Central YMA Thuchhuak

[ 26 November, 2011 | 1 comments ]

Assam Police ten pawisawilo Mizo 3 an sawisak : Assam Police ten an duh, an nawm an maka an tih theih loh avanga, Mizo tlangval pawisawi lo pathum-Lalhmingmawia (24), Zemabawk, 42nd Rashtrya Rifles (Srinagar-a awm), Lalawmpuia (22), Dilkawn, 7th Assam Regiment (Punjab-a awm) Zoremthara (21), East Lungdar, 7th Assam Regiment (Punjab-a awm) te Gharmura hmuna Assam Police ten ni 11.11.2011-a an chuanna Maxi Cab ti dinga an sawisa hi Central YMA chuan pawi a ti takzet a. Hetianga mi pawisawi lo chunga kutthlak tute hi Central YMA chuan a dem takzet a, thil tisualtute hi an phu tawka hremna pek ngei a phut tlat a ni. Bairabi-a kan

Agape Basketball Court hawn a ni

[ 19 November, 2011 | 1 comments ]

19 November, 2011 (Inrinni) khan Dawrpui Bial KTP-in project-a an neih Agape Basketball Court chu Bial Chairman Upa Lalchawimawia'n ropui takin a hawng ta. He Basketball Court hi 2009 Bial Conf. rorel-in a pass ani a. Mahni Branch theuhah Basketball court puala Ip sem thin a ni a, vawi tam tak Bial huapa hnatlang anlo nei thin bawk a ni.
Hunserh hman zawhah hian Dawrpui, Saron leh Zarkawt Team 2 theuh-te Exhibition Match ropui tak an khel nghal a ni.


He Basketball court atana sum hmuh zawng zawng chu Rs. 3,99,022 ani a, sum senral zawng zawng chu Rs. 3,77,061 a ni.

Sangbera Top-Scorer

| 0 comments ]

Tv. Lalsangbera, Medical Quarter, Dawrpui chu Second Division Mid-Season Football Tournamnet 2011 neih zawh takah khan Top-Scorer a thlan a ni a, hetianga veng tihmingthatu vengin kan nei hi kan chhuang hle a. A kal zelna turah duhsakna kan hlan bawk e

Mit na

| 4 comments ]

Mitna hri a len hian fimkhur a ngai hle a. A natna chhan tam ber hi virus hrik vang a ni ber a, a damdawi a awm lem lova, mit thlawr a ti nuam tur thlawr mai tur a ni a. Mahse tulna bik a awm anih loh chuan STEROID e.g.Betnesol eye drop te hi hman loh hram hram tur, tul loah mut a ti chhuak thei a, mit hi kan nun kawng hruaitu pawimawh ber a nih avangin duat a ngai a. Heng mitna len hun lai te phei hi chuan mit a lo thak deuh a nih pawh in nuai mai lo la tui thianghlim in sil emaw, a chhungah meng la, mit khap la, chu chu a silfai dan a ni mai a. Kan nuai nghal mai hian a ti punlun thin a ni.
Tin, kut silfai that hi a pawimawh em em a. Mitna lenlai phei chuan kut hi sil deuh reng mai tur chu chuan a veng rei ber ang che. Bible pawhin Kut fai leh Thianghlim nei a ni a duh ber. Kan Bible hian in ang reng sawi pahnih a nei zel a, Taksa leh Thlarau lam, hrem hmun leh vanram pawh helaiah leh nakin hnuah a hman theih a ni. Bible-ah phei chuan Kut sil leh taksa fai a duh zia chu miin mitthi emaw ran thi emaw a khawih chuan nilengin a bawlhhlawh a ni, engmah a khawih leh tawh tur a ni lo, a inbual fai leh hma chu tihte kan hmu a, kan Bible hi zawm tha peih ila in zirtir leh vak tur pawh a awm lem lo, kan chhiar a, kan hria kan zawm silo hi kan buaina intanna chu a ni ta ber e.
- Dr Thangchungnunga, MS (Ortho)

Dawrpui KTP 56th Rising Day

[ 16 November, 2011 | 1 comments ]

Dawrpui Branch KTP chuan an din champhaphak vawi 56-na chu 14 November, 2011 khan ropui takin an lawm a. Hemi denchhen hian Group hrang hrangte Zirtawp zan atang khan Intihsiakna - Beat Contest, Musical Dance, Banner insiamsiak (on the spot), Extempore Speech, Drama (on the spot) leh Solo-ah te neih a ni a. Inrinni (12 Nov) khan Fellowship Hall-ah Durtlang Hospital-a hman atan mi 54 ten thisen an pe bawk a ni.

