V. Biakthansanga kan chan ta

V. Biakthansanga (1968 - 2011) hi Pu V. Lalmuana leh Pi Rotluangi te fa 14 zinga a parukna niin Feb 8, 1968 khan Mualthuam khuaah alo pianga. April 5, 1994 khan Malsawmi nen Pastor K. Lalzuala kutah an innei a, fapa pakhat leh fanu pahnih an nei. Biakthansanga hian Cooperative Department ah Driver hna chelhin, a thihni thlengin he hna hi a chelh a ni.

Amah hi mi tlawmngai thei tak a ni a, YMA Dawrpui Branch Chawngbawla Section hruaitu te pawh a lo ni tawh thin. Kohhran leh khawtlangah theihtawpin a inhmang ve thin a, puipun nikhua-ah te phei chuan a hnung dawltu ber a ni thin a, heng kawngah hian a entawn tlak tak meuh a ni.
Kum 2009 Krismas ruai theh a fatu zo lo haw chu a Tonsil na tiin a insawisel tan a. Hemi hnu hian thla hnih dan velah a insawisel tan ta zeuh zeuh a. Nikum May thla khan a insawisel nasat deuh avangin Biopsy lak a ni a, a natna chu Cancer a ni tih hmuh chhuah a ni. Hemi hnu July 13, 2010 khan Mumbai lama inenkawl turin an kal a, Mumbai-a an awm lai Oct. 6, 2010 khan a nu Rotluangin a boral san leh tak si avangin an lo haw chho leh a. Hemi hnu hian dam lam aiin zual lam a pan hret hret zel a. Amah hi mi tuarchhel tak anih avangin a natna hian a bawih lem lo. Tichuan, October 10, 2011 (Thawhtanni) zing lam dar 1:15 khan a lo chawl ta a ni.