DAWRPUI YMA KUM 20 A TLING TA

Kum 1988 a din YMA Dawrpui Branch chu kum 20 a tling ve ta a. Min hruaitu leh awmpuitu hruaitu tha tak tak min pe a, member thahnemngai vawiin thlenga min petu Pathian hnenah lawmthu awm rawh se. He kum 20 chhung hian YMA Dawrpui Branch hian thil tawn tam tak a nei a, lawmna lamte, lawm lohna lamte pawh a awm ang a. Nasa taka hma kan sawn laiin tanlakna thar tur pawh tam tak kan nei bawk ngei ang.

LO INDIN DAN : He Dawrpui YMA lo pianchhuahna tur hian hma nasa taka lak ani a, Dawrpui Thalai Pawl (DTP) ngelnghet tak a awm a, YMA-in a tih tur ang zawng zawng chu DTP hian a ti vek a, khawtlang inlungrualna pawh a tha a khawtlang min khairual tha em em a ni. Hun lo inher danglam zelah Zorama pawl lian leh huvang ngah YMA din ve ngei duhna alo awm a, a chang chuan boruak pawh a rih viau hunte pawh a awm a. Tichuan vantlang mipui kalkhawmten lungrual takin October ni 4, 1988 khan YMA Dawrpui Branch chu din alo ni ve ta a ni.

Hruaitu hmasa berte chu :-
President - Michael Thanmawia
Vice President - K. Rothanga
Secretary - F. Lalfakzuala
Asst. Secretary - Rebecca
Treasurer - John Rotluangliana
Fin. Secy. - R. Zoliana

Hun hmasa lam kan sawi seng lo vang a, a kum 20-na kan thlen kum tak hian lawmna nasa tak a tawng chho mek a - 2007 chhunga Branch YMA Chanchinbu tha thlanah Top 10-ah (8-na) a hauh pha a, Branch YMA Zaipawl Intihsiakah Top 10 a hauh chho leh bawk a. YMA Member-te zing atangin Village Level Badminton Championship-ah Team Champion an hauh bawk a, kan senior Pu Zadingluaia'n 'Tlawmngai Chawimawina' a dawng leh bawk a. Heng zawng zawng hi a YMA a, a hlu a, a zahawm a ni. A kum 20-na kuma thleng awm reng pawh a ni e.

A hmaa kan sawi tawh ang khan Pathianin khaw tha leh boruak tha min pe a, kum 20 lawmna chu Inrinni nileng leh zan khan Dawrpui Skul Hall-ah leh a Compound-ah Intihhlimna chi hrang hrang leh Programme hlimawm taka hman a ni a. Member-te an kal tha a, tlai lam ruai buatsaih pawh chaw chhum belh leh ngai khawpa tamin Vengchhung mipuite kan kalkhawm a (Dar 5:30-ah gate khar tawp ani). Zan lamah programme pawimawh tak hman bawk ani.