Branch KTP Hruaitu Inhlantharna

[ 15 March, 2009 | 7 comments ]

Branch KTP-a Branch Committee member leh Group Office Bearer 30 rualin 12 - 14 March, 2009 (Thu-Sat) chhung khan Bung Bangalow-a Mt. Rephidim School-ah zan 2 riakin ‘Inhlantharna’ hun hlawhtling tak an hmang a. He hunah hian Mawhphurhna - Leader mawhphurhna inzirtirna, Sum enkawl dan inzirtirna leh Secretary tih tur leh Minute ziak dan leh lehkha siam dan bakah thil pawimawh tak tak inhrilhhriatna hun hman a ni a.

‘Tih tawh loh atana tha leh tih atana tha’ tih thupui hmangin sawihona hlawkpuiawm tak an nei a.
An member BD pahnih Pu David Remruata leh Nl. H. Lalhmachhuani (Teii) te atangin Bible Study neih anih bakah, Rev. H. Zalawma hnen atangin Kohhran kalphung leh hruaitu hriattur pawimawh tak takte ngaihthlak a ni a. Zirtawp zan (ie.13 March) khan Upa C. Ngurthantluanga (Khatla) hnen atangin thlarau nun chawm theitu thu tha tak ngaithlak bawk a ni.

Tualchhung News (15 March,'09)

| 0 comments ]

Lo haw : Dawrpui YMA Treasurer, Pu H. Dingluaia, Nokia Company bultuma Middle East ram hrang hrang fanga zin pawh dam takin a lo thleng leh ta.
Damlo : Pi Lalzapi,Dawrpui S Guwahati-a check up chu dam takin alo haw ta.
* Pu Lalrintluanga (Apuia) Bara Bazar pawh phai lamah Check up neih mek a ni.
* Pu Lalramthanga (Patea) H/o Ngurthanzami Jail Veng chu Aizawl Hospital-ah hun engemawchen enkawl a nih hnuin tunah hian Civil Hospital ICU-ah dah a ni a, that lam a pan zel niin kan lo hria.
* Pi Lalthandawngi M/o Dr. Zothansanga, Dawrpui South, Chuap natna avanga Vellore pan chu in lama inenkawl turin an lo haw.
* Pi Vanhlupuii, Dawrpui South, Guwahati-a inentir pawh in lama inenkawl chhunzawm turin a lo haw.

Tuak thar : Lalremsanga (M-a) S/o Vanlalthanga(L) Dawrpui ‘W’ leh Vanlalhriati, Venghlui te chu March 11, 2009 (Nilaini) khan an innei.
Group Conference hmanpui : Kan Branch YMA Finance Secretary, Pu Lalrammuana (Lare-a) chuan March 12, 2009 khan Aibawk Group YMA Conference, Lungleng khuaa neih chu a va hmanpui.
Doctor of Divinity Degree dawng : Upa Rokamlova chu March 9, 2009 khan Churachanpur-ah Trinity Bible College in Doctor of Divinity Degree an hlan.

Branch YMA Executive Committee Vawi 3-na

| 0 comments ]

March 12, 2009 zan khan Dawrpui Branch YMA Executive Committee Vawi 3-na neih a ni a. Committee-ah hian thu pawimawh tak tak rel leh sawiho a ni a, veng mipuite hriat tur pawimawh zual lo tarlang ila.

1] Finance Secretary Report ngaihthlak a ni a, MP Fund Rs.2,00,000/- chu Fixed-in kum khat chhung atan 16th February, 2009 khan Bank-ah dah luh a ni. Hei bakah hian Central YMA a chhun luh tur sum Membership fee leh annual fee pawh a rang lama chhun luh nise tih a ni.

2] Music Sub-Committee ten an thurel Branch Committee-a an rawn thlen chu sawi ho a ni a, Mitthi In a solfa zai/zai hruai/hla chang sawi leh kan hlabu a hlate zir ho an rawtna chu pawmpui a ni a, he Sub-Committee hian a hun leh ni tur te hun awl remchang lo ngaihtuahin hma lo la mai se tih a ni.

3] Central YMA lam atanga ngenna kan hmuh YMA chhang din chungchang sawi ho a ni a, kan vengah pawh din ve ngei nise tih a ni a, a din dan tur chungchang zir chian hmasak phawt a Committee leh peka ngaihtuah tura dah a ni.

4] CYMA lam atang bawka lehkha hmuh Census neih tur, chin/Burmese zo hnahthlak refugee-te dinhmun chiang taka hriat theihna tur chungchang sawiho niin Central YMA thu chhuak lo nghah leh rih phawt mai nise tih a ni.

5] Central YMA buatsaih ‘Training on Million plus City Project of Satellite Imaginery World Map’ in kan veng chhung Census kimchang nei tura min ngenna chu a kalhmang in zirtir hmasak phawt a ngaih avangin a zirna hun siam hmasak phawt nise tih a ni.

6] Vanapa Section atanga lehkha hmuh Section sum tuakna atana Zephyr Drama Club show neih an dilna chu pawm sak an ni. Hemi atana Sound System leh bungraw dang hawh an dilna pawh phalsak an ni bawk.

7] Anganwadi enkawltu rawihna senso atana thla tin Rs.500/- Branch YMA in a tum sak thin kumin atana chhunzawm leh tura MHIP Dawrpui Branch hnen atanga ngenna kan hmuh chu remtih sak niin, kumin atana Branch-in a tum tur Rs.6,000/- chu pek fel nghal a ni.

Drama thar nen Zephyr

| 0 comments ]

March 26, 2009 (Ningani) zan dar 7:00 khian Zephyr Drama Club te chuan Dawrpui School Complex-ah Vanapa Section, Dawrpui YMA-te buatsaihin show an nei leh dawn. Hlimna kutpuiah hian hlim takin rawn nui ve bawk bawk ang che.
Tunkar chho hian In tinah ticket an rawn zuar kual dawna tlawmngaia lo leisak vek turin Vanapa Section hruaitute chuan veng mipuite min ngen a ni.

Dawrpui V.C. Press Release

| 0 comments ]

March 13, 2009 (Zirtawpni) zana Dawrpui Village Council huaihawta Dawrpui Vengchhunga Kohhran hrang hrang aiawh leh NGO Office Bearers leh vengchhung mipawimawhte kalkhawm chuan Pawisa khawn hi dan bawhchhiatna a nih avangin kan ram leh hnam hmelmaah a ngai tlat a. Chuvangin Dawrpui Village Council chuan Dawrpui Vengchhunga hetiang Donation (Extortion) khawn hi a remti lo a ni. He thu ngaipawimawhlote chu dan angin thuneitute hnena hriattir (report) an ni ang.
Village Council/Court, Dawrpui

Lamtawi

| 1 comments ]

- Dr. Zothanpuia
Virus tih hi ‘Vital Information Resouces Under Siege’ tih lamtawi a ni.
Microsoft tih hi ‘Micro Computer Software’ tih lamtawi a ni.
Window XP tih hi, ‘Exprience’ tih lam tawi a ni
Microsoft Windows ‘Shut Down’ turin ‘Start’ tih click a ngai
Adobe (eg: Adobe Photoshop) tih te hi ‘A-DO-BEE’ tiha lam tur a ni