health chu a chhe hle tih a hriat a. A tehna pawimawh ber chu mahni intihlum (sucide) an tam em? Kumin hian inawkhlum an tam em em tih kan hria a, a dawt lehah chuan nupa inthen, uire, sawnpai (sex hman dik lohna) leh naupang piangsual leh pawngsual hrim hrim. Heng pawh hi kumin hian kan ngah hle tih a hriat a, a dawt lehah chuan rukruk leh tualthah a ni a, hei pawh hi kan hai awm lo ve. Tin rilru hah avanga nun hrehawm intihhlum ngam meuh si lote kan tam tih a hriat a. Tin naupang lamah sikul dropout (sikul kal peih lo) fail tam lutukte heng ang hrang hrang hi social health tehna kawng khat a ni a. Thil dangte pawh veng /khawfai leh fai lote pawh a ni tel thei zel ang chu.

Heng kan han tarlan hrang hrang atang hian lo thlir ve la kan Veng, kan khua, hi a hrisel em tih chu i hrethei mai ang a. Engtia tih hrisel tur nge? tih hi a ni ta a ni.

A hmasaber ni a ka ngaih chu taimakna leh rinawmna kan tlachham a, hei hi sim i la, sum leh pai awhna leh kut tlinglova pawisa hmuhna leh hmuh tumna rilru hi bansan i la mahni chan tawkah tih tak zeta kan thawh chuan lungawi tum ila, chantawka lungawilo hlir awm khawm kan ni ang tih a hlauhawm hle. A tawp berah chuan kan Pathian biak dan pawh tihtak zet leh rilru zawng zawnga kan tan that a ngai a ni, nangmah i in hmangaih anga i vengte i hmangaih emaw, i chunga an tiha i duh tur ang mi chunga i tih zat zat chuan i lo hrisel ang, nang malsawmna ni ang che tih kha sawi lovin nangmah kha ilo ni mai zawk dawn a ni.
- Dr Thangchungnunga, MS (Ortho)

Min kang em, hmehmih chi em?

| 7 comments ]

In a kang e..... tih hnuah chuan a lo kang hluah hluah tawh thin a, in a kang dawn e.... tih chuan a la kang tan dawn chauh tihna a ni a. A thelh mih leh pawh a awl deuh thin.

Dawrpui vengin hun engemawti atang tawh khan han hawi thawvenna tur leh kan thalaite han inhnangfakna tur hmunawl remchang tha kan ngaihven thin a. Hmun remchang tak mai tura kan ngaih tuna sorkarin ruahmanna min siam sak tak Medical Quarters tlang pawng, tunhmaa ‘Virmep tlang’ an tih thin chu kan han mit sir tan a. Minu, pawmlai nei han beisei ngawt chu a huphurhawm duh khawp mai. Khatih hunlaia (tunah) kan Br. YMA President hovin ti ti phunglengin kan sawiho thin a. Kan in rawt phur thin hle.

Khûn khân zawk leh awmze nei zawka ngaihtuah chhoh zel a ni ta a. Khawtlangah awmze nei zawka kalpui anih theih nan tiin V.C leh NGOs in he thu hi kan buaipui ta a. Vantlang inkhawmte hial kovin committee lian Dawrpui Multipurpose Centre Demand Committee (DMCDC) chu din a lo ni ta a. Khatih hunlaia (tunah) kan YMA President chu Chairman niin, VCP chu Vice Chairman atan ruat an ni a.

Kan vei tlang bawk a Chairman (Br YMA President) te ina kan thutkhawm tawh chuan thudang hi a leng lo ani ber. Zan khat pawh kan thukhawm zo, a then demand area lam kan pan a, a then Medical Superintendent hmu turin kan kal bawk a. Azan azanin Demand Area-a hnawmhnawkte han tifaiin a tuk a JCB lai zawl tir deuh dan turte han ruahman pahin Ban kan han phun a, lehkha kan han tar ve ngawt a. A hnuah chanchinthar lamah a langang tih lam reng ngaihtuah lo chuan kan Minu pawmlai nei rim chu kan han luhkhung a ni deuh der mai a. Hemi in a nghawng kal zel dan leh kan thalai in hawrkhawm in Bazar Bungkawn a Motor kal an dan zana boruak tidai tura kan MUP hruaitute in Upper Bazar a emergency committee kan neih hnu a, kan thalaite boruak tidai tura kan chhuk thlak tak hnua thilthlengte kha aw!!! Kan thalai fel tak takte leh kan hruaitu thenkhat hliamtuarte kha an zahawm ka ti, kan hrereng ang.

Khatiang boruak kaltlanga kan lo sual ve kan Demand chu tunah kan sorkarin ruahhmanna min lo siamsak dawn ta a. A lawmawm khawp mai (Hurray!!!). Chutih lai erawh chuan DMCDC thiah a nih leh nih loh pawh kan sawiho hma leh a bul atanga sul lo su ve tute nen a in râwntlânna pawh awm lova kan Multipurpose Centre chungchanga kan khawtlang hruaitu thlan thar ten hma an rawn la ta daih mai hi hriatthiam a harin a leh a ling a vuttuithlawrbel ang em chu ni lo mahse a iang a ni? Hma lak zelna turah chuan kan hmahruaitu turte chu an ni tak meuh mai a. Ama’rawhchu, he kan hlawhtlinna hi Politics lama hlawkna a hruaikawi tumna lam a ang mange? a tih theih a. A him ber em? Kei chu kan veng hi politics tuinu a a pil hi ka phal lova. Zonunzemawi, Dawrpui venga bet tlat hi hun lo la kal zel tur atan a chhawm nun tlak zawk angem? ka ti. Hei mei de re re hian min kan nasat hma hian....lo dawn ve teh?
- Awmawma Pa, Dawrpui ‘S’

Teteii Weds Rohminga

[ 05 November, 2009 | 13 comments ]

Vawiin (ie.5 November, 2009) chawhnu dar 1 khan Laldinpuii Ralte (Teteii) d/o Upa Dr. R. Lalzauva (Dawrpui West) leh Rohmingliana Pachuau (Republic) te chu Kohhran Dan Thianghlimin Republic Presbyterian Kohhran Biak inah an innei.