DAWRPUI KHAWTLANG HRUAITUTE THUCHHUAK

[ 26 April, 2010 | 5 comments ]

Dawrpui Khawtlang Pawl hrang hrangte chuan Multipurpose Centre chungchanga thil hre chiang mang lova Chanchinbua ziak ta mai mai an tam avangin thu chiang zawk mipuiin an hriat theih nan hetiang hian thuchhuah an siam.

Dawrpui Multipurpose Centre chungchang hi chanchinbu hrang hrangah vawi tam tak, a sawisel zawng leh a fak zawngte pawhin, a lo chhuak tawh thin a. He thil hi Zoram mipuiin kan mamawh leh Zokhaw lama kan unaute tana tangkai tur a nih avangin Dawrpui khawtlang ang hian kan chhang let ngai lova. Tun tumah erawh hi chuan ‘Dawrpui Veng Pa’ inti in khawtlang lungrualna tichhe zawng leh mimal sawichhe zawnga lehkha a tih chhuah avang hian thil nih dan tlangpui leh Dawrpui khawtlang rilru tih lan tulin kan hria a ni.

Aizawl Civil Hospital hi tun dinhmun a damdawiin kan neih len ber a nih avangin Zoram hmun tin atanga damlote pan thin a ni ngei mai. Chutih rualin kan Aizawl khawpui lun lai leh tawt tawh tak a Civil Hospital tih len belh ai hian tih changtlun hi keini Dawrpui khawtlang duh dan a ni, a chhan chu Hospital in a ken tel thli bawlhlawh tin reng dawng pha chin, keini a veng neitu te bakah, chhuah lam leh tlak lam veng thenkhat te tan chuan a tawrhhlelh awm tawh a ni, mihring hriselna atana tha lo thil tam tak hi kan lo buaipui fo tawh thin a ni. Tunah hian kan Sorkarin State Referal Hospital tha tak, kawngpui nuam tak minute 20 vel lek tlanah hman mai theih turin hma a la mek a, Urban Health Centre atana enkawl mek Aizawl chhim leh Hmar, Chhak leh Thlang a awm te tih chang tlun a tum mek niin kan hria a. Hetiang a nih chuan Aizawl khawpui hmun hrang hranga awmte leh Zokhaw lam unaute tan pawh pan zung zung a awlsam ngei ang.

Chhiatrupna/Accident lian tham a lo thlen chang te hian, Hospital-a thi leh hliam buaipui chungchangah, veng neitu nihna leh Mizo tlawmngaihna dik tak nen Hospital-a thawkte tanpui hi kan tih turah kan ngai tlat a. Amaherawhchu, hetiang hun a lo thlena han chet velna remchan loh zia kan lo hmachhawn fo tawh thin avang hian hmun zawl zau (Open space) leh chawlhbuk tha tul anga hman tur kan ram hian kan mamawh tak meuh meuh a ni. Zokhaw lama ruang thawnchhuah ngai an lo awmte hian, thlahna hun fel tak siamin Dawrpui khawtlang leh Kohhran te’n neitu chan changin kan lo buaipui thin a.

Tichuan, heng harsatna kan lo hmachhawn fo thin avangin V.C. te’n vantlang inkhawm kovin Dawrpui Multipurpose Centre din chu Sorkar-ah thlen turin a lo rel ta a. He hmalakna hi a chak theih nan tiin ni 19 April, 2007 khan a bawhzuitu tur Committee pawh siam a niin kan Sorkar hmasa hnenah pawh khan kan lo thlen tawh thin a ni a. He Multipurpose Centre hi Dawrpui veng ta bil nilovin Mizoram pum anga kan chhawr tangkai tur a ni. Zokhaw lam unaute, Aizawl khawpuia chhung leh khat nei thalote phei chuan an chhawr tangkai zual ngei ang. Dawrpui khawtlang hian Civil Hospital ram sah hek leh neih hi Sorkarah kan la dil ngai lo. Phai ram damdawi In lian leh changkang zawkahte chuan Hospital chheh velah hmun zawl zau, Park nuam tak thingkung leh Pangpar etc. damlo leh enkawltute tan pawh han hawi khaw thawnna, Doctor leh Nurse thawktu buai tak takte tan pawh a chhen fak awm hmun thawveng an siam thin.

