'Leleleeleh! Tu rawng nge in bawl dawn?'

[ 30 March, 2009 | 4 comments ]

Inrinni zan (ie. 28th March, 2009) dar 8:30 khan Dawrpui Branch YMA, Vanapa Section buatsaihin Zephyr Drama Club ten Dawrpui Skul kawtah Show ropui tak an nei a.
Drama mai bakah vengchhung zaithiam Lungmuana leh Laldinpuii ten thiam takin mipui an awi a, Zoram pum huap pawha lam thiam tak takten an thiamzia mipui hmuhah an entir a, mipui an tihlim tlang hle a, vengchhung leh vengpawn atangte in hluttu an kal thahnem hle a ni.

Zephyr Drama Club hian an drama thupuiah 'Leleleeleh! Tu rawng nge in bawl dawn?' tih thupui hmangin entir tha tak nei chung siin mipui an chawk hlim hle a.

Kohhrana rawngbawltu kan nihna hi Biak In leh a velah chuah nilovin kan hnathawhnaah, kan kalna apiangah, khawiah pawh kan lantir tur ani' tiin mipuite min zirtir ani.

He show hi mipuiin an hlut hle a, skul kawt zawng zawng chu mipuiin an khat a. Ticket leitu leh sponsored-tu zawng zawng chungah Organised-tuten lawmthu an sawi tak meuh a ni.

Tv. Laldinthara (K-18) kan chan ta

[ 29 March, 2009 | 1 comments ]

Laldinthara hi Dengthanzauva leh Lalthanpari te fa sawm zinga naupang ber niin Sept. 14, 1990 khan a lo piang a, Manipur-ah seilianin HSLC pawh Manipurah hian a pass a, Class-XII a zir tan dawn mek a ni. Kum 2007 khan Dinthar veng, Aizawl atangin Dawrpui ah an lo pem chhovin, Pu Sanghnuna (L) Building, Bazar Bungkawn-ah an cheng mek a ni.

Mizia : A mah hi mi zakzum leh tawng tam lo tak a ni a, mi pawisawi ngai lo leh aia upate zah thiam tak a ni bawk. Tin, amah hi YMA lamah pawh a theih ang tawk tawkin a inhmang ve thin a, kumin Chapchar Kut pawh khan YMA Dawrpui Branch aiawha Hnamlam entirtute zingah a tel ve a ni.
A nat dan : A hriselna a that viau laiin hun engemaw ti lai khan pimpui Ulcer a nei a, Doctor ten damdawi an chawhte eiin, a dam ve leh mai zel a, mut pui tham em em in a na ngai lo. March 23, 2009 khan a pim nat thu a sawi tan a, amah leh a chhungte pawhin ngaihthat lohna em em pawh an neih loh laiin, a pumna hi a dam hlei thei ta lova, March 27, 2009 (Zirtawpni) khan Presbyterian Hospital, Durtlangah Admit a ni a, Doctor ten ngun taka enin a tuk Inrinnia Endoscope leh Ultrasound te ti tura an buatsaih laiin, hemi ni hi chawlh a lo nih leh si avangin an ti ta lova, hemi zan hian a pumna chu a zual ta em em a, Doctor leh Nurse ten theihtawp an chhuah chung pawhin March 29 (Pathianni) zing lam dar 4:20 khan min lo kalsan ta ani.

HSLC pass tharte

| 2 comments ]

Kan vengchhung atanga pass tharte kan hriat theih chin (Hmaih palh ala awm nual ang)
TAITESENA SECTION
1. Vanlalthlamuanpuii d/o Dr S.R Zonunthari II Div.
2. Lalmalsawmi d/o K.Kapvela II Div.
3. Marina Lalremruati d/o H.T Lalzidinga I Div. (L in Maths, English, I.T)
4. Samuel R.Zoremsanga s/o R.Biakmawia I Div.
5. Lalrinchhani d/o Lalhlimpuia Khiangte III Div.

VANAPA SECTION
1. Jerry Lallawmkima s/o C.L Thanga (L) III Div.
2. Lalruatmawia s/o Vanlalhriata II Div.
3. Tom K.Lalrohlua s/o Sangrozama II Div.
4. Esther Vanlalngaihawmi d/o R.Lalramliana (Ramtea) II Div
5. Lalchhandama c/o R. Lalramliana (Ramtea) III Div.

