Intuaitharna Hun Hman A Ni

Central YMA buatsaihin 7th February (Inrinni) khan Chanmari YMA Hall-ah Aizawl khawpui chhunga veng hrang hrang YMA hruaitute leh CEC member leh CYMA hnuaia Committee peng hrang hrang a chanvo neitute chuan Central YMA president Pu J.H Zoremthanga kaihhruaina in in tuaitharna neih a ni, kumin a YMA thupui thlan ‘Khawtlang nun siamthat’ tih leh ‘Mizo nunze mawi’ tih thupui te zirho a ni.

‘Khawtlang nun siamthat’ tih thupui hnuaiah hian chhungkaw nun, khua leh tui tha, zu leh ruihhlo chungchang, mipat hmeichhiatna hman khawloh leh pawngsual chungchang, kohhran, sorkar leh tlawmngai pawl dangte zah leh pawisak chungchangte zirho a ni a.

‘Mizo nun zemawi’ tih thupuiah hian chhiatni thatni, tlawmngaihna, rinawmna, taimakna leh intodelhna, mahni inthunun, sual huat leh dan pawisak, induhsak tawn leh aia upa zah, zunram thiar leh zuk leh hmuam te bakah, pianphunga rualbanlo chungchangte sawiho a ni bawk.

‘Mizo nun zemawi’ tih thupuiah hian Pu K.Sapdanga’n paper a present a; ‘Khawtlang nun siamthat’ tih thupui ah hian CYMA Vice president Pu Lalchungnunga’n thu a sawi a. Management lam thiam bik, Pu Rinzuala leh Social Works lama mithiam Pu Henry Zodinliana Pachuau ten YMA kal zel dan tur leh thawhhona kawnga thil pawimawhte sawiin paper an present bawk.

Nikuma YMA General Conference in a lo rel tawh angin, kumin hian YMA chuan kumpuan bik kan nei lo a, Mahse YMA Branch tinte bawhzui atan ; Khawtlang nun siamthat’ leh, Mizo nun zemawi’ tih thupui a thlang a. Heng thupuite hi inang tlanga branch hrang hrangte’n an bawhzui theih nan zirhona hi neih a ni.