Asanga weds Chongi

[ 25 February, 2010 | 7 comments ]

Dt. 18 February, 2010 (Ningani) chawhnu dar 1:00 khan Lalrinsanga (Asanga) leh Chawngthanpuii te chu Dawrpui Presbyterian Kohhran Biak inah Kohhran Dan Thianghlimin an Innei.

Court-in Evidence tel lovin ro a rel ngai lo

[ 21 February, 2010 | 0 comments ]

Zawhna : Court hian tihchianna (Evidence) tel lo, rindan/ngaihdan (Presumption) mai a innghatin ro a rel thei em?
Chhanna : Court reng reng in ro a rel dawnin tihchianna/fiahna (Evidence) tel loin ro a rel ngai lo. The Indian Evidence Act 1872 in a sawi angin thubuai neitu (Party) te ve ve khan thuhretu (Witness) court-ah an hruai ang a, Civil case a ni emaw, Criminal case a ni emaw Evidence tel lo chuan Court in ro a rel thei lo ang.

Heng a hnuaia Section pathumahte erawh hi chuan Court in ngaihdan bik siamsa a nei thin.
1. Sec 113-A of Indian Evidence Act 1872-ah chuan “mi an inneih atanga kum 7 chhung a pasal in a nghaisak thin a, a pasala chhungten an tih nawmnah avanga ama nunna hial a lo lak chuan Court chuan a pasal leh a chhungte chu he thihnaah hian inhnamhnawih (abetted) ngeiah a ngai thin”.

2. Sec114 of Indian Evidence Act chuan thil then khatah a nih dan phung leh awm dan angin ngairuatna a siam thei. Entirnan - Rukruk a awmin kha thilruk kha mi tupawhin lo kawl ta sela, chumi kawltu chu thilrutu emaw hre reng chunga mi thilruk lo dawngtuah a ngai a ni.

3. Sec 114 of Indian Evidence Act-ah chuan IPC 376(2) in pawngsual a sawiah (Naupang kumtlinglo pawngsual tih chauh lohah chuan) hmeichhia in ka remtihna tel lovin min pawl lui a ni a tih chuan, hmeichhia khan a remtilo ngei a ni tiin Court chuan a ngai a ni.

Khing a chunga kan tarlan Section pathumte-ah khian Court chuan ngaihdan siamsa a nei a, heng bakah hi chuan Court chu bukna khaitu a nih angin awn lam a neih a thiang lo a ni. Sawrkar a ni emaw mimal an ni emaw, a teber atanga a lianber thlengin duhsak bik a neih a thiang lo a, Evidence hmanga rorel in, thulai ala mai tur a ni.

Blood Pressure (BP)

| 5 comments ]

BP sang leh hniam tih hi kan hre lar in, Mizo tawng ani ta ber mai a. Thisen sang tih tawngkam hi kan hmang tlem ta hle a; Engpawhnise, Blood Pressure sang leh hniam hi tih dan hrang hrang a awm a. BP enna hi Mercury rih lam nena entawn a, chumi Mercury-a pump chhoh nat dan a zirin a hniamin a sang a. A tlangpuiin puitlingah hian normal range kan ti a, thisen tha pump chhuaktu hi systolic kan ti a, thisen chhia, oxygen phur ve lo chuap lama pump luttu hi diastolic kan ti a. Chuvang chuan BP reng reng a normal chu 120/80 anga ngaih a ni.

Mahse kum a zirin a danglam ve a, kum upa, kum 50 chung lamah phei chuan 150/90 pawh kai se a normal tihna a ni a, mahse, mipuiin kan hriat pawimawh em em chu mahni mimal hian mahni normal hi kan nei ve leh vek a. A then chu 90/60 MM Hg chauh te a ni thei a. Heng tan chuan 130/90 te an kai chuan an let tawp mai dawn tihna a ni. Chuvangin, a dan tlangpui a 100/60 - 140/100 hi Normal Range pawh nise, mahni normal hi hriat ngei ngei a tha. Ka hmuha la sang ber, a tan chuan normal ni si, 220/140 a ni a. Mahse hetiang dan pangngai piah lama sang lutuk emaw hniam lutuk normal a lo neih hi chu Abnormally normal kan ti a. Pangngailo mahse, ani tan chuan pangngai tihna a ni ber ang chu. BP sang tia in puh mai hi a that lohna chu, a putu rilru kha kumkhuain BP sang nei nun in a nung ta thin a, rilru a hah thei a ni. Chuvangin, i mimal BP kha hre turin vawikhat tal in test ve thin ang che.
- Dr Thangchungnunga, MS (Ortho)

Joint Committee Thuchhuak

[ 13 February, 2010 | 5 comments ]

March 9, 2010 (Thawhlehni) zing khan VC, YMA, MHIP, MUP te chuan Dawrpui Sikulah Joint Committee an nei a -

