,

Dawrpui School kum 100-na ropui takin lawm

[ 28 November, 2022 | 0 comments ]

November ni 24 (Ningani) khan Dawrpui School Complex-ah School kum 100 tlinna (1922 - 2022)  chu ropui takin lawm a ni. Dawrpui School Managing Board (DSMB) ten April thla atang khan he Centenary lawmna tur atan hian Organising Committee an din a, Sub-Committee 10 din niin, mi 110 an ruat a ni. Organising Committee hian thutkhawm vawi 4 an nei a, COVID-19 hri la reh hma deuha rêl anih angin a tirah chuan Thingpui Ruai nen chauha lawm tum a ni. Hun lokal zelah hrileng dinhmunin ziaawm a pan tak avangin Committee chuan Khawtlang huap Ruaipui nena lawm a rêl thlu leh ta zawk ani. Hetianga Ruaipui nena lawm anih hnuah hian Sub-Committee ten Member ruat belh pawh an nei leh ta hial a ni. 

Chawhma dar 11:00 atangin programme duan a ni a, Dr. C. Zarzoliana,Chairman, DSMB kaihhruaina hnuaiah Pu Robert Romawia Royte, Minister of State leh Bialtu M.L.A. ni bawk chu khuallian niin Dr. H. Lalthlangliana, MCS, Director, School Education (Mizoram) chu khual zahawm a ni. Dawrpui Pastor Bial i/c Rev. F. Lalhmingthanga’n hunserh a hmang a ni. Bialtu M.L.A. hian tunhma atanga Dawrpui School hmun tangkainate, a lo thang chhoh zel danah a lawmawm a tih thu sawiin, hma sawn zel tura a duhsak thu a sawi a, Information & Communication Technology Minister a nihna ang pawhin NIELIT hnuaia Computer course hrang hrang zir theihna tur ang chi atan Dawrpui School chu Centre atan Sorkar lam hotute a lo biak fel tawh thu leh DSMB lamin room an pek theih chuan zirtirtute pawh a thlawn vekin an dah theih thu a sawi a ni. Kan khuallian hian DSMB enkawl School 3 (Primary, Middle leh DSST) te tan Computer leh Printer pakhat theuh bakah Football 2, Volleyball 2 leh Futsal ball2 theuh a pe a ni.
Dr. H. Lalthlangliana, MCS chuan zirlaite fuihna hun tha tak a nei a, he Dawrpui School zirlai atanga mi ropui tak tak lo chhuak thin hian zirtirtute inpekna leh thawhrimna a tih lan chian zia sawiin zirlaite chu theihtawp chhuaha zir zel turin a fuih a ni.
Monument Sub-Committee te hruainain Pu Robert Romawia Royte hian Centenary Lungphun hawnna a nei a, veng pawn (Sangtei Khuptong, Jerry Lalrinawma leh Cindy Lalthanpuii) leh veng chhung zaithiam (Angaihtei Hnialum, Zothanpuia leh a thiante) ten hun an hmang a, Ramngaih hla Zaipawl intihsiaknaa pakhatna Dawrpui Branch Y.M.A. Zaipawlte mawi takin an zai ani. 
Dr. S.R. Zonunthara, Chairman, Souvenir Magazine Sub-Committee chuan Souvenir Magazine sawi hawnna a nei a, kan khual zahawmin a tlangzarh a ni. Dawrpui School chanchin tawi bakah Centenary lawmna Organising Committee Report Tv. Victor Vanlalmawia, Secretary, DSMB hnen atangin ngaihthlak a ni a, School atangin Primary & Middle Section Choir, Staff -te zai, lâm leh solo DSST atangin an rawn ti thei bawk. Primary Section zirtirtu B.Malsawmtluangi (Spi) thiam takin a rawn zai a, School tin head ten thusawina hun an hmang.
Zirtirtu leh zirlai lo ni tawh thin mi thahnem tak an rawn tel thei a, heng mite tan hian thusawina hun hawn niin, DSMB member dintu Dawrpui Khawtlang Hruaitute Joint Committee Chairman Pi Zosangzuali hnen atangin thusawi ngaihthlak a ni bawk. Pu Lalrammuana, Finance Secretary, DSMB chuan lawmthu sawina neiin, Pi Chawngthansangi leh Tv. C. Lalrinpuia ten Variety Programme hnehsawh takin an kai hruai a ni.
Ruaipui tuihnai tak (Catering kal tlanga chah) theh a ni a, thehtu pawh thahnem tak niin, mi 2,200 chuangin an theh ni-a rin a ni a, Pu Zothanpuia leh a thiante hruainain zai hona hun hlimawm tak hman chhunzawm a ni.

