Khawtlang Inlungrualna

- Rev. Lalramchhana (RC-a)

"Mizo Khawtlang Inrelbawl Dan: Hmanlai leh Tunlai” tih article internet-ah ka chhiar fuh a, a ziaktu chu Lallianchhunga, MZU a ni a, a ngaihnawmin a bengvarthlak khawp mai. Hetah hian a thuziak han sawichhawn ka tum hran lo va, mahse a thuziak tawp lama a sawi hi han sawi zui a ṭhain ka hria a, tawite han ziak ila a ṭha awm e. Hmanlai aṭanga tunlai  thlenga “Mizo khawtlang hruaitute lung ti leng a, an awmna khua/veng ṭheuha an kenkawh reng tura an duh ber a awm a, chu chu ‘khawtlang inlungrualna hi a ni kan ti thei awm e.” He thu tak hi han sawi zui chakawm ka tih chu a ni. 

Khawpuiah kan awm a, mi chi hrang hrang kan fuan khawm a, mahni veng/khua tih dan chi hrang hrang kan chhawm lo thei lo va. Zawhna lian tak nia ka hriat tak chu, tun laia kan khawtlang hruaitute hian khi article-in a sawi ang khi an lung ti lengtu leh kenkawh an duh ber a ni zel em? Kan rorelna hian khawtlang inlungrualna lam a hawi reng em? 

Hetia kan sawi avang hian chu chu a fuhlo kan ti a ni lo va, kan khawtlang hruaitute hian hmanlai aṭanga an dah pawimawh leh vawn nun zel hi ngaipawimawha vawng nung zel turin kan duh tihna a ni zawk a. Tunlaiah chuan
mihring kan ṭhahnem ta deuha, hruaitute zingah pawh mahni laina hnai leh ṭhian hnaite hriat bik leh duhsak bik a awm thei hle dawn tih kan hre ṭheuh awm e. Amaherawhchu, hetiang anga khawtlang hruaituten duhsak bik an nei anga sawi theihna hmun chu chenna nuam a ni ngai lo.

Hmanlaia Mizo lalten ro an rel lai pawha khaw nuam an tih reng reng chu Lal duhsak bik nei lova fel taka roreltu nei an ni ṭhin ang; tunlaiah pawh ram nuam leh khawtlang nuam ni tur chuan thlei bik nei lova dik taka rorel khawl neih a ngai a ni. Khawtlang hruaina kawngah mimal duhdan kan dah pawimawh thiang lo va, mipui duhdan a lal zawk tur a ni. Chuvanga rorel ṭhin kan ni reng a ni. 

Khawtlang hruaitu, a bikin tlawmngai pawl hruaitu thlan chungchangah pawh mi tlemte an duh zawng line-up siam ching te an lo chhuak ta zel hi zahna chang hriat a ṭha awm e, politics lam chu thuhran. Mi pahnih khat inthurualin hruaitu atana thlan turte kan lo duang lawk ve a, campaign pui tih thawmte a rik tawh phei hi chuan “Khawtlang Inlungrualna” tih hi chu a hla hle tawh a ni tih hriat a pawimawh hle mai. Chutiang anga a khelha khel chhuak hruaitu chuan a tira kan zawhna khi an chhang fuh thei ngai lo ang. 

Mimalin duhzawng chu kan nei ṭheuh mai, mahse pawng lak tuma hruaitu inthlanna hmachhawn hi chu a mawi lo va, kan hnam nihphung nen pawh a inmil lo tih hria ang u. Hmanlai aṭanga kan lo chin tawh leh kan ngaih-pawimawh “Khawtlang Inlungrual” ni tur chuan hruaitu kan thlan dan hi a felfai hle a ngai a ni tih chu MLA inthlan hian min zirtir chiang >m >m lo em ni le? Mahni bak ngaihpawimawh tawh mang lohna khawvelah hian cheng mahila, kan khawtlang inkaihhruaina hi ṭha takin a la kalpui theih reng a, chutiang ang taka kalpui thei tur chuan hruaitute huaisen a ngai. Thu ṭha deuh deuh sawi ringawt lo va, a tak taka khawtlang inlungrualna duha chêt lâk hi mawhphurhna sâng tak a ni a, ṭan a ngai takzet a ni.

(Pu Ramchhana (RC-a) hi Pu Lalhmingliana, Bara Bazar fapa niin tunah (2018) hian nupui fanaute nen Bangalore-ah awmin, PhD (New Testament) a zir leh mek a, Bangalore Mizo Association chanchibu ‘BMA AW’-ah Editor a ni mek bawk a ni)