(i) Taxi Stand lova ding ngaimawh : Kan vengchhunga zan lama Taxi-te an stand lova an ding thin hian sualna a ti pun lun thin avangin, Daily news paper-ah leh cable TV-ah Taxi-te mahni stand-ah chauh ding tura thuchhuah nise tih a ni a.
(ii) Dawr chhuahsan tura hriattirna pek : Pu R.Thansanga, Electric Hebron veng a cheng, tuna Israel Point Opposite a dawr siam mek R.Thansanga Tailor dawr atanga zu fun thahnem tak man a nih avangin, thlakhat chhunga a dawr chhuahsan tura hriattirna pek nise tih a ni bawk.
(iii) In chhuahsan tura hriattir : Lawma, Dawrpui South-a cheng pawh ruihhlo avangin an In chhuahsan turin hriattirna pek a ni bawk, Medical quarter peng a Pathianni leh zana hawkers thu te hian sualna an tih punlun avangin tlai dar 5 thleng bak in pho lo tura hriattirna pek nise tih a ni bawk.

Dawrpui Khawtlang thuchhuak angin Veng chhungah Taxi Stand lovah chuan a bikin zan lamah Taxi din phal a ni tawh lova, hei hi Taxi Driver-te zawm hram tura hriattir kan ni. Zawm lo man kan awm chuan Khawtlangin an chungthu an rel ang.

PILES

| 2 comments ]

Piles hi Mizo tawngin kan nei lova, mitin hian kan hrethiam tawh tho a, Mizo tawngah seng luh mai tur niin ka hria. Piles lo awm dan hi hriat ve mai mai a tha a, kan vun pawn lam leh chhung inzawmna, mawngkaw chhung deuh si-ah hian thisen thalo kal let lehna tur a kual letna lai tak, thisen tha oxygen a hman ral a, thisen chhia (Vein) a intanna chiah a ni a. A awmzia chu, thisen tha oxygen phur a luang par par a, a tawp oxygen hman zawha a let lehna lai a ni ber mai. Hetiang tho hian taksa hmun tinah, vunah te, pumpui hnunah te a awm vek a. Mahse mawnga Piles a awm tak bik nachhan chu- Ek tum lian tak pawh chhuak se, na lova fan thei tur, ek a awm loh laia chip leh tur a nih avangin vun/duar chuang leh thisen dawt chuang fan vak thei a tam vang a ni.

Piles lo awm nachhan erawh chu chi tam tak a awm thei a, Thin (Liver) that loh vanga awl taka luang let tur kha a tling khawm a, a rei telh telh a, a lo puar a, uai chhuak khawpin a lo lian thei thin a ni.

Tin, thil dang hrang hrang, taksa chak lo lutuk vangte, ek khal lutuk vangte, thisen dawt diklo chi nei hrim hrim te pawh Piles awm tirtu an ni thei vek. A chhan a tam em a, BP sang vang thlengte pawhin a awm thei a ni. A pawimawh ber chu, Piles Treatment aiin neih loh dan hi hriat a tha. Ei leh in hi a hun dik leh, ek hun bik neih a, regular taka ek thin te. Ek tum lian deuh siam thei tur chawhmeh duar nei deuh, antam leh thlai chi hrang hrang ei tamte, rulhut pai loh leh santen benvawn neih lohte, ei leh in thianghlim leh Balanced Diet a nih ber chu.

Santen benvawn avanga Piles nei hi an tam em em tih pawh hriat a tha. Piles a lo awm tawh chuan Doctor entir a, treatment lak vat hi a tha ber. Piles i neih a, a thi a nih chuan, thisen lar pangngaiin ek a rawn pawlh a, pumpui atanga thi (Internal Bleeding) a nih chuan ek a dum a, a nasat phei chuan Alkatra ang maia dum leh banin a ek theih a ni.
- Dr Thangchungnunga, MS (Ortho)

P.I.L awmzia leh a nih dan phung

[ 06 February, 2010 | 2 comments ]

PIL (Public Interest Litigation) hi mipui hmakhua ngaia Court-a thu thlen tihna a ni a, Public Interest (Mipui hma khua) kan tih hian mipui zawng zawng ni kher lovin a tam zawk hamthatna a kawk.

Babu Ram Verma vrs. State of Uttar Pradesh 1971 Allahabad LJ 653 chuan mipui nawlpui kher pawh ni lovin mipui chanvo emaw hamthatna an dawn turin mipui a thlen loh chuan Court-ah PIL mipuite aiawhin tu pawhin thu a thlen thei a. Amaherawhchu, Court-a thuthlentu khan ama hmingthatna atan emaw vote zawn na atan emaw a hman erawh Court- in a phal lo a ni (vide S.P. Gupta vrs Union of India AIR 1982 S.C. 149)