Chuvangin, Dawrpui Multipurpose Centre hi Zoram mipui leh damdawiin ngei pawhin a mamawh a nih avangin tuna kan Sorkar hian Medical Compound kil khat (Tunhmaa ‘Pipu Tlang’ tih thin)-ah chawlhbuk, park nuam tak leh hmun awl tha tak awmna tur Dawrpui Multipurpose Centre, Mizoram mipui tan siam a lo rem ti ta a. Hemi chungchang a chak tak a hma latu kan Chief Minister zahawm tak, Pu Lal Thanhawla, min Bialtu Pu Lalsawta, Minister i/c Education, Pu Lalrinliana Sailo, Minister i/c H&FW; Pu Lalthanliana, Minister i/c LAD; Pu Lalzirliana, Minister i/c Home; Pu Zodintluanga, Minister i/c UD&PA; Pu John Rotluangliana, Dy. Speaker leh kan Chief Minister thawhpui zawng zawngte chungah Dawrpui khawtlang kan lawm tak meuh meuh a, lawmthu kan sawi a ni.

Amaherawhchu, Sorkar leh khawtlang inlungrual taka ke kan pen lai a “Dawrpui Veng Pa” inti in, thil nihphung hrechiang lova, khawtlang inlungrualna tichhe zawng leh min bialtu MLA/ Minister sawichhe zawnga a rawn ziak ta mai hi tha kan ti lova, Dawrpui khawtlang chuan kan duh lo a ni. Chuvangin, he lehkhathawn ziaktu mahni hming pawh ziak lang ngam lo hi Dawrpui Veng mi-ah kan ngai lo.
Kan Sorkar hian tunah chak takin hma a la mek zel a, Dawrpui khawtlang chuan Sorkar hmalakna hi kan thlawp tlat a ni.

Dawrpui Bial Inkhawmpui Vawi 85-na

[ 19 April, 2010 | 3 comments ]

A hmun : Zarkawt Kohhran Biak In
A hun : 16-18th April, 2010
Thupui : 'Engkima Lungawi' (Phil. 4:11)

Khawmpui Rorelin a passed-te :
1] Synod Inkhawmpui a lo zangkhai zawk theihnan, Synod Inkhawmpui Palai nisa, kum tina Board leh Committee atanga palai kal thinte hi Nomination Committee, SEC leh Pastoral huam lovin, hmun thuma thena hmun khat (1/3) zelin kum tina palaia inkalchhawk thin ni tawh rawh se - (Dawrpui)

2] Dawrpui Pastor Bial huapin Revival Inkhawmpui buatsaih ni rawh se. - (Saron)

3] SMB hnuaia Ramthar-a Pastor leh Pro. Pastor thawk tur hian Hindi B.Th./BD kher lo pawh a tam zawk lak theih dan zawn ni rawh se. - (Zarkawt)

4] Agape Home building sak that ni rawh se. - (Bial Standing)

5] Biak in hawng lova innei Dawrpui Pastor Bial-in zingkar chauha kan buatsaih thin hi Nupa Chungchang Dan anga kalpui ni rawh se. - (Saron & Zarkawt)

6] Mizoram Presbyterian Kohhran Hmeichhia-in Women's Centre sa tura hma a lak meknaah hian Synod atangin tanpuina pek ve ni rawh se. - (Dawrpui)

7] Masihi Sangati Convention thlengtu tanpuina Synod-in a pek thin hi tihpun ni rawh se. - (Saron)

8] Kohhran Committee Member (Tual Upa) dilna :
(a) Dawrpui Kohhran - Dil zat 4
(b) Zarkawt Kohhran - Dil zat 4

Summer Diarhoea (Nipui Kawthalo)

[ 17 April, 2010 | 7 comments ]

Tunah chuan thlasik a ral a, ruahtui hmasa leh fur a in chhunzawm chho dawn niin a lang a. Tun ang hunlai hi Kawţhalo, Santen, Tetanus a lanchhuah duh hunlai a ni a. Kan khawlai leh a vel zawng zawng hi natna hrik chi sang tam tak awm mur mur angin han hisap la a dik bawk a. Hengho a hmaa lo darhsarh mai mai kha tunah chuan tuihawk leh tuitling velah an luangkhawm tam ta, chuvangin, eng natna hrik ber nge? hriat nilo mahse khawţhalo, awmna, khawsik a len duh hunlai a ni a. A bikin veng mawng lam - Tuikual, Dinthar, Armed Veng, Bethlehem, Ramhlun etc. te an risk a sang bik.