Khupkawi

[ 15 November, 2011 | 9 comments ]

Tunah chuan kan chang kang ta deuh a ni ang, ‘kawi’ hre lo leh hmu lo hi naupang an tam ta viau mai a. Khupkawi tih pawh hi an hre thiam lo.
Kan khup a ruh bawk, nem sawn theih hi khup kawi a ni a, inbah nana kawi an hman nen a in an deuh avanga phuah a ni ber awm e. Khupkawi hi a pawimawh em em mai a, kan ke lek kawh tur a tanna petu (Lever) a tan chhan ber a ni a. Thil kan kar kau dawn a a hnuai a lung emaw thing bung emaw kan dah a, awlsam taka kan kar kau ang hian a tang ve a. Chuvangin khup kawi keh reng reng chu zai a zawm leh anih loh chuan an ke tlawn kal ut ut thin a. Tin, kan hriat fo tur chu, kan taksa ruh chuktuah emaw, kawng emaw, na taka (hriat reng tham) tleirawl emaw nulat tlangval laia tihnat, inherh etc.. ang reng reng hi kum alo upat hnu kum 50 han pelh meuh hi chuan a rawn lang chhuak leh ngei ngei thin.
Khup hi a bikin kan taksa rihna dotu anih avang hian a ruh chuktuah hi a hrisel leh a chak a ngai em em a ni. Nu thenkhat phei chu, ke kual phah khawpin an khup ruh hi an rap ral thei a, kan kal hian a chhung lam hi kan rap nasa bik a, a ral tak tak thin ani.
Hei hian a entir ta ber chu khup chak tha i mamawh reng a, chhuk kal hian khup tihrawl a chak loh chuan a harsa hma em em a, khawn phei deuh a ke chheh te a ngai thin. A venna tha ber chu - Ke, Malpui tihrawl tih chak hi a ni mai a. Exercise lak a, kalte hi a tha a, a nat hnuah erawh chuan a ngeih loh ber a ni thung a. Kan kal hian sipai kal ang deuh a khup tisek tanga kal hi zirtur; chuti a nih loh chuan awmzia a nei tlem a. A nat tawh hnu rau rauah chuan muchunga exercise lak tur a ni a. Ke hi a pahnihin zungtang li bawk lek a sang in lek kawh la, second 10 (sawm chhiar la) i dah thla anga i ti leh ang a, mut dawn leh thawh dawn ah vawi 20 tal tih han tum teh. A tir chuan vawi 10 chu i ti zo lo hrim hrim ang.
- Dr Thangchungnunga, MS (Ortho)

Tawngtai Beihpui

[ 06 November, 2011 | 8 comments ]

Synod Revival Committee-in Revival Beihpui Programme a duan angin Nov ni 4 (Fri) zan dar 7:00 khan Bial 25 ten hmun hrang hrangah Beihpui Programme hlawhtling tak an hmang a, Dawrpui leh Chhinga Veng Bial pawhin Millennium Centre kawtah an hmang ho bawk.



November ni 5, 2011 (Sat) khan Tawngtai Beihpui chu AR Lammualah Synod Revival Committee buatsaihin hman leh a ni a. Hetah hian Dawrpui leh Tuikual Bial KTP-te chu Ushering & Reception, a hmun buatsaih leh senghawi mawhphurhna an la a, tha takin an hlenchhuak thei a ni.

F-a weds KPi

[ 05 November, 2011 | 1 comments ]


F. Lalremruata
s/o F. Huapliana, Dawrpui Thana Tlang leh Zokungpuii d/o Lalzinga (L) Dawrpui, Jail Veng te chu Kohhran Dan Thianghlimin November ni 3, 2011 (Ningani) chawhnu dar 2:00 khan Dawrpui Presbyterian Kohhran Biak inah an innei.

Multipurpose Centre hman dan tur

| 1 comments ]

Dawrpui Multipurpose Centre Hman dan tur

Ruang Dah Lailawk Nan :
Khualkhua a mi Civil Hospital-ah thi an awmin a ruang an khaw lam panpui mai turte chu hmundanga ruang lak buai ngai lovin, helai hmun hi ruang dah lailawk nan leh mipui kalkhawmna atan hman theih a ni ang. Hunserh hman theihna hall a awm nghal bawk.
Chhiatna Lian Tham Thlen Thulha Hman Atan :
Chhiatna lian tham a thlen thulh a Hospital leh a thawktute chimbuai lova mipui awmkhawmna hmun atan leh Information lakna hmun atan Counter pawh dah a ni.
Rikrum Thilah A Tul Apianga Hman Atan :
Heng bakah hian Dawrpui khawtlang Jiont Committee-in tul bik thilah a hmantir thei bawk ang
Issued by : Dawrpui Khawtlang Hruaitute Joint Committee, Aizawl

Pu Lalchungnunga thusawi tlangpui

| 1 comments ]

Kumin YMA General Confence Vawi 66-na, 2011 Kolasiba neiha President kalchhuak tur Pu Lalchungnunga thusawi tlangpui han tarlang ila:

