HUN HMASA LAMA DAWRPUI

1. Dawrpui huam zau lai : Kum 1910 hnu lam kum 40 chhung vel kha chuan, 'Dawrpui Veng' kan tih mai hian a la huam zau hle a. Mihring erawh chu an tam fahran lo, an la khawhar hle. Zanah phei chuan, hmun hrang hranga ramriak awm ang deuh lek an ni awm e. Hetih laia Dawrpuiin a huamte chu tuna Chanmari Veng te, Electric Veng te, Chhinga Veng te, Saron Veng te, Dawrpui Vengthar te, Dinthar Veng te, Tuikual North & South te, Armed Veng te, Vaivakawn te leh Zarkawt Veng te hi an ni. 

Dawrpui pheiah hian Vai Dawrkai an intlar phei a, Mizovin an pawlh ve nual a. Kawng chhak lamah hian Stall (Dawr tê) kaihkûl chau fe fe a tlar phei chauh va. Zion Street chhak lam, Dawrpui Presbyterian Biak In thleng hian, hun reit tak chhung chu thinghmun ram ruak vek a ni. Pu Khawtinkhuma In bul, Vaivakawn peng aṭanga Zodin Cinema Hall thleng hian hmun ruak a la ni vek bawk. Heng lai pheiah hian Far thing a tam hle thin. Macdonald Hill hi thingpui huan vek a ni a, enkawltu chenna In pakhat tih mai loh chu In dang a awm lo.

Macdonald Hill aṭanga Chanmari lam leh Electric Veng zawng hi rei tak ramhnuai a ni. Tuna Chanmari Biak In bulah hian, Chânkahna lo enkawltu awmna In pakhat a awm chauh va. Chanmari tlak lam mawng deuhvah 

hian, 'Hmarkaii Nu Veng' In 10 vel a awm. Chhinga Vengah hian In tlem te, thlanmual bul thleng hian a awm thla pheuh pheuh va, Saron Vengah hian, Hmunphiatho In tlem leh Police Lane leh mi dang In tlem a ding bawk. Tuna Dawrpui Sikul hmun hi Police Lammual leh Chânkahna hmun a ni. Helai hmun aṭang hian, Laipui Tlang pang mawng lam, Ramhlun Veng kawngphei inthemthiam, chânkahna a ni. Police sawm vel hi an lâm ve tlat tlat ṭhin an ti. Hetih lai hian, Dawrpui Veng hi Venghlui lal Pu Makthanga rorelna hnuaia awm a ni.

2. Hun hmasaa Dawrpui Veng hrang hmingte  : Tuna Dawrpui Veng hian, lal bân hma leh V/C neih hma chuan, heng Dawrpui Vengthar, Zarkawt, Chanmari, Chhinga Veng, Saron Veng, Tuikual Veng, Dinthar Veng, etc-te hi a huam vek ṭhin a. Mizoramah lal ban a lo nih aṭang khan, Village Council neiin Veng hrang hrangah an lo inhlawm hrang ta a ni. Political Party-te a lo awm a, mihring an lo pung zel bawk a, kawng hrang hranga hmasawnna a lo awm bawk a; chung chuan lohtheihlohvin Veng hrang hranga insiam hi a rawn thlen ta a ni.

(i) Tuna Chhinga Veng hi, Rahsi Pu Chhinga hming lo pu hlen ta a ni. Pu Liankhuma (L), Kulikawn pa a ni. 1902 khan Chhinga Vengah hian awm \an ni âwmin kan hria. Hemi hma hian sipai nupui Pi Chawngi leh mi ṭhenkhat an awm tawh âwm e. Hun rei tak mi tlem tein an awm reng ṭhin a, zawi zawiin an lo pung ve ta zel a ni. Dawrpui Veng nen hian hmun khat niin, Dawrpui Kohhranah an lawi za reng ṭhin. Mizorama Village Council neih hma zawng kha chuan, Dawrpui Veng kawtthler hming pakhat ang a ni \hin.