CHAWNGBAWLA SECTION
1. Lalhruaipui Fanai d/o F. Lalnunzira II Div.
2. R. Lalhriatpuii c/o Lalthanzami III Div.
3. Zirsangzeli d/o Ramdinliana (L) III Div.
4. Varropuii d/o Vanlalzawni III Div.
5. Vanlalnunfeli d/o R. S. Thanga I Div. (L in Eng)
6. Lalawmpuii c/o Chhawla III Div.
7. Lalnunthari d/o Lalrinmawia III Div.
8. Lalsangzela s/o Biakchungnunga II Div.
9. Lalchhanchhuaha c/o Micheal Rawna II Div.
10. Stephen L. Hmar s/o Zarzoliana II Div.
11. Lalhminghluni d/o Dinga I Div.
12. Gospel Lalrindika s/o Vaichunga III Div.
13. Vanlalremthangi d/o Vanlalchungnunga I Div.
14. Eric V.L. Ngaihsaka s/o Maj. Saitluanga II Div.
15. Jonathan Lalchhuanawma s/o Jenny Vanlalruati (L) I Div.

Tuna hriat theih chinah Dawrpui vengchhunga Sikul awmte atangin -
Modern English School - Appeared 38 - 99.9 % pass
Centenary School, Dawrpui Church - Appeared 31 - 100% pass

NUPA INTHEN CHUNGCHANG

| 1 comments ]

1. Ma/ Mak : Mipa in a nupui duh lova a then hi Ma/Mak a ni.

2. Sum chhuah : Hmeichhia in a pasal a duh lohva a ma thu-a a then chuan Sum chhuah a ni.

3. Sum laitan : Ngam leh ngama nupa inthen hi Sum laitan a ni.

4. Peksa chang : Man pek tawh zawng zawng chhuak leh tawh lo tura inthenna hi Peksa chang a ni.

5. Kawngka sula mak : Nupui pawm lai neiin hmeichhe dang nupui atan a hruai luh emaw nupui thlakna tura hualsa nei emaw a nupui pawmlai a thlak chuan Kawngka sula mak a ni.

6. Uire : Pasal/ Nupui nei laiin mipa/ hmeichhia dang ngai sela.

7.Pasal awm loh laia chhuak :
(1) Hmeichhia a pasal awm loh hlan a mahni thu-a chhuak chu tlan a ni, a pasal lo hawn-a a kohva a haw duh loh chuan Sum chhuah a ni. A pasalin a koh duh loh chuan a ma ani.
(2) Hmeichhia a pasal awm loh hlana a pasala chhungte nen inngeih loh vanga a pasal chhungte chhuah tir chu a pasal lo haw leh hnu-ah koh tur ani. A pasalin a koh duh loh chuan a ma ani. Koha a haw duh loh chuan Sum chhuah a ni. A pasal lo haw hma in a tu zawk emaw lo thi sela mahni thua chhuak chu Sum chhuah a ni. Pasal chhungte chhuah tir chu Mak a ni.

Tualchhung News (29 March, 2009)

| 0 comments ]

Boral : Pi Rodingpuii (53) Mission Veng chu Lungna avangin March 23, 2009 (Thawhtanni) khan a boral a, a tukah vuiliam a ni. Amah hi Pi Ronguri leh Pu Rochungnunga (YMA Ex. Committee Member) te unaunu a ni.

Damlo : Pu C. Lalbuanga, Bazar Bungkawn (Ch. Sect) chu CARE Hospital-ah BP sang avanga hun engemaw chen enkawl chu dam takin a chhuak leh ta.
* Grace Lalpekhlui d/o Pu H. Dingluaia (Branch YMA Fin. Secy.) fanu chu Downtown Hospital, Guwahati-ah enkawl mek a ni.
* Kar hmasa lama kan rawn tarlan Pi Thanchhungi (Pi Khawngaihi Nu) chuan that lam a pan leh ta deuh.
* Pu V.L. Ruala, Jail Veng (T. Sect) chu Durtlang Hospital-ah hunrei tak enkawl a ni ta a, that lam a pan zel niin kan lo hria.