ZONUNMAWI : Bus-ah i chuanga, i bula ding, seat chang ve lo kha engatinge ni seat-ah i thut tir? bus fare a tumsak che em ni? tumsak lo, nang aia a upat avangin i zah a, i seat i kian mai a ni. Ruaithehnaah chaw dawh turin i intlar a, i ril pawh a tam ve tawh, mahse i hnunga putar chu i kiana, i dawh hmasaktir thin. Hei pawh eng dang vang mah a ni lo, i Zonun zemawi lo lanchhuah vang a ni. Zinnaah mi motor chhia a lo ding a, motor chhe siam thiam miah lo chunga “engtizia nge”? ti a i din chilhna chhan pawh Zonun Zemawi hawihhawmna nangmaha nung reng kha a lo chhuah vang mai a ni.
Zing dar 2 a ni tawh a, mitthi dar ri val val chuan i muhil tui lai a tiharh che a, YMA tlangau in tunge thi, engvanga thi nge tih a rawn puang a, vanneihthlak takin i chhungte an ni lo hlauh mai. Mahse i muhil zui thei ta lo va, chutiang ang hunah chuan tanpui ngaite tanpui turin ruahsur hnuaiah pawh ke i pen thin. I exam hun a hnai, a nih loh leh a tukah i hnaah i kal ngei ngei a ngaih chunga mitthi lumena tlaivar tlat si pawh em-i-mi, zet-o-zo Mizo

Eizawnna atanga Natna

| 1 comments ]

Kawng sira welding : Kan kawng a te-in a zim a, kawng sira Workshop siam pawh an tam mai a. He thil hi, a bikin Welding (Thir char zawmna) hi mihring tana hlauhawm tam tak a awm ve a. Chung zinga a tha lo ber, thir an kahzawm laia eng pawl tek chuai chuai thin hi Ultra violet ray (Light) a ni a. Mit hian a haw em em a, kawng sira an lo ti anih pawhin en lo hram hram ang che. Ni awk lem a hlauhawm an tih thin ang tho zungzam kha a ni. A khawihtu phei chuan a venna tarmit a bika siam a hmang ngei tur a ni a, chuti a nih loh chuan mit hnung lamah hian nerve hriatna thazam chak em em mai a awm a, hei hi a va en chhe thei a, mit fiah lo, mit chak lo emaw lu na te a siam thei thin. Tin, a bul hnaia awm phei chuan vun natna hrang hrang pawh a siam thei bawk.
In rawng hnawih : Mahni In rawng hnawih that te hian zanah tukverh leh kawngka te hawn vek a, boruak chhuak tam thei ang ber hi a ngai tih hriat tur. A rawnga an telh damdawi hi chuapin a haw em em a, rawng hnawiha inhlawh phei chu hmui leh hnar tuamna vuah reng a tha. Rizai siam leh heng lapua lam chi khawih pawh hi a kum tluana khawih tan chuan hmui leh hmai tuam ngei ngei tur. Asthma te, chuap chaklo te a siam hma bik.

Chhuanawma kan chan ta

| 2 comments ]

Lalchhuanawma hi Pu Rochungnunga leh Pi Lalrengpuii te fa 3 zinga upa ber a niin April ni 27, 1977 khan Civil Hospital, Aizawlah a piang a, Ni 12, June1998 khan Lalrengpuii nen an innei a. Fa pathum an nei.
Pu. Lalchhuanawma hi nu leh pa thuawih leh zah thiam tak a ni a. Meizial tak ngial pawh a nu leh pa hmuhah a la zu lo. A naupan lai atangin a naute hi a duat in, u nih tling takin a enkawl thin a. A nupui fanau a duat thiam em em a, an thlamunpui thin hle. Amah hi thenrual pawl thiam tak, mi tawng duh tak leh fiamthu duh em em mai a ni a. A bengvarin thenrual tha leh chhungkhat lainate lo kilkawitu ber a ni thin.
A nat dan : Taksa lamah hian harsatna a tawk ve zauh zauh thin a. A naupan zual lai atangin khawsik hlek a ‘kaih’ mai a ching thin. A lo len deuh hnuin, ‘Kal’ thatlohna avangin Guwahati panpui a ni a, beidawngin an rawn haw leh a. Mahse beidawng a an lo haw hnu hian Pu Tawka kaltlangin Pathian tihdamna a chang a,

Upa P.Lalluaia kan chan ta

| 5 comments ]

Upa P. Lalluaia (UPC) hi ni 25.12.1950 khan Liantluanga (L) leh Chalnguri (L) te inkarah Khuanghlumah a lo piang a. Pianpui unau 11 (Sawm pakhat) a nei. A mah hi unaute hmangaih thei tak a ni a. Thenrual ngaina mi, a dam chuan awm mai mai lova, sekrek khawih nuam ti mi a ni. Miin vawng fel khap thin a ni a, record vawnthat leh thil chhinchhiah peih mi tak a ni bawk.
Chhungkaw retheihna avangin lehkhazir san zel duh mahse loh theihlohna avangin hlo thlawh a ngai a. Kum 1973 khan a u Saingenga zarah vanneihthlak takin Pachhunga University College-ah Library Attendant hna a hmu hlauh a. He hna hi kum 38 a thawh hnuin ni 31.12.2010 khan a penson ta a ni.
Kum 1973-ah Lalthannguri nen an inneiin Fapa pali an nei a, a nupui Pi Lalthannguri hian June 10, 2005 khan chatuan ram a lo pan san tawh a. Lalrinsanga leh Lalbiakveli te nupa leh an fate pahnih nen tuna an