,

Dawrpui School din dan

[ 04 November, 2022 | 0 comments ]

Dawrpui Sikul hi tun hmain Dawrpui naupangte inkhelhna leh infiamna, sikul leh Sunday Sikul neihna, Carnival, Concert, Drama neihna, Krismas intihhlimna leh ruai buatsaihna, vantlang inkhawmna hmun pawimawh tak anih bakah Kohhran, Political Party leh Association hrang hrangten vantlang inkhawmna atan an lo hman ṭhin a ni.


Primary School : Primary Sikul hi kum 1922 khan din a ni a. A tirah chuan tuna Saron Veng ni ta, Rev. KD Siamliana leh Upa Lalchawimawia te in hmunah hian a awm ṭhin, Mission sikul a ni a, a sikul hi Sunday Sikul atante an hmang ṭhin a. Tin, zirtirtute pawh Mission rawih an nih ṭhin avangin a Kohhran sikul hle a ni. Tunah chuan Primary School hi zirtirtute sorkar ta niin a building erawh Dawrpui Veng mipuite ta a ni.

Middle School : Kum 1947 khan Dawrpui pa hoten private-a Middle School din zai an rel a, vantlang inkhawmte kovin Private ME School din chu an rawt thlu ta a, hemi kum hian Class IV chauh hawngin din ṭan a ni a. 1948-ah Class V, 1949-ah Class VI te hawn belh leh a ni. (A ngaihtuah chhuaktute nia sawi - Pu R. Buchhawna, Pu Sainghinga, Pu Kailuia, Pu Dahrawka)


Hmasa berte

        Headmaster - Pu Lalsiama

Zirtirtu         - Nl. Thangnovi

Dawrpui Middle sikul hi sorkar khan 1955 khan Sawrkar sikula siama lak a lo tum tawh a, mahse School Committee khan phal lovin veng chhungah thawhlawmte khawnin an lo enkawl chho a ni.

Middle School hi 1960 April khan Deficit School-ah hlan kai a ni a, Mizoram sikulah concrete building nei hmasa ber a ni a, kum 1977-ah, chutih laia Director of Education Dr. Lalnuntluanga’n a hawng.


Building sak ṭhat : 1974-ah Pu Rokamlova (L) hovin sak ṭhat dan tur ngaihtuah ṭan a ni a, plan leh estimate-te siamin drawing pawh peih vek a ni a. Zion Street lam dawr leh a chunga School building-te hi peih hman a ni.

Tichuan, hun a lokal zel a, Master Plan lo neisate chu tidanglamin Hall leh a hnuai dawr tlar, classrom leh a hnuai Tuikhuah-te hi Pu VLT Muana’n Plan a siam angin sak a ni.

Tuna building thar sak hi Pu Chawngdingliana plan a ni a, June 1996 aṭanga sak ṭan a ni. 

Hall leh School building sak nan hian Dawrpui nu leh pa te hnenah ṭanpuina thawhlawm dil a ni.


Kawng zauhna pek : Vantlang inkhawmin a rel angin Mizoram Sorkar-ah kawng zauhna pek a ni.


Dawrpui College : Kum 1978 khan Dawrpui College hawn a ni a, Dawrpui Ṭhalai Pawl-in sum leh tha sengin ṭan an la nasa hle a, hetia Ṭhalai Pawl leh nu leh paten ṭan an lak lai hian Politics lumlet sual avangin sorkar-in min tihtawp sak ta a ni.