YMA CONFERENCE VAWI 63-NA A TIAK TA

YMA General Conference vawi 63-na Serchhip-a neih chu October 23, 2008 zan khan a tiak ta. Tun tum Conference-ah hian Palai riak lut in report zat chu 4400 vel bawr an ni a, heng bakah hian lehlanga kal mi engemaw zat an awm bawk. Conference boruak a nuam in a thlengtu Serchhip hian an thleng hneh em em a, an inbuatsaihna pawh sawisel tur a awm lo, an fakawm hle.


Kumin Conference-ah hian kan branch atang pawhin kan kal thahnem viau a, a lawmawm khawp mai. Kan Branch aiawha kalte hi an vaiin mi 41 an ni a, mahni hna tul avanga riaklut theilo mi 25 an awm a, mi 16 te chu Conference hun chhung zawngin an awm tluan zak a ni. Kan sawi hmaih hauh loh tur chu Zaipawl tha tak an nei thei kha a ni, kan zaipawl member-te an fakawm tak zet, an tang a, zai pawh an zai tha hle reng a ni. Kan Branch aiawha kal te hi mipa 22 leh hmeichhia 19 an ni.

October 22, 2008 (Nilaini) dar 10:30 AM khan Rorel Inkhawm neih a ni a, Rorel Palaite hi mi 759 an ni. Kum dang anglo takin Agenda hi YMA khawih 2 leh Sorkar khawih 2 chauh a awm a, heng te hi a vaiin rorel palai ten ban pharin lungrual takin an pawm.
1. Mizo nun zemawi uar zawka inzirtir ni se.
2. YMA DANPUI (YMA Constitution)-a siam that ngaite ennawn ni rawh se.
3. Mizoram sorkar hna lak thinah hian a tling leh tlakte chauh lak a nih theih nan Sorkar-ah thlen ni rawh se.
4. Saitluk ramah Airport siam a nih thuai theih nan Mizoram Sorkarah ngen ni rawh se.

Tin, Central YMA Budget 2008-2009 atan Rs. 83,97,400/- Pu Vanlalrema Rokhum, Treasurer CYMA in a pharh chu lungrual taka pawm a ni. Kum 2009 General Conference thlen dil pali zingah Chalfilh Group YMA in thlengin DARLAWN-ah neih tura thlan a ni bawk.