DAWRPUI BRANCH YMA EXECUTIVE COMMITTEE NEIH A NI
February ni 20, 2024 (Thawhlehni) 7:30 PM khan YMA Committee Room, Dawrpui School Complex-ah Pu Lianzama Pachuau President kaihruainain Dawrpui Branch YMA Executive Committee vawi 2-na neih a ni a. Secretary hnen atangin branch YMA hma lakna leh Finance report ngaihthlak a ni bawk.
‘DAWRPUI’ I VÊNGHIM ANG U (KUMPUAN PUAL-1)
- Samuel Lalrozâma, Chairman,
Kumpuan Sub-Committee, DYMA
Kum 2024 kan lo chuang kai leh ta der mai a, Central Y.M.A. chuan kum 2025 thlenga Y.M.A. kumpuan atan ‘Ram leh hnam humhalh’ a thlang leh a, kumpuan kaihhruaina hi hun remchangah Dawrpui News lamah pawh la rawn tar lan a ni ang. Mizoram leh Zofate awmna hmuna Y.M.A. branch awmna apianga hman tur ni mah se, a pawimawh ber erawh keimahni hi kan ni tih kan hriat chian a ngai! Aizawl ti Aizawltu leh Mizoram hmel ti langtu an lo tih fo thin chu Dawrpui veng hi kan ni miau va. Kan nunphung leh kan veng lan chhuah dan hian Mizoram hmêl a ti lang fo \hin tih hi kan hriat thar leh a va tul em!
Mihring hi awmho tura duan kan nih angin chhungkua kan din a, khawtlang inrelbawlna neiin hruaitute thlangin pâwl te kan din thin a nih hi. Chutiang kawnga min phuar khawmtu leh pawl pawimawh berte zing ami chu Y.M.A. hi a ni ti ila a sual tam lo vang. Amaherawhchu, tunah chuan Y.M.A. hi pawl pakhat ang maia en leh ngai kan awm ta niin a lang. thalai tam tak zingah khawhar in kal leh inlenpui leh khawtlang huap hnatlângte hi pawl pakhat thil tih (activity) ang chauhva ngaihna chen a lo awm ta hi a pawi khawp mai. Y.M.A. programme te hi pawl pakhat programme a ni lo va, kan veng chhung programme a ni tih leh Y.M.A. hlawhtlinna hi pawl pakhat hlawhtlinna ni lovin kan veng hlawhtlinna a ni tih hriat a pawimawh ta khawp mai.
Kum engemaw chen chu Bangalore-ah hna thawkin ka awm ve a, Mizo welfare lamah hruaitu nihna chelhin theih tawp kan chhhuah ve thin. Vai khua a ni tih kan hre chiang a, kan awmna kumhlun tur pawh a ni lo tih pawh kan chiang; amaherawhchu, kan khaw awmna a nih angin kan tang em em a, “Bangalore Mizote” hming chu a tha zawnga thantir kan tum hle thin. Chutiang bawk chuan ram pawna khawsa tam takin rilru an pu ve bawk a ni tih a hmuh theih. Ram danga awmte mah an tan si chuan he lai kan veng chhung, Pathianin ram min pek Mizoram chhung ngei ami, mi tam takin ngaisang leh entawn tlak ti-a an rawn thlir ve fo hi kan theihtawkin kan hmangaihin kan humhalh ve dawn lo’m ni? Mahni ina cheng kan ni emaw mi in luah kan ni emaw pawh a ni thei, a tawpah chuan ‘veng mi’ kan nihna leh Dawrpui veng khualehtui kan nihna hian min phuarkhawm a, chhungkhatah min siam a, a tul huna min hnemtu tur min buatsaihsak a ni
Chhungkaw member zing ami tu emaw an hmingchhiat/ that chuan chhungkaw hming a chhe/ tha ang hian veng hmingthatna leh hmingchhiatna chu mi tinah a innghat nasa hle. Chu vangin kan tih theih theuh a awm a ni tih kan inhmuhchhuah a, kan infinchhuah zel a ngai. Dawrpui veng a hmingthat chuan a chengte hming a tha tihna a ni si a. Veng ngaihsanawm leh fak tlaka awm chu nuam kan ti vek ang, chutiang dinhmuna siam theitu chu keimahni tho hi kan ni. Kan veng hian ram leh hnama chian tharnaah harh tharna kan mamawh a, chumi tur chuan a hmasain kan veng chawimawi tu leh venghimtu ni thei turin harh tharna kan chan a ngai.
