Climate change

- Dr.Thangchungnunga, M.S.Ortho

Tunlai, thlasik leh ṭhal inṭhen tur lai hi boruak a danglam nasat lai ani a. Damlo pawh an zual leh an thih duh hunlai, ruhseh leh na, chi hrang hrang a tam hunlai tak ani. Hritlang leh kawṭhalo chen in, engkim mai hian a ngeih lo ani ber e.

A nawlpuia kan hriat tur chu, hunpui inthlak hrim hrim, thlasik leh ṭhal, ṭhal leh fur, fur leh favang, amah ngawt ngawt hi a hua ani lova, a inṭhen fel hma, chhun lam a lum tawh si, zan lam a thlasik rawng la kai si hi kan taksain a huat ber lai ani tih hriat tur.

Ruhseh nei tan phei chuan a zual duh em em a, a zual bakah na dang a siam belh chiam ṭhin. Tunlai kan boruak hrim hrim hi kum 1980 hmalam nena khaikhin chuan a danglam
nasa lutuk tawh a, kan taksa pawh hian in adjust zung zung a har a ti ve ani.

Tunhma, 1980’s chho vel khan veng pakhata pitar chu ruah a sur dawn chuan a khup ana lawk ṭhin a. Khanglai chuan tui chawi te a la ngai a. Khami kum kher kher kha chuan khua a ṭhal rei em em kum a lo ni bawk nen, tlangval tui chawi tur kal hian, “Ka pi, i khup a na tawh em?”, an ti ziah a. A na ta rih si lo a, tuk khat chu a na ta hlauh mai a. Tlangval ho chuan a tukah ruah a sur tawh dawn tih an hria a. Pitar khupna lawmna ni lo mahse a khupna an lawm lutuk chuan thingpui leh chhangin an lawm a ni. Nâ inlawmpui hmasa ber pawh ani mahna!

Hetiang hunpui inthlak reng reng hi, tlang hri leng pawh a zual hun ani tih hriat a ṭha. Fur dawnah phei chuan tui in tur te, ei leh in te fimkhur lehzual a ṭha. Kawng sir, tuihawk luankawr bul a thei den leh ei mai theih, a hminga puana an khuh ve nin nian te hi ei mai mai loh a ṭha. Mizo te hi vir ang reng tak, kut bal niau nuau chung a kuhva leh thil han ei leh mai ṭhin kan ni a. Hei tak hi kan sim a kut silfai leh ei leh in tih thianghlim zir a ṭha. Tunah phei chuan kalna  sirah thir (railing) an siam a, heng te hi zut zui zui loh tur, natna tam tak i kai phah ang tih hria ang che.