Damlo kan/en

Mizote hi a huhova thil ti chi, hmanlai atanga lo ni tawh kan ni a. Awmni khamin thlan laih te, tu emaw lo nei thlo zo theilo khawtlangin an thlawh zawh sak te, zualko kal, thlan laih, damlo kan hmelhriat vak lem loh pawh kan ngei ngei thin kan ni. Khang hun lai kha chuan eizawnna a inang put a, a harsa lem lo. Tunah chuan Computer Age-ah kan awm tawh a, awmni khama thlan laih leh tih dual dual a theih tawh loh. Eizawnna a inang tawh lova, chuvangin tunah pawh veng thenkhatah chuan mitthi In riak tawh lovin, thlan laih pawh hlawhfa an ruai tawh a ni. Keini veng pawhin thinlung damlo takin hlawhfa ruai lo thei lovin kan lo awm ta a, tlawmngaihna a tlahniam ni lovin, kan nitin nunin a zir ta lo zawk a ni tih hi pawm thiam tum mai ila.

Hemi rual hian kan zir tur leh hmabak tam tak kan la nei a, chung zingah chuan damlo kan/en hi kan la thiam lo. A bikin Civil Hospital-ah hian a hun lova in tlawh tum lui tlat hi kan la tam hle a, chutih laiin Durtlang leh Private Hospital dangah tum lui an awm lem si lo. Tin, damlo kan tlawhin, va hmuh a biak kher kan tum thin hi (A bika be ngei ngei tur chu an awm) kan tih danglam a ngai a ni. Ina damlo pawh kan tibuai viau thei a, a mah damlo kha biak leh hnaih vak loh tur an ti anih chuan, a chhungte hnenah ka rawn tlawh ve a, enge a an tih mai hi duh tawk thiam ve a hun hlein a lang. Thawhtanni phei hi chu ‘Nat zual ni’ kan ti tawp mai a, Ward zawng zawng damlo hi an na zual vek thin a, a chhan chu Pathiannia kantu tam lutuk vang a ni ber. Tlawmngaih chhuaha damlo be kher lova intlawh hunte hi hre ve tawh ila, hun vawn dikte hi tlawmngaihna vek a lo ni.