Hengte hi ka rawtna a ni a ni a, a aia tha zawk hria pawh kan tam ang.
• Kan veng chhung a fai theih nan mahni in leh a chhehvel tihfai i uar ang u.
• In neitu ten hnam dang, Mizo aia sang zawka luah ngamte, kan in leh dawrte luahtir mai lovin, a duh ve an lo awm chuan mahni hnampui ngei duhsak nachang hria ang u.
• Lehkha chhiar tam chuan nunna tam tak an nung chhuak a ni an tih angin chhiar tam turin tan la ila, lehkhabu leh Bible chhiar bakah CYMA chanchinbu thla khata cheng sawm chauh hi chu in tinah subscribe-in chhiar chhuah ziah tum theuh ila, kan tu leh fate pawh chhiar turin i fuih ang u.
• Veng buai leh sumdawng tamna berte zing ami kan nih angin kan hunâwlah ina tawm chakawm viau thin mah se Pathian hnaih leh kohhran belh pawimawhna hre thar lehin Pathianni-a inkhawm bak vawi khat tal inkhawm belh tur leh kar khatah vawi khat aia tam chhung inkhawmna hun nei turin intiam ang u.
• Ruihhlo do kawngah a mimal anga ke kan pen theihna kawng chu taksa insawizawi tha leh hrisel neih hi a ni, chu chuan rilru hrisel a hring si a. Gym tha tak kan nei tawh a, thalaite phei chu kar khatah vawi hnih/ vawi thum tal kal vek i tum ang u.
• Lehkha zir thei tawh phawt chuan zir chhunzawm zel ila, mi dangte i fuih zel ang u.
• Infiamna lamah tui zawng inang te kan awm a nih chuan intelkhawmin hma la zel ila, veng mite tan chuan kan khawtlang hruaitute leh mi inphalte an inkau em em ang.
• Mi tin, a bikin \halaite, hian hunawl hnawhkhahna (hobby) nei theuh turin hma la ila, thil thar zir leh thiam belh hian nun hluta min hmuh zualtir \hin a nia.
• Tlawmngaihna kan chawi nun zel theih nana bul tanna tha ber chu khawhar in inlenpui hi a ni mai awm e. Kan tlaivar hman lo a nih pawhin Y.M.A. zan thum chhung hi chuan zan khat tal lan tum ila, chu chuan lusunte hnem bakah veng mite inpawhna leh inhmelhriatna a tizual.
• Veng dang nena inrina bula awm ten mahni mawhphurhnaa ngaiin ramri rawn ti bawrhbâng zawnga hma la an awm chuan khawtlang hruaitute hrilhhriat nachang hria ila. Veng dang nena inrina tinah kan veng welcome sign board tar a ni ngei em tih leh thuam \hat a ngai em tih thlithlai reng turin kan mit ti var ang u.
• Zan lamah hna pawimawh kan nei a nih loh chuan zan mut hma leh zing thawh hma uar ila, chu chuan kan hnathawhna leh mimal nunah nasa takin min pui ang.
Feburary ni 13, 2024 zing khan Commerce & Industries Minister Pu F. Rodingliana chuan Aizawl New Market building thar sak mek chu tlawhin hnathawh a enfiah.
Minister chuan he bazar building sak mek hi mipuite nghawng tak tak thil anih avangin a ngaih pawimawh thu leh chak zawka hnathawh a \ul thu a sawi a. Hnathawh mekte uluk taka vil tur leh quality control uluk turin a enkawltu
.jpeg)
