2009 Krismas hlim leh lawm taka lawm a ni

[ 27 December, 2009 | 3 comments ]

Khawvel mi chi hrang hrang, Kristian leh Kristian lote pawhin an ngahfak Khawvel Chhandam tura Isua Krista lo pianna hriatrengna “Krismas” chu khawvel hmun hrang hrang leh Mizoramah hlim leh tluang taka lawm a ni. Aizawlah chuan boruak muanawm taka he ni ropui hi lawm a ni a, Kohhran tam zawkin Dec. 25, 2009 Krismas Ni hi Pathianni anga serh a ni a. Nileng leh zan thlengin inkhawm neih a ni a. Zaikhawm boruak pawh thenkhat chu an tui viau niin a lang. Dec. 26, 2009 Inrinni hian a lawmna Ruaipui an theh hlawm ang. Veng thenkhat chuan Mitthi an neih avangin boruak a nuam lo deuh.

Dawrpui Veng boruak a nuam thawkhat a, Dec. 22, 2009 zana Mitthi kan neih avangin tlemin boruak a danglam deuh a, duhthusamin kan intawiawm tha thei lo deuh a, a pawi hle. He hunpui vuakveta Dawrpui boruak chu a pui muah muah hle a. Sorkar lam atangin No Vehicle Zone an siam avangin Dawrpui vengchhung Pu V. Lalliana kawt atanga Canteen Kual chu kawnglai Bazar a ni ber a. Mipui tan pawh kal ngaihna a awm meuh lo a ni ber. He No Vehicle Zone hi mipui lam chuan tha an ti hle a, mahse tun aia ruahmanna fel zawka siam hi a that hmel.

Dawrpui vengchhunga pawl hrang hrang YMA, MHIP, MUP leh Kohhran te pawhin he Krismas denchhen hian Chibai bukna an sem chhuak nual hlawm a :-

YMA Dawrpui Branch pawhin Vengchhung mi harsa deuh chhungkaw hrang hrang hnenah Rs. 1,000/- diat diat an sem a, damlo rei tawhte hnenah Krismas thilpek an pe bawk.

MHIP Dawrpui Branch-te chuan Durtlang Presbyterian Hospital, Aizawl Civil Hospital leh Vengchhung mi harsate hnenah Krismas Chibai bukna thilpek an hlan.

Presbyterian Kohhran Hmeichhia, Dawrpui pawhin vengchhung mi kum 80 chung lamte hnenah Krismas thilpek an pe bawk

MUP Dawrpui Unit- te chuan vengchhunga kum 80 chin chunglamte hnenah Kristmas chibai bukna thilpek an hlan a, tin, chhungkaw harsa zuala an hriatte hnenah tanpuina thilpek an hlan bawk a ni.

He Krismas denchhen hian Bungkawn chu mawi taka chei a ni a, hemi kawnga sulsutu leh hmalatute an fakawm hle a ni. Thlalakpuitu an thahnem hle a ni.

Theih ang tawka khawtlang thianghlimna atana Duty kalpui a ni a, kumin hian Sorkar lamin Force lam Duty a dah tha a, khawtlang duty pawh a hahdam phah em em a ni.

A lehlamah thung chuan kumin Krismas hi Dawrpui veng tan chuan a nuam mawlh lo thung. Kum dang zawng aia Mitthi kan ngah kum a ni a, khawhar chhungte pawh an khawngaihthlak hle a, hnem pawh kan inhnem hman lo a ni ber mai a, Lungleng leh khawhar taka Krismas hmangtute Dawrpui veng.com chuan a hre reng a, kan tuarpui tak zet a ni.
Kumtharah hun lawmawm zawkah Pathianin min hlangkai turah ngai ila, hun kal ta te theihnghilhin hma thlir duhawm tak nei theuh turin duhsakna kan inhlan a, Kumthar Chibai kan inbuk vek a ni.

Lung (heart)

| 0 comments ]

Tunah chuan kan changkang ta deuh a ni ang, Heart attack (Lung na) a thi te, zeng te kan nei ta nual mai a. Hei hian kan hmasawnna leh ei leh inah kan fimkhur lovin ruihtheih thil, Vaihlo, Sahdah, Khaini leh Tuibur kan zu in kan hmuam nasa si a. Hei hi kan Lung na (Lung chaklo) tam ber siamtu a ni thei ve a ni tih hi hriat a tha.Vaihlo zu lo mah la i hmuam ho kha a thawh dan a in ang deuh reng a. A tira lung leh chuap tha tak nei pawh kha, khing zuk leh hmuam avang khian zawi zawiin thisen dawt a ti zim a, chuap a boruak luhna a ti tein a ti khauh zual a, zawi zawi a a lo chhah telh telh khan thisen kal a chak thei lova, lung (Heart) khan a pump chak zual a ngai tihna a ni a, hemi avang hian kan lung chu hahthi phul kaiin thisen pump chhuak turin a tan nasat a ngai ta a ni.

Thluak hian Oxygen duh tawk a neih reng a ngai a, a neih loh chuan lung leh chuap hnenah pump chak zual turin thu a pe a. Vaihlo zuk vanga thisen dawt lo khawng leh te ta kha thisen a luang tam thei lova, thluakin a duh tawk hmu turin a tha tawpin a tang ta tauh tauh mai a ni. Hetiang alo nih hian COPD (Cardio Obstractive Pulmonary Diseaces) chuap leh lung thalo a lo ni ta thin a ni. A nihna takah chuan lung khan extra works a thawk nasa lutuk a, a lo chau ta thin a ni. A peih loh tawp hun a thlen phei chuan lungphu chawl dik taka thih mai theih a ni.

Vaihlo zu nasa reng reng chuan khak an ngah a, muthilh chhung chauh pawhin chuap a buai a, khak a siam ta thin a ni. Heart Attack erawh hi chu a dang leh deuh a, kha thisen dawt te telh telh kha a chhung pawh a lo mam lova, Cholesterol san vang te in (Sa ei nasa ho) lung chawmtu thisen dawt hi a ping thut thei a, a pin chuan lung tihrawl kha a thi a ni ve mai a, a na em em a, an thih loh pawhin an chak loh phah hle thin. Hei hi ‘Heart Attack’ kan tih ber chu a ni. Chuvangin, heng thil bawlhhlawh - Vaihlo, Sahdah, Kuhva, Khaini leh Tuibur tih vel ho hi chu lung (Heart) tha tak neih reng i duh chuan tawp san mai rawh. Biak In hung chhung kawtlaiah phei chuan Lalpa’n a phal lo. I thianghlim tur a ni kei ka thianghlim si a.
- Dr Thangchungnunga, MS (Ortho)

Thil tha zawk ching chhuak zelin

| 0 comments ]

December chu kan lo thleng a, puan lawk ang ngeiin Zodin Square atanga Chanmari kawn thleng motor leh lirthei dang kal phal loh tih chu a hlawhtlin ngei theihna turin Traffic Police lam pawh an virbuai hle a. Kawngsira motor dah pawh zing dar 10:00 hnu lamah chuan Recovery Van hnungah an bei tai tai hlawm mai, khawiah tak dahsak hlawm ang maw? Zodin lam atanga lo lutin keipawh ke in ka rawn phei a. Kei chang nilovin midang pawh an ni ve tho a ni ang, kawnglaia kal ta mai lo chuan a tawt a tawtin footpath-ah kan inkalthuah tup tup mai a. Ka hre chhuak thut a, ngampa deuh chuan kawnglaiah ka’n chhuk a, engthawl deuh chuan ka kal a; mahse, ka rilruah motor-in min sut mai hlauhna ka la nei a, ka la hawikual chhen mai. Demawm tak chu ka ni bik lo, tih than loh vang mai a ni zawk!

