Dawrpui khawtlang mipawimawh leh chhinchhiah tlak thenkhatte

DAWRPUI VENG CHANCHIN 1991 : Tun hma chuan, Dawrpui Veng hian tunlaia a huam chin aia zau a huam ṭhin avangin, Dawrpui Veng mi, mipawimawh lo ni ṭhin chanchin kan han tar lan ṭhenkhatte chu, Veng danga awmte an ni ta nual a, chhiartute'n kan lo dah rem thiam ang chu.

Lal rorel hun chhung zawng khan, Dawrpui Veng hi Venghlui lal Pu Makthanga awpna hnuaia awm a ni a. Mizoramah lal rorelna tihban a lo nih aṭang khan, Village Council neiin, mipui thlanin ro an lo rel ta a ni. Kum 1954 October 20-ah lal rorelna tihtawp a ni a. Heta ṭang hian Village Council rorelna pawh ṭan nghal a ni. Dawrpui huam chhunga Veng dang awm ṭhin, heng-Saron-Chhinga Veng leh Zarkawt-Chanmari te chu Village Council hran neiin an indang ve ta nghal bawk. Tuikual erawh chu, hun eng emaw chen Dawrpui Village Council enkawlna hnuaia a awm hnuin, 1963 aṭang khan Village Council hran neiin a awm ve ta a ni. Tunah phei chuan Tuikual North leh Tuikual South, V/C hran neiin an awm ta. Chutiangin, Chanmari leh Zarkawt te, Saron leh

Dawrpui Venga Village Council President ni hmasa ber chu Pu Lalhmingthanga (L) a ni a, 1954-57 chhung ro a rel a ni. Dawrpuia Village Council President lo ni tawhte leh an hun chhungte chu hetiang hi a ni :

1. Pu Lalhmingthanga 1954-1957

2. Pu Challeta 1957-1971

3. Pu Lalrinliana 1971-1975

4. Pu Rohmingthanga  1975-1979

5. A.O. or C.A. Rule 19. 11. '79 - 28. 2. '82 

6. Pu Challeta 1982  -1985

7. Pu Rosangliana 1985-1987

        1987-1990 

9. Pu Lalthansanga 1991 -

Challeta hian kum 30 Village Council President leh member a lo nih tawhna a lawm a, Pu Rosangliana hi kum 1972 aṭang khan V.C. Member lo ni tawhin, 1990 thlengin term hnih President a ni Amah hi tunlai hian Aizawl North I MLA a ni bawk a ni. Sport lamah Zoram huapin nihna pawimawh tak tak a chelh ṭhin a, tunah hian Mizoram Sports Council-ah Vice-Chairman a ni. 

Pu Pachhunga

Pu Lalmawia hi Mizo Politician hmasa berte zinga mi leh Zalen Pawl (EITU) President lo ni ṭhin a ni. Pu Lalhema (L) kha Mizo Union President 2-na a ni a, Mizo Union dintu bul berte zinga mi a ni-bawk. Mizo zinga sana siam hmasa ber ni-a hriat a ni bawk. Pu Hrangchhuana hi Mizo zinga damdawi lama sumdawnna tihlawhtling ber a ni. Amahin sumdawnna a tih theih loh hnu pawhin a fate'n an la chhunzawm zel a, Damdawi Company Agency nei ngah ber an ni. Kum 1967-1974 khan Mizoram Congress President a ni bawk.

Pi Lalthanzami (L) W/o Pu Khawtinkhuma kha hmeichhe ṭangrual dintu a ni. Pu Lalhmingthanga (L) kha Pu Pachhunga fapa a ni a, mihausa a nih bakah, Dawrpuia V/C President hmasa ber a ni a, MLA (1972-'77) lo ni tawh a ni bawk. Pu Thangridema hi Aizawla thlalatu hmasa leh Assembly Speaker (1978-’79) lo ni tawh a ni. Pu Lalrinliana (L) hi Val Upa te, V/C President te lo ni tawh leh MLA ni tawh a ni.

Pu Sainghinga (L) leh Pu R. Buchhawna (L) te kha Mizo Sâptê hmasate an ni. Pu Sangliana (L), Mizo zinga English thiam bera an sawi ṭhin kha, Govt. High School Headmaster hmasa leh Mizo Inspector of School hmasa ber leh M.P. lo ni tawh a ni. Pu P.S. Dahrawka (L) kha Ran Daktawr hmasa ber a ni; a nupui Pi Kaiṭhuami chu Nurse hmasa ber zinga mi a ni bawk. Pi Pawngi, Nurse hmasa ber nia hriat a ni. Pu Zairema, B. Sc., B.D., Presbyterian Kohhran hruaitu hlun leh vawiin thlenga Bible letlingtu ṭangkai tak a ni. B.Sc. a zir lai te, B.D. a zir lai tein record break khawpin result a nei ṭha a ni. Kum 1989/1990 khan, Senate of Serampore College chuan Ph.D. (Doctorate Degree) a rawn pe nghe nghe a ni.

