BAZAR CORPS LO PIAN DAN

Kum 1935 khan, Lt. Ngurliana'n Capt. Sapliana chu a rawn thlak a, ani chu Bazar Corps awptu a lo ni ve leh ta a. Kum 5 chhung Biak In nei lova Ina an inkhawm leh hnuin, kum 1940 January thla-ah Dawrpui Bungkawn

Biak In hmun leina tur hian nasa takin pawisa an tuak a. Thingphurh hnatlangte siamin an tuak ṭhin a ni. Pu Hmingliana chu hetih laia mihausa pawl a ni ve a. An thing phurh chu a man letin a lo chansak (leisak) zel a. Tichuan, harsa takin, eng emaw ti tiin Biak In hmun chu an lei thei ta a ni. In leh a hmun chu chei ṭhaa Biak In atana an peih fel hnuin, chutih laia lal, Pu Makthanga an hawntir ta a ni. Biak In an lo nei ve ta. Zawi zawiin an lo ṭhang chho ta zel a ni.

(2) Biak In thar (Rust Memorial Hall) : Kum 17 lai mai, Bungkawn chhuah lama an inkhawm hnu chuan, 1957 khan Aizawl chhuah lamah hian leikhi nasa tak mai a lo awm ta a. Salvation, Bazar Corps Biak In pawh chu a tichhia a, inkhawm theih a ni ta lo va. Bungkawn tlak lam, Sipai Pawlin Hotel leh Damdawi zawrhna hmun atana an hman ṭhin bulah Biak In thar tur sa chawpin, inkhawmna hmun chu sawn a ni ta a. Hun rei tak hetah hian inkhawm a nih hnuin, PWD Tlang pang, Jail hlui chhak chu, sawrkarin Biak In hmun atan 1964 khan a pe ta a ni. 

Biak In thar tur puahchah turin, Committee hmasa ber chu October ni 15, 1964 khan an ṭhu khawm ta a. Sum neih sa awm lo mah se, rinnain Biak In thar sa tur chuan hma an la ṭan ta a. Kopang awiha Biak In sa tur chuan nasa taka lei laih a ngai a, vawi tam tak hnatlanga lei laih a ni. Hnatlang hmasa ber chu ni 20.10.1964-ah neih a niin, rambuai (1966) hnu khan Biak In sak theihna atana puitlin a ni ta a ni.

Biak In sakna tur hian Pathian remruat mak tak mai a lo thleng a. Colonel Rust-a hriat reng nan, Australia rama Rust-a ṭhiannu leh, Australia Southern Territory-a mite chuan Rs. 25,000/- an rawn thawn ta hlauh mai a. Chu ṭanpuina hmang chuan, Corps-in theihtawp chhuahin RUST MEMORIAL HALL chu a lo sa ta a ni. Sipai chhungkuate'n hnatlang bakah, Rs. 15,168.84 an thawh khawm a, ṭanpuina dawn nen, a vaiin Rs. 40,168.84, Biak In sak nan hian sen a ni.

Lt. Colonel Rust-a hi Australia mi, Sap a ni a. India ramah Pathian kohna chhangin Missionary atan a lo kal a. North-Eastern India Territory-ah Territorial Commander niin, 1947 May thla khan Calcutta THQ-ah hna a rawn zawm a. Hemi kum October thla hian Mizoram a rawn tlawh a. Pathian rawngbawla thla khat lai a zin vel hnuah, vanduaithlak takin, November 4, 1947 khan, Sairang kawngah Motor accident-in a boral ta a ni. Amah hi, Salvation Army Missionary, Zorama martar hmasa ber a nih avangin mite'n an ngaisang em em a. Amah hriatrengna turin, Biak In hming atan hian "RUST MEMORIAL HALL" tia vuah a ni ta a ni. Amah hi, Sap thlanmual, tuna Subordinate Court hmunah phum a ni a; chuta ṭangin a ruhrote phawrhin, R.M. Hall-ah hian lak phei a ni. A ruhte chu helai hmunah hian phum ṭhain, lungphun nen uluk taka enkawl a ni.

(3) Fa sawm a hring : Bazar Corps chu Pathian hruainain a lo ṭhang chho zel a, 1979 khan a member tam vanglai ber a lo tawng ta a, an vaiin Sipai Member 2,225 an awm a ni. Hemi hma 1972 aṭang khan, mahni inchawm (Self Support) Corps-a puan a ni bawk. Mizorama mahnia Officer-te chawm (Self Support) hmasa ber a ni. Tichuan, Bazar Corps chu Lersia Sepui ang deuh a ni a, a chi a ṭhain, fa ṭha tak tak a hring a, Corps 10 a hring chhuak tawh a ni. Tunah hian, V/C pasarih laia mi, Veng hrang hranga mite an la lawi khawm a, member erawh chu an tam tawh lo hle. Bazar Corps aṭanga Corps dang lo piangte chu hengte hi an ni : 

1) Chaltlang Corps Kum 1958-ah

2) Bethlehem Corps Kum 1967-ah

3) Salem Corps Kum 1974-ah

4) Dinthar Corps Kum 1979-ah

5) Luangmual Corps Kum 1978-ah

6) Zotlang Corps Kum 1979-ah

7) Temple Corps Kum 1981-ah

8) Kanan Corps Kum 1982-ah

        9) Chanmari Corps         Kum 1982-ah

        10) Ramthar Corps          Kum 1983-ah 

Source : 'Dawrpui Veng Chanchin' published by Dawrpui YMA 1991
Ziaktute - Pu Bualhranga & PC Lianhmingthanga