Dawrpui YLA din dan (1940)

Mizo dan leh kalhmang pangngaiah chuan, Zawlbuk awm lai kha chuan a hranpaa Tlawmngai Pawl din a ni ngai lo. Zawlbukah tlangvâlho an riak khawm a, Val Upain an ho khawm a, tlawmngaihna kawng tinreng, Zawlbuk insawrkarna khan a keng sa vek ṭhin. 

Dawrpui Vengah hian Zawlbuk a ding lo nia hriat a ni. Aizawl khawpui huam chhungah hian Thakthing Vengah Zawlbuk a ding rei ber a ni. Kum 1940 khan, Dawrpuiah hian Y.L.A. (Young Lushai Association) ṭha tak leh phuisui takin a lo ding tawh ṭhin a. 

    Chuta a puipa deuhte chu :  Pu Dahrawka, Pu Buana, Pu Zawngauva, Pu Kapthanga leh fiamthuthiam Pu Pachhunga-te an ni. Pu Hrawva leh Pu Buchhawna-te pawh tel ve ni-a sawi a ni. Heng mite hnuah hian Pu Zosiama, Pu Rualkhuma, Pu Lalbiaka, Pu Dara, Pu Lalkunga leh Pu Haudala-te hi a khaipate an ni leh a. 

Infiam lam leh inkhelh lamahte hma an la a. Veng hmingin Team-te an siam a, nasa takin an lo che tawh ṭhin a. Fiamthu nuihzate thawhin khawtlang an lo chawk hlim tawh ṭhin a ni.

Dawrpui Veng hranghluite hian Zoramah hmahruaitu nihna an hauh theihna a awm. Mizorama Krismas Carol hmasa ber, Pu Vankhama hovin 1938 khan Dawrpui nula leh tlangvalte chuan an lo nei tawh a. Mizorama Musical Instrument hrang hrang tum thiam hmasate chu Dawrpui tlangvalte an ni. Violin tumah Pu Vankhama leh Pu Ngila-te hi Zoram chhuanvawr hmasa an ni a. Hawaii Guiter tumah Pu Vandailova leh Pu Rualkhuma-te a thiam hmasa an ni bawk. Ukulele tumah Pu Vanbûka, Harmonium tumah Pu Haudala-te a thiam hmasa an ni. Carrom Board thiam hmasa leh tichhuaktu chu Pu Vandailova a ni bawk.

Source : Dawrpui Veng Chanchin published by Dawrpui YMA 1991
Ziaktute - Pu Bualhranga & PC Lianhmingthanga