Thil tha zawk ching chhuak zelin

Chik takin ka ngaihtuahna hmangin ka’n inngaihtuah fim a, chuta ka thil hriatchhuah thar chu hei hi a ni. Motor kawnglai taka mihring kan han kal ta hut hut mai chauh kha thil thar a ni lo a, nidanga boruak kan hip ang lo tak mai boruak thiang kan han hip ta kha ka rilru a thil thar danglam tak chu a ni. Kan veng nu pakhat nen kan kal phei dun a, motor khu dum tak mai kan hip thin ang nilo, boruak thianghlim kak mai kan han hip chu a nuam kan tiin “hetiang ang hlir hi chu ni thei se chu kan veng pawh hi a hriselin a nuam ve deuh tur” kan ti dun mawlh mawlh a. Ka Office kal tur Zodin pela ka kal pawh chu kan veng kal pelh ka hreh phah ta hle a, a piah lawk chu khawdang daih lo awm ta ang maiin a lo ri leh vut vut mai bawk si a.

Kum hnih khat kaltaah khan vawikhat chu ka khuh reng mai a, ka hrawk a na bawk si a, Dr. Rohlua (Canteen kual Pu Hminga makpa) hi ka inentir a, ani chuan, “Bronchitis tlem i nei a nih hi, Dawrpui veng a cheng reng hi chuan in nei deuh vek ang” min ti mai a. A dik tlat bawk si a, mahse, ka ngaihtuah chian chuan a lungngaihthlak ka ti ta hle mai a. Hmundanga chenna tur kan nei chuang silova, tichuan natna pawh kan chungah lo thleng dawn se, kan sepui ruah tuar ngawt ngawt mai dawn a nih tak chu ka ti ta ringawt a.

Ka rawn sawichhuah duhna chhan tak chu, he thil duhawm tak mai - kea kal mite tan hlauh tur awm lo a Krismas bazar lungmuang taka an bazar theih leh dawrkaite tan pawha tlanchhe chunga dawrtu nilova muangchanga dawrtu an nei theite chu a hlu hlein ka hria a. Chumai nilovin a venga chengte’na boruak thianghlim Lalpan a thlawn liau liau a min pek kan han hip ve theihna hun remchang a lo ni lehzelte chu a lawmawm ka ti a. He thil buatsaihtu kan sawrkar chungah hian lawmthu ka sawi a ni.

He thil duhawm tak mai hi vawikhat mai atan ti nilovin, dan ang (tradition) ah nei ta zawk ila, a hun a lo thlen chuan kumtina tih ni mai sela. Amaherawhchu, Dawrpui leh veng dang, lirthei kal phal lohna in a huam chin rem lai laiah hian lirthei dah hi phal zawk sela, hmundang an buai lutuk loh nan tih hi ka rawt tel duh bawk a ni. Entir nan, Vaivakawn lamah te, kawngsirah motor an dah a, traffic a tawt ta lutuk si a.

India ram hmun hrang hrang, a bik takin Hill Station-ah hian bazar lun laia motor luh phallohna hi a awm fur a. Ka hriat chian ve pakhat kan sawi ve theih chu Simla khu a ni. A area zau tak chhung, a bik takin sumdawnna leh bazar velah khuan motor luh an phal lova, zalen takin ke in duh tawkin a kal ve theih a, khu khuan mi a hip mai bakah a kal tawh ten nuam an tih thu an sawi thin. Hetiang deuh hian Dawrpui atanga Zarkawt vel thleng tal hi chu tih ve theih nisela chuan a va tha lehzual dawn em!

Thil tha tih hi banglo mai nilo vin zawng chhuak thar zel zawk ila, ram nuam chu kan nei ve thuai ang le.