Civic Sense

Tunah chuan Mizoram hian khawpui lian dang leh hmunpui tak tak chu kan nei mai dawnin a lang lo. Hetih lai hian incheina leh Motor, In ilo te changkang ber berte kan nei a. Dawrpui hi a bikin mitin entawn leh mi thlir kan ni a. Khawtlang nun pawh uluk a ngai ta hle in ka hria a. Sap-in ‘Civic Sense’ (Khawtlang nun mawi) an tih kan neilo erawh hi chu a tantu nih a duhawm hle mai. Entirnan, mahni insa te, sa mek te kan awm a, kawng tichhe khawp leh midang tana hnawksak khawpa leivungte kawr hnawh tira, en reng reng pawha mi tana hnawksak a ni tih hreren ga, kan tifai duhlo te, mahni tuichhe luanna tur pawh siamtha duhlo te hi insa mekah te pawh hian ka hmu nual mai a. Hei hian a entir chu vantlang zahlohna a ni.

Civic Sense nei tha tan chuan mi tan kan hnawksak em? mi kan tibuai em? tih te ngaihtuah fel hi a ni a, a Kristian bawk a ni. Biak In hnuailam banga chinai intat var lei luai te, bawlhhlawh bawm hmun tinah an dah ve tawh laia sikret kawr, kuhva them, sweet kawr, etc. te thui lote han ken a, bawma paih maite hiching ve tawh ila. Cement building lianpui kan nei a, mipui kalna sidewalk-ah te, kawnglaiah te inchung tui kan khawhthlak tir tur tur te hi a in neitute hian zahna changte hre ve tawh ila, thenawm leh vantlang tana hnawksak leh hmuh nuam lova awm loh hram hram hi changkanna a ni. Kan sidewalk-te a te si a, kan kal lah hi Zawhte kaw-na ang maiin kan kal hnuk hnuk mai a, hnunglama mi hmanhmawh pawh ngaihtuah lova kalna laia ding chunga inbiak tlat te hi mihring traffic jam bawk, motor jam bawk veng nih reng pawh hi ngaihtuah a ngai.
Keini veng hi chuan tilo phawt mai ila, kan kal te hian chak tak taka kal zir ve ila, a hranpa in excercise kan la peih si lo. Nun changkang tih hian incheina changkang nilovin, nunmawi leh mite tibuai lova nun a, mite tana entawn tlak nih hi a ni zawk. ‘Exer ka la regu vak lova’ kan han ti te phei hi chu, a word hnih lek pawh lampum peihlo chuan a lak hmel loh hmel viau a ni.
Chuvangin, kumtharah hi chuan mahni in leh a velte, kan tuichhe luangin thenawmte a tibuai em? tih te inenfiah theuh ila, veng mawi leh nuam, mi entawn tlak siam i tum teh ang u. A sawi pawh sawi tam a tha. Hmalam pan zela thil tha tih tum ve hi Krista duhdan pawh a nih kha.