Chik takin ka ngaihtuahna hmangin ka’n inngaihtuah fim a, chuta ka thil hriatchhuah thar chu hei hi a ni. Motor kawnglai taka mihring kan han kal ta hut hut mai chauh kha thil thar a ni lo a, nidanga boruak kan hip ang lo tak mai boruak thiang kan han hip ta kha ka rilru a thil thar danglam tak chu a ni. Kan veng nu pakhat nen kan kal phei dun a, motor khu dum tak mai kan hip thin ang nilo, boruak thianghlim kak mai kan han hip chu a nuam kan tiin “hetiang ang hlir hi chu ni thei se chu kan veng pawh hi a hriselin a nuam ve deuh tur” kan ti dun mawlh mawlh a. Ka Office kal tur Zodin pela ka kal pawh chu kan veng kal pelh ka hreh phah ta hle a, a piah lawk chu khawdang daih lo awm ta ang maiin a lo ri leh vut vut mai bawk si a.

Kum hnih khat kaltaah khan vawikhat chu ka khuh reng mai a, ka hrawk a na bawk si a, Dr. Rohlua (Canteen kual Pu Hminga makpa) hi ka inentir a, ani chuan, “Bronchitis tlem i nei a nih hi, Dawrpui veng a cheng reng hi chuan in nei deuh vek ang” min ti mai a. A dik tlat bawk si a, mahse, ka ngaihtuah chian chuan a lungngaihthlak ka ti ta hle mai a. Hmundanga chenna tur kan nei chuang silova, tichuan natna pawh kan chungah lo thleng dawn se, kan sepui ruah tuar ngawt ngawt mai dawn a nih tak chu ka ti ta ringawt a.

Ka rawn sawichhuah duhna chhan tak chu, he thil duhawm tak mai - kea kal mite tan hlauh tur awm lo a Krismas bazar lungmuang taka an bazar theih leh dawrkaite tan pawha tlanchhe chunga dawrtu nilova muangchanga dawrtu an nei theite chu a hlu hlein ka hria a. Chumai nilovin a venga chengte’na boruak thianghlim Lalpan a thlawn liau liau a min pek kan han hip ve theihna hun remchang a lo ni lehzelte chu a lawmawm ka ti a. He thil buatsaihtu kan sawrkar chungah hian lawmthu ka sawi a ni.

He thil duhawm tak mai hi vawikhat mai atan ti nilovin, dan ang (tradition) ah nei ta zawk ila, a hun a lo thlen chuan kumtina tih ni mai sela. Amaherawhchu, Dawrpui leh veng dang, lirthei kal phal lohna in a huam chin rem lai laiah hian lirthei dah hi phal zawk sela, hmundang an buai lutuk loh nan tih hi ka rawt tel duh bawk a ni. Entir nan, Vaivakawn lamah te, kawngsirah motor an dah a, traffic a tawt ta lutuk si a.

India ram hmun hrang hrang, a bik takin Hill Station-ah hian bazar lun laia motor luh phallohna hi a awm fur a. Ka hriat chian ve pakhat kan sawi ve theih chu Simla khu a ni. A area zau tak chhung, a bik takin sumdawnna leh bazar velah khuan motor luh an phal lova, zalen takin ke in duh tawkin a kal ve theih a, khu khuan mi a hip mai bakah a kal tawh ten nuam an tih thu an sawi thin. Hetiang deuh hian Dawrpui atanga Zarkawt vel thleng tal hi chu tih ve theih nisela chuan a va tha lehzual dawn em!

Thil tha tih hi banglo mai nilo vin zawng chhuak thar zel zawk ila, ram nuam chu kan nei ve thuai ang le.
- Vanhmingliana, Dawrpui

Pu Laltanpuia kan chan ta

| 1 comments ]

Pu Laltanpuia hi Pu Lalremmawia (L) leh Pi Zomawii te fa paruk zinga a pathumna niin December ni 23, 1982 khan a piang a, Dawrpui Venga piang leh seilian a ni. Kum 2002-ah Lalhlimpuii, Tuikual nen inneiin fapa pahnih - Lalremsanga (6) leh Lalmalsawma (5) te an nei.

Pu Laltanpuia hi a naupan lai atanga mi nungchang zawi mi leh mi inthlahrung mi a ni a, taima tak, a phak ang tawk, thawh tur awm ang apiang thawh hreh neilo mi a ni.
Kohhran leh khawtlang lamah inthawh tamlo mahse, khawhar kal leh thlanlaih lamahte chuan a phak ang tawk tawka tha thawh ve fo thin a ni.
December ni 22 zan dar 9:30 vel khan an In bulah chesual palhin chatuan ram a pan a, a tuk December ni 23 chhun dar 12-ah vui liam a ni.

Mizorama Krismas kan hman tan dan

[ 19 December, 2009 | 1 comments ]

Mizorama Krismas kan hman tan dan hi chiang taka ziakna hmuh tur a awm mumal loh avangin kan hman tan dan leh tih dan chiah hriat a har hle a. Kan rama chanchinbu hmasa 'Mizo leh Vai’ Feb.1904 leh Feb.1905-a chhuaka an ziak dan i lo thlir teh ang, heta tang hian Krismas hi kan hmang chho ve zel niin a lang (he thu hi Thu leh Hla Dec. 1989-a chhuak, “Mizo Krismas Hmasate’ tih Pu C.Vanlallawma ziak atanga lak a ni).

Kum 1903 Krismas : Krismas hi a awmzia Isua lo pianni a ni. Kum tin-in Disembar ni 25 a awm thin. Tin, Kristian hovin chumi ni chu an ngai hlu em em mai a, “Lawmni ni bik a ni,” ti-in.Tin, chumi ni chuan awmni an kham thin.Tin, tunlai sawrkarte hi Kristian sawrkar an nih avangin chu mi ni chuan awm ni an kham thin; an hnathawk tute zawng zawng Kristian emaw, mi dang emaw pawh an chawlh tir thin.Tin, hlimna turin ruaithehna te, englo shem te, in fiamna tin reng te an shiam. Zosap leh sawrkar in, chu mi ni atan eng lo an thawh-lawm khan sebawng leh vawk ser leh fu nen an lei.

