CYMA INTHLAN THUCHAH 2008

Inthlan thuchah hi ngaipawimawh a, zawm ngei turin Zoram mipui leh political party tinte CYMA chuan a ngen a ni.
1. Kan ram rorelna hi mipui siam a ni a, a chhiat a thatah mawhphurtu kan ni tih hriain, khua leh tui dik takte chuan vote i thlak ang u.
2. Zohnahthlak zingah chibing/ sakhaw bing inthliar hrang zawng a chetna hi CYMA chuan tha a ti lova. Kan hmaa Inthlanna kan neih turah pawh chutiang zawnga hma la lo tur leh chibing/sakhaw bing puala Candidate siam lo turin Political party leh mipuite kan ngen a ni.
3. Inthlan hun puan a nih hnuah leh party hrang hrang ten Candidate an puan hnuah chuan Political Party emaw, Candidate-in khawtlang Ruai siam hi tha kan ti lova, tumahin khawtlang huap Ruai siam loh nise.
4. Candidate turte hi ram hruaitu turte an nih vangin Zu ruih hmangte, Eiruk chingte leh nungchang thlahdahte chu Political Party ten Candidate atan vawrh chhuah loh nise. Hetiang mi Candidate zingah an lo awm palh a nih pawhin vote loh ngam nise.
5. Naupang kumtling lo leh thil kalphung hre pha lote, Inthlan boruaka hnuhluh loh leh hmanrua a hman loh nise.
6. Political Party Manifesto-ah a taka tih puiltin theih ngei tur tarlan nise.
7. Inthlanna muanawm, boruak tha tak hnuaia kan neih theihna turin thlangtu mipuite leh mawhphurhtu zawng zawngte theihtawp chhuah a, tanla turin kan ngen a ni.
8. Hel pawl hmanruaa hman leh ralthuam chelekna reng reng kan duh lova, mitinin kan chhia leh tha hriatna thiang tak hmanga vote kan thlak theih nan Sum leh Therhlo dang hmanga vote lei leh hralh hi tih loh nise, mipui, pawl hrang hrang leh Kohhrante pawhin Party leh Candidate- te sum leh thildang dil loh nise.
Hetiang hi Central YMA chuan Inthlan Thuchah duan chhuah chu a ni a, sawifiah leh chuan a ngai awm love. Mipui ten rilru fimin, kan ram hruaitu tur hi thlang ila, kan ram a chhiat a thata mawhphurtu kan nih hria in, Pathian hnena tawngtai chungin mitin i inbuatsaih zel ang u.