Pi Lalrimawii kan chan ta

Pi Lalrimawii hi kum 1959 khan Pu Pianherha leh Pi Hauchhingpuite fa 9 zingah Khawruhlian khuaah a lo piang a. Zirna lamah Class IX thleng a zir. July 29, 1982 khan V.L. Ruala nen hian inneiin fapa 1 leh fanu 3 an nei a, an hun tam zawk hi a pasal Pu Ruala Missionary-na hmun Manipur-ah an hmang a ni ber a, an fate pawh Manipur-a pianga seilian an ni. Pathian ram zau nan thahnemngai tak leh theihtawp chhuahin a pasal rawngbawlna hi a tawiawm tlat a, an thawhrimna hi vawiin thleng hian ala lang zel a ni.
Amah hi mi hrisel tha tak a ni thin a, 1998 khan Guwahati-ah a mit zai a ni a, Dec 2003 khan a Hnute zai a ni leh a. Engemaw neuh neuh hrisel lohna in a tlakbuak chho ve ta reng a. Kumin Feb 15, 2010 khan Doctor Ramdinpuia’an, “A thisen sang tihniam leh a thisen mamawh kan pek theih nan Durtlang lamah lo chho
mai rawh u,” a tih avangin chhoh pui a ni a. Tichuan March 3, 2010-ah kar thum zet awmpui a nih hnuah Durtlang atangin chhuahpui a ni a, Durtlang Hospital -ah refered a nih angin Civil Hospital-ah luhpui leh a ni a, Dialysis tih chhoh a ni tan ta a, hetianga enkawl a nih mek lai hian a chungah eng engemaw a thleng thin a; Feb 14, 2010 zana a mumang hetiang hian a sawi, “ Ka nu ka lo hmu a, ‘ka lo nghak che a nia,’ min ti ringawt a, a hnuah ka pi, Churachanpur, Konpui a mi ka hmu leh a, chu pawh chuan, ‘Lalte, ka lo nghak che a nia,’ min ti leh a, mang chu a ni na a, ngaih chu a tha lo deuh a ni,” a ti.

April 16, 2010 zing lam dar 3:30 a thli na tak lo thawk atangin pawlna thar a chang a, “Ka dam tawh, ka dam tawh, hlum bel mai ka ni si, Belvawtu-in a duh angin a vua ang chu,” tiin a lawm chho ta hle a. He tih mek lai hian Dialysis tih a ngai ngun ta tawlh tawlh a, ni khat kar dana tih alo ngai ta hial a. Amah pawhin, “nitin ka chau hret hretin ka hria,” a ti hial a. Engtik hunah nge ni ang? kan tih rilruk reng chu alo thleng ta nge nge a ni. Oct 5, 2010 zingah Civil Hospital-ah Dylaisis ti leh turin kan inphurphei a, a chauh deuh avangin Ogxygen pek a ni a, a dinhmun hniam zelin zan dar 9:00 khan a chatuan ram tur alo pan ta a ni.