Scooty leh Nau pai

Tunah chuan kan changkang a, kan over lo chauh chu a ni ta. A tha lam hriselna leh ruih theih thilah pawh kan ziaawm chho zel a. Kan changkannain a ken tel tha lo erawh a awm ve thin. Chung zinga mi chu Scooty (Two Wheeler) hmeichhia/Nu in an khalh ve ta hi. Kan tih tawh chu ti vak zel hnam kan nih avangin hei pawh hi kan ti lutuk ang tih a hlauhawm hle.

Nau pai tir, a bikin thi neih huna nei ta lo, rai dawn nia inhria leh nau pai thla hnih chhung hi, thla thum ti law law teh ang. Lirthei leh khawla chuan hi a haw em em a, chhulah hian naute kha thisen leh tisa nem lutuk hlawm khawma awm a ni a. A nghet em em chungin rawn awm thar a nih avangin a nghet nep tih chu hriat sa a ni. Ke-a kal leh hna thawh vak vak chu a pawi lem lo. Mahse, hetia nau insiam tirin a huat ber chu, khawl motor emaw Scooty a ni emaw, a nghawr der der hi a haw em em a. Bur mawngah thil ban lutuk lo bel la, a letlinga kengin thing khur char char la, reilo teah a tla mai ang. Hetiang tho hi naute
insiam tir awm dan chu a ni a, chhul kawrawng a letlinga awm chhungah a bet ve tawk tawk a ni.
Lirthei a chuan hrim hrim pawh kawng chhia chu a haw tho a, mahse a huat ber chu khawl nghawr der der kha a ni. Hei vang hi a ni mahna, tunlai innei thar nau chhiat an tam riauna pawh hi kan Motor leh Scooty chuang tam lutuk vang hi a nih hmel a ni. Ke-a kal leh tlan te hi chu Pathian min siam dan anih avangin kan haw lova, tih tur a ni zawk.
Nau pai tirh thla thum chhung hi chu fimkhur em em tur, a bikin lirtheia chuan leh damdawi ei hi. I ei leh in ang ang kha naute-in a ei ve zel tih hriat tur. Zu i in a nih chuan i nau pai pawh kha i pum chhungah a lo rui ve chhar chhar dawn tihna anih chu. Thil ho te angin lang mahse a pawi thui thei a ni tih hria ang u. Motor Jam a ding reng a, a khawl nunga chuan reng te hi a hlauhawm hlei hlei. Mahse a tir thla 2 hi a pawimawh ber a, thla 3-ah chuan naute alo insiam fel tawh a, a mah pawh a inham tang ve thei tawh a, chhiat a har deuh. Ke a kal, Pathianin kan nih dan tur anga a duan sa hi hman tam a tha a, a him ber bawk. Pathian siam dan kan kal pelh apiangin kan buai thin.