Puan Pe : Pi R. Liansanga w/o Zothanthuama (L) Jail Veng (T. Sect.) leh Pi Lalngheti w/o R. Rengchhunga(L) Bazar Bungkawn (Ch. Sect) te chhung chuan mamawh a hman atan YMA hnenah Puan thahnem tak an pe.

Central YMA Tournament

| 4 comments ]

Kan hma lawk April thla hian Central YMA chuan Mizoram pum huam YMA Branch hrang hrangte Sports Item hrang hrangah inelna a buatsaih leh dawn. Kan Branch pawh hetah hian Item hrang hrangah tel ve tuma hma lak mek a ni.
Item hrang hranga kan Branch aiawh turte chu hetiang hi a ni e.
100/1500/3000 Metre Race
Lalsangbera, Lalhmangaihzuala(Duata), Monty Malsawmzuali, Lalhmangaihtluangi.
Volley Ball (Women)
Monty Malsawmzuali, Hmangaihtluangi, Lalmuanpuii, Lalzarzovi, Lalnunsangi, Lalpekthangi, Lalhmangaihzuali, Zampuii, Zarzoliani.
Manager/ Coach : R. Zoliana,Lalremruata, Ziakkima Pachuau
Cricket Team
Jonathan Zomawia, P.C Lalrinchhana, Lalhmangaiha, Henry Lallawmsanga, Lalremruata (Mama), Sangngaihthanga, Lalnuntluanga (Boya), Lalruatfela (Afela), Michael Zomuansanga, David Zothanchhunga, Lalremliana(Terema), William, Zuala, Lalrinchhana, Lalrinawma Royte (Marina)
Team Manager : Lalrinsanga Pachuau

Graveyard of Dawrpui

| 0 comments ]

Dawrpui veng Thlanmual hi kum 1910 atanga hman tan niin vawiin thleng hian khaw 5 laiin kan inhmantawm mek a ni. Kan mi hmasa, kan pi leh pu, kan nu leh pa, kan u leh nau, kan fa kan hmangaih kaltate zalna hmun a nih avangin a hlu in kan veng tan ROHLU a tling a. Chuvang chuan kan humhalh that pawh a ngai hle a ni. Hetih mêk lai hian tunah hian a hmunin min zo ta lo hle a, Dawrpui Thlanmual hi a khat tep ta mai! Chuvangin, thlanmual thar ngaihtuah a ngai ta hle a, muangchan hun a ni ta lova, ngaihtuah zung zung a ngai ta a ni.

YMA kaihhruainain Thlanmual Thar Ngaihtuahtu Committee-te hial din a ni a. Thlanmual thar ngaihtuah hian kan hruaitute kum hmasa lam atang tawh khan an vir buai char char tawh a. Hmalam hun thuitak thlir chungin Thlanmual thar hi loh theih loh a kan neih a ngai ta a ni. Veng tam takin tunah hian Thlanmual Thar an nei tawh a, Aizawl khawpui pawnah ani tlangpui. Keini Dawrpui Veng pawh hi tuna kan Thlanmual hi kum tam kan hmang tawh dawn lova, a rang lama chet kan lak leh phur taka nakin zela kan khawtlang tana thil tul leh pawimawh a nih hriaa kan thawhho leh kan tanrual a ngai hle dawn a ni.

Vengchhung mipuite hemi atan hian ngaihtuahna senga, sum leh pai lamahte pawh kan tan tlan hle a ngai dawn a. Tunlaiah Ram a hlu zel a, hmanni lawka Rs 1000/- a kan lei theih kha vawiin ah chuan Rs. 10,000 a ni chho ta zel mai! A ngaihtuahtu lam pawhin chak takin hma an la zel ang a, Ram lei thuai thuai hi a tulin a tul ta a ni. Vengchhung in tinah THAWHLAWM IP siam a Thlanmual thar leina hi tuak ala ngai dawn a. Keinin kan hmang hman lo a nih pawhin kan tu kan faten an la mamawh tho tho dawn tih hria a, kan neih sum kan sen tlan pawh a ngai dawn a ni. Chhungkaw tin ten rilru ilo seng lawk ila, kan mamawh chhungkaw tinin kan hman ngei ngei tur a nih hriat tlan a tha khawp mai.

