YMA hruaitu Inhlantharna leh Infuihtharna

Branch YMA Executive Committee in a lo rel tawh angin kumin 2009 chhunga Dawrpui Branch YMA a mawhphurhna hrang hrang neite inhlantharna leh infuihtharna hun chu February 19, 2009 (Ningani) zan dar 7:30 khan Dawrpui School Hall-ah neih a ni. Inhlantharna leh infuihtharna hun Dawrpui Branch YMA President, Pu Chhawnkima Pachuau in kaihhruaiin Secretary, Pu Vanlalbika’n hun hman dan turte leh report tul angte a pek hnuin Rev. H. Zalawma’n mawhphurhna hrang hrang neitute Pathian hnena hlanna hun a hmang.

Dawrpui Branch YMA Senior Adviser, Pu Lalhmingliana’n kawng hrang hranga YMA member-te tihturte sawiin fuihna thu tha tak a sawi a, Dawrpui Branch YMA Finance Secretary, Pu Lalrammuana’n YMA kal zelna tura thil tul leh tangkaite a sawi a, member kalkhawm ten ngaihdan hrang hrang an thawhkhawm bawk a, suggestion box hun niin member engemawzatin an ngaihdan an ziakte an thlak bawk.

Dawrpui Branch YMA Asst. Secretary, Pu VR Hmachhuana’n inchhiarna hun a hmang a, member kal thate hnenah Dawrpui Branch YMA Senior Adviser, Pu K. Liantuala’n lawmman a sem. Vanapa Section-te kal tha berin Chawngbawla Section-in an dawt a, Taitesena section-te pathumna an ni.