STROKE

[ 20 March, 2010 | 3 comments ]

He tawngkam hi Mizovin a anpui kan nei lova, Stroke kan ti zel tawh mai ang chu. A nat dan hi vawi leh khata engmah hre lova tluk thut emaw taksa chanve che thei lo emaw, tawng tha thei lo, taksa puma che tha theilo, zeng ang deuhin a rawn awm thut thei. A chhan hi tam tak a awm theih laiin an lo zen chhan ber hi chi hnihin a thliar theih a. Pakhat chu thisen dawt bal (Clot) thisen khal emaw in a hnawh thei a, pakhat leh chu thisen dawt a puak keh thin a ni.

Thluak hi pahnih a ni a, vei lam leh ding lam a awm a, a lai hi a kawrawngin tui luanna kawr ang deuh, engmahin a khuh ve loh laiah hian luruh phek chungah thisen dawt pali thluak supply-tu a inphah a. Hei hi a kualin a inzawm vek a, ‘Circle of Willis’ an ti. Taksa danga thisen dawt hi chu a vengtu, tuamtu tihrawl leh thau a awm a, an tuam bet tlat a, thluak ami hi chuan tuamtu a neih ve loh avangin BP sang thutah te a puak keh mai thei ta a, chu chu Stroke awm duhna chhan a ni fo. Tin, Diabetes (Zun thlum) te, lung chaklo te, Cholesterol (Thau chhia) taksa a tam lutuk hote hi thisen dawt atanga a tawlh sawn emaw, thlawn emaw chuan helai kualah hian a tang duh bik a, Stroke siamtu chu a ni ta tho mai. Chuvangin Stroke theuh theuh a puak keh leh a hnawh ping chi hi a enkawl dan a dang daih a, mahni rin thu a, mi stroke damdawi ei ang lo ei ve ngawt te hi a tih chi loh.

Tin, lung thalo leh zai (Operate) tawh hote Aspirin tab an ei tir reng nachhan hi thisen khang palh a awm anga, stroke emaw lung supply-tu thisen dawt a hnawh pin an hlauh vang a ni ber. Hei hian a entir chiang tak chu, sa leh sathau, vawksa thauah hian Cholesterol hlauhawm ber a tam bik a, taksa fit lo lutuk te, thau lutuk te, taksa che tlem lutuk te a tha lo tih a hriat theih ta mai a ni. Chuvangin i ha kha bawng ha ang chauh a siam a ni a, sa ei tura duan chu kan nih loh hmel. Sa ei chi chuan ngho leh ha hriam tak an nei zel ang, mahni in enfiah rawh.
- Dr Thangchungnunga, MS (Ortho)

Finga weds Dami

[ 19 March, 2010 | 1 comments ]

Lalfingfela leh Laldampuii, Dawrpui West ve vete chu 18 March, 2010 (2:00PM) khan Dawrpui Presbyterian Kohhran Biak inah Kohhran Dan Thianghlimin an innei.

Cheraw hmanga World Record

[ 16 March, 2010 | 10 comments ]

Ruahman lawk angin March ni 12, 2010 (Zirtawpni) khan Mizoram chuan khawvel a la thleng ngai reng reng lo, a ruala Cheraw kan tam ber leh thui ber chu hlawhtling taka neiin mi 10736 hmangin World record thar a siam ta!

Cheraw hmangin Mizoramin world record thar a siam ta a ni tih hi March ni 12, 2010 (Zirtawpni) tlai dar 3:00 khan Guinness World Record aiawha lo kal Adjudicator-in Aizawl sipai lammuala lenglo Mizo mipui kalkhawm hmaah puangin Art & Culture Minister P.C. Zoram Sangliana hnenah certificate a hlan a, ri thei zawng zawng khawnga hlado chhama, tlangtlirin, ‘Lalpa’n thil ropui min tihsak e..” ti a, zaia lamin lawm zui nghal a ni.