Chuvangin, tun ang hunlai chho hi chuan tuikhur tui leh tui in tur pangngai reng reng chu chhuan so a, dahvawh in tur a ni. Tin, hliam leh pem nei chunga tuihawk leh tuitlingte khawih loh a ţha. Tetanus a lut hma bik a, natna tam tak siamtu Septicemia neih a awl em em bawk a. Natna benvawn ruhseh, asthma leh kawngnate pawh a zual vek hunlai a ni a, tuar zo lova thihna pawh a tam hunlai a ni tih hriat tur. Inven hi a him ber a, tui luankawrte kawt leh a vel i tifai dawn a nih chuan kutkawr bun theih hram a ţha. Tunah pawh tetanus vei enkawl lai kan nei a, thil hlauhawm tak a ni.

Tin, tun ang hunlai chuan thil engpawh bal deuh nia i hriat i khawih chuan kut sil nghal zel ang che. Kut sil hi ram changkang chuan an uar em em a, an hrisel phah reng a ni. Hnatlannaah te thil bawlhhlawh kan haiin kan dahsawn vak vak a. Kut kan hru thuak thuak a, kuhva kan han eizui leh maite hi thil pawi tak a ni. Kan pum nuamlo tam ber hi chu kut sil kan peih lo leh sil tlem lutuk vang a ni ber e.
- Dr Thangchungnunga, MS (Ortho)

Pi Darchhingi kan then ta

| 8 comments ]

Pi Darchhingi, kum 81 hi Darzo khuaah lo piang in unau pathum (3) zinga la dam awmchhun a ni a. Pu Lalkunga (L) nena an inneih hma hian fa pali (4) a nei tawh a. Tin, Pu Lalkunga (L) nen hian kum 1963-ah an innei a. An inkarah hian fa piang awm lo mahse Pu Lalkunga (L) hian a nupui lo sun tawh nen fa paruk (6) an nei a ni.

Pu Lalkunga (L) hian kum 1996 khan a lo boralsan tawh a. An awmdun kum 37 chhung hian nupa inngeih tak an ni. Amah hi zokhaw nu ve mai leh zirna lamah pawh engmah thlenglo ni mahse midang tana hnawk lo tak mai niin a pasal fa bikte pawh hi pawnlam mi tam zawk chuan a fa hrinte an nilo tih pawh hi an hrelo ani.

Pathian ţih tak leh Kohhran bel tlat mi niin Kohhran inkhawmah tantu a ni a. A taksa a dam a a kal theih tek tek chhung chuan Kohhran inkhawm, a bik takin zing leh tlai ţawngţai inkhawm hi a hmaih duh ngailo bawk.
Nu hrisel ve tak ni thin kha kum 1990 khan zunthlum natna a vei tih hriat a ni a. Doctor-te thu awih in a tha chho viau zel emaw an tih laiin kum 2000 khan he natna in a ken tel BP sang leh Asthma chuan tlakbuak in hemi kum hian civil hospital-ah nikhaw hrelo leh chhungkaw inkohkhawm hman hialin a awm a. Mak taka lo tha chhuak leh in heta tang erawh hi chuan heng natnate hian a tibuai ta zeuh zeuh a. Tunhnai kum 2 vel kalta chhung phei chuan heng natnate avang hian damdawiin panpui ngaiin a awm ta zeuh zeuh a.
Kumin (2010) January ni 8 khan tuna min boralsanna natna hian a rawn tlakbuak ta a. Hemi hnu lawk hian oxygen pek a ngaih bakah chaw barh pawh a theih tak loh avangin a hnar atangin eitur tuiril pawh pek a lo ngai chho ta a. Zawi zawiin hniam lam pan chho zel in ni 13 April, 2010 chhun dar 12:00 khan chatuan ram minlo pan san ta a ni.

CYMA Vice President thlan thar

| 1 comments ]

April 15 (Ningani) khan Pu C. Zoramliana, Vice President, Central YMA-in min boralsan tak avangin a hna chanpual lo thawk a, a aiawh turin Ni 15.4.2010-a Central Executive Committee (CEC) Meeting chuan Pu J.H. Zoremthanga, CEC Member, Ex-President chu lungrual takin an thlang.

