Nuna rochun thil

- Vanhmingliana (Taua)

“Leia sûlrûl leh tuiêkin a ei chhiatnaah, rûkruten an reh pawha an rûknaah hian

in tan ro te khâwl khawm suh u” Matt 6:19.

Lal Isua Krista thusawi hi han ngaihtuah vang vang ila a sawi tum awmzia tak hi ‘Khawvel hi hmangaih suh u’ ti te pawhin kan dah thei tho mai thei. A thil sawi hi a ril lutuk a kan chhiar zawh rual rualin kan theihnghilh leh nghal \hin, duhamnaa khat khawvela cheng kan nih miau avangin.

Amah Lal Isua ngei kha a thihin thil hlu engmah a hnuchhiah lova. A kawr haklai neih ang chhun chhun kha kraws bula sipai \hu te khan an insem vel a! Isua’n engnge rochun thil min hnuchhiah? Thurochhiah, bank account, in leh ram, engmah! Mahse thil ropui ber zawk “Nunna”, sawi hleih theih loh khawp a nun thianghlim,
mahni inphatna leh hmasialna tel miah lo nun leh Pa duhzawng tipuitling tura thuawihna nun min hnuchhiah a. A tawp berah chuan chhandam kan nih ve theihna tura kan aia min thihsakna, chu aia ropui chu engnge awm chuang le! Chu ngei chu min hnuchhiah a tum, a tih puitlin tak chu a ni. 

Mahatma Gandhi pawh khan thil hlu engmah hnuchhiah a nei lo. Vawthlep (Sandal), a chaw eina thlêng leh a tarmit; chu bak engmah thil (material) hnuchhiah a neih an hre lo. England a Dân zir, Sap ho incheia nalh taka inchei ve, court a roreltu ropui, Prime Minister, Lal te hmaa rorel a ding ve si chu pawisa nei miah lo leh ama tahchawp puan (khadi) nen chauh he khawvel a chhuahsan ta anih kha! Nimahsela, Gandhi-a hian rochun thil a thihsan ve thung erawh chu ‘Hnam Zalenna’ (Free Nation), India ram zalenna a ni. 

Tharum thawhna tel lovin, loneitu rethei tè tè te nen insuihkhawmin ram ni tla seng lova roreltu British Sawrkar an hneh thei tlat mai. He thu a chhar chhuahna pawh hi Tlanga Isuan thu a sawi hmanrua chiah kha a hmang ve a ni; chu ngei chu Gandhi-a zalenna sual chhuah dan chu a ni.

Vawiina thi tur ni ta ila, engnge ni nuna rochun thil (legacy) ka hnuchhiah ve tur chu ni ang le? Kan hmangaih te thil hnuchhiah chu a \ha alawm, a bik takin keimahnia innghat ve ngawih ngawih te chu, a \hain a pawimawh hle mai. Nimahsela, chung thil te chu ka kalsana ka hnuchhawn mai tur thil te an ni si!

Khawvel, ka ram, ka khua leh tui, ka chhungkua te’n a min hriat ve reng na tur eng thil nge ka hnuchhiah ve tak ang le? Sûlrûl leh thîmin a ei chhiat leh mai tur thil hnuchhiah ai chuan chatuan a ro chhe thei tawh lo awmnaa ro khawl khawm tu nih chu a hlu fê zawk dawn lawm ni! He khawvelah ngei pawh hian chhuan dang lo awm zel te’n a an neih tur ro khawlkhawm tu nih chu a hlu hle zawk ang. Kan thih veleh a mi anchhia leh kamchhe tleuhna, a tawp a nun tam tak chân tu ni bawk Juda Iskariota chan ang changtu nih chu vanduaina tawpkhawk a ni mai lo maw? I in ngaihtuah chiang teh ang u.