TV. LALHMACHHUANA (KUM 26) KAN CHAN TA

Kan then tak LALHMACHHUANA hi Dt 22nd March 1982 khan Civil Hospital-ah a lo piang a, naupang duhawm tak niin anau VANLALHMANGAIHI paw’n a rin em em thin a ni. Kum 1986 atangin EL TEE KEE School-ah lut tanin, kum 1997-ah Model School atangin Matric a passed a, Johnson College-ah pawl 12 a zir leh a ni. August 2005 atang khan M.L. Motor Works, Kulikawnah Manager hna a thih thleng hian a thawk a ni.
A hna thawhna hmunah hian riah chilhin mahni vengah pawh duh angin hun a hmang thei lo va, M.L. Motor Works neitupa Joseph-a hian unau anga enin a damloh chhung pawhin theihtawpin a enkawl a ni.
A mize tlangpui
Ahmachhuana hi thiante tana mi inpe zo tak, a thiante leh lainate tana neih ui lo mi a ni a. Thiante thu awih thei tak a nih thin avangin a thiante pawh in a bul a awm nuam an ti thin a ni. Thian siam thiam tak a nih avangin a thihni thleng pawh in a thian ten an ui thu an sawi bang thei lo ani.
A nat dan tlangpui
August thla chawhnu lam atang khan a pum lam a sawisel a, doctor-te pawh rawnin mahse that lam a pan thei meuh lova, November ni 19 atang khan a khua asik tan ta zeuh zeuh. Nov. ni 27 khan doctor rawn lehin damdawia an lo chawh a, tichuan December ni 4-a in check up leh turin an lo hrilh a.
Amaherawhchu Dec ni 1 zanah chuan chau thutin unconcious-in a awm ta mai a, Civil Hospital Casualty pan pui a ni a, drip-te khaiin amah pawh a lo harhchhuak leh a, khum ruak a awm mai loh avangin in lama in enkawl turin an haw leh a. In lama an haw hnu reiloteah chuan a kaih ta vak mai a, hmanhmawh takin Nazareth Hospital, Ramhlun ‘N’ pan pui leh nghal a ni a. Doctor-te’n theihtawp chhuaha lo enkawlin nimahsela nizan (3rd Dec.’08) dar 11:35 khan Meningitis natnain chatuan ram min lo pansan ta ani.