DAWRPUI KHAWTLANG HRUAITUTE THUCHHUAK

Dawrpui Multipurpose Centre chungchang hi chanchinbu hrang hrangah vawi tam tak, a sawisel zawng leh a fak zawngte pawhin, a lo chhuak tawh thin a. He thil hi Zoram mipuiin kan mamawh leh Zokhaw lama kan unaute tana tangkai tur a nih avangin Dawrpui khawtlang ang hian kan chhang let ngai lova. Tun tumah erawh hi chuan ‘Dawrpui Veng Pa’ inti in khawtlang lungrualna tichhe zawng leh mimal sawichhe zawnga lehkha a tih chhuah avang hian thil nih dan tlangpui leh Dawrpui khawtlang rilru tih lan tulin kan hria a ni.

Aizawl Civil Hospital hi tun dinhmun a damdawiin kan neih len ber a nih avangin Zoram hmun tin atanga damlote pan thin a ni ngei mai. Chutih rualin kan Aizawl khawpui lun lai leh tawt tawh tak a Civil Hospital tih len belh ai hian tih changtlun hi keini Dawrpui khawtlang duh dan a ni, a chhan chu Hospital in a ken tel thli bawlhlawh tin reng dawng pha chin, keini a veng neitu te bakah, chhuah lam leh tlak lam veng thenkhat te tan chuan a tawrhhlelh awm tawh a ni, mihring hriselna atana tha lo thil tam tak hi kan lo buaipui fo tawh thin a ni. Tunah hian kan Sorkarin State Referal Hospital tha tak, kawngpui nuam tak minute 20 vel lek tlanah hman mai theih turin hma a la mek a, Urban Health Centre atana enkawl mek Aizawl chhim leh Hmar, Chhak leh Thlang a awm te tih chang tlun a tum mek niin kan hria a. Hetiang a nih chuan Aizawl khawpui hmun hrang hranga awmte leh Zokhaw lam unaute tan pawh pan zung zung a awlsam ngei ang.

Chhiatrupna/Accident lian tham a lo thlen chang te hian, Hospital-a thi leh hliam buaipui chungchangah, veng neitu nihna leh Mizo tlawmngaihna dik tak nen Hospital-a thawkte tanpui hi kan tih turah kan ngai tlat a. Amaherawhchu, hetiang hun a lo thlena han chet velna remchan loh zia kan lo hmachhawn fo tawh thin avang hian hmun zawl zau (Open space) leh chawlhbuk tha tul anga hman tur kan ram hian kan mamawh tak meuh meuh a ni. Zokhaw lama ruang thawnchhuah ngai an lo awmte hian, thlahna hun fel tak siamin Dawrpui khawtlang leh Kohhran te’n neitu chan changin kan lo buaipui thin a.

Tichuan, heng harsatna kan lo hmachhawn fo thin avangin V.C. te’n vantlang inkhawm kovin Dawrpui Multipurpose Centre din chu Sorkar-ah thlen turin a lo rel ta a. He hmalakna hi a chak theih nan tiin ni 19 April, 2007 khan a bawhzuitu tur Committee pawh siam a niin kan Sorkar hmasa hnenah pawh khan kan lo thlen tawh thin a ni a. He Multipurpose Centre hi Dawrpui veng ta bil nilovin Mizoram pum anga kan chhawr tangkai tur a ni. Zokhaw lam unaute, Aizawl khawpuia chhung leh khat nei thalote phei chuan an chhawr tangkai zual ngei ang. Dawrpui khawtlang hian Civil Hospital ram sah hek leh neih hi Sorkarah kan la dil ngai lo. Phai ram damdawi In lian leh changkang zawkahte chuan Hospital chheh velah hmun zawl zau, Park nuam tak thingkung leh Pangpar etc. damlo leh enkawltute tan pawh han hawi khaw thawnna, Doctor leh Nurse thawktu buai tak takte tan pawh a chhen fak awm hmun thawveng an siam thin.

Chuvangin, Dawrpui Multipurpose Centre hi Zoram mipui leh damdawiin ngei pawhin a mamawh a nih avangin tuna kan Sorkar hian Medical Compound kil khat (Tunhmaa ‘Pipu Tlang’ tih thin)-ah chawlhbuk, park nuam tak leh hmun awl tha tak awmna tur Dawrpui Multipurpose Centre, Mizoram mipui tan siam a lo rem ti ta a. Hemi chungchang a chak tak a hma latu kan Chief Minister zahawm tak, Pu Lal Thanhawla, min Bialtu Pu Lalsawta, Minister i/c Education, Pu Lalrinliana Sailo, Minister i/c H&FW; Pu Lalthanliana, Minister i/c LAD; Pu Lalzirliana, Minister i/c Home; Pu Zodintluanga, Minister i/c UD&PA; Pu John Rotluangliana, Dy. Speaker leh kan Chief Minister thawhpui zawng zawngte chungah Dawrpui khawtlang kan lawm tak meuh meuh a, lawmthu kan sawi a ni.

Amaherawhchu, Sorkar leh khawtlang inlungrual taka ke kan pen lai a “Dawrpui Veng Pa” inti in, thil nihphung hrechiang lova, khawtlang inlungrualna tichhe zawng leh min bialtu MLA/ Minister sawichhe zawnga a rawn ziak ta mai hi tha kan ti lova, Dawrpui khawtlang chuan kan duh lo a ni. Chuvangin, he lehkhathawn ziaktu mahni hming pawh ziak lang ngam lo hi Dawrpui Veng mi-ah kan ngai lo.
Kan Sorkar hian tunah chak takin hma a la mek zel a, Dawrpui khawtlang chuan Sorkar hmalakna hi kan thlawp tlat a ni.