Chaw ei

Dr.Thangchungnunga, M.S.(Ortho)

Mizo te hi tun hma atang tawh in kan hmuh ang ang, a hunlai ami  chaw leh chawhmeh kan ei a ni ber a. Kan hriat ve phak chinah pawh, tunlaia an sawi, balanced diet, chaw tha hi kan rilruah a la awm lem lo. Chutih rualin kan dam khawchhuak ve zel chu a ni mai a. Mahse tunlaia kan hriat thiam tawh loh, Mit malh (night blindness) te kha kan awm nual mai reng a. Zun leh ek thiarna tha a la awm bawk lo nen, rulhut sei chi (Ascariasis) pai lo leh e chhuak lo aram kan awm meuh lo a la nih kha. Kan taksa pawh a te in a tawi a, mawng
bathlar a hniam a. Khang hunlaia ei leh in a la harsat, a la tlem em em lai, kan thar chhuah tlem tlem bak, sa phei chu kar khatah pawh talh loh tum a awm lai te kh a la ni a. Duh tawk a krismas a sa ei teuh kha kan nghakhlel thin a ni.

Tunah chuan, thenawm ram changkang zawk te ang in ei tur tha, leh inchawhpawlh tawk, vitamin tha leh kim telna tih te kan hre ta teuh mai a. A pawimawh ber chu, chaw kan ei hian, puar khat chin hi a awm ve a. Hemi hunah hian , ei tawp tum hram ila, puar luah a, ei zawm leh hi, kan dulkiar na hmahruaitu pakhat a ni. Chhunah pangngai tak ei leh a, tlai dar thum vel a thingpui leh chhang ilo ei leh a, zanriah mumal taka ei leh hi a tha ber a. Heng kan sawi hun hrang hrang inkarah hian thil dang nepnawi leh ei neuh neuh nei lo hram ila, hei ber hi kan pum ti tha lo tu a ni thin.

Tunlaiah, thil ei tur, damlo, BP sang, Zunthlum, ruhseh, gout leh mi pangngai tan a balanced diet ei tur min hrilh tur Dietitian an awm teuh tawh a. Civil Hospital-ah an awm reng a ni. Mahni hriselna ngai pawimawh chuan rawn mai tur an ni. Zun thlum chhungkua te, BP sang chhung kua te, cancer chhungkua te, ruhseh chhungkua te hian ei leh ei loh tur tam tak a awm a. Kan fimkhur a ngai. Ka nghei theilo tih vang mai mai a, pumpuina, zunthlum, ruhseh chhuak a lo tam a. A nasat zualah doctor kan rawn leh a, damdawi in luh hial te kan ngai ta thin a. Chu vangin, kan hriselna hi a buar chuar ta em em mai a ni.

A pawimawh ber pakhat, kan in fit lo lutuk hi a ni. Tunah chuan Gym leh exercise tha leh tih kan uar tan a, a ziaawm ve ta deuh chu a ang. A pawi ber chu, chaw leh sa, vawksa thau, arsa leh thlai chi hrang hrang leh thei te kan ei teuh a. Chaw eikhamah, thutthlenga mu chungin kuhva ei a, vaihlozial zu chungin kan han awm hi chu hrisel harsa tak a ni. Ei tur kan nei tha tan tawh a, a tawk a ei dan leh thlai leh thei ei tur hriat a, ei teuh aiin a chikim a ei hi a hrisel zawk tih te pawh hriat a tha.

Tunhma in kan ei tur nei lo lutuk kha kan hrisel lova. Tunah kan nei tam leh a, kan ei leh lutuk a, kan hrisel loh phah leh ta si a. A awmzia ber chu tunhma a kan changkan loh ang tho khan tunah pawh kan changkang ta chuang lo a ni ber. Chaw, vawi lehkhat a ei teuh mai hi chu kan ngeih lo a ni tih hre thin ang u. Balanced diet, chaw in chawh pawlh kim ei hram hram i tum ang u.