Kum 1904 Krismas : Krismas chu Mizo ramah hian Sap ho an awm avangin a lo awm ve ta a, 25-na Disembar 1904 a khan an tan a.Lunglei zosap pahnih te pawh an nupui ve ve te nen 23-12-1904 khan Aizawl an lo phei a.Zosap skul naupangte pawh in tangkan thawhlawm a. Sapho pawh in cheng 50/- lai an ngah a. Vawk pathum an lei a, thil dang nen. Disembar 27 ah ruai an theh a, nitlak dawn in zosap skul ah an inkhawm a, Lunglei zosap pahnih te chuan hmanah Mizo rama an lo kal hmasak thu, an chanchin leh lawmthu te an sawi a.Tin, a tuk 25 a bawrhsap in a sapho Pathian thu ngaithla in an inkhawm a, sap hmeichhia 6 leh mipa 9 an ni a, Mizo 11 leh Khasi 7 leh Bengali 3 pawh an tel.Sap te chuan hla an sha a, sap upa zawk in thu a shawi a, Isua lo pian tirh ata a thih thlengin a shawi a.Hemi zan hian sap ho chu bawrhsap in a an inkhawm leh a, in chhung a chuan Far kung, a hanh chawp in an phun a,a zar kin chuan khawnvar mawi tak tak an khai thluah a.Chu mi bul ah chuan sapho 15 lai chuan nasa takin hla an sha a, a mawi em avangin babu office a mi pawh an lo kal khawm a, mawi an ti hle a.Bawrhsap chuan a chaw ei dawhkan a Khasi ho thingpui tui a in tir a.Dar sava en nawm te an shiam a, dar zaiin an chaih a, a hmuh nawm hle mai. Mi lem kaih chhuk zawng a nui thei, hlawh chhoh zawng a mu hil thei te an shiam a.Desembar 26,27,28 chhung zawng in zosap skul a chuan Pathian thu an shawi leh ngai-thla in mi an awm reng a, lehkha pawh an zirlo.29 zan ah skul vek sap ho an in khawm leh a, Babu ho, Mizo te pawh a duh apiang an lo kal a, Bawrhsap in , ‘tumah chapo suh u,’ tiin mipui a zilh a, sap an zai a, Khasi hmeichhia 2 pawh in hla an sha ve.Mizo chuan pawl 4 in shiam in hla an in shak siak a, kalrem ‘Mizo kan ni lawm ilang in’ tih hi. Chhinga zirtirtu pawlin an thiam ber a, lawm man tlem an hmu.An shak na hmun an dawh kang a: puan sen an phah a, hla sha apiang an va ding, mipui an tam vei nen ! Ni 30 ah chuan sapho chu Chaltlang a an kal a, ruai te an theh leh a, January 2 a chuan Lunglei Sap te an haw phei.

(Kum 1905-ah pawh Pu Zosapthara (Edwind Rowlands) hovin tuna Synod Press awmna hmunah hian Krismas an hman thu report hlui thenkhat atangin a lang thei a, hengte hi Mizorama Krismas kan hman hmasakte leh hman dan tlangpui chu a ni mai awm e)

,

Naupiang Chibai bukna hlan

| 0 comments ]

YMA : Kan Branch YMA in kan lo tih thin fo tawh angin kumin pawh hian veng chhung engemaw zat hnenah “Krismas Thilpek” sem leh nise tih a ni a, hemi atan hian Section hrang hrangin mahni huam chhungah tanpui awm deuh lo dap chhuah tur a ni. Tanpuina hi Rs 15,000(Singkhat sangnga) aia tam lo nise tiin rel a ni.

KTP : December ni 13 (Pathianni) khan Old Age Home-ah leh Gan Sabra-ah Naupiang Chibai bukna thiklpek an hlan tawh a. 22 Dec (Tue) zan hian Presbyterian Hospital, Hmangaihna In leh Damna In te tlawhin thilpek hlan leh tum bawk a ni.

Pancreas

| 0 comments ]

Pancreas kan tih mai hi Mizoin a hming kan lo nei lova, tun laiah Pancreas natna (Pancreatitis) vang a thi te pawh kan neiin a hming pawh kan hre lar ta viau a. Amah hi pumpui hmawra Mit (bile) tui lo luhna bula awm ve, kutphah chen dawn hi a ni ve a. A pawimawh em em a, kan taksaa Blood Sugar Control-tu ber pakhat a ni a. Ani hian “insulin” kan tih mai, thisena glucose (Carbohydrate) tam lutuk tur kha a lo si ral a, a tawk chiah turin alo control ta thin a ni.

Amah hrim hrim hi a na in, a Cancer emaw, a bawk emaw, Lungte in a kua tui chhuahna a hnawh emaw chuan hna a thawk thei lova. A nih loh leh Zu in nasat lutuk avangin a chhe thei a, thih hial pawh a thih theih a ni. Tin, amah hrim hrim hi a chak loin hna a thawk thei lo ve tho bawk a. Chuvang chuan a siam tur pawimawh insulin a siam theih loh chuan, Diabetes nei (Zun thlum) kan tih hi alo awm ta thin a ni. A thawh ber thisena sugar (thilthlum - glucose) a nih tur anga a control theih loh veleh thisenah sugar alo tam a, zun thlum kan ti ta thin a ni. He Insulin Chemical siamtu hi Cell chikhat a awm a, chu chu pianpui a chak lo sa, an awm ve a, heng ang ho tan hi chuan fimkhur a ngai. A awmzia chu, Diabetes hi chhungkuaah in thlahchhawn zel theih a ni tihna a ni a. Mawl taka fimkhur dan chu- i thisen zawmpui te nu leh pa, pi leh pu, unaute Zunthlum an neih chuan nei ve thei din hmunah i ding tih hria in thisen test ve fo a tha.

Kan taksa hi kum 30 thleng hi chu a fit tha em em a, eng natna pianpui chi ang pawh hi an in peizawn a, an Control thei hram hram a, kum 30 hnu lamah hi chuan mahni seh seh mual hrangah an ti ve ta deuh a. Chuvang chuan thil awmsa reng kha alo lang chhuak ta thin a ni. Entirnan - Gout te, Diabetes te, Ruhseh te, Cancer te pawh an ni ve thei a. Chuvangin mahni chhungkuaa natna benvawn a awm leh awm lohte hriat tum tur.

Diabetes hi a hlauhawmna chu, kan taksa englai pawh hi ati chhe thei a, mit a ti del thei a, Septiceamia a siam thei a, lung leh kal leh thin a ti chak lo thei bawk a. Thisen dawt a ti ping thei bawk a. Engmah hre lovin an awm thei bawk a; Sawi sen a ni lo. Mahse, chumi avanga hlaua phiruai erawh a ngai lo. Doctor-in damdawi leh a enkawl dan an tih hi zawm mai a tha a ni. Mahni Blood group te, Blood Pressure te, mit a dik leh dik loh te hi chu thaa kan inhriat lai kum 20-30 inkar chhung hi chuan hriat theuh a, chhinchhiah i tum ang u.
- Dr Thangchungnunga, MS (Ortho)

Nanoi weds Zothanpuia

| 5 comments ]

Vanlalruati (Nano-i) Med.Qtr leh Zothanpuia (Vaivakawn) te December ni 3 khan Vaivakawn Presbyterian Kohhran Biak inah an innei.

Halpuah lo nen Krismas

| 0 comments ]

Khawvel Chhandam tura Isua Krista lo pianna champha kan hriatrengna Krismas chu a ni telin kan hnaih tial tial, sorkar leh YMA ngenna anga Halpuah etc. khapna pawhin awmzia a nei hle niin a lang a. Kan thuneitu lam ten thuawihlo fal an man leh zauh zauh bawk a. Veng hrang hrangin tualchhungah ngenna leh khapna an puangzar reng bawk a. Mipui pawhin kan zawm tha hlein a lang rih a, zawm zel nise a duhawm ngawt ang.

Krismas hian Halpuah a keng tel lova, khawvela sakhaw dang betu thenkhat ten an sakhua nena inzawmna neia an hriat avangin halpuah hi an hal thin a, keini Kristiante hi chuan kan sakhua nen inzawmna a nei hlawl lova, tul pawh a tul hek lo. Damlo chau leh natna hrang hrang ten an lo tuar em em bawk thin si a, “at lai hun” kal pel a, Halpuah lo nen Krismas hman hi kan thiam chho zel dawn pawh niin a lang. Chuvangin, chhungkaw tinte mahni chhungkua theuhah tan la tlang ila, mahni tu leh fate leisak lo ngam ila, “Halpuah lo nen Krismas” i hmang ang aw.

