A tribute to Marova

- Vanhmingliana (Taua)

Tunlai chhanah ‘Tribute’ tih hi kan uar ta viau a, zaithiam mual liam ta te kan ui zui nan chuan kan hmang ngun viau a. Mahse, tun ṭumah chuan Khawtlang, Kohhran leh ram tana mi uihawm Rochungnunga (Marova) zah leh ui nan ka’n hmang ve teh ang.

Thlahtute : Mifingte chuan mi nun an zir leh an chhui hian thlahtute an ngai pawimawh hle ṭhin. A dik a, thlahtute nun ṭha leh chhia hi inthlahchhawn theih anih avangin ngaih pawimawh tur a lo ni reng a ni. 

Pu Pachhunga Hmar, mi tam zawkin kan hriat danin ‘Pachhung Hausaa’ kha a pu a ni a. Pu Pachhunga te nupa felzia, thil phalzia leh Pathiana an nun an nghah nghehzia kha anmahni hretu te’n an sawi zin ber a ni hial ang; an hausak thu aiin an chanchinah a lang zing zawk.  Mi chumchhia, mahnia ei leh bar zawng thei lo, kut tual leichham kan tih ang thleng te khan an khawi dur dur ṭhin a, retheih phah a hnêkin an hausakna a pung tulh tulh a. Pathian nghen chhan tlata nung te hi chu Lalpa’n mal a sawm zel mai.

Tuna Marova in hmalam dâwr chin zawng hi Mizoram a concrete in sak hmasa ber a ni. Ram buai hma 1960
bawr vel emaw a ding tawh a ni a. Rambuai 1966-ah pawh khan a kâng ve lo va, a ruh ruang chu a ding reng bik a ni. Sawi tur a tam em em mai a, mahse duh tawk mai i la.

A pa Robert Liantluanga kha mi nunṭha leh zaidam, Zoram mi hausa ber fapa ni si, nun tlawm ber mai a a nung leh a kawm nuam lutuk te kha, a bêl chiang te chuan chhun zanin an thlah thei lo anih ber kha! A ṭhat hunlaiin khawvel midangte angin nun a chên ve naa, a hun tawp lamah erawh chuan Lalpa’n a kuangkuah ta tlat anih kha. 

A nun  pumpui mai chu Pathian tana hlanin, a thihni thlengin a Lalpa tana a theih ang tawk tak meuh, a neih zawng zawng nen a pe ta te kha tu nge theihnghilh mai thei ang. Marova ruang awm ni a a chanchin ziahnaah tlem azawng chauh chu a chuan ve kha. “Mi tupawh Kristaa an awm chuan thilsiam thar an lo ni a, thil hlui te chu an ral a, ngai teh, an lo thar ta” (II Korth 5:17)

Pathian hnenah Amah nena inpawl tura nun te hlana mahnia thinlung te tidanglam ngawt thei tu nge awm? Kan thil tih ṭhat te hriaa mahni in rinchhan ngawt thei lah kan awm hek lo. Amaherawhchu, kan nunah Pathian chu a cheng ve tak meuh em tih erawh chu mihring nun chhungril aṭanga rawn irhchhuak khan kan ṭawngkam chhuakah leh kan nunah te a hril thei chauh a lo ni. 

Zir tlak nun : Marova hian a thlahtu te nun chu rawn phawk chhuakin an hniak hnung rawn rap ve zelin a hun tawp thleng a hmang ve ta! Marova hian a hringnun zawh chhung khan a nunah paltlang a ngah em avangin amahah hian zir tur tam tak min hnutchhiah a ni. Keimahni ang bawkin kawng chhuk chho a zawh ve nasa em em a, amaherawhchu, chuti maia boral tur chuan Lalpa’n a phal lo tih a chiang. Kan chhungril nun te hi asin Lalpa’n a lo enthlak kiau ṭhin chu.  A tana ṭha ber tur ni a a hriat a Lalpa, Isua Krista vuan tlat a nun neih a thlang ta erawh kha chu a ti fuhin chatuan atana hrehawmna tuar leh tawh ngai lo turin a rinchhan Lal Isua Krista ah a nun pumpui chu humhimin a awm ta. Lalpa chu fakin awm rawh se! “Lei pangpar hi a chuai si ṭhin, ka Lalpa chauh a mawi ka ti..” A kalsan tak a chhungte tan I ṭawngṭai sak ang u, a bik takin a fate tuisik mai la ni te hi. 

A thil tih ṭhat leh  ngaihtuahna ṭha a lo sen tawh zawng zawngte hi keini Dawrpui Veng mite thinlungah leh an chunga ṭhat a lo chhuah tawhnate hnenah chuan kumkhuain a dai tawh lovang.