Aizawlah Veng tin maiah Y.M.A. Branch a lo ding ta a, Mission Vengah te pawh a lo ding ta hial a, Dawrpui Veng chauh chu Aizawla Y.M.A. dinlohna Veng a lo ni ta mai a. Tlawmngaihna thu-ah leh chet dan kawng tinrengah, ṭhalai tam berin Dawrpui Ṭhalai Pawl tih ngawt chu an tawngkhawp ta lo deuh va.
Dawrpui Sikula Vantlang Inkhawm chuan lungrual takin Y.M.A. din thu a lo pass ve ta a ni. Tichuan, Zoram puma Tlawmngai Pawl lian ber, ṭhalai infawkkhawmna Y.M.A. zawm ve lova awm reng mai chu hnufualna chi khat ni-a ngaiin, Young Mizo Association, Dawrpui Branch chu 1988 October ni 4 khan din a lo ni ta a ni.
1940-a Dawrpuia Y.L.A. lo ding, 1947-a tawp ta chu, 1988-ah Y.M.A-in din a ni leh ta a ni.
Hemi kuma Central Y.M.A. Khawmpui, Serchhipah pawh Dawrpui Branch chuan palai a tir ve nghal a ni. Dawrpui Y.M.A. Branch kaihruai hmasa bertute chu heng mite hi an ni :-
President : Tv. Michael Lalthanmawia
Vice-President : Tv. K. Rothanga
Secretary : Tv. Lalfakzuala
Asstt. Secy. : NI. Rebecca (Re-i)
Treasurer : Pu John Rotluangliana
Fin. Secy. : Tv. Zoliana
Chutia Aizawla Veng pui ber, Y.M.A. a la din ngai lohna Venga Y.M.A. lo ding ve ta chu, mite bengkhawn leh ngaihven a hlawh hle a ni. Ṭhalai leh Veng mipuite pawh an phur tharin, kawng tinrengah hmasawnna hmuh theihin a awm a ni. Chhiatni ṭhatni, khawhar lenpui leh tlaivar ngai leh thlanlaih nikhuaahte, nasa taka phurtharna leh hmasawnna a lo awm leh ta a ni.
Y.M.A-ah hian ṭhalai, nula leh tlangvalte an phur hle a, Veng chhung thenfai leh tihthianghlimna kawngah Village Council te, Kohhran te, MHIP leh Zoram Upa Pawl te nen ṭang tlangin, nasa takin hma an la mek a ni. Lengkhawmzai thiam lo ber Veng ni-a sawi ṭhin chu, Aizawl khawpui Y.M.A. Branch hrang hrang zinga a thiam berte zingah thlan a lo ni thei ta hial a ni.
Source : Dawrpui Veng Chanchin published by Dawrpui YMA 1991
Ziaktute - Pu Bualhranga & PC Lianhmingthanga
