Pu Banglova kan chan ta

Pu R. Lianbanglova hi Pu Rualkhuma (L) leh Pi Tlanliani (L) te fa pariat zinga a naupang ber dawttu a ni. October 22, 1950 khan Aizawl Civil Hospital-ah a piang a. Dawrpui Sikul-ah Primary leh Middle zir a, High School erawh chu Republic High School-ah a zir. September 12,1974-ah Pi Vanthangliani, Kulikawn nen an innei a, fa panga an nei. Eizawnna lamah chuan, Public Works Department (PWD)-ah Section Assistant (SA) in a lut a, chumi hnuah Junior Engineer (JE)-ah kaisang lehin tunah hian Building Division, PWD-ah a awm mek a ni. Amah hi hna ngaipawimawh mi niin a that deuh chuan office hi a kal hram hram thin a, mi taima, rintlak leh hotute thu awih thei tak a ni a, rinawm taka a hnate hlen chhuak thin mi a ni bawk.
October 2006, thla atangin chaw a helh thin a, doctor-ah inentir niin, March 2007-ah chawkawng Cancer a
ni tih hmuhchhuah a ni. March 17, 2007-ah TATA Memorial Hospital, Mumbai panpui a ni a, April 3, 2007-ah hlawhtling taka zai a ni. Amah pawh a tha chho viau va. Pathianin a tidam a ni tih te pawh a puang a, a hna pawh a chhunzawm leh peih a. A natna hriatchhuah a nih hian amah pawhin Pathian a belh phah a, a kal theih hram chuan Zing Tawngtai Inkhawm leh Tlai Tawngtai Maicham a thulh ngai lo a ni. Pathianah lawmna nasa tak neiin, a nat vang hian Pathian lakah a vui ngai lo. April 2010-a an zuk inentir leh chuan, Cancer chu hmun dangah a lo lang leh tih hmuhchhuah a ni a. Mumbai-ah hian vawi 16 lai check up-in an kal hman. Grace hospital-ah chemo khai thin a ni bawk. March 24, 2012-a Mumbai pan leh tura an inpuahchah laiin March 23, 2012 zingah a khakah thi a lo tel tak avangin Aizawl Civil Hospital-ah admit a ni a. Doctor leh nurse ten theihtawpa an enkawl laiin April 1, 2012 zing dar 7:30 vel khan a Lalpa hnenah a chawl ta a ni.
Amah hi Mizoram Cancer Care Foundation dintute zingah telin, tunah hian Senior Vice President nihna a chelh mek.