Dawrpui News hi a lo rei ve ta in kum 35 hmel chu a lo hmu ve ta reng mai. Vengchhung thil inhriatpawhna leh vengchhung chanchin tarlanna tha tak anih avangin a hlu hle a, tin, vengchhung mite pawhin kan hlut tulh tulh turah i ngai ang. Vengchhung mitthi a vuinaa kan kal ve kher lohnate pawh an chanchin tarlan a ni thinte hian minti bengvar a, tin, infuihna thu tha tak tak Editorial lamah hriat tur a awm reng a, tin, articles bengvarthlak tak tak thawhtu an awm reng theite hian vengchhung thil pawimawh pakhat a ti nung ve reng a ni tih hria ila, a thei thei chuan he chanchinbu hi a nun reng theih nan tan lak a ngai a ni, a bik takin khawtlangin an ruat bik a te phei chuan tun ai hian tan i la nasa lehzual ang u.
Ka han ngaihtuah vang vang hian he chanchinbu a ka tel ve na hi a lo va rei ve tawh e ka ti duh a, kum 1994-a Store Division PWD a ka thawh laia kan typist, Makimi min chhutsak leh typewriter leh cyclostyle ngat kut chhuakte kha ka la kawl a, chu chu Dawrpui News a mi turte an ni ve. Hun a lo kal zel a, Pu Rothanga(L) s/o Pu Rangkunga(L), Dawrpui Bungkawn Editor lai te, Dingluaia s/o Pu Thanmawia, Dawrpui Sikul bul ten an enkawl lai te khan an inahte panin chhuah tur ka lo pe ve zar zar thinte kha lung a tileng ta mang e.U Rodingliana(L) b/o Pu Rochungnunga, Medical Quarter ten an buaipui lai te khan chuti tho bawk chu. Engmah ziak thiam tak tak lo, zirna pawh nei lo ka ni tih in hre reng chungin, tih theih tawk chu tia telve mai chauh ka ni. Vawiin thlenga a khat tawka ka la thawh ve zauh zauh thei te hi Pathian zar ngei a ni tih chiang hmasa ber tu chu keimah ka ni.
Khawvel finna leh thiamnain a than chhohpui zelah mobile phone-ah te, computer-ah te thil engkim mai a lo lang a, kan en ta reng mai a. Hei hi kan literature lama kan chhiatna bulpui leh chaklohna chu a ni ta reng a ni. Lehkha ziak leh chhiar kan peih ta lo va, lehkhabu tha takte pawh hralh a tla ta lo. Thil hre fu fu angin kan ziak chhuak a, kan sawi a, mahsela kan thinlung ngaihtuahna leh awmirchhuak nilovin, mi thiam ziaksa kan lak chhawn leh copy mai mai te a ni tlangpui. Hei hian kan thinlung chhung ngaihtuahna leh keimahni atanga chhuak creativity kha a tizeng a, thu tha lawrkhawm ah kan in el ta deuh mai ni te pawhin a lang.
Ka mi ngaihsan em em – K.L.Liana te, Mafaa Hauhnar te thuziak han chhiar hian, an thuziakah hian literature hausakna a awm a ni tih a hriat theih. A chhan chu an ngaihtuahna ril ber atanga an phawrh thin vang a ni. Tin, hlaphuahthiamte thu leh hla atanga kai lekin an duhzawng tak an sawi thiam.
Thangthar lehkhathiam tak tak kan tam tawh em em a, a thente chu mi chanchin hlui atanga thil chhui a ziak thin te pawh an awm tawh. Nimahsela, a nawlpui hi chu Pu Google-a rawn tum ringawt mai a innghat, mahnia zuk hai chhuah leh zawn tum miah lo hi nang leh keia mawh hi a ni tih hriat chhuah a pawimawh. Kan thalaite pawh by-heart-system a kal ho chu an tlahniam tial tial ang. Competition a sang tawh a, hnathawk tura an duh ber chu mahni irawm chhuak a thil ngaihtuah thei, ngaihtuah thiam, rorel thei, administration fel taka kalpui thei chauh an dam khaw chhuak zel tawh ang.Dawrpui News-hi hei aia changtlung leh tha zawk, mi vengte entawn tlaka siam tur chuan thalaite, mithiamte in pawimawh. Keini kum over tawh lutuk te hriatna hi chu a tlakin a tling zo tawh lo va, tha kan thawh a tul. Editor-te chauh kan ring dawn a nih chuan kan veng chanchinbu hi a tha tak tak thei lo, hun a nei bik lo va, kartin chhuak tur chuan a hriatna pawhin a daih lo thei. Chanchinbu hmu phak a awm zawngte hian tan kan lak chuan chhuah sen loh pawh kan khawl thei ang.
Tirhkoh Paula chuan,”Tirhkohte, thuhriltute, thilmak tihtheihna, tihdam theihnate, rorel thiamna thilpekte, Krista taksa pengte ah chuan a awm teuh mai (I Korinth12)” tih thu a lo sawi a, talent hrang hrang dawngte khan mahni zawn theuhah he kartin chhuak chanchinbu te reuhte tan hian tan ila ang u.
He Dawrpui veng hi a mi chengte ta vek a ni a, veng dam zelna atan chuan theihtawp i chhuah theuh ang u.
x
.jpeg)
.jpeg)
.jpeg)
.jpg)