Pu J.H. Zoremthanga hi Central YMA-ah 1995-1997, 1997-1999 khan Assistant Secretary niin, kum 1999-2001, 2001-2003 khan General Secretary hna a chelh a, kum 2003-2005 khan Vice President niin kum 2005-2007, 2007-2009 chhung khan President hna a lo chelh tawh a ni.

Tunah hian Vaivakawnah an chhungkuain an cheng mek a, a nupui Dr. Lalmalsawmi Hmar leh a fate 3 nen khawsain hnathawhna lamah chuan Govt. Zirtiri Residential College-ah Selection Grade (Lecturer) hna a thawk mek a ni.

Pu Lalramliana kan then ta

| 0 comments ]

Lalramliana hi Zakhuma (L) fapa niin 1940 khan Senvawn khuaah alo piang a. Naupang zakzum leh inthlahrung mi a ni a, pianpui unau 8 a nei. Sumdawn lam timi tak a ni a, bungraw chi hrang hrang phura zuarkual thin a ni a. 1965-ah Tlangmawii nen inneiin fa 3, mipa 2 leh hmeichhe 1 an nei.

An nupa an inthen avangin amah hian a farnu Thanghnemi w/o Rev. H. Lalzara, New Market bula awm a duh avangin 1996 atang khana a bel ta a ni. Tar chaklo lam alo ni chho a, Bawng chek te a zuar ve lawp lawp a, thenrual kawm vak lo, mahni a tla mai thin mi a ni.

Amah hian hun engemaw chen atang khan Chuapna a nei a, theih ang anga enkawl a nih laiin April 8th, 2010 (Ningani) zan dar 8:30 khan he khawvel hi alo chhuahsan ta a ni.

Muay Thai-a ke tliak kha!!

[ 10 April, 2010 | 6 comments ]

Hman zan lawkah khan Muay Thai game kan en a, kha ta ke ruh tliak pakhat kha ka sawi duhna chhan chu, mihring rihna taksain a tihdanglam theih zia hi kan hriat a ţha. Mihring hrisel pangngai, 60kg hi kal pangngaia a kal chuan a ke lehlam lehlam khan 30kg ve ve chauha ritin a do a. Mahse ke lehlam lo na ta se, a kal bai chiah khan a ke ţha lam khan ama rihna let 120kg a ritin a rap ta ţhin a. Tin, kan hmuh anga zuang chunga ke lehlam chauh a zuk rah phei chuan a let 240kg force a zu pe ta ţhin a. Chuvang chuan kebai te hi kawng leh khupin a tuar ta em em ţhin a ni. Muay Thai-a ke tliahna pawh kha a ke zuk rap kha a rap lek deuh a, amah 60kg zet zawt alo ni si a, khatia ţangrual lova a zuk rah khan 240kg a rit do zo lovin a ke kha a tliak ta a ni.

Engatinge kan ţuma ke pakhata kan va din hian a tliah loh? i ti a ni mai thei, a tliah lohna chhan chu, i tihrawl leh ke dah dan a angle emaw ni lovin inrual ţhapa an ţan avangin a tliak lo mai a ni. Hetiang hi anih avangin sang deuh aţanga inring hman lova tlak a, ding chawta an tlak hian hnungzang ruh leh ring ruh hi a tliak/per/keh ţhin a, tam tak tla an zen nachhan pawh a ni. Taksa inring ren rawn erawh chuan 10feet aţang pawhin zuangthla se a na chuang lo ţhin. Hmanlai pi pu ten “Ngum sawha tluk chu an nui uar uar a, an thi mai ţhin” an lo tih kha thil ni thei leh ni mek, thi chiah lova zeng ta te pawh kan nei reng a, an lo sawi dik viau a ni. A chhan chu inring hman miah lova an tluk avangin an nghawng ruh a tliak/pelh emaw ta ţhin a, inring ren rawn a ţhu chawrh chu ni se engmah a na lovang. Chuvangin hetiang lo awmna chhan chu kan rihna kha a let thum vela rit ang a lo nih tak vang a ni. Nu pakhat ngum sawha tlu pawh, “An nui vur vur a an thi mai” tih a lo hre ve si a, a tum hmuk a, tum hmukin a thi an tih fiamthu hi thil awm thei a ni tih hriat ve mai mai a ţha.