Chhiatni Fund kan khawn thin a, chu chuan chhungkaw tinte zangkhai takin pawisa tlemte in kan insawngbawl tlang mek a ni. Chumi hre reng chuan chhungkaw tinte lo inbuatsaih lawk ang u.

Tui In

| 2 comments ]

- Dr. Thangchungnunga, MBBS (Ortho)
Doctor-te hian tui in tam tur kan han ti ngawt hi mi tam zawk chuan an lo hrethiam lo a lo ni. Tui kan tih hian, Water ringawt ni lovin Liquid (Tuiril lam chi) zawng zawng a kawk vek a ni. Tui in tam hi taksa venna tha ber a nih laiin, a tui in dan tur ber chu kan hre fumfe leh si lo.

Kan chaw ei zing, chhun, tlai leh zanah hian tui lampang litre 3 ei tel tura ngaih kan ni a, a bak litre 2 hi chu pawn lam atanga ei/in tel tur a ni. Chuvangin, tui in tam i duh chuan Thingpui sen hang a tam thei ang ber in tum la, hei hian pumpui Ulcer a veng a, Cancer a veng an ti bawk a, pumpui na, zinga thawh veleh a pum ti deuh nghulh te hi thingpui sen hang han in la a dam hiai hiai mai ang.

Chutiangtho chuan chaw ei laite hian, chaw chawm tuite, antui, Dal-te hi fian a hawp mai mai lova No-a thlit a in hian in tam a awl ber a, len velnaah pawh theitui, tunlai phei chuan ORS tui deuh deuhin an siam tawh a, in teuh teuh mai tur. I taksa-ah tui a tam tawk em tih i hriat duh chuan i zun en la a fim var har tur a ni. Hetiang a awm reng theih nan hian eng tui chi pawh in tam tur a ni.

Kawthalo len laite a nih lem loh chuan tui pangngai filter mai hi taksain a ngeih ber a, chhum so kher kher a tul lem lo. Tlangau pakhat pawhin, ‘Tunlaiin kawthalo a leng a, tui chhuanso chauh in tur’ tiin a au va, a bula mi chuan, "A va harsa dawn tiah tiah ve, dah vawh phal a ni em", a lo ti a!

VC News (29 March,2009)

| 0 comments ]

Dawrpui Village Council 26th March, '09-a thukhawm chuan VC, NGO leh veng parawn kalkhawmin veng tana hma lakna tur kawng hrang hrang an sawihote chu thlir nawnin hmalak nghal mai theih turte thliarin bawhzui nghal turte a chhawpchhuak a. Hemi bakah thurel pawimawh tak tak zingah veng mipuite hriat tur awm deuh deuh a hnuaiah hian tarlan a ni.
1. Gas Card : Dawrpui veng chhung miten veng chhunga Gas sem lakna atan Card a siam a, chhungkaw khat tan Card pakhat zel tur a ni. Card hi Rs. 10/- tlan tur a ni ang.
31st March 09 (Thawhlehni) leh 1st April 09 (Nilaini) 11:00 Am - 2:00 Pm chhungin VC House, Upper Bazar-ah Card hi lak theih a ni ang. Card la turte chuan Dawrpui Family Ration Card leh Gas Consumer Card ken tur a ni.

2. Inluah chungchang : Dawrpui venga pemlut tur reng rengin Pem Lehkha fel tak leh rintlak a nei ngei tur a ni. Veng chhunga a pemluh hma ngeiin VC-ah phalna a la hmasa tur a ni. Pem luh hnua pem lehkha thehluh hi a dik lova, an lo luh hma ngeiin phalna an la hmasa tur a ni. Hei hi veng mipuite pawhin hria ila, In luah tur neite pawhin luah tir hma ngeiin VC-ah tihfel hmasak phawt tur a ni.