MASI

[ 13 December, 2009 | 10 comments ]

Kan naupan lai chuan masi kan ti mai a, kawr thar leh pheikhawk thar neih hun leh duh tawk a sa ei hun ani ber a. Kan nghak hlel thei hle. Tunah zawng tlangsam par hmuh tur pawh a awm ta lo. Kan naupan lai a, chaihchun leh sertawk rah kan chaih a, kan pet kha alo nuam ber mai. Tunah zawng, motor lem, a tlan thei, thlawhna lem a thlawk thei te, Robot kal thei te duh ai sam piah lam a thil tha hlui a awm ta. Mahse, naupang an hlim chuang lo, chuvangin in ngaihtuah kan ngai ta hle. Engkim mai KHAP-NA RAM ah hian i fanu, fapa hi a รข lo anih chuan lawm takin Jail zau takah i tang tih hria la.

I thinlung lam a free a ngai a, hemi tur chuan bike, car leh thawmhnaw thar tha hi hlimna ani lo tih te, sum ngah hi an rethei zawk tih te hi hria in kan fate, uluk takin i enkawl ang u. Tun hun, chhungkaw kima awm lai hian, rinawmna, taimakna, tlawmnhaihna, sum kut tling lova lak that loh zia te in hrilh a hun in, hun tha kan neih chhun hi hmang tha ila, chhungkua theuh in hlim taka kan hman chuan, kan veng a hlim a ni mai. Chuti lova Bethlehem lam hawi lo zawnga kan inpuahchah anih erawh chuan thihna leh sawn paina in min hmuak tih i hria ang u. Chuvangin lo in enfiah ve teh, kan chhungkua kan hlimin kan him em?
- Dr Thangchungnunga, MS (Ortho)

Pu Lalramthanga IFS, Secy to CM

| 0 comments ]

Pu Lalramthanga IFS s/o Pu Haudala (L) Dawrpui South chu Secretary to Chief Minister - ah ruat thar a ni a, kan veng pa hetiang ang dinhmuna ruat thar a ni hi kan lawm pui hle.

Dawr leh in rawk

| 2 comments ]

1] RAVE kudam : December 9, 2009 (Nilaini) zan khan Dawrpui Presbyterian Church building-a Rave dawr kudam (Hawla dawr) chu an rawk a, mahse a bungrua hi vanneihthlak takin Police ten an hmuh sak in a ru tu hi man a ni bawk a ni.

2] Pu Hrangthanga in : Hemi ni vek chhun khan Pu Hrangthanga in, Jail veng chu rawk a ni bawk a, pawisa fai Rs.30000/- vel an ru chhuaka, a rawktu hi tun thleng in an la man lo niin thu kan dawng.

3] Pastor Qtr : December 10, 2009 (Ningani) chawhnu khan Dawrpui Presbyterian Pastor quarter chu misualin an rawk bawk a, an almirah kar chhiain pawisa leh Mobile handset an ru a, a rutu hi vawiin ni thleng hian man ala ni lo bawk.
(Tunlai Krismas vuakvetah hian rukruk leh pick pocket a tam hle a, mitin i fimkhur ang u)

2010 Dawrpui Branch YMA Hruaitute

| 1 comments ]

Senior Adviser :
1. Pu Lalhmingliana (Zofa)
2. Pu C.Lalbuanga
3. Dr. C.Zarzoliana
Executive Committee Member :
01. Pu H.Dingluaia 02. Pu Malthantluanga 03. Pu Vanlalchungnunga
04.
Pu Malsawmdawngliana 05. Pu Kapchhunga Pachuau
06.
Pu Vanlalruala 07. Pu R.Lalrinmawia 08. Pu Remsiama
09. Pu Rochungnunga 10. Pu Ziakkima Pachuau 11. Tv Lalrinsanga Pachuau12. Pu Kapthianga Ralte 13. Tv R.Lalremruata (Lalruata) 14. Tv Zonunsanga
15. Tv Robert Lalremruata 16. Pu H.Vanhlupuia 17. Pu R.Zomawia
18.
Tv Michael Zomuansanga 19. Pu Lalthakima 20. Pu Lalngaihawma
21.
Pu R.Zoliana

Section tin Leader leh Secretary turte :
Chawngbawla Section
Leader :
Pu P.C Zohmingthanga
Secretary : Pu David Remruata
Taitesena Section

Leader :
Pu H. Lalchhanhima
Secretary : Tv. Lalsangbera
Vanapa Section
Leader : Pu Lianzama Pachuau
Secretary : Pu Lalnunmawia (Mawia)

Thisuk nei

[ 06 December, 2009 | 7 comments ]

Thisuk kan tih hi miin thisen tam deuh bua emaw thil rapthlak deuh a hmuh emaw hian engmah hre lovin an tlu thin a, hei hi dawizep vang pawh a ni lova, thisen (mihring atanga) chhuak an hmuh hian hlauhna leh rapthlak tihna an nei a. An duh vang reng pawh ni lova thluak lam control-tu chak leh chak loha zir a ni zawk a. Hetianga engmah hre lova a lo tluk hian kaihthawh loh tur.

A chhan chu mihring thisuka a awmna chhan kha thil rapthlak emaw thisen chhuak a hmuh emaw khan a taksaa chemical (damdawi chikhat) -in thisen zam len leh tet control-tu kha a chak thut a; chu chu Sympathetic Nerve a ni a. Khatia thil rapthlak tak a hmuh khan a lo sympathise a (tuarpui) ve a, thisen dawt kha a var ta huau mai a ni. Taksa puma vawi leh khata thisen dawt a len thut chuan malpui pahnihah ringawt pawh hian 5 lts chu a tling thei mai a. Chuvang chuan ke leh pum lamah gravity pull (a rihna)-in a luangthla thut mai a, chu veleh thluak lampang computer-in an power supply a tawp tih an hria a. A hmuh let lehna rang berin, kha mi kha a tluk tir ta tawp mai a. Khatia a khampheia a awm kha chuan thisen dawt var (lian) vek pawh nise thluak lamah a luang phei ve leh ta a, reiloteah an lo harh ve leh mai thin. Computer-a electric supply a tawp thut a, inverter/UPS -in a chhunzawm ang chiah hian thluaka khan thisen a hmuh vatna tur a ngaihtuahna avanga tlu an ni a. Kaitho lo la, amahin a tho leh mai ang.

Hetiang thisuk nei hi taksa a thil dik lo, lung na, kal na, chuap, thin engemaw dik loh vang a ni lova, thluak computer control-na buaithut vang a ni mai a ni. Hlauh tur a ni lova, natna dang siam thei pawh a ni chuang lo. Mak deuh chu- tlangval lianpui pawh thisen lak sak mai maia thisuk nei zuk awm thei a; Chuvangin, innuihsawh ngawt tur pawh a ni lova, an duh reng vang a ni lo tih hriat tur a ni.
- Dr Thangchungnunga, MS (Ortho)

CFC Chhandamna Camp

| 2 comments ]

Dawrpui Presbyterian Kohhran, Children For Christ buatsaihin 3-6 December, 2009 khan Dawrpui Biak inah 'Chhandamna Camp' Gospel Thunder Team-te ruaiin buatsaih a ni a. Kum dang anglo takin Junior Deptt. chunglam Biak inah hian an riak lut a, Junior hnuai lam zawng langin hun an hmang ve bawk ani.