Chuvangin kebai deuh chuan tiang hawl hreh lo mai se an tuar nep deuh ngei ang. Tunlaiah pawh ke ruh tliak kan zai, a chhunga thir tlawn emaw phek emaw, kuta elh kawih zawh rual loh pawh an rawn rap tliak deuh reng a. A chhan chu a na a awm vak loh avangin an rap ta a, rihna a lo do zo tak tak si lova, an bai ta a, an bai khan a let 4 laia rit a lo nih tak si avangin kha thir khan a do zo lova, a tliak ta a, a thir kha a tliak leh ta ţhin a ni. Tunah pawh hetianga thir tliak hi zai tur 2 lai kan nei mek a ni.

A tawp berah chuan kan kawng kalte hi kal hne hne lovin taksa ţang mar rual deuh leh zang veh vawha kal i tum ang u, hrisel nan a pawimawh tlat.
- Dr Thangchungnunga, MS (Ortho)

Mizo thuamchhawm leh a kaihnawih

| 0 comments ]

MIZO THUAMCHHAWM LEH A KAIHHNAWIH CHUNGCHANGA NGENNA LEH KAIHHRUAINA

MHIP General Headquarter chuan kan Mizo Dana inneihna lo hautak chho zel bo nan leh, Inneih thuamchhawmte Mizoram chhung leh rampawna awm MHIP member zawng zawngte’n rualkhai leh zangkhai zawka inneih kan sawngbawl theih nan leh kan Mizo Dan kalsan hla lo thei ang bera kan zawm tlan turte a hnuaia mi ang hian a buatsaih a, Mizo chhungkawtin leh MHIP member ten kan zawm tlan vek kan beisei. (Hei hi kum 2005 - 2007 MHIP General Assembly a thu passed tawh bawhzuina a ni)

1] Inneih ni a mo leh a thiante incheina senso hi hmeichhe tum nise. A theih hram chuan Mizo incheina pangngaia inchei nise.
2] Mattress (Awngphah chhah) leh thosilen hi mipa lamin lo neih sa nise.
3] Mizo thuamna tel ngei tura ngaih Em leh Hnam hi la ken chhunzawm zel nise.
4] Mizo thuam tel ngei thin Thul aiah Thingrem/Suitcase ken nise.
5] Mizo thuam chhawma tel lo theilo PAWNPUI te kan neih tawh loh avangin a aiah Blanket/Rizai ken ni se. Tin, awngphah pan (Bed sheet) leh lukham te ken tel ni se.
6] ZAWLKEN PUAN, Pawndum pakhat ken ngei tur a ni. Hei hi pi leh pu chenah Mo-in a pasal thih thulha tuamna tur a nih avangin lak pen chi a ni lova, thuam chhawma ngaih chiah pawh a ni lo.
7] Puan pangngai chhawm hi hmanlai kan pi leh pu, nu leh pa sanah ken ngei tura ngaih a ni a, amaherawhchu tam tak an keng ngai lo. Kan tun hunah hian a tam berah 25 ken ni se, a tlem lam chu duhthusam a ni.
8] Inneih man hlan zan hi khuala kal tur nih si loh chuan zan kar-awl neia tih loh hram hram ni se.
9] Man eitu hi a eitur dik tak ei tir thin ni se. Mizo hnam dan 2006-a chhut angin: i) Sum hmahruai. ii) Sumfang. iii) Pusum. iv) Palal. v) Ni-ar. vi) Nau puakpuan - tih ang hian.
Nu man hi kan hmang dik lova, pasal nei tur kha a nu leh pa inthen emaw innei lo an nihin, mo tur nu khan a lo hrin hah manah nu man a ei tur a ni. Man eitu hming phuah hi fimkhurin a dik tak chauh tih hram ni se.

10] Monuin mopa hnenah inneih zungbun Biak In chhunga a pe ve thin hi chin loh hram hram ni se. (Hei hian Kohhran tih dan phunga lo neite a huam lovang)
11] Inneih ni a (Mo lawmna leh thlahna) ei leh in sawngbawl hi a hautak lo thei ang bera tih thin ni se. Tin, a theite tih anga tih ve tum kher lova insengso lo zawnga rel thiam ni se.
12] Lawi ar hi man eitute lam tum a ni a. Mo, a pasal Ina lawi tur malsawmna a lawi pui theihna tura an pek thin a nih avangin ken nun zel ni se.