3. VC Member Bial insem dan :
Dawrpui South leh Dawrpui West - Pu Zosangzuala & Pu KL. Zamvela
Bara Bazar leh Upper Bazar - Pu Malthantluanga
New Market - Pu H. Malsawma
Medical Qtr, Jail Veng leh Thana Tlang - Dr. Chawnglungmuana

4. Vengchhung Street Light : Buaipui tur bik atan Pu Rothuamliana ruat a ni a, tlawmngaia lo puibawm turin Pu R. Zaichhawnthanga leh Pu Lalrinmawia (RMA) te ruat an ni

Kan VC ten chak takin vengchhung hmasawnna atan hma an la zel a, tunlai hian Electric Deptt.-te nena tangkawpin Street Light siam hna an thawk mek a, Vengchhung kawtthler a eng nuam ta hle.

Rawtna : Dawrpui West street light hun rei tak atanga thim tawh chu mipui ten eng thuai thuai se an duh hle a, Jail veng - Thana leh Prison Office inkara point khat dah belh hi mipui tana tangkai tak tur a ni. Dawrpui Biak In kawt hi hunrei tak atangin a thim tawh a, tunlai a eng tha deuh chi hi dah atan mipui in an duh hle. Bazar Bungkawn to Zodin Sqr. phei hi a thim em em reng mai a, tun aia eng tha lehzual ni thei reng se, Aizawl khawpui timawitu a ni si a.

Ruahtui alo tla tan a, tuiluan kawr inhnawh a tam hle a, hei hi mipuite thiam loh a nihna chin a awm. Ruahtui tam hma a, haifai theih nise, nakina kan buai loh nan. Tunlai hian Civil Hospital peng leh Hustler dawr kawt tuichhe luankawr block reng mai pawh hi VC-te en zui atan rawtna kan siam e.

Isaac weds Remlalruati

[ 27 March, 2009 | 5 comments ]

24th March, 2009 (Thawhlehni) Zing dar 7 khan Dawrpui Presbyterian Kohhran Hall-ah Isaac Lalrinawma s/o R. Zachhawna, New Market leh Remlalruati (Teii) Mission Vengthlang te chuan 'Tiam tlat e' an ti ta.

Jenny Vanlalruati kan chan ta

[ 25 March, 2009 | 3 comments ]

Jenny Vanlalruati (Bungkawn, Pu Shillonga Building) hi Pu R. Rengchhunga (L) leh Pi Lalngheti te fa paruk zinga naupang ber niin 1st September 1971 khan Zunehmoto, Nagaland-ah a lo piang a. A pianpui unaute chu :
1] Lalmalsawma H/o Saidingliani, Saron Veng
2] Lalbiakdiki W/o Lalrinawma, Ramthar Veng
3] Lalrintluangi W/o R. Zomawia, Dawrpui
4] Lalthlengliani W/o Lalremruata, Chanmari
5] Vanlalzawna (L) Dawrpui
Kum 1990-ah pasal neiin fapa Jonathan Lalchhuanawma leh fanu Marilyn Lalawmpuii a nei a. A pasal nen an inthen hnuin a fate hi a nu hovin vawiin ni thlengin a tulpui ta a ni.

Amah hi mi hlim thei leh harhvang tha tak a ni thin a. Amaherawhchu, hun engemaw ti lai atang khan a taksa-ah insawiselna a nei tan a, Doctor-te rawnin 24th March '09-ah Greenwood Hospital-a check up tura rawn a ni a, hemi ni a, a va in entir chu operation lo ngaiin tluang taka zai a ni a, hemi an zai zo hi a rawn harh chhuak zo ta lo a ni.

Live! After Death (Ahmachhuana Tribute)

[ 23 March, 2009 | 8 comments ]

Ahmachhuana 3rd December, 2008-a boralta hriat rengna atana Dawrpui Venga a thiante SILLY VITZ-in an buatsaih Live! After Death Tribute Concert chu 21 March, 2009 (Inrinni) zan khan Dawrpui School kawtah hlawhtling taka buatsaih a ni a. Vengchhung leh veng pawn atangin hluttu tamtak an kalkhawm.
Tunlaia zaithiam hrang hrang an zai a, Pu Lalbiakdika'n amah hriatrengna atan hunserh reilote a hmang a, Pi Vanlalruati (Ahmachhuana nu) 'n thu tawi te sawiin a fapa heti taka a thianten an lo hmangaih leh ticket lo leia lo sponsor-tute zawng zawng chungah lawmthu a sawi bawk ani.