Cheraw hmanga World Record siam tur hian hun rei tak atang tawhin inbuatsaihna kalpui a ni tawh a, fak selna tam tak karah March ni 12, 2010 (Zirtawpni) chhun dar 12:00 atangin A.R. Lammual bakah Sikulpuikawn leh Chanmari kawn inkarah Cheraw hmanga World Record siam tura inbuatsaihte chu inrem tanin vawi thum enchhinna neih a nih hnuah chawhnu dar 2:00-ah World Record siam turin Cheraw Kan pui chu neih a ni a, chumi hnuah vawikhat dang kan lehin A.R. Lammual lamah Zai leh lamin hun hman chhunzawm a ni a, chawhnu dar 3:00-ah Cheraw hmangin Mizoram chuan World Record thar a siam ta tih chu puan a ni ta a ni.

AR Lammuala hun hmannaah hian zaithiamten Mizo hnam hla hrang hrang an sak chu mipui lamin lama zawmin Zira Hnamte in a lo larpui tawh ‘Sudden Muanga, Champion of The World’ a sak chuan kalkhawmte a ti phur hle.

Cheraw hmanga World Record siam tur hian Dawrpui Veng pawh theihtawpin a inbuatsaiha, V/C, YMA leh nu leh pa leh khawtlang mipui tanrualna leh thawhho thatna avangin Bu sarih (7) kan thawhchhuahpui thei a, Bu 1-ah hian a khawngtu mi 8 leh a kantu mi 8 zel an awm a, bu tin viltu leh flag kengtu nen bu khatah mi 18 zel an awm a, engemaw avanga thlak ngai an awm palh thulha thlaktu tur mi 9 nen Dawrpui thalai 135 te chu Cheraw hmanga World Record siamnaah telin kan vengin Cheraw kan thiam leh khawng thiam thalai 135 chu chiang takin kan nei ta mek a ni.

Santen Benvawn

| 1 comments ]

He natna Santen benvawn kan tih mai hi Mizote hian khawpui leh thingtlangah pawh kan nei/vei deuh vek emaw tih tur khawpin pum nuamlo hi kan nei nasa hle mai. A then phei chu Giardiasis Santen hrik ve thote hi a tam a, hmeichhe serh atanga bawlhhlawh var chhuak thin tam ber pawh hian Santen Giardiasis/Amoebiasis hrik an pai reng a, a inhnaih bawk si a, an vak lut phei ve thin a. Chutiang a nih chuan bawlhhlawh chhuak an lo nei ta a. Chhul diklo hrim hrim pawh an awm tho laiin a tam ber chu in silfai tawk loh vang a ni tlangpui thin.

Santen vei reng reng chu pum hian nawm lai a nei lova, chaw ei te hian a puar tung a, ek pawh mum hil hel, a chang leh tui deuh phirh pherh te a ni deuh reng thin. Heng ho hi chu hmeichhia an nih chuan bawlhhlawh chhuak an nei tlangpui bawk thin a, rulhut (Pin Worm, etc) te pawh an vei tel chawk thin.

Mawngmirh kan tih mai hi rulhut chikhat, tunlaia mit lawnga hmuh theih awm chhun a ni ta a. Kan changkan tawh avangin tun hmaa rulhut sei pui pui ang chi kha a awm ta ngai lova , a lawmawm hle. Heng ho hi pum nuamlo teuh toh leh chaw ei tui lo leh nuam mang lovin an awm thin a. Chuvangin, i ek kha ektum tha tak a nih loh chuan santen benvawn emaw rulhut te tak te, mita hmuh tham loh ho hi an vei a ni ber a, in enkawl vat a, Doctor rawn a tha.

Tin, kut silfai hi kan uar lo lutuk a, kawchhungah phei chuan natna hrik hi khawi laiah pawh a awm ti ila a sual vak lovang. Chuvangin thil bawlhhlawh deuh nia lang i khawih chuan kut sil hma chu engmah ei lova kut sil nghal zung zung hi ching tawh ang u.
- Dr Thangchungnunga, MS (Ortho)

KTP General Conf. Vawi 53-na

[ 15 March, 2010 | 4 comments ]

KTP General Conf. Vawi 53-na chu 4-7 March, 2010 chhung khan Mamit-ah tluang taka neih a ni a. Palai kal that ber tum ala ni awm e. Dawrpui Branch atang pawhin member 53 (mipa 31 & hmeichhia 22) an kal thei a, Conf. kal nan hian Bus 1, motor-te 2 leh 2 wheeler 10 an hmang ani. Dawrpui Branch thlen khawmna hi Middle School III, Dinthar Vengah a ni a, pandal atangin 5km vela hla a ni.

