Bengkherh leh Sazu Lip

Tunlaiah chuan bengkherh hnai liai luai-te an awm ta lova. Kan nuapan lai chuan bengkherh hnai leh hnap tawlh perpur-te an tam em em a. Dul a kiar lang mai bawk a. Rulhut leh natna hrik ei bang dam chhuak kan ni ber mai. Tunah zawng a hming pawh hriattur a vang ta! Mahse, ka sawi duh chu, “Kan personal health hi duh ai chuan kan la uluk lo deuh.” Beng, hnar, kap leh a vel te inbuala tihfai uluk hi a tul hle a ni.

Tin, sazu lip tha lo hi kan la hmu hnem em em mai a, hei hi nu mawhphurhna a ni. Naute a bualin a sazu a lip fai tur a ni. Tlemte ti lip mai loin a tawp rata lip sak thin tur a ni a, a beh a awm chuan silfai sak vek tur a ni. A then chu a kua a zim lutuk a, lip thei lote an awm bawk a. Heng ang hi chu sikul an kal hma (kum 5 hma) a tih fel sak vek tur. Tette atanga sazu lip thei lo chu an len hunah an buai thin a, nupui neih ngam loh phahte pawh an awm nual mai.

Tin, lip ngailo an nih chuan a chhunga beh hian Cancer a siam thei a, sazu cancer-te pawh a hlauhawm
a ni. Chuvangin, nu leh pa (a bikin nu) in nau a bual apiangin a lip sak tur a ni. Harsatna a awm chuan Doctor rawn vat tur a ni.

Hmeichhe naupang pawh nu ten tha takin thi a neih tur thute hrilhin thi neih a inenkawl dan turte hrilh lawk a tha. Kum 2002 khan hmeichhe naupang kum 12 lek chu a tap rap mai a, rizai hnuaiah a inkhuh reng mai a, “Ka kawng a na,” a ti thin a. Ka hnenah an rawn hruai a, ka’n zawh chian chuan thi a nei a lo ni a. A nu te a lo hrilh ngam silo a, a chhan chu a awm khawloh vangah an ngai ang tih a hlau si a ni. Chaw pawh ei lo, rilru hah em em in a lo awm reng tihna a nih chu. Kan han inhrilhfiah hnu chuan a hmel pawh hmuh theihin a danglam ta a ni. Chuvangin, fanu neite chuan kum 9/10 an nih atangin heng chungchang hi fiah takin hrilhlawk vek a tha. (Thi nei naupang ber ka hriat chu kum 9 mi a ni).