Camera : RCa

Pu Lalramthanga (Patea) kan then ta

[ 22 March, 2009 | 3 comments ]

20 March, 2009 (Zirtawp) zan dar 11:55 khan Pu Lalramthanga Hlawndo (Patea) Kum 38 h/o Ngurthanzami (Mami) Jail Veng chu Septicimia-in a boral a, a tuk ni 21 khan Dawrpui thlanmualah vuiliam a ni. A pa hi Lalchungnunga (Pa Chunga ti a hriat lar) niin, Madanryting, Shillong-ah an nupa leh Patea farnu naupang ber nen an la khawsa a. Patea te unau hi 5 niin amah hi a upa ber dawt ani.

Mizia : Miziaah chuan mi zakzum, inngaitlawm, thuawih, ngawichawi, thian ngaina leh mi pawisawi lo tak a ni a. Nu leh pa leh unaute hmangaih leh duat thiam tak niin mahni in thlahlel leh ngaina mi tak a ni. A naupan lai atang tawha hrisello anih avangin chhungte ngaihven leh duat rawn pawh a hlawh hle a ni.

Hnathawhna lam : Amah hi Sub-Inspector (SI) niin PTC-a Law Instructor hna chelh mek a ni a. A hnathawhnaah hian hotute thuawih leh zah thiam tak niin a mawhphurhna reng reng chu tha taka hlenchhuah duh mi a ni a. A service chhung hian heng hmun hrang hrang- Saiha, Lengpui Airport, Champhai, Khawzawl leh Police Training Centre (PTC), Lungverh-ah te a awm kual a, a thih ni thlengin PTC-ah hian a thawk a ni.

A nupui : R.Ngurthanzami (Mami) d/o R.Zothanthuama (L), Dawrpui Jail Veng nen ni 2.4.2004 khan Presbyterian Kohhran Biak In, Madanryting, Shillong-ah an innei a, fa la nei lovin tuna an chennaah hian an nupain an khawsa dun a ni.

Thlanmual Thar Kan Ngaihtuah A Ngai

| 5 comments ]

Kan hriat theuh angin kan veng thlanmual hi vengdang engemaw zatin min tawmpui a, reiloteah a khat tawh mai dawn! Thlanmual thar tur kan ngaihtuah thuai a ngai ta. YMA chuan a thar tur hi a lo buaipui nual tawh a, nimahsela sum engmah a la awmloh avangin a la ti puitling thei ta rihlo a ni. Tunah erawh chuan loh theih lohnain min nang ta a, kumin chhung ngeia a hmun kan sualchhuah a lo tul ta a ni.
Hmun/Ram man a to tawhin, sum awmsa engmah a awmlo a, kan thawhkhawm atanga ngaituah chauh tur anih avangin chhungtinte kan tan tlan a ngai dawn a ni. Hemi atan lp hran siamin, kumkhat (April 2009 - March 2010) chhung thlatina thawh tura ruahman a ni dawn a, chhungtinte hnenah ngenna leh thlatina thawh theihzat tur in zawhna pawh a lo thleng thuai dawn, hetah hian chhungkaw tinten ngaituahna i lo hmang lâwk ang u, Kan inphal zau erawh a ngai dawn hle tih i hria ang u.

Tualchhung News (22 March,2009)

| 0 comments ]