PIL in a tum ber chu miretheite, riangvaite, michanhai zawk te, society leh ei leh bar kawnga mi hnuaihnung zawk te chanvo dan anga hum sak leh chawikana ni. Dan anga chawikan tih hi Violation of Legal or Constitutional Rights-te a ni. Constitutional Rights tih chu India Danpuiin a khua leh tuite chanvo leh dikna a pek te an ni a, chung Rights-te chu tun tumah kan sawi seng vek lo anga.
Entirnan, India Danpui in Art. 21-ah chuan ‘Mimal nun leh mimal zalenna venhimna’ min pe a, dan siamsain a phal ang a nih chauh loh chuan, tumah a mimal nunna leh a mimal zalenna lak sak a ni lovang ’ tiin a sawifiah a ni. Jail-ah mi lo tang ta se, Jail Manual-in a sawi angte leh dan in a phal ang, mi pakhat tan mutna pakhat pek tur tihte zawm anih loh chuan, Jail tang kher lo pawh khan jail tangte chanvo leh dikna humhalh nan PIL a theh lut thei a ni. Art.21-a right to life min pek hi a zau hle a, chutiang bawk chuan Article dang dangte, India Danpui (Constitution) in chanvo leh dikna min pekte diklo takin emaw ngaihthah / pawisa lo taka rah beh a nih chuan PIL-hi a file theih a ni.

PIL file tur chuan Supreme Court-ah emaw High Court-ah emaw file tur ani a, Ukil ruai kher lo pawhin thil nih dan chiang taka ziakin heng Court-ah te hian thlen mai tur.

LS-i kan chan ta

| 5 comments ]

Lalsawmliani (LSI) hi Kum 1969, June ni 30 khan Aizawl Civil Hospital-ah a lo piang a. Pu Sailothanga Sailo leh Pi Vanhnuaithangi (L) te fa pali zinga naupang ber a ni.

Lalsawmliani hi a naupan lai atangin harhvang tha tak leh duhawm tak a ni a. Inleng lo chhawntu ber leh In chhung khawsak relah taima tak leh che peih tak a ni a. Chhungkhat laina pawh a hre thei hle a, a huikhawm peih berte zing ami a ni bawk. Zirna lamah chuan RB School-ah bul tanin Modern English School atangin Matric a zo a. Aizawl West College-ah PU a zir a, harsatna engemaw avangin a chhunzawm thei ta lo a ni. Tunah hian a fate panga (5) a kalsan.

A thih dan : Lalsawmliani hian a nunah harsatna hrang hrangte tawk ve thin mahse, amah hi mi hlim thei tak leh tuarchhel tak a ni a, min la dampui zel tura kan beisei laiin Ni 2 February, 2010 (Thawhlehni) zan dar 10:30 khan Falkland Veng-ah Motor Accident a tawk a, Aizawl Civil Hospital panpui a ni a. Doctor leh Nurse ten theihtawp an chhuah laiin Ni 3 February, 2010 (Nilaini) zing dar 1:10-ah Chatuan ram min lo pansan ta a ni.

Bial KTP Conference Vawi 53-na

[ 01 February, 2010 | 5 comments ]

Dawrpui Pastor Bial KTP Conference Vawi 53-na chu 28-31st January, 2010 chhung khan Saron Kohhran Biak inah tluang taka hman a ni a. 28 Jan (Ningani) zan khan Nomination Committee a thu a, 29 January (Inrinni) nileng khan Hruaitu Thlan & Rorel neih a ni a. Thupui vawi 3 ngaihthak bawk a ni.



Thupui :
'Kristian Thalaite leh Tunlai Khawvel'

Speaker : Upa C. Vanmuana

Agenda tih hlawhtlinte :-
i) ‘Kum 2010 chhungin Chhinga Veng Bial KTP nen Joint Meet neih dan tur Bial KTP Committee-in ngaihtuah rawh se’ - Dawrpui
ii) Bial chhung thalaite inkhawmah hma kan sawn theih nan Bial KTP in hma la rawh se. - Saron
iii) Dawrpui Pastor Bial KTP Sports hi kum khat danah neih ni tawh rawh se. - Zarkawt
iv) Bial KTP in Bial pum huapin Bible Exam buatsaih leh rawh se. - Saron
v) Inkawplo chi inkawpte (Homosexual) chungchangah kum 2010 chhungin CKTP-in zirtirna buatsaih rawh se. - Zarkawt
vi) Dawrpui Pastor Bial Zaipawl uniform thar neih dan ngaihtuah ni rawh se. - Zarkawt
vii) Agape Home Basketball Court Project-a kan lo neih tawh hi chhunzawm leh ni rawh se. - Bial KTP
viii) 2010 Bial KTP budget atan Rs. 1,60,000/- kan pawm.

2010-2011 Bial KTP Office Bearer thlan tharte :-
Leader -
Pu Lalhmangaiha (Zarkawt)
Asst. Leader - Pu Lalrohlua (Saron)
Secretary - Pu Lalthlanga (Dawrpui)
Asst Secy - Pu H. Lalruatkima (Saron)
Treasurer - Pu Zothlamuana (Zarkawt)
Finance Secy - Pu Lalbiakdika (Dawrpui)