Roman Catholic, Dawrpui Kohhran din dan

DAWRPUI VENG CHANCHIN 1991 : Kum 1926 khan Pu Laltûra'n a din ṭan a, a Inah an inkhawm ṭhin. A thi a, Roman Catholic pawh chu a tawp ve leh ta a. Kum 1961 khan, Pu Joseph Saikaia Inah, Father Marcotte leh Father Marka-te hovin an ṭan leh ta a ni. 1962 aṭangin Pi Rita Neihpuii In, Electric Vengah an inkhawm ṭhin a, 1969 thleng khan an inkhawm a ni. 

        Kum 1968 khan, Pu Ch. Chhunga'n, CEM a nih laiin, Dobi Lane, Pu Mankunga ṭhenawm hi Biak In hmunah a pe a. Pu Biakthansanga In hmun, Electric Venga mi nen an inthleng a, Electric Vengah chuan Biak In an sa ta a ni. An Biak In hmingah chuan "St. Mary's Church" tih a ni a; 1969 khan, Monsignor George Breen, CSC, Haflong-a miin a rawn hawng nghe nghe a ni. 

Tichuan, Dawrpui Catholic Kohhran chuan Electric Vengah Biak In neiin, vawiin thleng hian Dawrpui Catholic Kohhran an la ti tho a ni. He Kohhran aṭang hian, Ramhlun, Luangmual, Tuikual leh Bethlehem Catholic Kohhrante an Indang ve leh ta bawk a ni.