Ram rorelna Assembly-a lo ṭhu ve tawh mai pawh ni lo, vawiin thlenga ram hnuk khai tak taktu kan nei a, chu chu Prof. Rokamlova a ni. Minister vawi eng emaw zat lo ni tawhin, tunah hian Mizoram Assembly Speaker hna a chelh mek a ni. Amah hi M.A. niin, College-ah rei fe a thawh hnuah NEHU (Aizawl Campus)-ah Deputy Registrar hna te lo chelh tawh a ni; kum 1970-a Upa ordained a ni bawk.

Ram rorelna Legislative Assembly-a lo ṭhu ve tawh heng mite hi kan nei bawk:- Pu R. Dotinaia (1972-1977), Pu Kappor Chand (1972-1977), Pu Bualhranga (1979-1984), Pi K. Thansiami (1974-'84, 1985 1987). Pi K. Thansiami hi tunah Kanan Veng lamah a awm ta. Dawrpui Veng lo ni tawh ṭhin, hmun danga awm ta leh tuna la awm mek, hna pawimawh tak tak chelh tawh ṭhin leh chelh mek eng emaw zat an awm. Dr. Rohawka (L), mi lar tak a ni a, Doctor hmasa zinga mi a ni. A nupui Pi Hmingliani hi inkawibah thiamah a lar hle a ni. Dr. Doliana (MBBS), Civil Hospital-a Medical Superintendent pensioned hmasa ber a ni. Pu Hauṭhuama, MCS chu Deputy Commissioner, Mizorama pensioned Mizo kan neih hmasak ber a ni. Pu Mankunga, M.A., Republic High School Headmaster a ni a, Mizorama High School Headmaster-ah chuan senior ber a ni tawh. Kum 1990 President Award dawngtu a ni a, 1991 Sept. 5 khan Delhi-ah President-in a hlan a ni. Kum 1992 February thla aṭangin a chawl dawn tawh a ni.

Officer eng emaw zat awm zingah, Dr. Tlangkunga (MBBS, M.S.) te, Dr. Thansiama te chu Joint Director of Health Services an ni. Pu Dawngliana, M.E. (Civil) chu PHE-ah Superintending Engineer a ni bawk. Heng bakah hian, Doctor te, M.A., M.Ed. leh B.A./B.Com. passed eng emaw zat an awm. Pu Khawtinkhuma hi Mizo zinga M.A. hmasa ber a ni a, Pi Vanhlupuii hi Mizo hmeichhe zaithiam hmingthang a nih bakah, hmeichhe B.Com. hmasa ber nia hriat a ni. Dawrpui Vengah hian Aizawl mihausa ber ber tling phak eng emaw zat an awm a; bung dangah kan dawrkaite chanchin chu kan la sawi ang.

Prof. Lalnghaka, M.B.B.S.,M.S. hi Mizo zinga Master of Surgery degree nei hmasa ber a ni a, Mizo zinga Professor kai hmasa ber a ni bawk. Amah hi Asia khawmualpuia milar thlan zingah pawh a tel phak a ni. Pu K. Hmingthanga hi, Civil mi, tlawmngaihna leh hnathawh ṭhat avanga Administrator's GOLD MEDAL, Mizo zinga dawng hmasa ber a ni. Gold Medal hi August ni 15, 1985 khan a dawng a ni. Pu C. Thangkima, Aizawl Watch House neitu chuan, khawvela Salvation Army-a chawimawina sang ber "ORDER OF THE FOUNDER" an tih chu a dawng a, January 7, 1990 khan General Eva Burrow-i ngein Aizawlah a rawn hlan a ni. He chawimawina hi, Sum leh Pai leh Chetze tinrenga Pathian rawngbawlnaa miṭhahnemngai leh entawn tlak chungchuangte hnena pek ṭhin a ni. Khawvel khawii laiah pawh zin ta sela, Salvation Army-ah chuan VIP niin, Free Accommodation a hmu vek dawn a ni.

Dawrpui Vengah hian, Mizo hla phuah thiam ber zinga mi Pu Vankhama (L) kan nei a. Zai lamah pawh kan duailo hle; Pi Vanhlupuii te, Pi Vanlalruati te chu Mizo zingah an aia thiam awm chuang lote an ni a; Rebecca Saimawii, zai thiam tak, "A aia thiam an awm bik lo ve," an tih hial khawp kan nei bawk.

Pu Gohain, Hotel Ritz neitu chu Superintending Engineer pensioned a ni a, Pastor lamah Rev. Siamliana kan nei a, an nupain Leprosy Mission-a thawk an ni.

Source : Dawrpui Veng Chanchin published by Dawrpui YMA 1991
Ziaktute - Pu Bualhranga & PC Lianhmingthanga