Damlo : Pi. Thanchhungi M/O Pi. Khawngaihi,New Market chu tunlai hian a tha vak lo.
* Pu C. Lalbuanga, Chawngbawla Section chu Care Hospital-ah BP sang avangin enkawl mek a ni.
* 15 March (Sunday) khan Branch O.B-te leh Vanapa Section O.B-ten Dawrpui Duty nia in chhal vengdang tlangvalte zilhhauin tunhnuah chuan ti tawhlo tura in tiamtir an nih hnuin haw tir an ni.
* Branch YMA Treasurer Pu H. Dingluaia fanu Grace Lalpekhlui chu damlo, khawsik pumna avangin Guwahati-ah enkawl mek a ni.
Census : Mizo hnahthlak chin/Burma unaute Census neih tur leh Mizorama Census 2011 ami chhiarpui neihna turah 17 March (Thawhlehni) zan khan Pu H.Thanmawiate In Church Square-ah Section hrang hrang hruaituten inhrilhfiahna hun an hmang.
Hun reiloteah he chhiarpui hi Section hruaitu ten vengchhung intinah an rawn nei dawn.
Meeting : 19th March (Ningani) zan khan Thlanmual thar ngaihtuahtu Committee Meeting Pu Rochungnungate inah neih a ni a, Treasurer atan Pi Tlangthankhumi W/o Dr. C. Zarzoliana chu an ruat.
Ration : Tunlaiin kan vengah Ration Buhfai sem a khat hle a, a chhan chu Retailer ding lai hun a tawp tawh rih avangin tunah hian Sorkar lamin a thar tur a la ruat fel lova, chuvangin sem theih rih a ni lo a ni. Sorkar lam nghah mek a ni a, tunah hian kan hma lawkah MP inthlan a awm dawn avangin Election Code of Conduct-in a la dang rih a ni. A rang lama kan hmuh theih ngei kan beisei. Vengchhung mipuiten i hrethiam hram hram rih ang u.

Tui tla

| 0 comments ]

- Dr. Thangchungnunga, MBBS (Ortho)
Khua alo thal tan leh ta, tui a harsa a, Blanket leh thil dang thawmhnaw lum dahbo rih ngai tawh si, suk faia dah duhin KTP/YMA -te leh midang ten Tlawng luiah an zu su a, a then chuan Serlui lamte pawh an pan a. A that em em rualin hruaitu/hotu deuh awm thei se a duhawm hle. Chutih rualin, mau lian vak lo sei tak sah lawk a tha. Tui tla palh an awmin va man mai chi a ni lova, a lo man tur mau tlawn kha i pe thei dawn a ni. Hmanni lawkah pawh Blanket su an chetsual leh tawh kha. Chuvangin a kal reng reng hi an insukna bul velah mau tlawn sei tawk pahnih khat tal an inring sa tur a ni. Hetia kan tih chuan tui tlate pawh kan tlem phah deuh mahna.

Khuang Stand Pe

[ 19 March, 2009 | 2 comments ]

17th March, 2009 (Thawhlehni) zan khan Pi Lalrinawmi te chhungkua (Church Square) chuan an pa Pu Lalrintluanga chaw kawng cancer avanga February ni 11, 2009-a boralta hriatreng nan Branch YMA hnenah khuang stand tha tak mai an pe.

CHAPCHAR KUT 2009 A ROPUI E

[ 15 March, 2009 | 11 comments ]

Kumin 2009 Chapchar Kut chu 13th March, '09 (Zirtawpni) khan Aizawl Sipai Lammual-ah ropui taka hman a ni. Hetah hian Mizo hnam lam chi hrang hrang bakah mizo zaithiam tak tak te an zai bawk a. Tin, Costume Parade te, Khuangchawi te, Short Play Drama hmuhnawm tak entir a ni bawk a, mipui kalkhawmte mit leh beng a tlai hle.

Heng kan tarlan bakah hian mipui kalkhawm zawng zawngte tan Chai hla Lalvunga Zai chu sa rualin Lammual khat tlatin mipuite an in kaihkuah kual a, an han su dup dup mai chu a hmuhnawm tham hle mai.


He Chapchar Kut-ah hian kan Branch pawhin hnam lam chi hnih Cheraw leh Sarlamkai entir tute zingah kan tel ve a, Participation Prize Rs. 4,000/- kan dawng bawk. Kan Branch atang hian member lam thei mi 53 bakah a chhimtu mi engemawzat te nen mi 100 bawr vel kan tel thei a, a lawmawm hle mai. Kum dang zawng aiin member-te pawh kan phura hetiang anga tam hi kum dangah kan la tel ngai lova thil chhinchhiah tlak tak a ni awm e.


Pages (16)123 Next