13] Heng a chunga tarlan loh mo in an mahni In lama a lo neih leh hman sa, a la mamawh chhunzawm tur leh thildangte chu inneih ni a keng lut bur bur lovin, hun hran leh ni danga lak mai thin ni se. Mahni phak ang leh dinhmun mila huaisen taka lan chhuah ngam hram hram ni thei se.

Daddy

[ 04 April, 2010 | 5 comments ]

Years ago someone asked me, who was the greatest man alive.
Without hesitation I said, my daddy. He is my Hero! A man
in my eyes who stood as tall as a mountain, shoulders as
wide as the sea, eyes as blue as the sky, he meant the world
to me.

There are so many memories I have of daddy. But this one,
was very special to us. As children when we would get
ready to go somewhere, we would get the biggest kick out
of pulling daddy's fingers, while he was setting down and
we would say "One for the money - Two for the show -
Three get ready and lets go" and we would pull real hard and
daddy would just grin really big and would stand up.

Daddy made life so much fun.
He was a Christian man and loved the Lord with all he had.
I am so glad mother and daddy brought us up in the Church
and to know that the good Lord is always with us. Baby
told me Wednesday, when the Lord took daddy home. That
he lived his life to serve and to one day see Jesus and she
said "now his dream has come true." There is no doubt in
my heart where daddy is today. On April the fourth the Lord
needed an Angel and out of all the people in the world, he
chose the very best, our daddy!

Everyone that is here today knew and loved daddy. He was
one of a kind! He lived 34 glorious years and I am so proud
to have been able to call him daddy and love him for part of
those 34 years. He always said, "death on this earth, that's
not the end but just the beginning." His memory and his love
lives on through each one of us here today.

Daddy will never be far, for we will always carry his love in
our hearts. I know one day I will see him again, so for now
daddy, "One for the money - Two for the show - Three get
ready.......and now, I have to let go.

I miss you Daddy!!


Michael Fanai

Vanzau Bial KTP tlawh

| 3 comments ]

Nikum 2009 Vanzau Pastor Bial KTP Conf-in an Golden Jubilee (Kum 50-na) lawmpui tura Dawrpui Branch KTP-te sawm nise tia an rel angin Dawrpui Branch KTP member 65-te chu Bus 2 leh motor-te 3 hmangin March ni 26-a chhuakin ni 31 (Ningani) khan dam takin an lo haw leh. He Jubilee hi CKTP Gen. Secy Upa Lalrinmuana leh Comm Member Dr. Samuel Vanlalthlanga'n an hmanpui bawk a ni.
Dawrpui Branch-te hian zaia rawngbawlna an neih bakah Inrinni tlai khan Free Dental Clinic an nei bawk a, mipuiin an hlut hle a ni.
Vanzau khua hi in 150 niin, Champhai District-a awm a ni a, Aizawl atangin 250km.-a hla a ni. An khuaah hian Presbyterian (in 140 vel), UPC Mizoram (In 10 vel) leh Seventh Day Adventist (In 1) kohhrante an awm a. Vanzau bial chhungah hian Kohhran panga - Vanzau Kohhran, Dungtlang Kohhran, Bungzung Kohhran, Zawngtetui Kohhran leh Leithum Kohhran te an awm a, Vanzau hi Pastor thuthmun a ni.


Thawhtanni ni 29 khan Farkawn leh Vaphai chheh vela pi pute sul hnu hmun pawimawh tak tak - Fiara Tui (Farkawn), Tan Tlang, Thasiama Seno neihna (Chawngtui), Lianchhiari lunglen tlang (Dungtlang), Dungtlang 7000 lungphun leh Hla kungpui Mual (Khawbung) tlawh kual ani a. A kal a ten vannei an inti hle.

