VC THLAN TURAH HIAN NGAIHTUAHNA I HMANG ANG U

Kan hriat angin February 24, 2009 hian khawtlang hruaitu tur, Village Council member thlanna kan hmachhawn dawn a ni a, Dawrpui mipuite hian Veng rilru pu chung leh party politics dah tha in, Dawrpui khawtlang hruaitu atana Mi taima, Mi Rinawm, Mi Dik, Veng mi nihna a chiang i ngaihtuah ang u.

Dawrpui Veng hi faina leh thianghlimna kawngah te leh kawng tinrengah Mizoram hmel lanna, ramdang mi (foreigner) thleng pawha an kalpelh ngei ngei a ni a, kan drainage system mumalloh zia leh kan bawlhhlawh paihna tenawmzia, khawpui a tih tawp dan te leh veng hrang hrang atanga dawr luahte leh chawhmeh zuar bawlhhlawh chitin paihkhawmna a nihzia kan hre theuh awm e. Tun kan tawng an huatthu suhah, veng tlabirh zawka kan ngaihte, an tuihawk luankawr felfai zia hmuhte hian rualawh a na thin.

Tin, kan thalai talent nei tha tak takte tana han chhenfak tur leh hunawl hmanna tur, infiamna kawngah te hmalak a tul zia hriaa, heng thleng pawha thalaite dinhmun chepzia hriaa, rilru zau tak leh ngaihtuahna changkang tak hmang mi kan va mamawh em.

Hetih mek lai hian Sorkar lamin MUNICIPAL din turin chak takin hma a la mek zel a, tuna kan VC thlan tur pawh hi kum khat pawh an ding hman ang em? tih karah kan inthlang dawn a ni. Sorkar ruahman dan chuan Aizawl khawpui chhung hi zone 10 ah thenin, Assembly Constituency angin then tum a ni, keini Dawrpui hi 14 Aizawl East II hnuaia awm tur kan nih hmel a, heng Municipal kan neih tur thleng hian tun kan VC thlanah hian Dawrpui aiawh zo, Aizawl East II atan pawha thehchhuah ve tur kan ngaihtuah thlen te hi a va tul em! Khawpui changkan ang zela rilru zau leh ngaihtuahna hmang mi kan mamawh dawn takmeuh a ni.

Dawrpui Veng hi tunhma chuan khawtlang leh kohhran ang thleng pawha nihna a buai ngailo, kei kei tih aia, nang nang inti thin veng, rilru verther pu ngailo leh politics ah ngat phei chuan party nihna la na lo mi, neutral awmkhawmna veng tih a ni thin, kan VC/YMA hruaitu hmasahote an ngaihawmin rilruah an cham reng mai. Mahse, eng kan ti ta nge, hun engemawlai atang khan thu sepsel te te, mimal inbeihna ang chi, chanchinbu leh local TV (fakselna, ka vei zawng) tih ang chi ah te insawisel kan chingin, Dawrpui chanchin a lang, alang ta mai hi Dawrpui Veng neitu inti tan chuan a zahthlakin, veng tan a mualphothlak a ni.
Tun kan VC thlan turah pawh hian vengdang mi hian, kan vengchhung chanchin hi an rawn sawiselin min rawn vei em em tur pawh niin a langlo, chuvangin, mimal tin hi i inbih chiang ang u, mi chanchin a chhe zawnga sawi sawi ai chuan mi thatna sawi ching mi nih hi Kristian te tihtur diktak a ni.

Kan ram hian, Kohhran, Ram, Khawtlang roreltu tur atan hian Pathian chhungte atanga kan tan hi a hun tawh takmeuh meuh lo maw?