VUN VAR

He natna hi natna hlauhawm leh inkaichhawn chi chu ani lo na a, mihring hmel a ti danglam nasa in, tam tak tan phei chuan tenawm lamah pawh a kal thei, mahse chutiang ani lo a. Kan vun rawng hi a nihna siamtu tak chu melanin an ti a, chemical / hormone chi khat ani mai a. Negro-te hian black melanin an ngah hle a, sap, European ho erawh in an nei tlem. An var lutuk hi ni sa ah tuipui kamah te an in pho thin a, ni eng a ultra violet ray lo kal tel ve hian an taksa a ti uk ve deuh a. He melanin nei tha sa reng an lo upat a, an vun rawn var ta mai hi enge a chhan tak hi hmuh chhuah fak a la awm lo. Phaiah an zu kal a, engteh ual tih theih an nei lo. Zing ni chhuak a in pho tih te, leh damdawi man tam tak tak an lo chawh a, mahse vawiin thleng hian a tih rehna chu an la hre lo ani. 

Ka sawi duh leh tum tak zawk chu, hetiang vun var nei hi an tenawm lo a, inkaichhawn chi pawh ani lo. Mipui hian kan rilru a ten deuhna kan nei thin hi zawi zawi a kan paih a ngai a, mi dang ang tho a thianghlim an ni tih hi I pawm ang u. Hepatitis B an hriatchhuah tirh pawh khan, kan hlau lutuk a, veng thenkhatah chuan
hepatitis vang a thi, a zan a zan a in phum tawk pawh an lo awm hman a. Tunah chuan tuman engahmah kan ngaih tawh loh hi. Chutiang tho in, Hepatitis C te, HIV hrik pai te pawh kan mipangai en thei ta viau ani. Chuvangin vun var te pawh hi, a rawng a dang deuh mai chauh ani tih hria in, rilru lamah pawh hriatthiam I tum ang u. A chhan dik tak hi a vang hle na a, taksa a vun rawng melanin an tih , tlem lutuk vang ani ber. Damdawi chi li vel vun ti var thei chu a awm a, mahse khawvelah hman ani ta lo a. A then chu inthlahchhawn te, vanduai zual bik , chhan chhui tur awm miah lo hi a tam ber an ni. Antibiotics course ei kim loh vang a vun var awm thin ang a sawi an awm thin a, hei hi a dik lo a, hlauh tur ani lo.

- Dr Thangchungnunga, MS (Ortho)