Pu Lalkhawsiama kan chan ta

[ 01 February, 2009 | 0 comments ]

Pu Lalkhawsiama (Kum 82) Thana Tlang (Jail Veng) chu accident avangin a boral a, Dt. 1 January, 2009 (1:00 pm) khan Dawrpui thlanmualah vuiliam a ni.

A chanchin : Pu Lalkhawsiama hi Pu Khuma leh Pi Zachengi te fa niin 1928 Nov. 17 khan Senvawn khuaah a lo piang a. Unau panga niin pathum in chatuan ram an pansan tawh a ni. Senvawn atang hian Saipumah pemin lum 1955 khan Pi Buangi nen inneiin fa 8 (hmeichhia 5 leh mipa 3). Tu 20 lai a nei tawh bawk. Saipum atang hian 1989-ah Aizawlah rawn pemin Dawrpui Jail Vengah an awm a ni. Amah hi a phak tawk anga anga khawtlang leh kohhrana in hmangin Saipum lama an awm lai phei chuan kum 10 chhung ngawt YMA President niin VC member leh VCP-te pawh term engemaw zat a lo chelh tawh.

A nat dan : Dt 22 .1. 2009 zing lam khan thuthlenga a muzal tho tura a han ding chu a tlu palh a, Civil hospital panpui nghal in Doctor leh Nurse ten an enkawl hnu-ah tha takin in lamah enkawl zui turin an hawng ta a ni. Ni 30.01.2009 zinga lam khan a pum rawn puarin a aw te a rawn chhanga engmah eithei lovin tawng pawh hriat theih loh khawpin a aw a rawn chhang a, Damdawiin lam panpui nghal niin Doctor leh Nurse ten theihtawp lo chhuaha an buaipui chungin zing dar 8 : 30 khan a boral ta a ni.

V.C thlan Chungchanga Khawtlang Mipuite Hnena Ngenna

| 0 comments ]

Kan hriat theuh angin kan hma lawk, Feb 24, 2009 (Thawhlehni) khian vengtinah Village Council inthlanna neih tur a ni a, hemi atan hian vengchhung mai bakah Political Party hrang hrangte chuan inbuatsaihna chi hrang hrang an kalpui hlawm a, keini vengah pawh Jan 30, 2009 (Zirtawpni) zing khan Dawrpui vengchhunga tlawmngai pawl hrang hrang YMA, MUP, MHIP-te chuan Joint Meeting neiin hetiang hian khawtlang mipuite hnena ngenna chuan lungrual takin an tichhuak a, ngun tak leh uluk taka lo chhiar theuh turin veng mipuite an ngen a ni.

Kan veng hian kawng hrang hranga hmasawnna hmel a hmu chho ve mek zel a. Hmasawnna kan neih zel theihna tur atan hian keini veng mipuite mitinte hi kan pawimawh em em a ni.

Kan veng (Dawrpui) hi Mizoram khawpui Aizawla veng laili kan niin, Zoram hmel pawh kan vengah hian thui tak a innghat a. Dawrpui venga thilthleng reng reng hian kar lovah kan zoram hi a deng chhuak nghal thin a ni. Chutiang khawpa veng laili leh Zoram darthlalang dinhmuna kan din mek lai hian keini a chhunga chengte hian tih tur kan nei a ni. Kan veng hmasawn zel nan leh kan veng a lo mawi a Zoram a lo mawi theihna turin V.C hi an pawimawh em em a. Chumi dinhmun pawimawh tak luah tur chu kan hma 24 Feb’09 (Thawhlehni) hian kan thlang mai dawn a.