Christmas Card

| 4 comments ]

Kutke kima la thaw ve tek tek ta chuan Masi Card te kan dawng ve leh ta nawlh nawlh mai. Heng duhsakna Card zozai te hi chhan lohva Dustbin luahlumtu atana hman ngawt chu ka ui sia, ralpui phiar taka ka phiar hnuah ka chhanna tur che u chu hei ka’n puan ngo zawh ve tak hram hi. Thu fahrah te te mah nise, daikal chhung titawitu atan tal in lo hmang a niang chu.

‘Ber’ thla kan kaia, heh rep, biang chat tih vel kan buaipui leh ta. ‘U a..ma’ lawma Lengi leh Vala te ‘Hey Tonight’ hun a hnai leh tawh miau a lawm. Nia, kan hma lawkah Kristian te hunpui kan hmachawn miau avangin U a..ma lawm turin kan inbuatsaih mup mup a, kan inbuatsaihdan erawh a in ang lo hlawm leh pek ang chu. I inbuatsaihdan kha han ngaihtuah vang vang la, chunglam duhdan a nih i ring em? Sasste & Sheng (nula & zu) tih vel nena i lo inbuatsaih ve chiam mai chuan rorelna ni-ah nuam i sa lo viau ta ve ang.

Kan khaw Taliban ho hi kumin chu rinaiin an reh tlat, uniform ha a, teikual vel lam an tam viau thung a, an thuzawm chakawm khawp erawh chuan an polite em em lem hlei lova, uniform ha, zu rim nam him hiam chunga lo inti duty ve em em tawk lah bo hek suh. Polite sawi takah chuan zan khat chu KTP hnatlang hawng nula fel deuh mai hi a nutapa leh an KTP hruaitu pakhat nen inlam panin an kal a, kawng lakah chuan Traffic Police, zu rim nam lehnghal chuan chu nula fel tak mai chu an lo fiam/chhaih vel! a nutapa in engatinge ni? an ti dek dek a, uniform ha min va zah lo ve an la ti zui”, (Traffic Police uniform hi nula chhaih vel na tur emawni tehreng ni). “Tlangval te u, lo ngaithla teh u, in nula kalpui kha tu ten emaw an lo chhaih velin lawm suh u, a kalpui tlangval kha an zah miah lo che tihna a ni. Nula te u, in kawng kal emaw khawia in awm lai pawhin hmelhriat mangloh tlangvalin lo au che u in lo chhaih vel che u se la, chumi chu mi mawl tawp a ni tih hriain khin let tlakah ruat hek suh u. Tlangval Ch.V. an tih ang chi hi an nih avangin hey tonight pui tlak an ni lo”. Kan peng kawi ta vak a. Tleirawl leh rawlthar te pawh u a..ma lawm turin an phak ang tawk tawkin an inbuatsaih ve nasa. Nu leh pa ten kan fate inbuatsaihdan kan hriatpui em? Kumin Krismas hi i fanu/fapa khan sual kawng zawh tanna atan a hmang palh hlauh ange.

Aizawlah chuan kum dang ang bawkin Dec.24 zanah Coffee Nite a awm leh ngeiin a rinawm a, Sakhaw thila punkhawmna a nih avangin kum dang ang erawh chuan Kohhran hruaitu, Sakhaw puithiamte aiin Sorkar milian an langsar zawk tawh lo turah ngai ila. Rawngbawlna hlawk tak a ni tih hrerengin a buatsaihtute pawhin sumdawng rilru nilovin missionary rilru pu mawlh teh se. Zoram khawpui dangahte pawh hetiang programme hi a awm mai thei. hetiang programe hian fak/sel na tur tamtak a nei a, selna anka kan cheh hrih lovang. Coffee Nite hian tlangval/rawlthar leh tleirawl zaikhawm peih lo, in-a awm peih bawk silo, khawi lai kawngpui emawa in race kual mai mai tur leh Sasste lo ride kual pui vel tur te, khawi lai emawa lo interek hrang tur engemawzat te a thulh tir a. Accident a tlem a, mipat/hmeichhiatna hmang sual tur engemawzat a veng bawk, a va hlawk em!

“Kan zaikhawm ang chu” i ti maw? tui taka i zai hlan khan khawi khawi kilah emaw i fate khan thil an lo ti ang a, an duhtawk hunah i bulah fel hmel takin an lo thu leh mai ang a, ka nu/ka pa chu “engmah lah hi i hre si lova” an tih rilruk khum ham ham mai ang che. Zaikhawmnaah i hruai theilo a nih phei chuan khawi khawiah emaw an lo ride kual vel mai mai tho awm si a. Coffee Nite-ah chuan va kalpui la, khawidangah mah kalpen an tumin a rinawm lo.

I fa nula/tlangval tantir leh la naupang deuh pawh Coffee Nite-ah hian an tel chak maithei, zaikhawm i duh avanga, “Inah lo awm ula, lo chhuak suh u”, ti a, i kalsana, i faten sual lam thil an lo tawh palh pawhin i mawh a ni ang. I faten nunkawng dik an zawh aia, nangma nuam tih zawng i ngaihpawimawh zawk tlat avangin. Han ngaihtuah zawm mah teh.

Heng ang te rawn fak mawi vak, biak in-a hman that zia te pawh rawn sawi mawi zawk awm in ti a ni maithei, thlirna tlang dang atang chuan a dik a lawm. Mahse, kan hun hman mek hi hmanlai ni lovin tunlai a ni tawh tlat a, thangtharte hian heng ang boruak han hip ve te hi an mamawhna lai a awm ve tlat a ni. Mahse, heng ang chi-ah hian kan fate anmahniin kan kaltir mai tur erawh a ni lo, kan hruai ngei tur a ni. I fate chu zaikhawmnaa awm tura i duh a nih pawhin a tawp thlengin awmpui ang che. I faten zaikhawmnaah i hmel an hmuh ve si loh chuan zilhhau an ngaih hunah i thu an pawisa lovang.

Krismas vuakvetah kher lo pawh i fate chuan concert leh show hrang hrangte an en ve chak ang, pool te pawh an khel ve chak a ni mahna, “En lovang, khel lovang” emaw “va en rawh, va khel rawh”, emaw ti a, pawisa i pe mai a nih chuan i tisual ang. Hun remchang melh la, i fanu/fapa chu hruai la enpuiin khelhpui ang che. Nu leh pa duhtak te u, hetianga an hun awl remchang min hmanpui theih fo chuan in fate hian kan ngaisangin kan ngaina che u anga, engemaw ti a, chhuahvah duhna kan neih pawhin kan thiante sawm lovin kan nu leh pa te hlir kan sawm tawh che u ang a, in thu kan lo awih mai dawn a lo ni !
KRISMAS & KUMTHAR CHIBAI VEK U LE.

Social Nite & 2010 OB thlan

| 4 comments ]

December 3, 2009 (Ningani) zan khan Dawrpui Sikul Hall-ah, kum 2010 atana Dawrpui Branch YMA hruaitu thlan pahin Social Nite hlimawm tak hman a ni. Hemi zan Programme hi hun hnihah then niin, hun khatnaah hruaitu thlan a niin inthlanna felfai tak tluang takin hman a ni a. Inthlan result puan a nih hmain hun hnihna hman chhunzawm leh a ni a, inthlannaa kan R.O. Dr. C. Zarzoliana (Upa) chuan inthlan result a puang a, Vote tla zawng zawng hi 132 a nih thu a puan zawhin, thlan tlinte chu heng mite hi an ni, tih a puang zui nghal :-

1. Pu Chhawnkima Pachuau 2. Pu Rosangliana (Masanga) 3. Pu Vanlalbika
4. Pu Lalrammuana 5. Pu VR. Hmachhuan 6. Pu Lalhlimpuia Khiangte


Heng thlan tlinte hian an nihna tur an invuah fel anga, kar khat chhungin kum 2009 Branch hruaitute nen charge an inhlan fel ang.