(ii) Zarkawt-Chanmari hi, Village Council neih \an atang khan V/C khatin an lo awm ṭan a; tunah erawh chuan Village Council nei hrangin an lo awm ta. Zarkawt hi, Mizo lalho, 1890-a P.W.D. Tlang leh Jail hlui hmun pheia an inkulh laia an chhuahkâ (kalkawng) a nih avangin, 'Zarkawt' tih hi a lo pu ta a ni awm e. Sawi dan \henkhatah chuan, vakilên zarna hmun a nih avanga Zarkawt tih niin sawi a ni bawk.

(iii) Dawrpui Vengthar hi, Village Council neih ṭan aṭang bawka Veng hrang anga awm ṭan a ni. Dawrpui Veng tihzauhna ang deuhva ngaiin, a hming pawh hi, "Dawrpui Vengthar" tih an lo puttir ta a ni.

(iv) Saron Veng hi, Chhinga Veng nen V/C khatin an awm hmasa phawt a, chumi hnu-ah a hranin V/C an lo nei ta a ni. Dawrpui Vengah chuan, Saron Veng hi Civil awm hmasakna ber pawl a ni. A Veng hming hmasa chu, "Mirawng Veng," a ni. Hmunphiat leh Ekpaihte an awm ṭhin. Mi dang an awm belh zel hnu-ah, "Saron Veng," ti-a thlak a lo ni ta a ni. An In bul leh Gate velahte Saron an phun uar deuh va, a par vul chûk hlawm ṭhin a; chungte avang chuan, "Saron Veng," an tih phah niin a lang.

(v) Tuikual hi, 1963 aṭang khan Dawrpui Veng aṭangin V/C hran neiin a Indang chauh a ni. Mihring an lo pun deuh hnu-ah, Tuikual Veng hian Veng hrang, 'A' 'B' 'C' 'D' a nei. Tunah phei chuan, "Tuikual North" leh "Tuikual South" tiin ṭhen a ni leh ta bawk.

A hming hi, a Veng mawnga luitê, kikawi taka luang kual vel hmingchawiin, "Tui kual" tih a ni a, "Tuikual" an lo ti ta zel a ni.

(vi) Dinthar Veng hi, tun hma chuan, "Keltawlh Veng," ti-a hriat lar a ni ṭhin. "Dinthar Veng," tih hi an putna a la rei vak lo. Tun hma chuan, Dinthar Tlangah hian Survey Map siamtuho an awm ṭhin a, "Survey Tillah," ti tein an sawi bawk ṭhin. Tunah hian, Dinthar I leh Dinthar II tiin Veng hming siam a ni ta.

(vii) Tuna Electric Veng hi, Electric Khawlpui bunna Veng a nih avangin hmingah a pu chho ta a ni. Refugee Veng pawh an ti bawk ṭhin. A mawng lam deuh, Chhinga Veng hnaih lam hi an awm hmasakna a ni awm e. A Veng laili lam phei hi chu rambuai hnua luah lum tan chauh a ni.

Tun hma chuan, Dawrpui Veng hian, heng a chunga Veng hrang hrang kan sawite hi lo huam \hin mah se, tunah chuan a lo zim ta hle a. Chhim lamah Dak Inpui bul, Brig. Vankunga Point, hmar lamah Dawrpui Pastor Quarter thleng. Thlang lamah, Sairang road chung zelah Pi Seikungi In thleng a huam a, chhak lamah New Market kawngpui zelah New Market huamin a ni.

A hming hi, sumdawnna hmunpui leh dawrkaite awmna hmunpui a lo nih avangin, 'Dawrpui Veng' an lo ti ta a. Vaiho chuan Bara Bazar an ti mai ṭhin a ni.

3. Hun hmasa laia khawtlang dinhmun : Dawrpui Veng chuan a huam zau hle; mahse, a la rialrawk hle a. Inte chu hmun ruak leh ramhnuaiin a kardan thluah avangin, Veng khat anga chhiatni/ṭhatnia inphungbawm thei Mizo ngat chu an tlem hle a ni.  Bazar niin mi an han lun viau va, Bazar a han tiak a, zan lamahte chuan ramriak ang maiin, a Veng hi a reh vung vung mai a, a khawharthlak hle awm e. Tunlai nen chuan a inang awm lo hle mai. Kum 1918 vel lai kha chuan, Dawrpui Veng ti-a inchhal chin chu Chhinga Vengah In 10 vel an awm a, tuna Dawrpui huamah phei chuan Mizo In 5 vel chauh an la awm a ni. Mi dang chu Vai sumdawng vek an ni. 

