Minister-te nen Lawmthusawi chawhlui kilho

Kum 3 vel ruahman a nih  hnuah Dawrpui Multipurpose Centre kan neih avanga lawmthu sawina chawhlui chu ni 5.3.2018(Thawhṭanni) tlai khan Jt. Committee buatsaihnain neih a ni a. Hon’ble Chief Minister Pu Lalthanhawla te nupa, Pu R. Lalzirliana, Home Minister, Pu Lalsawta, Fin. Minister leh Pu Zodintluanga, UD&PA Minister -te sawm an nih angin an lo tel thei a. An chungah Dawrpui Khawtlang Hruaitute Joint Committee an lawm hle.  Pi Zosangzuali, Chairman, Local Council-in a kaihruai a, sawrkar duhsakna dawnga khawtlangin kan mamawh em em Multipurpose Centre changkang tak mai kan nei tur chu Dawrpui khawtlang tan leh zoram pum tan thil
lawmawm tak a nih thu sawiin a lawmna pawh khawtlang huapa la buatsaih ngei anih tur thu a sawi. 

Pu Lalrammuana, Chairman, Dawrpui Multipurpose Managing Board pawhin report pe in Dawrpui Multipurpose Centre nei tura khawtlangin hma a lak dan sawiin, hun harsa tak te pawh paltlang anih thu a sawi a. Sawrkar duhsakna leh malsawmna Dawrpui khawtlangin a dawn chungchangah Sawrkar hotute chungah uar takin lawmthu a sawi .  Mi sawmte hian thu an sawi vek a. Pu Lalthanhawla chuan, "Keini te, Pu Sawta te hi chu vawiin thlenga la inti Dawrpui em em kan ni a. In ngaih aiin kan la inti Dawrpui a; Multipurpose awm theih nan hian a theih dan kawng te kan dap a, tuna Millennium Centre hi kan ruahman dan nen khan a inpersan ta deuh a, hetiang ang hi kan mamawh em a ni. Dawrpuiin lawmthu sawi nachang in hria hi in fing a, in ti ṭha hle a ni,"  a ti a. A hun laia Health Minister, Pu Lalrinliana Sailo hmalakna fakawm a tih thu a sawi bawk.

Pu Lalsawta, bialtu MLA (Minister) pawhin inti neitu taka thusawiin, “Sorkar a din phat aṭangin CM zahawm tak in Multipurpose Centre siam hi tihpuitlin ngei a tum thu sawiin, Land lease siam turin a changtu Minister-in tih tur ṭul apiang alo ti zung zung bawk a kan lawm hle a ni” a ti. Pu R. Lalzirliana, Home Minister pawhin thu sawiin, "Multipurpose Centre bul ṭan a nih laia a changtu Minister Pu Lalrinliana Sailo khan a duhsak em em che u a, in bialtu Pu Lalsawta chungah lawm hle ula, lawmthu hrilh mawlh mawlh rawh u." a ti.

Pu Zodintluanga pawhin thu sawiin hetiang hun siam a nih avanga a lawmthu a sawi. Tuna Multipurpose Hall bul Basketball Court tura ruahman mekah hian Parking siam belh ni se tuna mi hlutna hi a belhchhah leh zual anga pawisa tam tak ngai tur a ni tawh lo bawk a, Fin. Minister in  kawng lo dappui se a duhthu a sawi. Dawrpui chhungah hian sorkar in hmasawnna tam tak a siam tawh thu a sawi bawk.

Khawtlang hruaitu LC member, YMA, MHIP, MUP OB te an kal ṭha viau a, lawmthu sawina chawhlui kilho zui a ni.