Pu Hminga weds Chhingpuii

[ 04 December, 2009 | 1 comments ]

Vawiin dt. 4 December, 2009 chawhnu dar 1:00 khan Aizawl pa hlun leh sumdawng hlun - Zofa dawr neitu Pu Lalhmingliana chuan Thanchhingpuii (Chanmari) chu Dawrpui Presbyterian Kohhran Biak inah Kohhran Dan Dan Thianghlimin a nei ta. Thanchhingpuii hi School Education Deptt.-a thawk mek a ni.

Dialysis

[ 28 November, 2009 | 3 comments ]

Dialysis tih hi mizo tawngin a awm lo va, chuvangin kal(kidney) thuahfaina a ni ber mai a. He thil hi a tangkaiin nunna pawh a chhan hnem ta hle. Kal a tha lo kan tih hian thisena bawlhhlawh leh paih tur ho kha paih thei lovin a luang tlang ringawt a. Tui te, bawlhhlawh te, a paih chhuak tur a ni a. Mahse, taksa a bikin liver (thin) tha lo te, amah kal hrim hrim tha lote leh natna dang dang vangin a khawl hi a tawp hmak thin a ni. Chutiang a lo nih chuan, zun a insiam ta lova, zun aiah taksa pumah a kal kual a, an vung ta bur thin a ni.

Taksaa bawlhhlawh awmte paihchhuah loh a lo nih chuan reilote ah unconcious (engmah hrelo) in an awm ta mai a ni. Hemi, kal (kidney) thawk theilo hi Dialysis khawl hian a thawh sak ta a. Thisen zawng zawng hi khawlah a kal kual a, a inthlifim-a, kal pawh zawi zawiin a lo tha ve leh a, an dam ve leh mai thin. Mahse kal (kidney) kha engtinmah thawk thei tawh lova chhia a lo nih chuan, kal thlak a nih loh leh nunin a tlin loh hun a awm thin a, kal tha lo tam tak Dialysis vanga dam leh hi an tam em em tih hriat tur.

Tunah chuan kan Hospital a changkang ta hlawm a, heng khawl tha te hi kan nei ta a, nunna tam tak chhan a ni ta reng a ni. Dialysis tih laia a bawlhhlawh paih chhuah han hmuh chuan rapthlak khawpin a bal a ni.

Heng zawng zawng piah lamah hian Dialysis ngailo turin, zuk leh hmuam, zu in te sim a, tui leh thingpuisen hang a tam thei ang ber in tum tur. Tichuan, i lo hrisel ang a, Dialysis khawl hi i mamawh lo mai ang.
- Dr Thangchungnunga, MS (Ortho)

Rs.25 lakhs sanction tawh

| 10 comments ]

Nov. 26. 2009 (Zirtawp) zan dar 7:00-ah Dawrpui Multipurpose Centre Demand Committee chu Dawrpui School, YMA Committee room-ah neih a ni a.

Hetah hian hmalakna hrang hrang report ngaihthlak a niin, Pu Malthantluanga, Vice President, Dawrpui V.C. in Sorkar lam atanga lehkha rawn lut te leh hmalaknate report a pe a. Local Administrative Department-in Park siamna atan cheng nuai sawmhnih panga (Rs.25 lakhs) an rawn sanction tawh thu a sawi a, Demand Commitee chuan lawmawm a ti hle a ni.

Hmalak zui zel dan tur sawi ho a ni a. Chaktaka hmalak zui zel a tul thute sawi a ni a. Sorkar leh khawtlang indawrna chungchangah Village Council hnenah engkim thlen vek thin a nih tawh avangin Committee chuan DMCDC aiawhin Dawrpui Village Council leh Dawrpui Multipurpose Centre Demand Commitee Office Bearers ten a tul angin chak takin hma lo la se tih a ni. He hmalakna hi Village Council kaihruainain kalpui nise tih a ni bawk.

Dawrpui Joint Committee Thuchhuak

| 5 comments ]

Nov. 23, 2009 Thawhtanni zan khan Dawrpui khawtlang hruaitu hrang hrang VC, YMA, MHIP, MUP- te Joint Committee Dawrpui School-ah neih a an thurel thenkhat vantlang mipui hriat awmte kan han tarlang e :-
1] Vengchhung Chei : Krismas vuakveta veng chhung chei tha tih a ni a. Kum danga kan lo chei tawh Bazar Bungkawn chei leh ngei nise tih a ni a. Heng a hnuaia mite hi mawhphur tura ruat an ni :-
Conveners : 1. Pu Rosangliana (Masanga) & Pu Rothuamliana
Secretaries : 1. Pu KL Zamvela & Pu Vanlalbika
Treasurer : Pi Zosangzuali (Baby-i)
Heng te hian a tul angin phungbawm an siam thei anga, a chei hun tur leh a chei dan tur pawh an kuta dah a ni.

2] Ramri Chhinchhiahna : Dawrpui veng ramri chhinchhiahna a remchanna hmun apiangah tar leh nise tih a ni.

3] Vengchhung Venhimna : Dawrpui Vengchhung kawng hrang hranga alo thianghlimna atan leh vengchhungah Ruihhlo lo hluar zel dona atan New Market Area-a Duty turin Excise Force-te VC ten dil se tih a ni. (Kan VC-te hian an bawhzui nghal a, a rang lama tihhlawhtlin tum mek a nih thu kan dawng - Admin)

Pu-Tea kan chan ta

[ 24 November, 2009 | 6 comments ]

Tv. Joseph Lalhmachhuana (Tea) hi Pu P.C. Thandanga leh Pi Laldingliani (L) te fa, unau paruk zinga palina niin May 10, 1967 khan Civil Hospital, Aizawl-ah alo piang a. R.B. School-ah zirna tan ve in, Assam Rifle School-ah kal chhunzawmin a hriselna a that vak loh avangin Class - V bak chu a chhunzawm thei ta lo a ni.

Amah hi naupang zaidam leh nunnem tak, nu leh pa leh unaute hmangaih tak, thuawih thei tak a ni a. A nu khan hmun hran hrana hna a thawhna Sairang leh Serchhipah te a zui ve zel a. Sairang a an awm lai hian a mitah Balu an ti lut palh a, chuta tang chuan a mit hian a that loh hlen phah ta a ni.

A hriselna a that vak loh avang hian Delhi leh hmun dang dangah pawh check-up neihpui a ni tawh. Khawtlang leh Kohhran tan a phak ang tawk tawka in hmang ve tlat mi a ni a. Kohhran Zaipawl leh hnatlan nikhuaah a dam phawt chuan tel ve ngei ngei thin, thulh duh ngailo a ni.

Tunhma deuh atang khan a hriselna hi a tlahniam deuh a, a thawhah avangte in Damdawi inahte pawh lutin enkawl alo ni tawh thin a. Meizial hi a nghei thei tlat lova, tunhnai mai khan a thaw a hah zual a, Nov. 23, 2009 (Thawhtanni) pawh khan Doctor entir a ni a, chutah pawh chuan kalkawng kal ringawt pawh a chauh pui mai zel a. Nizan (ie.23 Nov) pawh khan rei vaklo chu lengchhuakin tui takin a mu a. Tukin zing (ie. 24Nov, 2009) dar 8: 00 vela kaithawh an han tum chuan a tho thei ta lo a ni.