1918 hnu lamah khan Mizo dawrkai an lo pung ve ta hret hret a. Pu Pachhunga te, Pu Thangvunga te, Pu Hrangchhuma te, Pu Hangpawla te, Pu Zama te, Pu Khamliana te, Pu Taitea te leh Pu Suakkunga te hi In leh Dawr neia awm hmasate an ni. Kawlkulh lam aṭangin, 1918 khan Upa Laihnuna a lo pem bawk a, an lo pung ve ta zel a ni.

Vaiho awmte nen hian an intlawhpawh vak loh avangin, mihring cheng an tam ang hu-in, Dawrpui Veng chu Veng hulum nuam chu a ni lem lo a ni. Mizo tlawmngaihna thilah pawh, Veng chhungah hnam dang an tam avangin thawk chhuak an tlem thei hle ṭhin. Tlangval 30 pawh hetih hun lai hian thawk chhuak tur an awm lo niin an sawi. Tlangval awm chhunte an rim thei hle ṭhin a; mizawn inchuh nikhuate hian, Chaltlang tlangval leh Thakthing tlangvalte chuan an tam hneh deuh ṭhin niin an sawi. Damdawi In awmna Veng a ni si a, damlo leh mitthi zawn a zing si a, an hah thei hle ṭhin a ni. Tlem hle mah se, nula leh tlangval awm chhunte chuan Mizo tlawmngaihna sang tak an lanchhuahtir reng a, tlawmngaihna lamah hian an chhuanawmin an rim ngiang reng bawk a ni.

Dawrpui Veng hi Politics lamah pawh a lo duailo hle ṭhin a. Mizo Union aiawh leh India aiawhte inremna anga Mizoram dinhmun siamsak lova, District Council lek nei tura Indian Constitutent Assembly-in a lo tihtluk tak khan, Dawrpui Veng chuan an duh lo hle a. India hruaitute chu thutiampui tlak lohvah ngaiin, Veng pum hian Mizoram independence duhin an pawm a. Nawr hlawhtling ta lo pawh ni se, chuti taka ram leh hnam rilru an lo pu chu an fakawm hle a ni.

India Independence dawn zante khan, Dawrpui Biak Inah British thlahna inkhawm, ropui taka siam a ni a, mipui pawh an ṭhahnem hle a ni. Dawrpui Veng a\ang hian politics-a mihlun tak tak an lo chhuak hlawm bawk a ni.

4. Rorelna lam : Aizawl tlangah hian, Bawrhsap lo awm hma aṭang khan, Thakthing Vengah sawn Paliana a lo lal tawh a.  Bawrhsap lo awm hnu pawh khan, hun eng emaw chen chu, heng Dawrpui Veng te pawh hi a khualehtui ang deuhva dah a ni awm e. Mahse, eng mah a rawn ti lem lo va, chhiah pawh a rawn la lo ni awm tak a ni.

A hnuah Venghlui (Rahsi Venghlui)-ah hian Bawrhsapin Pu Makthanga, lal atan a dah a, Dawrpui Veng te pawh hi Pu Makthanga khualehtui anga dah a ni. Pu Makthanga rorelna huam chhungah hian, Dawrpui Veng mai bakah, Champhai road kawngpui kualkhung chin, heng - Chaltlang, Zemabawk leh Zokhawsang thleng hian dah a ni. Heng huam chhunga 'Micheng puitling' chin tawh phawt chuan, kum khatah 'Khawpui awm man' chhiah Rs. 3/ an chawi ṭhin a ni. Hmanlai chuan Bawrhsapin Aizawl khawpuia mi tam tak awm a phal lo va, awm apiang hnenah khawpui awm man a chawitir zel ṭhin a. Heng chhiahte hi, lal Makthanga kutah pek a ni ṭhin.