Pu Rampuia kan chan ta

| 0 comments ]

Pu C.Zoramliana (Rampuia) CYMA Vice President tanglai mek chuan March 27 (Inrinni) zing lam dar 10:00 khan lungphuchawlin he khawvel hi a lo chhuahsan ta. Pu Rampuia hian insawiselna em em a nei hran lova, March 26 (Zirtawpni) pawh khan CYMA Kumpuan hnatlangah a thawk chhuak a, zan lamah Electric Veng leh Kulikawn Branch Kumpuan Awareness Campaign-ah thu te pawh a la sawi a ni. A boral ni March 27 tukthuan ei laiin a pum a nat thut leh Damdawiina kal a duh thu a sawi a, Civil Hospital panpui nghal a ni. Doctor leh Nurse te’n theitawp chhuah mahse a nunna an chhan zo ta lo a ni.

A boarl thu hriat anih veleh CYMA CEC-te chu CYMA Office-ah kalkhawm nghalin sunna hun a n hmang a, Pu Rampuia an ui thu mi hrang hrangin an sawi hlawm a. YMA Flag pawh a ngul chanvea zar a ni. CYMA ngenna angin Aizawla a vuina hun hman a nih lai hian Sub Hqrs, Group leh Branch hrang hrang engemawzatah a sunna hun hman a ni bawk a ni. Tichuan ui tak chunga lumen a nih hnuah March 28, 2010(Pathianni) chhun dar 12:00 khan Rev K Lalpiangthara’n a vuiliam ta a ni.

Pu Rampuia hi YMA-a a inhman mai piah lamah Ram veitu leh Ram hmangaihtu dik tak kan ti thei ang. A hla phuah “Mizoram Tan” tih hian a chu chu a sawi fiah ber mai awm e. He hla lar tak, ram pum fanchuak khawp a zaithiam te’n an sak lar mai bakah hian Ramngaihhla tam tak a phuah bawk a ni.

Pu C Zoramliana hi October 13, 1960 khan a lo piang a, pianpui unau 5 a nei. A nupui Pi Lalhlimpuii nen hian fa 5 (fanu 4 leh fapa 1) an nei a ni. Thiamna lamah Automobile Engineering a zir zova, Mizoram Sorkara GAD-ah Senior Pool Officer hna a thawk mek a ni. A awmna Branch YMA-ah OB Post hrang hrang a chelh tawh thin a, 1991-1996 chhung CYMA CEC member a ni q, 1997-1999 chhung Fin. Secretary a ni a, 1999-2003 chhung khan Asst Secretary a ni leh a, kum 2003- 2007 chhung Gen Secretary hna chelh lehin kum 2009- 2010 chhung atan Vice President a tan thlan tlin a ni leh ta a ni.YMA a din tirh 1935 atanga CYMA Office Bearer nilai thi awmchhun a ni. A thih hian Kumpuan Committee Chairman ni lai a ni.

Pu Rampuia hian uitu leh suntu a ngah hle a, Political Party hrang hrang, MUP, MHIP, MZP leh NGO dang te’n an ui thu thuchhuah an siam hlawm a ni. YMA tana theihtawp chhuaha a hun leh tha leh rilru tam tak sengtu Pu Rampuia thlah nan hian Dawrpui Branch YMA pawhin pangpar mawi tak a ruang chungah a dah ve a ni.
YMA tana Rohlu leh Ram Hmangaihtu chu a fam ta si a.

2010 Dawrpui YMA member dinhmun

| 4 comments ]

CHAWNGBAWLA SECTION
Chhungkaw awm zat - 208
YMA member mipa - 323
YMA member hmeichhia - 320
Member awm zawng zawng - 643

TAITESENA SECTION
Chhungkaw awm zat - 155
YMA member mipa - 276
YMA member hmeichhia - 235
Member awm zawng zawng - 511

VANAPA SECTION
Chhungkaw awm zat - 142
YMA member mipa - 264
YMA member hmeichhia - 247
Member awm zawng zawng - 511

2010 chhunga YMA Dawrpui Branch Member zawng zawng - 1665
(Mipa 863; Hmeichhia 802).