Dawrpui Khawtlang dinhmun

[ 22 November, 2009 | 9 comments ]

Dawrpui Khawtlang dinhmun hi kan sawifo thin a, thenkhat thengathawngah a lut lo mai thei? Mahse, sawifo a ngai si a nih hi. Hengte hi lo zirbing ve teh u, engtin nge kan tih ang?

1] Nov 14, 2009 (Inrinni) khan VC leh YMA Ex. Committee member leh Section OB ten nilengin Dawrpui vengchhunga Dawrkai an dawr bak a Varandah vela dawhkan leh thil zawrh dahchhuakte ti tawh lova, mipui tana hmunawl tam zawk kian ve tura ngenin nilengin an fangkual a. A tirah chuan an han ti ve mai a, reilote hnuah a ngaite bawkin an tizui leh mai a. Hah man a awm lo hle. Hemi chungchang hi kan VC ten an bawhzui zel dawn niin kan lo hria.

2] Sualna a pung nasa a, kan vengah rukruk leh ruihhlo zuar leh hmang thinte an huangtau hle a. Veng mipui nun a ralti ta lek lek mai! Kan YMA leh VC ten theihtawp an chhuah mek a, mipui ten kan theihna chin chinah i thlawp tlat zel ang u. Tunlai hian YMA lamin zan lam Duty a ruahman a, kartin Thawhlehni zan leh Zirtawp ni zan Duty hun a ruat a, hminghmerh in mahni Duty hun pawh an ruat a. Mahni Duty hun nana chu ngaipawimawh tlang ang u.

Tin, Nov 21, 2009 Inrinni khan VC huaihawtin khawtlang nun siamthat chungchangah kan vengchhung YMA, MUP, MHIP Leader KTP & SAY, FXB, SHALOM, VOLCOMH etc. Joint Commitee an nei a ni.

Rulhut - II

| 10 comments ]

Rulhut hi tun hma Rambuai hma leh 1970’s thleng kha chuan kan ngah em em mai a, e chhuak loa ram pawh an awm lova, a thente phei chu ka lamahte alo chhuak hial a nih kha!

Tunah chuan a bikin khawpuiah chuan Rulhut kan tih bik (Ascaciasis) hi chu a awm ta meuh lo. Rulhut hi chi hrang hrang a awm a: Asearis te, Pinworm te, Hookworm te, Tapeworm te an awm a. Mizorama Rulhutpui kan tih chu tapeworm kan tih hi a ni a. Sei tak tak, chang rek thlik thlek an ni a, ran hian an pai tam bik.

Kan nun a lo changkangin, kan ei leh in te alo thianghlim ta bawk a, rulhut e chhuak an vang ta hle. A bikin naupangte hian an la nei tam deuh a, hei pawh hi tun hma ang em em chu a ni tawh lo. Hetiang rulhut kan ek chhuah loh vang ngawt hian kan pai lo tihna a ni lo a. Pinworm, hookworm-te hi mita hmuh mai harsa a te (small) an ni a, hengho hi kan pai deuh vek zawk a. Pum nuamlo, ti teuh teuh kan neihte, thin thip te a siam thei a. Tin, Vawk bawl kan tih ho hi hemi tapeworm tui (eggs) hi an ni a. A thi har em em a, chhum so chiam pawhin a thi thei lo, vaivut zingah pawh kum tam tak a awm thei a ni. Kan ei veleh pumpuia acid hian a kawr tuamtu alo chiah ral a, a note chu alo chhuak a, a lo thang lian ta thin a ni. A then chu thisen dawtah te kalin thluakah te, taksa khawi lai laiah emaw an tawp a, an awm ta reng a, thluaka a luh phei chuan buaina a siam thin a ni.

Tin, hookworm hi ke zungtang karah hian an lut a, tunhma chuian Bawng ek leh chirh diaka tuikhuah naupangin an chin/uar lai khan a tam a. Tunah chuan nausen tet atangin pheikhawk kan bun ta a, kan vei ta meuh lo ani ber. Pinworm kan tih hi mawngmirh kan tih hi a ni a. Hei erawh hi chu ala tam hle; ei leh in thianghlim loh vang a ni. Rulhut hi a tirh berah chuan Kelin a nei a, kel ek kha vawkin a ei a, an inkaichhawng zel a, kan ei tur thlaiah te, an lo kai ta thin a ni. Mahse hei pawh hi kel leh vawk khuahkhirh lohna khuaah chauh a hlauhawm tawh tih hriat a tha. Mihringin alo kai khan a e chhuak a, Ui in a lo ei a, a kai ve leh a, ui nen kan chengho leh si a. Hetiang stage hi chu Vawk khung lo, ek in nei lo khuaah a tam a, mahse Mizoram chu tun kum 20 chhung hian ek in nei lo khua an awm tawh lo a tih theih hial awm e.

Chuvangin, Aseacis (rulhut) kan tih bik tak hi chu a rampum ang pawhin kan ngah ta lo a ni. Chuvang chuan mahni a lo inenkawl ve dan tam tak a awm a, kut silfai ngun te, Rulhut hlo (eg: Albendazole )-te hi mum khat ei a tawk mai a. A ei dan chu regular taka thlaruk danah ei tur a ni. Chaw bel khat zen ho chuan zan mut dawnah a ruala ei thap a, zingah ek ngei ngei tur a ni. Mawngmirh hi a dam har a, Mebendazole hi a tha a. Ni khatah vawi 2 ei a, ni 3 ei tur a ni. Kum 1 ah vawi hnih tal tih tur a ni. Tunhma a rulhut hlo hlauhawm - fanghma, thingfanghma ei loh tur tih ang chi kha chu an siam tawh lo. Heng damdawi hi chuan engmah a hal lo tih hriat tur. Kum 2 chung lam chuan mum 1 ei a tawk a, kum 2 tling lo chuan a phel emaw a tui bur chanve ei tir tur. Naute an bawkvak thei tih atang hian engkim an ei a, ar ek te, lung te, ui ek rote an ei a. Chuvangin a kai hma ber ber an ni tih hriat tur a ni.
- Dr Thangchungnunga, MS (Ortho)

Pu Ni-a kan chan ta

| 2 comments ]

Pu Lalniliana Sailo hi thlahtu lamah chuan Pawibawiha Sailo Lal thlah kal zel niin, Buhban Lal, Lalchi-a Sailo (L) leh Thangliani Sailo (L) te fatlum ber a ni. Kolosib nula Rosy Lalrammawii d/o Lalrochhunga ASI (L) nen inneiin fanu pathum an nei.

Kum 1956-ah an chhungkuain Churachandpur, Manipur-ah pemin, 1966 khan a lo piang a, pianpui unaute 6 a nei. Zirna Vairengte High School atanga Matric zir zovin, Kolkata-ah PU (Arts) a zo va. Chumi hnuah kum 1988, April ni 13 khan Mizoram Police Constable a zawm a. Departmental exam-ah tlingin kum 1991, September ni 5 khan ASI-ah kaisantir a ni a, a hnathawhnaah hian Pathian khawngaihna leh tanpuina, hotute duhsakna a dawng nasa a. Ni 19, September 2000 khan Departmental exam bei leh in tuna a chelh lai SI hna-ah hian kaisantir a ni leh ta a ni.

He hna a chelh chhung hian Mizoram hmun hrang hrangah dah a ni a. March 2009 khan Darlawn Police Station-ah OC dah a niin a boral thleng hian a thawk zui ta ni.

