June ni 16, 2026 (Thawhlehni) zing dar 8:00 bawr vel khan Dawrpui veng chhunga Vanapa Section (New Market) area-ah thil duhawm loh tak mai a thleng a, a thlenna hmun hi Bazarpui kan tih ṭhin, Dawrpui hmun ngeiah niin, Chhinga Veng Ṭhalai inti ten ABC lane phei leh Israel Market inkarah mipui ṭhahnem tak inzui pheiin thuziak an keng a, aurinna hmangin a veng neitute chuan an section pakhat pawh an ngam loh tur thuin vauna ṭawngkam an rawn aupui.
Heng bakah hian Dawrpui hming LSC nei dawr ṭhenkhatah thuziakte târin Chhinga Veng angin an rawn chhâl. Kan veng hming pu ngei dawrte chu khâr tirin anmahni tâla (Lock) hmangin an kalhsak. Hei hi duhtawk mai lovin, Mizoten kan hmangaih kaltate zalhna tia kan Kristianna nen pawha inzawm tlat, thlanmualah kalin, veng pasarihin kan inṭawm mek, Dawrpui Thlanmuala thu intâr (Dawrpui Thlanmual Centenary), thir hmanga siam chu kutbêng leh aurual chungin zahpahna nei miah lovin an la thla. He thil thlen hriat anih veleh a rang thei ang berin vengchhung hruaitute an kal khawm nghal a, anni hian an ngai thutak hle a, Dawrpui Khawtlang Hruaitute Joint Committee chuan vengchhunga mi râwn kâite nen Emergency Meeting Local Council Office-ah a ko nghal a, hmalak dan tur leh bawhzui dan tur uluk taka rêl nghal a ni.
June ni 15, 2026, YMA Day khan YMA leh Local Council thurel angin kan veng area a tam thei ang ber hrûtin tihfai hnatlang neih a ni a, hei hian Sawrkar Gazette (1994)-a kan veng huamchhung a kil thei ang ber bâk he hnatlang hian a huam lo tih hriat a ṭha awm e. He YMA Day hnatlang bawlhhlawh paihna tur motor pawh Local Council lamin an rawn tum nghe nghe a, a lawmawm hle mai. Hetianga Emergency Meeting neih a nih hnu hian Dawrpui area-a rîkrâp zawnga rawn che te leh Khawtlang hminga chhinchhiahna bungrua thlanmual lamah lak thlak a ni ringawt mai chu ngaihthiam chi a nih loh avangin Joint Committee hmingin Aizawl Police Station-ah FIR theh luh a ni a, meeting-naa tel zawng zawngten Aizawl PS Officer-in-Charge hnenah FIR hi an han theh lut. Hemi ni hian AMC Ward IX Corporator Pi B. Lalawmpuii chuan Saron Veng LC House-ah Dawrpui LC-te leh Chhinga Veng LC-te inkawm khawmna leh titi hona hun a buatsaih a, tlai lamah Aizawl Bawrhsapin DC Office-ah Dawrpui leh Chhinga Veng LC Chairman te ve ve leh YMA President te ve ve thu sawikhawmna hun a buatsaih bawk. Thusawi hona ten awmzia a neih thui loh avangin June ni 17 (Nilaini) khan AMC Conference Hall-ah Pu H. Lalremtluanga, AMC Mayor hovin veng pahnihte Local Council leh NGO-ten meeting an nei leh a, lungrual takin Committee on the Land Dispute between Chhinga Veng & Dawrpui an din a, hengte hi member an ni. Chairman: R. Lalawmpuii, Deputy Mayor, AMC.
Vice Chairman: B. Lalawmpuii, Corporator, Ward No. 9
Secretary: K. Vanlalruata, Deputy Municipal Commissioner
Members: Christina Roluahpuii Sailo, Exe. Corporator, Vanlalhruaia, Exe. Corporator Vanlalfaka, Exe. Corporator, K. Lalrodinga, Exe. Corporator Chairman & member pakhat, Local Council (Dawrpui & Chhinga Veng) President & Secretary, YMA (Dawrpui & Chhinga Veng) President & Secretary, MUP (Dawrpui & Chhinga Veng) President & Secretary, MHIP (Dawrpui & Chhinga Veng) Vanlalbika, Dawrpui (Prominent Citizen) R. Rosiama, Chhinga Veng (Prominent Citizen) Meeting hmasaber hi June ni 19, 2026 (Zirtawpni) dar 1:00 PM khan neih a ni.