Dawrpui Branch atangin Dr. Zothansanga chu vawi hnih zaina hun a nei a, Pu Lalthlanga, CKTP c/m (Dawrpui Branch Leader) in thusawi tawi tha takin a nei thei bawk a. Bial aiawhin Ten Strings (Zarkawt Female Band) ten Live music tha takin an nei thei bawk a, mipui lawm an hlawh hle a ni. Kum 2010-2011 CKTP Committee member atan Dawrpui Bial atangin Pu Lalrohlua (Saron Leader) chu thlan chhuah a ni bawk.


2009 Bial report Khaikhawmnaa Dawrpui lanna thenkhat :-
i] Branch tlemna Bial - Dawrpui Bialah Branch 3 a awm
ii] Member thi tam ber - 12
iii] Bial chhunga Branch zawng zawng Chanchinbu chhuah kim thei
iv] Hmun dang aia Biak ina innei tamna Bialah 12-na (22/20)
v] Bial hminga Sum thawkchhuak tamah 3-na (Rs.2,53,401)

vi] Branch Sum thawh chhuah tamna Bialah 2-na (Rs. 22,43,856)

vii] Bial leh Branch Sum thawh chhuah tamna Bialah 2-na (Rs. 24,97,257)

viii] Branch sum thawh chhuah belhkhawm member Pakhat zela chhuta thawk chhuak tam Bialah 1-na (Rs. 1,381.68)

ix] Kohhrana Sum chhung tam Bialah 2-na (Rs. 9,08,800)

x] Bial leh Branch Missionary chawm zat belhkhawm tamna Bialah 2-na (38)

xi] Member inkhawm that lohna Bialah 1-na (16.25%)

Blood Pressure (BP) - II

[ 06 March, 2010 | 2 comments ]

A hmasa khan BP- high blood pressure (Thisen sang/hniam) leh normal range kha kan ziak tawh a. Mahse kan sawi tawh angin keini Mongoloid leh sapho Eurasian chu kan in ang thei tak tak lova, Mizo hmeichhia phei hi chu 110/70 tih vel hi a tam ber pawl an ni a.

A pawimawh ber zawk chu, BP sang nih tawh chuan an thinlungin an vei reng a, rilrute a hah a, a san zual phah thei. Chuvangin, BP sanna chhan hi a tam em em a, sawi sen pawh a ni mai lo ang a, a tlangpuiin chhungkuaa inthlahchhawn deuh te, ei leh in - sa thau leh exercise la lo, fit lo lutuk te, buai lutuk leh rilru hmang nasa lutuk te, chuap lam that loh vang te, thisen dawt that loh vang te sawi tur a tam em em a. Raipuar laite, awrpuar vangte a ni thei bawk. Thil vang tak pakhat erawh chu pianpui BP sang sa, Kal (Kidney) dik loh vanga BP tisang thei a awm a; heng ang hi chu kum 15 an nih pawhin a sang viau tawh thin.

A tlangpuia khawpui mi aia thingtlang mi BP sang an tlem nachhan pawh hi, kan ei tha in mawm leh hmuihmer kan ei tam si a, kan che tlem si a, thau hian thisen dawtte hi a hnawhping thei a, hengte leh kan eizawnna lama rilru hah leh vei kan ngah lutuk hi a chhan pakhat chu a ni ber. Sathau rau rauah pawh Vawk thau hi taksain a huat ber, thau chhe chi, Cholesterol-te ti sangtu a tam em em a, chuvangin Vawksa thau hi chu eitlem a tha ber. Tin, BP sang tak tak i nih a, Doctor-in damdawi a chawh che a nih chuan tih tawp mai mai tur a ni lo a, i BP a normal reng tawh a nih pawhin damdawi zawk kha tih tlem ve hret hret zawk tur a ni.

Thisena in thlah chhawn chiah chu nilo mahse i chhungte BP sang an awm fur chuan, in-check tir ve ngei ngei tur, an sang duh bik thin. Heart attack lo awmna chhante pawh hi kan vawk thau ei leh BP sangte hi a ti tamtu an ni thin.
- Dr Thangchungnunga, MS (Ortho)