YMA Dawrpui Branch Inchhiarna

Kum 2009 chhung atana YMA Dawrpui Branch dinhmun chu tunah hian kan hre thei ta a. Kumin atan hian membership fee mai bakah nakin zela kan record atana chhungkaw zat pawh chhiar tel a ni a. Heta Dawrpui a lan dan chuan Dawrpui Vengchhungah chhungkaw 611 kan awm a, YMA member zawng zawng 1699 kan awm mek a ni. Heti zat YMA member kan la awm thei hi kan vannei a, a lawmawm em em a ni. Kan thawhho that phawt chuan Dawrpui vengah YMA a mualpho ngai lo ang. Amaherawhchu, kan tanho that loh erawh chuan heti zat YMA member awmna vengah hian YMA tih hian awmzia a nei lo thei tih pawh kan hriat a tha awm e.

YMA hi member tama innghat ani lem lova, mi inpe leh taima, teirei peih mi chiah a mamawh. Chu chu YMA member-a inziaklut te hian kan hriat theuh a tha hle. Member tam dul si, khawhar in kal ngailo kan tam chuan awmzia a nei lova, Mipa 847 kan awm a, thlan lai kan tlem viau chuan tunge mualpho ang? Hmeichhia 792 kan awm mek lai hian thlanlai thingpui pe tur nula kan inzawng leh ruai thin ang em? Mitthi in/khawhar inah vengdang nula in Thingpui an sem leh mai thin chuan tumah an mualpho lovang a, Dawrpui YMA a mualpho dawn a ni.

Chuvangin hruaitu kan thlang a, duh taka kan thlante hnungzui hi member-te mawh a ni a. Kan thlang sauh sauh a, an hnung kan zui leh peih silo a nih chuan kan nihna tur kan nilo tihna a ni. Kumthar hun kan hmang chho zel a, member-te tan la thar zel ila, kan tih ngai lohte ti thar zel ila, kan tih mekte pawh chhunzawm zel ang u. YMA hi hausak san chi a nilo a, lehkha zir thiam san chi a nilo kan tih thin kha. Thlafam Lusunte hnemtu, tanpui ngaite tanpuitu YMA a nih hi i theihnghilh lovang u.

YMA damreng rawh se.