Tun hma chuan, Sawrkar hnathawk leh C.I. (Rahsi kan tih)-te leh, an behbawmte deuh chauh an awm ṭhin a. Mi dang lo awm ve turah an ngai thei vak lo. Tuna Venghlui lo ni ta hi C.I. (Rahsi) awmna Veng a ni a, Thakthing Veng lamah an awm chhuahsan avangin Rahsi Venghlui tih a ni a, tunah Venghlui an lo ti ta mai a ni.

Upate sawi dan chuan, Rahsi-ho hian Bawrhsap hnenah, mi dang lo lut (pem lut)-te hian min tibuai mai mai a, thil man an tito zo va; chuvangin, khawpuia lo pem luh hi awih loh ni se, a awm sa leh lo lut luite pawh, 'Khawpui awm man' chawitir zel ni se a tha ang tiin an râwn a; Bawrhsap chuan an thu chu pawmin, Aizawla pem luh phal lovin, awm man chhiahte a lo laktir ta niin a lang. District Council Session-ah 'Khawpui Awm Man’ tibang tur hian move a ni a. A move hmasa bertu chu Pu Pachhunga (Mihausa) kha a ni. Hetih lai hian Opposition Member a nih avangin a tlu lo va; a hnuah Pu Hrangaia'n Ruling Bench lam a\angin a han move ve ta a, an tibang thei ta a ni.

Kum 1954 October 20 aṭangin lal an lo bang ta a, Dawrpui Veng pawh Village Council rorelna a lo ni ta a. Dawrpui Veng huam lo ni ṭhin Veng hrang hrangte pawh kha Village Council hran neiin an lo awm nghal ta deuh vek bawk. Tuikual Veng erawh chu Dawrpui Village Council rorelna hnuaia awmin, 1963 aṭang khan a Indang ve chauh a ni. Dawrpui Veng V.C. President hmasa ber chu Pu Lalhmingthanga kha a ni.

5. Tuna Dawrpui Veng chhunga Veng hming hrang hrangte  : Dawrpui Veng chhungah hian hming hrang a la awm leh thluah a, an lo vuah chhante nen hengte hi an ni:

(1) BUNGKAWN : Indopui vel lai khan Pu R. Buchhawna'n Bûng a phun a, vawiin thleng hian a la awm a, Dawrpui Bungkawn (Bazar Bungkawn) an lo ti hlen ta a ni. Tunah hian, sawrkarin Bungkawn a\anga chhim lama kawngpui phei zel hi 'Nehru Road' tiin a vuah ta a ni.

(2) ZAIAWN (ZION) STREET  : Pu Thangruaia fanu Mampuii, nula zaithiam leh ngaihnobei tak a awm a, helai Vengah hian an zai ho reng reng ṭhin a. An zai lo hre ṭhin Pu Liana chuan, "He lai Veng hi Zaiawn Veng a nih hi," a ti ṭhin a. Hun a lo kal zel a, Zaiawn Veng (Zion Street) an lo ti ta a ni.

(3) JAIL VENG : Jail hmasa ber awmna a ni a, Ran Tan In (Jail) awmna hmasa ber Veng a ni bawk a; chu vangin, Jail Veng tih a la ni ta reng a ni.

(4) PIPU TLANG  : Tuna Hospital Quarter Tlang, Pu R. Tlangkunga te awmna bawr hi a ni a; tunah chuan Hospital Quarter Veng a ni ta ber mai.

(5) CANTEEN KUAL  : 1st Assam Rifles Canteen awmna Veng a nih avangin, "Canteen Kual," tih a ni ta fo a ni.

(6) NEW MARKET  : Bazar-pui awmna Veng hi Bazar hmun atana 1965-ah tih thar a nih avangin, heng lai bawr vel hi "New Market" Veng anga sawi a ni ta a ni.

(7) DAWRPUI WEST  : 1989 khan, Y.M.A-in Dawrpui Veng tlak lam- Bungkawn leh Hospital liam hi 'Dawrpui West' tiin a vuah ta a ni.

Source : 'Dawrpui Veng Chanchin' published by Dawrpui YMA 1991
Ziaktute - Pu Bualhranga & PC Lianhmingthanga