DAWRPUI SIKUL CHANCHIN

 1. Dawrpuia zirna bul lo intan dan : Mizorama Zirna bul lo ṭantute chu, kan hriat ṭheuh angin Missionary-te an ni a. Kan 'A AW B' te nen lam min rawn siamsak a ni. Tichuan, Zirna chu Mission (Kohhran) hmanga hmalak chhoh a ni a. Sawrkar nen thawkdunin Mizoramah Zirnain hma a lo sawn chho ta zel a ni. Bansan hauh lova Mission-in Zirna a ṭanna chu 1924 kha a ni awm e. Dawrpui Vengah pawh hian Mission-in Zirna bul a ṭan avangin, a tirah chuan Biak In kha Zirna In a ni ve zel mai ṭhin a ni. Tuna Govt. Higher Secondary School ngei pawh hi Mission-in bul a lo ṭan chhoh a ni. Hmanlai chuan Zarkawt Area te, Chanmari Area te hi Dawrpui hian a huam ṭhin a. Kohhran lamah pawh ni ṭhinin, vawiin thleng hian Zarkawt lam pawh Dawrpui Kohhran huam chhung a la ni a. Government Higher Secondary School pawh hi Dawrpui Kohhran huam vek a ni mai a, Dawrpui Kohhran ta ti ila, a sual lo hial ang. Hun lo kal zelin, sawrkarin a bultum chho ta zel a ni.

Kum 1920 vel khan Dawrpuiah hian mihring an lo pung ve ta deuh va, naupang lehkhazirna pawh a lo ṭul ve ta a. Kohhrante a lo awm tawh bawk a. Hemi kum hian Chhotelal Seth-a Bawng In chu chei ṭhain, inkhawmna ni

bawkin Sikulah an hmang ta a ni. Tichuan, Bawng In chu Biak In hmasa ber leh Sikul hmasa ber a nih chu! Bawng In ringawta inkhawma lehkha zir chu felin an hre ta lo va. Tuna Pu L. Chawimawia (Buangthanga & Bros) In hmun, Saron Vengah hian, 1922 khan Dawrpui Biak In hmasa ber chu an sa ta a, Sikul atan an hmang nghal bawk. Bawng In kha zawng Bawng In a ni a, Biak In atana sak ngei hi Biak In tak takah chuan puh ila a dik ang chu. Heng hun lai hian zirna leh Kohhran chu a kal kawp ṭha hle a ni. Pathianni chhun leh zan lam hun ṭhenkhatah inkhawm a ni a, chhun lamah Sikul a ni thung a ni.

Zirtirtu hmasa ber chu Pu Thanghrima a ni a, a dawtah Pu Pakunga a ni a, chumi dawtah Pu Lalsiama a ni leh a, chumi dawtah Pu Lalbiaka (tunah Chhinga Veng Upa) hi a ni leh a ni. Tuna Primary School leh Middle School a lo awm chhoh dan leh Biak In ṭawm lova an lo din chhoh dan leh hun kan hre chiang lo nain, Biak In School-a hmang hian eng emaw chen School lo siamin, Primary School leh Middle School hi a lo awm chho ta ni ngeiin a lang. Kum 1920 velah Primary lo ṭan chhovin, 1924-ah Upper Primary hi an lo hawng leh ni awm. a ni.

2. Dawrpui Govt. Primary School  : He School hi tunah Sawrkar Sikul a ni a; Dawrpui Middle School nen hian hmun leh building inṭawmin a awm a. A hmun leh Building hi sawrkar ta ni lovin Dawrpui Veng ta a ni. Zirtirtu hmasate chu Senior Teacher tia vuah an ni a; chungte chu  :-

1) Pu Thanghrima (1924) 

        2) Pu Pakunga (1927), kum 1928 khan Theological College-ah a zir ta a, a thawk zui ta lo.  

3) Pu D. Kawnga, ani hi khawthlang lam Bial Sikul Entu a ni a, Sikul a tlem avangin Dawrpui Sikul hi a pui ṭhin a ni, 1927 thleng khan a pui a ni. 

4) Pu Lalsiama, ani hi Middle School-a Headmaster rawn ni hmasa ber a ni a, 1928 aṭangin Zirtirtu a ni ṭan a ni. 

5) Pu Lalbiaka, ani hi 1943 March aṭangin, 1948 October ni 31 thleng a thawk a ni. 

Head Teacher lo ni tawhte leh an thawh hun hetiang a ni :-

Pu Rualkhuma (L) 1948 Nov.-1968 Nov.

        Pu Satinluta 1968 Nov.-16th Jun. 1974. 

Pu Haukhuma (L) 1974 Jun. -17th Jun. 1975. 

Pu Hrangluaia 1975 -1982 March 

Pu F. Hrangchhuana 1982 Apr.-1984 Feb. 

Pu Pianghrima 1984 Mar. 1985 Apr. 

