Dawrpui hi kan tu leh fate chenna tlakah i siam ang

- Vanlalbika, Vice Chairman

Y.M.A. Kumpuan Committee 2017

Ruihhlo do chungchang hi Y.M.A. ang chuan hma kan la nasa em em a, YMA kumpuanah pawh vawiduailo kan lo puang tawh a ni. Zu leh ruihhlo hi ram leh hnam tlukchhiatna, mimal leh chhungkua zahawmna tichhetu leh ti tlarantu, khawtlang nun ti khawlo tu, tiraltitu leh thihna hial thlentu a ni. Chuvangin kan hnam tluchhe tur veng tur hian kan do zel a ngai ani.

Kan ramah ruihhloin bu a khuar nasa em em a, chhinchhiah dan chuan kum 1984 aṭanga kumin April thleng khan damdawi hmansual avanga ṭhalai thi hi Excise Department chhinchhiah danin mi 13000 chuang an tling tawh a, tam tham tak an ni, nikum khan ruihhlo avanga thi chu mi 58 lai an tling leh tawh bawk a ni. Kum 12 chhunga an tam ber kum kan tawng leh ta! 

Kan veng hi hmasang aṭang tawhin zu leh ruihhlo hian min chim nasa em em a, Branch Y.M.A. ang pawhin hma
nasa tak kan la ṭhin, zu leh ruihhlo atam chuan khawtlang a ralmuang lova, sualna chi hrang hrang rukrukna thlengin a hluar a ni. Kum hmasa lamahte kan hriat angin kan vengah Joint Operation Duty leh YMA Joint Duty-te veng ṭhenawmte nen ṭangrualin kan nei a, heng avang hian kan vengah pawh sualna lo pung zel turte hmehmihin a awm a, kan veng pawh a nuam em em a ni, engemaw rokhawlhna avangin heng Joint Duty-te hi chawlh lailawk hrih a ni a, kuminah Branch Y.M.A. hmalakna bawkin Khawtlang Duty kan veng Welfare hrang hrangte nen kalpui leh mek a ni. Tuna kan duty kan kalpui mekte hi khawtlang mi kan nih chuan kan telvena vek tur a ni a, duty tur hian tumah ruat bik kan awm lova khawtlang a lo ralmuannan mahni hna ṭul kalsanin mahni inlum chhuahsanin duty turin ke an pen chhuak zawk a ni. 

Zu leh ruihhlo do hi thuneitute kutah chauh kan dah chuan kan tu leh faten min la rawn dem lutuk palh ange, YMA hruaitu kan nih chuan ruihhlo kan do ngam tur a ni. Tuna kan YMA hruaitute hi chu ruihhlo dona kawngah chuan an ṭha em em a, member-te hian an hnung kan zui zel tur a ni, hruaitute kutah chauh tihtura kan dah chuan thil fello tak a ni thung ang, duty tur hian tumah hman bik an awm lova, tuman nuam an ti bik lo mahse kan khawtlangin a mamawh em avangin khawtlang chhanchhuak turin ke an pen chhuak zawk mai a ni. Edmund Burke chuan “Sual punlun chhan chu miṭhaten engmah an tih duh loh vang a ni” a ti tawp ami a ni. Chuvangin Dawrpui YMA member-te kan ram leh hnam hmelma  ruihhlo do tur hian kan insawm thar leh a ni e. Dawrpui hi kan tu leh fate chenna tlakah i siam ang u.

A tawp berah chuan midangin kan ram hi min siam ṭhat sak dawn lova, YMA chak lohna veng leh khua a nuam ngai lo an tih ṭhin angin Mizoram neitu YMA-ten theihtawp i chhuah zel ang u.