Pi Ni-a hi an hlawh la turin ni October 30, 2009 khan Aizawlah a rawn kal a. Nov. 4, 2009 khan a lu a na vak mai a, a luak bawk a. Darlawn damdawi inah dah luh a ni a. Aizawl-ah lakthlak a niin, Vaivenga Memorial Hospital-ah dahluh a ni a. Hmun pui zawk pan pui tula hriatna avangin thlawhna in ni 10.11.2009 zing dar 9 khan Guwahati panpui a ni a. ICU-ah dah nghal a ni a. Hemi zan la la hian ICU atang chuan ICCU ah sawn leh a ni a. A lu chhunga thi put chu tih reh mai theih a nih loh avangin a lo chau hret hret a, Nov 16, 2009 (Tawhtanni) zing dar 2 rik dawn chuan a natna tuar lovin chatuan ram a lo pan ta a ni. A ruang hi Guwahati atanga Motor-a phur chhoin Nov 17, 2009 zing dar 7:40-ah an chenna Police Qtr. thlenpui a ni.

NLUP hmahruai : Vawk vulh tanpuina Dawrpui ah

[ 20 November, 2009 | 16 comments ]


Mizoram Sorkar Scheme lian leh pawimawh tak, Zoram mipuite chawikanna tur NLUP chu a hmahruai (Vawk vulh tanpuina) tiin Sorkar chuan Aizawl khawpui chhungah a sem chhuak ta a, kan veng atang pawhin mi pariat (8) in Rs. 8120/- theuh (a vaiin Rs. 64,960/-) an dawng a, kan bial (Aizawl east II) huamchhung ah mi sawmruk (60) hnenah Rs. 4,95,320 /- sem a ni.
Hetih lai hian Agriculture Minister Pu H. Liansailova bial (Aizawl North II) ah chuan cheng nuai sawmhnih pathum chuang sem a ni a, kan bial nen chuan a inthlau khawp mai.

Chhura sul hnu

[ 17 November, 2009 | 15 comments ]



Pu Chhura Lung (Sialchal-a phun) ......................Chhura Chi Rawt Lung (Farkawn)

Chhura Ke Hniak

Ha chungchanga hriattur

| 1 comments ]

Flouride :
Flouride hi tui (natural water) -ah te hian a awm a. Kan hriat miah lohvin kan ha tan hian a lo tangkai ve em em mai a ni. A tawk tea kan taksa a a lo awm hian kan ha hian a lo thatpui em em a ni. Flouride tel Toothpaste/Powder leh Mouthwash (Entirnan : S-Flo) te pawh a tha. Hengte hian ha nget venna kawngah nasa takin a tanpui a ni. A nih tur aia tam (excess) flouride hi kan tui inah a lo awm erawh chuan, kan tuar ve leh hlauh thei thei thung a ni. Naupangin Toothpaste lem a chin tlat chuan ‘Non-Flouridated’ tih inziahna hman mai tur a ni.

Enamel :
Enamel hi a insiam fel tawh chuan amahin a in repair ve thei tawh lova. Ha nawhdan diklo avangte in a hek thei a, ha a nget kher loh pawhin a lo pan a (a bikin hapui), kan ei leh in azirin a lo chik ve thei bawk a ni (Entirnan: Sahdah, Khaini, Tuibur, etc.).

Dentin :
Dentin hi chu kan damchhung hian a insiam reng a. Amah tuamtu ber Enamel awmlo chuan a za (Sensitive) em em a ni.

Pulp : Pulp hi Dentin chaw pe tu ber leh repair hnthawktu a ni a. Amahah hian timur (Cells) leh Blood Vessels, Nerves etc. te an awm a ni.

Cementum : A langlo lama Dentin tuamtu a ni.
- Dr Mary

Zorini weds AwP-a

[ 13 November, 2009 | 8 comments ]

Zorinpuii d/o Upa R.Zodingliana leh Pastor R. Lalawmpuia (Hunthar) te chu 12 November, 2009 (Ningani) 1:00PM khan Kohhran Dan Thianghlimin Hunthar Veng Presbyterian Kohhran Biak Inah Biak In hawngin an innei.



Zorinpuii hi Dawrpui Branch KTP Comm. member leh Bial Zaipawl member nilai a ni a. Pastor R. Lalawmpuia hi Khawbung Pastor Bial Bialtu a ni.

Dawrpui KTP 54th Rising Day

[ 12 November, 2009 | 9 comments ]

Dawrpui Branch KTP chuan an Branch din champha phak vawi 54-na 9 November, 2009 khan an hmang a. Rising Day denchhen hian Group hrang hrangte - Quiz, Extempore Speech, Drawing, Photography, Hla inphuahsiak, Article, Photography leh video tawi (10mins) insiamsiakah te an intihsiak a. November ni 7 (Inrinni) khan Kohhran Fellowship Hall-ah Presbyterian Hospital, Durtlanga hman tur atan thisen unit 53 (Mipa 47+Hmeichhia 6) an pe bawk a ni.

November ni 8 (Pathianni) Sunday School bana Photo Exhibition buatsaih chu Kohhran mipuiin an hlut hle a. Photography intihsiakna chu member ten secret ballot-in vote an thlak bawk a ni.


Rising Day hi Nov. ni 9 zanah Extension Hall-ah programme chi hrang hrangin hman ani a, Day Cake siam niin an Upaten an zei zawhah an Branch OB-te an barh a, annin an barh let ve bawk a ni.

Inkhawm banah thingpui ruai buatsaih a ni a, Biak in hnung tualah Group hrang hrangte video tawi insiamsiak projector-in an enho a, result puan bawk a ni.

Dawrpui Branch hian an Rising Day hi vawi 1 an lawmna a ni a, an din kum/ni leh thla chiah an hre thei tawh lova. Mizoram buai lai khan an document pawimawh tak tak a kanral bakah a bo nual a. Hruiatu hmasate sawidan a inchen loh bawk avangin kum 2009 Branch Comm. chuan November Thawhtanni hmasa ber dawttu apiang hi Kohhran Committee-te remtihpuinain Branch din ni-ah pawmin kum tina lawm tawh tura buatsaih a ni a. Kum 2005 khan kum 50-na (Golden Jubilee) ropui takin anlo lawm tawh bawk a ni.

Happy Birthday A_es

[ 09 November, 2009 | 9 comments ]

Vawiin November ni 9 hi kan admin Lalrinsanga (Asanga) a.k.a A_es pianchampa (vawi sawmthum leh engzat na nge ka hre chiah bik lo) ani a. Kan lawmpui em em e. Kan admin dam reng rawh se.

Rising Day Blood Donation

[ 07 November, 2009 | 10 comments ]

Dawrpui Branch KTP chuan an Branch din champha Vawi 54-na denchhenin vawiin (ie.7 Nov) hian Presbyterian Hospital, Durtlanga hman turin 'Blood Donation Camp' an Kohhran Fellowship Hall-ah hman a ni a. Thisen pete hi mipa 47 leh Hmeichhia 6 te an ni a, an zavaiin 53 an ni.

Thisen pek tuma hming ziak hi za chuang an ni a, pe theilo an awm nual bawk a ni.


Rising Day hi November ni 9 (Thawhtan) zan hian ropui taka lawm tum a ni a. Hemi denchhen hian Group Intihsiakna - Quiz, Hla phuah, Extempore Speech, Article/Essay, Painting & Drawing, Photography leh Film siamahte intihsiakna an nei mek bawk a ni.