Thil hlui hi a hlu!

Khawvel hnam hrang hrang a bik takin hnam changkang zawkte zingah pi leh pute hun lai atanga an hnam tih dan(Culture &Tradition) leh an hnam thilhlui ngaihsanna a nasa a, an thilhluite an ngaihluin an roh em em thin.

Hnam naupang tak ni mah ila Mizote pawh hian kan pipute tih dan chhawm nun tur engemaw zat kan nei ve tho a, a chhawm nun kawngah erawh kan chaklo deuh em ni a tih theih awm e. Kan hnam nun hi sap culture-in a run a, sakhuana leh incheina lamah phei chuan kan inthlak danglam ta vek a ni berin a lang. Kan entawn sap ho hian an pi leh pute chin dan an ngaihsan tehlul nen keini erawh chuan kan veng leh khaw hming chenin kan thlak danglam ta zawt zawt mai si.

Mizo history a awmze nei thei tur mimal hming leh veng/hmun hming tam tak pawh kan thlak nasa ta em em mai. Tuitu Veng, Keltawlh Veng, Hmuia Veng leh Hmarkaianu Veng kan tih thinte kha thlak danglam lovin lo pu ta mai mai se Mizo history-ah hian awmze thui tak a nei zawk tur. Dawrpui Veng chhungah ngei pawh hmun tam tak hming chu zawi zawin thlakin a awm mek a, Dawrpui South, Upper Bazar-te hi tunhmaa awm ngai lo a ni.

Saikapthianga, Vawmkaia tihte chu a pi leh pu atangin pasaltha chhungkua an ni tih a hriat theih a, Zakhawlate chhung pawh chhungkaw awm thei, tangka za lai lo khawl thei an ni tih a lang reng. Heng hmingte hi thangtharte ngaihah chuan hming mawi ber an ni lo mai thei, amaherawhchu an hming hian kan hmanlai nun thui tak a ken tel miau avangin Mizote nunah awmzia a nei thui zawk kan ti lo thei lo ang. Heng chauh loah pawh thil hlui hian tangkaina nasa tak a nei a, thil hlui hi a hlu a ni tih chu phat rual a ni lo ang.