HSLC pass tharte (2010)

| 1 comments ]

Taitesena Section :
1. Thanghmingliani - I Div. d/o K.Kapvela
2. Bijoyta Devi - I Div. d/o B.M. Singh
3. Lalramliana - II Div. s/o Vanlaltluanga Parte
4. Esther Vanrammawii - II Div. d/o Romankima
5. Cyril Vanlalsanga - III Div. s/o J.Vanlallawma
6. Flora Lalrinfeli - III Div. d/o F.Lalrinliana
7. Esther Lalduhsangi - III Div. d/o R.Thankunga
8. K. Lalrinmawii - II Div. d/o K.Rothanga
9. Deborah Lalhmingsangi - II Div. d/o H.Lalchhandama
10.Lalnunsiami - III Div. c/o Biakkimi
11.Patea c/o Biakkimi
12.Precilia Lalrinengi - III Div. d/o Philip Lalthianghlima(L)
13.Deborah Lalhmingsangi - III Div. d/o Lalthantluanga
14.Elizabeth Malsawmdawngkimi - I Div. d/o B.Lalrintluanga (L in Eng)
15.R.Vanlalnunpuii - II Div. d/o R.Chhawnkima
Chawngbawla Section :
1. Lalhmangaihzuala c/o Pazawna
2. F.Lalremtluangi - III Div. d/o F Lalnunpuia (L)
3. F.Lalhriatpuii - III Div. d/o F Lalnunpuia (L)
4. Lalrinsanga - II Div. s/o Lalmuanpuia (L)
5. Laldinpuii - II Div. d/o James Thanmawia
6. Vanlalhruaia - II Div. s/o Lalngilneia
Vanapa Section :
1. Lalthakima - II Div. s/o Lalrohlua
2. Lalngaihawma - II Div. s/o Lalrohlua
3. Laldampuii - I Div. d/o Lalduhawma (Letter - SS & Mizo)
4. C.Lalchhanhima - III Div. s/o C.Denghmingliana
5. Hmingthanpuia- II Div. s/o Lalfakzuala
6. Lalrinpuii - II Div. d/o Lalduhawma

Chhul Tawlh

| 2 comments ]

Chhul Tawlh hi fa nei tawhah chauh a awm thin a. Mizo nu tam ber hi Chhul tawlh nei deuh vek kan ni hial awm e. Chhul hi kawng leh tai bawrah hian a inkhaikhawm a; Chhul alo tawlh hniam chuan a khaitu kha a pawt mar ta tlat a. Chu chuan Tai na deuh veng veng leh kawngna a siam ve leh a. Hetiang kawngna hi chu Saitika nen a inang lova, kawngbawrah a na mai thin.

Thingtlanga kan thawh laia pitar Chhul tawlh ka hmuh nasat ber chu mipa serh ang mai hian a rawn kawh chhuak a ni. Chhul tawlh hi a ninawm avangin an sik chhum an sik chhum a, a chanve dawn lai hi chu an sik ral thei a ni. Chhul hian sih leh zai-ah hian na a hre lova, a fan zawng chauhin na a hria a, chuvangin an sik ral ve mai thin.

Hetiang a lo awmna chhan hi ven theih a ni a, fa la nei tur tana hriatreng tur, a ven dan ho te a awm a. Naupian tuk atanga ni 10 chhung bawkkhup a, a tam thei ang ber mut tur. A chhan chu nau a pian veleh hian Chhulinnghak chu kawrawng lian pui, 2kg dawn laia rit leh lian a ni a. Rang takin a tawmte nghal char char a, a len laia bawkkhupa mut chuan hmalamah a awm ngei dawn a. A lo tet pawhin a awm dan tur dik takin a awm dawn a ni.

Chhul hi serhkua nen right angle, serhkua chho zawngin, chhul chu a khamphei deuhin a inthlepin a awm tur a ni. Chuti lova nau neih tuk atanga i mut zangthal chuan i chhul leh i serh kua kha ngil takin a in zawn dawn a; Thil kawrawng chhipa thil dah chu a kuaah a tawlh lut thla ngei ngei tih chu hriatsa a ni mai a. Chu chu Chhul tawlh chhan ber chu a ni. He thil ho te damchhung nun tihrehawm emaw tinuam thei hi fa nei turte reng reng chuan hre reng se a duhawm khawp mai.
- Dr Thangchungnunga, MS (Ortho)

Mami weds Chawngchhuana

[ 02 April, 2010 | 1 comments ]

Lalhmangaihzuali (Mami) d/o Upa Rokamlova leh Chawngchhuana Chongthu, Lunglei chu March ni 25 (Ningani) khan Lunglei Salem Baptist Biak Inah an Innei