Pu K. Rualkhuma 1985 May  -

Dawrpui Middle School nena inzawmin, he School hi 1991 aṭang hian Comprehensive School-ah siam a lo ni chho ta zel a ni.

3. Dawrpui Deficit Middle School : Dawrpui Middle School hi kum 1947-a ṭan nia hriat a ni. He School-ah hian hun eng emawti aṭang khan, Outside Cadrein Headmaster hi sawrkarin a dah a, tuna Headmaster ni mek pawh hi Govt. Headmaster a ni a, Staff-te erawh chu Govt. Deficit Grant-in-Aid Rules hnuaia Sawrkarin hlawh a pekte an ni. Headmaster lo ni tawh leh an hun chhungte hetiang a ni :-

Pu Lalsiama 1947 - 1954 

Pu Vanlalkunga 1954 - 1956 

Pu R. Laltawnga, B.A., B.T. 1956 - 1957

Pu Lalnuntluanga, B.A., B.T. 1957-1972 

Pu C. Lalkunga B.A., M.Ed. 1973 -

He School hi Primary School nen, hmun leh building inṭawma awm a ni a. Kum 1991 aṭang hian Primary nen hian Comprehensive School-a siama ṭhui zawm a ni ta a ni.

Tuna Dawrpui Middle School hmun hi hmanlai chuan Police Lammual atana laih zawl a ni a, police sawm vel an lam ve ṭhin an ti. Mizoram-a Missionary lo kal hmasa berte pawh khan he hmunah hian Puan In an kaih hmasa ber a; heta ṭang hian High School Tlangah khian an insuan chho ta a ni. He hmun hi Bawrhsap Peter-a hun lai khan Sikul hmun atana pek a ni. Aizawlah Centre pawimawh tak a lo ni chho ta a. Tun hma deuh phei chuan, Vantlang Inkhawmna hmun, Politics leh Social lam thila Public Meeting-na hmun ber a ni ṭhin. Sawrkarin Sikul a lak chhoh chur chur lai pawhin, vantlang hmun leh Public tana zalen deuhva hman reng a nih theih nan sawrkar hlan phal lovin, Veng chhung kutah he Sikul hi dah a ni ta zel a ni. Vawiin thleng hian a hmun leh building hi khawtlang ta a la ni. 

4. Mizo High School : Kum 1944 khan, Mission Sapte kaihhruainain Mizo High School din a ni a; tuna Govt. Higher Secondary School lo ni ta hi a ni. High School-a zir turte, Zoram pawna kal ngai ziah ṭhin kha, kal ngai lovin Mizoramah an lo zir ve thei ta a ni.

Pu Sangliana hnuah hian, hotu ber dinhmun chu PRINCIPAL tia vuah a ni ta a; heng mite hi Principal-te chu an ni :

        Pi Lalsangpuii, B.A., B.T. (28.10.1963 - 31.8. '79)

Pi Thannguri, B.A.,B.Ed. (1. 9.1979 - 7. 3. '87) 

Pu Hrankiauva, B.A.,B.Ed. (8. 3. 1987 - 26.10.'89) 

Pu C. Lalhmuaka, B.A., B.Ed. (27.10.1989 - )

He School hi tuna Dawrpui Area-ah awm tawh lo mah se, Dawrpuiin a huam laia din a nih bakah, Dawrpui Kohhran behchhana Missionary Sap Rev. J.M. Lloyd-a te leh mi dangte'n an lo din a nih avangin kan han sawi lang tel a ni.

5. School dangte : Dawrpuiah hian zirna sang zawk, College-te awm lo mah se, mithiam chhuanawm tak tak leh ram hruaitu, mi ṭangkai tak tak awmna hmun leh veng a ni.

Kum 1972 khan, mamawhna avang leh sawrkar lam aṭanga sihhmuhnain, MODERN ENGLISH SCHOOL, Dawrpuiah hian hawn ṭan a ni. Hei hi Salvation Army, Bazar Corps-in a bul an lo ṭan a ni. Tunah chuan Nursery aṭanga Class X thleng zirna a ni a. Principal hovin zirtirtu leh thawktu dangte nen, he School-ah hian mi 34-in an thawk mek a. Principal lo ni tawhte chu :-

1. Pu Zirthanga, B.A. 

2. Pu Lalhrima Sailo, B.A., M.Ed. 1986

3. Pu P.C. Lianhmingthanga, B.A., M.Ed. 1987 -

Kum 1989 aṭang khan, El Tee Ke School chu Pu Khawtinkhuma'n ama Inah a hawng a. Nursery a\anga Class X thleng zirna bawk a ni. Kum 1991 aṭangin Luangmual lamah an sawn thla ta a ni.

Source : Dawrpui Veng Chanchin published by Dawrpui YMA 1991
Ziaktute - Pu Bualhranga & PC Lianhmingthanga