I inti thianghlim ang u

- Vanhmingliana (Taua)

Thianghlimna kawngah hian kan Veng-Dawrpui hi lawmman lâk chu a har ngawt ang. Zoram puma ‘Kei ka ni, hengte hi ka thil neihte chu an ni’ ti zawng zawng deuh thawte hian an phur lutin an phur chhuak a.A duhin an duh tawhloh an hnutchhiah ringawt a, tlema alo fel deuhten polythene-ah dahin kan vantlang bawlhhlawh bawm hunah an dah khat ṭun a, bawlhhlawh motor-a paih peih silovin. A hahthlak hle mai! Chuti chung pawha veng enkawl fai lawmman kan han dawngte kha, veng enkawltu leh neitute hmalakna ṭha ani tih loh rual ani lo.

MLA bialtu, Local Council -te hma laknain kan vengchhung pawh a thianghlimin a mawi sawt hle e. Dawrpui tlâk lam phei chu a hrehawm ber ṭhin kha a nuam ta ber emaw ni chu aw tih mai turin a faiin a en a nuam hle mai. Nimahsela, a mipui chengte leh kawng kal velte hian zir tur kan la ngah hle mai thung.

Tuihawk luankawr awm lovin kawng a ṭha rei thei silo va. A awm lahin bawlhhlawh paihna emaw kan ti mai zel a. Luikawra saidawium leh plastic tui bur ruak, polythene paihte chuan tui kal tur a dang kh^wm a, bawlhhlawh
luang ral tur chu hnawmhne leh bawlhhlawh rimchhia a chang ta ringawt mai a, chutiang lehzel rawn thenfai chu veng enkawltute hna a ni thei zo zai tawh lo. Kan ram, kan vengte hi keimahni chenna kan ta ngei anihzia hre tharin “Intih thianghlimna” kawngah hian ṭan i la lehzual teh ang u.
I kawt i phiat faiin, mahse i bawlhhlawh kha rut lovin lui kawrah i paih thla lai ngei mit a hmutu che ka ni a, i hming chu ka sawi sak lo mai ang che. Ka ngaihtuahna  a ti thuiin faina kawng inzirtir hi kan va la ngai em tih min ngaihtuah tir nasa.

Mi \henkhat chu bawlhhlawh motor chang chhuak peihlo, mi hmuhloh laia Local Council-ten bawlhhlawh mi kawng kalten an sweet kawr leh an sikret bawm ruak khawlai chara paih lova an lo paihna mai remchang tur atana an dah, bawlhhlawh bawm pawlah i in leh dawr bungrua ilo hnawh khat leh vek \hin a ni tih hriat a ni a. Hetiang thil tenawm tak chingtute hi veh mek in ni a, man chhuah in nih hunah chuan zahthlak taka siam in ni dawn a ni tih lo hria ang che. Mi tlawmngai ten ni tinin motor-ah an paih \hin a, hlawh nei leh hming\hat pawh hlawh chuang lovin, nangin i thatchhiat vanga nawmsak nana ilo hmanna hi a rei vak thei lovang, lo fimkhur tawh ang che, man chhuah i nih hunah chuan i rin ai daihin a pawi ang.

Khawvela khawpui thianghlim kan tihte pawh hi a thianfaitute fel em vang chu ni bawk mah se, a mawh latu berte chu mipui chengte an ni. Bal leh bawlhhlawh hi a hrisel lova, kan hnam leh khua leh tui te hian i ching ve lo teh ang u tih rilru putna mai te khan ram ropui tak a siam \hin. Hawh u! Mizote hian thianghlimna leh faina hi Kristian nun diktak a ni tih leh Lal Isua hming chawina a ni tih hi hre tharin, zan lama kan zu inna tui leh um ruakte hi kawngah i paih mai mai tawh lo teh ang u. Kristiante hi mi entawn tur model ni turin i in phochhuak teh ang u.