Vengchhung mipuite rilru fim tak pu-a kan veng tana mi tangkai, mi dik, mi taima, mi huaisen leh Dawrpui veng PA nih tling tur kan thlan chhuah hi kan tih makmawh a ni. Hun kal tawha kan hruaitute hmalakna a fakawm a, kan hruaitu kaltate chungah lawmthu kan sawi bawk a. Chutih mek laiin hun lola kal zel tur thlira kan veng tan ngaihtuahna thuk zawk kan sen hi Dawrpui NGO (YMA, MHIP, MUP) Joint Meeting Dt. 29 Jan’09 (Zirtawpni) a thukhawm chuan a duh tak zet a ni.
Issued By: DAWRPUI NGO JOINT MEETING

TUALCHHUNG NEWS (1 Feb. 2009)

| 0 comments ]

GupShup chianglo : Tunlai hian BSNL chuan an khawl an siamthat avangin vengchhung chanchinthar inthawn darhnan a hman thin gupshup news chu BSNL mobile hmangtu ten in hmu tha thei lova, a that thuai kan beisei.

Naute thar : Pu Zalawma Asst. Leader, Vanapa Sec. te chuan January 27, 2009 (Nilaini) khan fanu duhawm tak an nei.

Damlo : * Pu Lalrintluanga, Church Square (V.Sect) chu Cancer natna avangin Nazareth Hospital ah admit a ni.
* Pi S.L Chhungpuii, Bara Bazar pawh damlohna avangin hun rei tak in lamah a in enkawl tawh a ni.
* Pi Dawngi m/o Dr. Zothansanga, Bazar Bungkawn chu damlohna avangin Doctors’ Sick Room, Aizawl Civil Hospital-ah enkawl mek a ni.

Puan : Pu Lalchhanhimate chhung, Med. Qtr. chuan Branch YMA in a tul apianga ahman atan puan an pe.
Transfer : Kan Jt. Editor Tv. Lalhruaitluanga (Vala) chu a hnathawhna Lunglei atangin Aizawl lamah sawn phei leh a ni a, February thla hian zawm tura tih a ni.
Interview : Feb 9, 2009 (Thawhtanni) zing dar 7:00 atangin min bialtu MLA Pu Lalsawta chuan Dawrpui YMA Committee Room-ah interview, vengchhung mi a duh apiang tan a nei dawn a, veng mipuite hriatah kan han thailang a ni e.

SECTION THUTHAR

| 0 comments ]

Chawngbawla Section : Hruaitu hlui leh thar charge inhlan fel a ni tawh a, section committee member/advisers turte pawh ruat fel a ni tawh a, Branch Ex. Committee-in a pawmpui ve leh inhriattir a ni ang.
Taitesena Section : Dt. 25 Jan’ 09 (Pathianni) khan Section hruaitu hlui leh tharte chuan charge an in hlan fel a. Committee member 26 leh Advisers 2 ruat a ni.
Vanapa Section : Dt. 26 Jan’09 (Thawhtan) khan section hruaitu hlui leh tharte chuan charge an in hlan fel a. Committee member leh Advisers ruat a ni.

VAIVENGA HOSPITAL & RESEARCH FOUNDATION

| 0 comments ]

CARE Hospital tia hriat thin Vaivenga Hospital & Research Foundation chu 27th Jan’09 khan ‘Sorkar recognized’ a ni ta a, Sorkara hnathawk tan M.R. Bill theih a ni a. Vengchhung mite M.R. Bill ve theilo tan 25 % discount (On Nursing & Accomodation) pek a ni bawk.

Vanlallawmawmi a boral

| 0 comments ]

Vanlallawmawmi (Kum 1 leh thla 10) d/o Lalchhanhima (Medical Quarter) hi, 3rd April, 2007 khan a lo piang a. 16th Dec’08 khan vanduaithlak takin tukverh atangin a tla a, damdawi inah luhpui a niin, hemi atang hian a tha chhuak tak tak thei ta lova, 13 Jan’09 khan damdawi inah luhpui leh a ni a, that lam pan loin, zual lam a pan zawk mah a. 17 Jan’09 atang phei kha chuan kaih nen a fawm a, a kaih hi a reh ve mai theih loh avangin 27 Jan’09 (Thawhlehni) zing lam dar 7:30 khan chatuan ram min pan san ta a ni. Naupang duhawm leh hmel tha tak a ni.